Popular Bible Verses from Abhafiripi 2

Share

Motakaakora engʼana yoyonswe igho kwa kwiroterra handë kwa ikiheemere. Kasi mwihoote na okomaaha abhandë igha mbo abhantö okokera bhëënyu. Kera ömöntö, atakaaroonerra amangʼana aghaaye umwene igho hë, kasi ni-igha aroonerre kora agha abhandë.

Mobhe na enkoro eeraeera Kiristo Yëësu yaarë nayo.

Nokaanyoora igha we yaarenga na eteemo yonswe igho iya Waryobha, kasi yaarööshë igha, ti-bhuuya ukukundirrya engʼana iyö. Kasi akatigha ghonswe igho ghayö, akaisuuhya, akabha kya omoghorwa, ku bhuyö akeebhorwa aana ekesosa ikya ömöntö, akabha ömöntömöntö. Mbe, hano yaabhaayë na ekesosa ikya ömöntö, akaihoota, akaighwera Waryobha, kora akaikërrya ukukwa, uruku urwa ko-mosarabha!

Mbe, mokorenga igho, ko bhoora Waryobha we akoghera morahansha okokora ghano akutuna mokore, kora nkobhahaana arë obhotoro ubhwa okoghakora.

Ku bhuyö Waryobha yaamuryökëri, kora akamokora abhe ighörö, okokera ëbhëntö bhyonswe igho, ko okomohaana iriina rinene okokera amariina ghonswe igho, okore ëbhëntö bhyonswe igho, bhesooke iriina irya Yëësu, ibhya mu-ryobha, ibhya ko-kebhara na ibhya mu-kyaro ikya abhaku. Na kera ömöntö aikërri igha, Yëësu Kiristo we Omonene, ko okokora igho, Waryobha Taata atöönibhwinga.

Amangʼana ghonswe igho ghano mokokora, mokorenga motakwibhëmbëërya handë ukunyeerana senkaani, okore mobhe abhaana abharöngë abha Waryobha, bhano bhataana risoro. Ghwiki bhano motakoghambwa bhoghogho mo-bhantö abha reero eno, bhano bhaishora amaghogho na obhorangara. Bhëënyu momaahekane mo-bhantö bhayö, kya emerengaari gheno ghëkömërëkya ekebhara.

Mbe, abhaghonshe abhaane, enkaagha eno naarë kö-bhëënyu hayö, mwaaighweranga Waryobha. Kora bhoono enkaagha eno ndëngë hare na bhëënyu, mwëngëri okokora ghano ghaingʼarëëyi ko-bhantö bhano Waryobha yaatöörya. Mokore ghayö kwa ukurighita kono kokoreetwa na ukwobhoha Waryobha.