Abhafiripi 2
2
Ukwegha ubhwihöötu ubhwa Yëësu Kiristo
1Mbe, hano oraanyoore moraisegha mo-senkoro isyënyu igha m-bantö abha Kiristo mörë, moraröörisibhwa ku righonshe iryaye, moona öbhömwë na Umwika Ömöhörëëru, mohanshirwë na nkomaaherwa mörë amaabhë na Kiristo, 2mbe, mohekerani ukushomerwa ukwane! Mobhe na ubhwighwerrani na mohanshane bhëënyu abheene ko abheene. Mobhe ëkëntö ëkëmwë mo-senkoro isyënyu na mo-maitegherro aghëënyu. 3Motakaakora engʼana yoyonswe igho kwa kwiroterra handë kwa ikiheemere. Kasi mwihoote na okomaaha abhandë igha mbo abhantö okokera bhëënyu. 4Kera ömöntö, atakaaroonerra amangʼana aghaaye umwene igho hë, kasi ni-igha aroonerre kora agha abhandë.
5Mobhe na enkoro eeraeera Kiristo Yëësu yaarë nayo.
6Nokaanyoora igha we yaarenga na eteemo yonswe igho iya Waryobha,
kasi yaarööshë igha, ti-bhuuya ukukundirrya engʼana iyö.
7Kasi akatigha ghonswe igho ghayö,
akaisuuhya, akabha kya omoghorwa,
ku bhuyö akeebhorwa aana ekesosa ikya ömöntö,
akabha ömöntömöntö.
8Mbe, hano yaabhaayë na ekesosa ikya ömöntö,
akaihoota,
akaighwera Waryobha,
kora akaikërrya ukukwa,
uruku urwa ko-mosarabha!
9Ku bhuyö Waryobha yaamuryökëri, kora akamokora abhe ighörö, okokera ëbhëntö bhyonswe igho,
ko okomohaana iriina rinene okokera amariina ghonswe igho,
10okore ëbhëntö bhyonswe igho,
bhesooke iriina irya Yëësu,
ibhya mu-ryobha,
ibhya ko-kebhara
na ibhya mu-kyaro ikya abhaku.#2:10 Ikyaro ikya abhaku. Maaha mo-faharaasa.
11Na kera ömöntö aikërri igha, Yëësu Kiristo we Omonene,
ko okokora igho, Waryobha Taata atöönibhwinga.
Abhakumya bhabhe kya emerengaari ko-kebhara
12Mbe, abhaghonshe abhaane, enkaagha eno naarë kö-bhëënyu hayö, mwaaighweranga Waryobha. Kora bhoono enkaagha eno ndëngë hare na bhëënyu, mwëngëri okokora ghano ghaingʼarëëyi ko-bhantö bhano Waryobha yaatöörya. Mokore ghayö kwa ukurighita kono kokoreetwa na ukwobhoha Waryobha. 13Mbe, mokorenga igho, ko bhoora Waryobha we akoghera morahansha okokora ghano akutuna mokore, kora nkobhahaana arë obhotoro ubhwa okoghakora.
14Amangʼana ghonswe igho ghano mokokora, mokorenga motakwibhëmbëërya handë ukunyeerana senkaani, 15okore mobhe abhaana abharöngë abha Waryobha, bhano bhataana risoro. Ghwiki bhano motakoghambwa bhoghogho mo-bhantö abha reero eno, bhano bhaishora amaghogho na obhorangara. Bhëënyu momaahekane mo-bhantö bhayö, kya emerengaari gheno ghëkömërëkya ekebhara. 16Moghoote na okoraareka engʼana iya Waryobha eno ekobhahaana öbhöhöru ubhwa amakora ghonswe igho. Mokore igho okore nishekomaaha ikuughë urusikö roora Kiristo arikyora, ko bhoora emeremo gheno naatönirë okokora mö-bhëënyu, tighyaheta bhosa hë.
