Popular Bible Verses from Jọnụ 19

Share

Manyanị a bangụ Jizọsị ọnụ, ọ nọ sị, “Ọ gụgụọ!” Ya ọ nọ bu isi kọma alị, nwụnhụn.

Omẹgụ, makẹni Jesu a marịngụọ nị ihiẹn ile k'e mẹni e mẹchanrịngụọ, ọ nọ sị, “Ẹgụn mirin rị a gụn m.” O ku okuni n'o gi ẹ mẹzu ihiẹn Ẹkụkwọ-nsọ ku.

Jesu a hụn nnẹ ẹ lẹ onyẹ nsọnmazụụn a ahụn ihiẹn ẹ a sụọ Jesu kẹ wẹ turu ebẹhụ, ọ nọ sị nnẹ ẹ, “Okpoho, hụnnị wụ nwa ị.” Ọ nọzị sị onyẹ nsọnmazụụn a ahụn, “Hụnnị wụ nnẹ i.” Ya onyẹ nsọnmazụụn a ahụn nọ gha ẹrịra weri nnẹ Jesu shi iwe ẹ, nnẹ Jesu nọ du ẹ biri.

Kanị e ru wẹ ebe Jesu rị, wẹ nọ hụn n'ọ nwụnhụngụọlẹ, ya wẹ nọlẹni kpagi ẹ ụkụ. Kanị onyẹ ohu imẹ ndị-agha hụ nọ dụn Jesu obo ẹkụnkụn, ẹdeke lẹ mirin nọ gbapụha.

Ihiẹn ndịnị mẹ kẹni Ẹkụkwọ-nsọ bụn, makẹni Ẹkụkwọ-nsọ sị, “Onwọnni ọkpụkpụ a jẹnkọ d'a kpagini.” Ẹkụkwọ-nsọ e kugụọzị a ebe ọzọ, sị, “Wẹ jẹnkọ d'a gba onyẹ hụ wẹ dụn ihiẹn ilee.”

Ọ nọ buru obe ahụn wẹ sikọ d'e gi kpọgbu ẹ buli, gha imẹ obodo ahụn pụ, shi ebe w'a kpọ “Ebe-Okpokomisi.” (“Gọgọta kẹ w'a kpọ a ọnụ Hibru, asụsụ ndị Ju.”)

Ndị-agha hụ nọ kpagiri ogun, gi ẹ kpa okpu-eze, bu ẹ che ẹ isi; ya wẹ nọ yimẹ ẹ ẹwuru okẹn-ịhịan.