17Nenkaruusya öbhöhöru ubhwane, bhobhe kya ikimwenso ikya idivai#2:17 Ikimwenso ikya idivai. Abhasëngëri mbaaterekanga idivai na itugho eno yaakorwanga ikimwenso ebhaho. Ikimwenso ikya idivai kiyö nkyo kyaabherekerwanga igha, ikimwenso ikya ukunywebhwa. Maaha mo-ketabho ikya Okobhara 15:1-12. hamwë na umukumo ughwënyu ghono ghokokorwa ikimwenso ku-Waryobha, öni nendaashomerwe nsange hamwë na bhëënyu bhonswe igho. 18Bhëënyu bhonswe mushomerwe bhuyöbhuyö, kora mukirirri hamwë na öni.
Pauro aratoma Timoteo
19Hano Omonene Yëësu araahanshe, ndaitengʼera okotoma Timoteo aashe kö-bhëënyu iyö bhöngö hano, okore hano arikyora, antëëbhi amangʼana aghëënyu, enkoro iyaane esambaaroke. 20Ko bhoora teneena ömöntö uwöndë ono akobhaighwera bhörrö heeneheene kya Timoteo. 21Ngambirë igho, ko bhoora abhandë bho na-mangʼana aghaabho agheene ghabhatönëri, kasi amangʼana ghano Yëësu Kiristo akutuna ghakorwe, teghabhatönëri hë. 22Kasi mmomanyirë bhono Timoteo akwiyörökya igha, m-möntö uwa heene. Yaakora emeremo ighya okoraareka Amangʼana Amaiya hamwë na öni, kya omoona na suwaabho. 23Ku bhuyö nkwitengʼera ndë igha, m-böngö ndaamotome kö-bhëënyu iyö, hano ndaamanyërri amangʼana agha ekebhohe ikyane bhono gharaabhe. 24Ghwiki nkwitengʼera ndë igha, Omonene Yëësu m-böngö araangʼaane umweya niishe kö-bhëënyu iyö.
Pauro aratoma Epafurodito
25Bhoono nkomaaha ndë igha, m-buuya ntome Epafurodito kö-bhëënyu, we nu-mukumya murikyane, nkokora arë emeremo ighya Waryobha hamwë na öni. Ntoona omotono kya abhasirikare ku ukwitanera Amangʼana Amaiya. Ghwiki uyö, we mwaatömirë ku-öni, aashe ukuntighinkanera, na ököntöörrya ëbhëntö bheno bhikunsuuha. 26Mmohaayë umweya aashe kobhamaaha, ko bhoora nkwighomba arë amaahane na bhëënyu bhonswe igho. Kora ghwiki enkoro iyaaye eraighwa bhoghogho ko bhoora mwaaighwa igha m-mörööyë yaarë kobhanga. 27Obhoheene m-mörööyë umusingu yaarë. Kasi bhoono Waryobha yaamwabhera. Ti-igha nu-mwene igho Waryobha yaabhera hë, kasi kora öni wonswe yaanyabhëëyë, okore ntakaabhaabhayera bhököngʼu.
28Ku bhuyö nehanshirë bhököngʼu igha, mmotome aashe kö-bhëënyu, hano moraamomaahe ghwiki, mushomerwe, enkoro iyaane etereme. 29Umukumya murikyënyu ono uwa Omonene Yëësu, ni-igha mömösërëëni mushömëëywë bhököngʼu. Mosookenga abhantö, bhano bhanga kya ono. 30Ngambirë igho ko bhoora hake yaarë akwe, ko okoghera iya emeremo ighya Kiristo. Ghwiki yaairëëyë ebheraasi öbhöhöru ubhwaye, okore anhikiri öni ekehaheeno keno bhëënyu mwaakërrwë ukukinhikirya ko bhoora hare naarë.
Currently Selected:
Abhafiripi 2: ssc
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.