Jọnụ 19

Isi Nke Mmitenẹi

1Ya Paịleti nọ weri Jesu gbu ẹ mkpịnsịn.

2Ndị-agha hụ nọ kpagiri ogun, gi ẹ kpa okpu-eze, bu ẹ che ẹ isi; ya wẹ nọ yimẹ ẹ ẹwuru okẹn-ịhịan. 3Wẹ hụ a bịa d'e kunrun ẹ, a sị, “Isi i chei, eze ndị Ju!” Wẹ hụ a fịan a ẹka.

4Paịleti nọ pụhazị, sị wẹ, “Lee ẹ, m jẹnkọ nwan d'e wepụhanị ụnụ ya, nị ụnụ marịn nị ahụnnị m njọ o mẹ!” 5Ya Jizọsị nọ pụha: o kpuhụ okpu ogun; o yihụ ẹwuru okẹn-ịhịan hụ wẹ yimẹ ẹ. Paịleti nọ sị wẹ, “Lee ni okẹnnyẹ hụ ebeni!”

6Ogẹn ndị-isi nchụn-ẹjan lẹ ndị-ọrụn Ụlọ-nsọ gi hụn a, wẹ nọ yi, “Kpọgbu ẹ! Kpọgbu ẹ!” Paịleti nọ sị wẹ, “Weri n'ẹ nwan d'e gi ẹka ụnụ kpọgbu ẹ; nị ahụnnị m eje-ihiẹn o mẹ.”

7Ndị-ndu ndị Ju nọ za, sị, “Ẹnyi e nwọnghọ Iwu. Iwu ẹnyi sị n'o furu hụn a nwụnhụnnị, makẹni o weri enwẹn ẹ n'ọ wụ Nwa Osolobuẹ.”

8Ogẹn Paịleti gi nụ hụnnị, egun nọ tụkẹnmẹd'ẹ. 9Ọ nọ shizi imẹ ọgwa a d'a jụ Jesu ajụjụ, sị a, “Elebe k'ị gha bịa?” Kanị Jesu ashịarịn'a. 10Paịleti nọ sị a, “Ị rị a gba m nkịtịn? Y'a marịn nị ihatun'i lẹ ikpọgbun'i rị m ẹka?”

11Jesu nọ sị a, “Onwọnni ihiẹn i k'a saẹka mẹ m mmanị Osolobuẹ rị elu-igwee kweri e kweri. Ya wụ, onyẹ hụ bu m che ẹka ị ka njọ e mẹ.”

12Ya kẹ Paịleti nọ mẹmẹ n'ọ hatu Jizọsị ye; kalẹ igunrun hụ nọ yi, “I hatu okẹnnyẹni ye, ya wụ y'ẹlẹ ọwụ eze-kanị wụ Siza; makẹni, onyẹ ọwụlẹ kpọ enwẹn ẹ eze rị a lụsọn Siza ọgụn!”

13Ya kẹ Paịleti nọ gi ufiri oku ndịnị wepụha Jizọsị ihun-ezi, nọdị alị elu Oche Okinkin-ikpe elu Mgbankpo w'a kpọ “Mgbankpo Ọmụma.” (“Gabata” kẹ w'a kpọ a ọnụ Hibru, asụsụ ndị Ju). 14Ụhụọhịn wẹ gi a kwademẹ Mmẹmmẹ-nghafe rọ. O rumẹgụọ ọkụrọkụ mmẹbụọ, ogẹn anwụn gi a rị isi. Ya Paịleti nọ sị ndị Ju, “Lee ni eze ụnụ!” 15Wẹ nọ yi, “Gbu ẹ! Gbu ẹ! Kpọgbu ẹ!”

Paịleti nọ sị wẹ, “Ụnụ chọ nị m kpọgbu eze ụnụ?”

Ndị-isi nchụn-ẹjan nọ sị a, “Siza, eze Rom, ịya sụọ wụ eze ẹnyi nwọn!”

16Ya Paịleti nọ we Jesu ye ndị-agha d'a kpọgbu. Ya ndị agha nọ weri Jesu.

A Kpọgbu Wẹ Jizọsị

(Mat 27.32-34; Mak 15.21-32; Luk 23.26-43)

17Ọ nọ buru obe ahụn wẹ sikọ d'e gi kpọgbu ẹ buli, gha imẹ obodo ahụn pụ, shi ebe w'a kpọ “Ebe-Okpokomisi.” (“Gọgọta kẹ w'a kpọ a ọnụ Hibru, asụsụ ndị Ju.”) 18Ya wẹ nọ nọ ebẹhụ kpọma a elu-obe; o nwọnzighọ ikẹnnyẹ ẹbụọ wẹ kpọma elu obe chen'ẹ, onyẹ ohu rị azụụnnị, onyẹ ohu rị azụụnnị, Jizọsị rị etintin wẹ. 19Paịleti nọ de ihiẹn buche elu obe hụ. Ihiẹn o de wụ, “Jesu onyẹ Nazarẹtị, eze ndị Ju.” 20Ndị bu ọda gụn a, makẹni ebahụn wẹ nọ kpọgbu Jesu nọkunmẹ imẹ obodo hụ lẹzi ni wẹ gi asụsụ ndị Ju wụ Hibru lẹ asụsụ ndị Rom lẹ asụsụ Griki alị ichẹn-ichẹn a sụ ogẹn hụ de ẹ. 21Ndị-isi nchụn-ẹjan ndị Ju nọ sị Paịleti, “Edelẹ ẹ ‘Eze ndị Ju,’ ka de ‘Okẹnnyẹni sị, “Mmẹ wụ eze ndị Ju.” ’ ” 22Paịleti nọ shịarị wẹ, “E degụọ m ihiẹn m de.”

23Ogẹn ndị-agha hụ gi kpọmagụ Jesu elu-obe, wẹ nọ kịrị ẹkwa a kebe ụzọ ẹnọ, onyẹ-onyẹ nọ weri ohu ohu. Kanị, ẹwuru tueni o yiye elu ẹ enwọn ebe wẹ nọ kwagbama a makẹni ibe ẹkwa ohu rọchanrịn, gha elu d'e ru alị, 24ya ndị-agha hụ nọ sị ibe wẹ, “Ẹnyi etikakọ n'a; nị ẹnyi tụ nkpọ: onyẹ ri ẹ, o weri.” Ya kẹ ihiẹn Ẹkụkwọ-nsọ ku nọ bụn — makẹni Ẹkụkwọ-nsọ sị,

“E keri wẹ ẹkwa m,

tụ mkpọ gi weri ẹwuru m yiye elu ẹ.”

Ya kẹ ndị-aghanị mẹ.

25Ikpoho ndịnị wuzo ẹhụ obe hụ ogẹn ahụn: Nnẹ Jesu lẹ nwẹnẹ nnẹ Jesu lẹ Meri nwunyẹ Klopasị lẹzi Meri onyẹ Magidala. 26Jesu a hụn nnẹ ẹ lẹ onyẹ nsọnmazụụn a ahụn ihiẹn ẹ a sụọ Jesu kẹ wẹ turu ebẹhụ, ọ nọ sị nnẹ ẹ, “Okpoho, hụnnị wụ nwa ị.” 27Ọ nọzị sị onyẹ nsọnmazụụn a ahụn, “Hụnnị wụ nnẹ i.” Ya onyẹ nsọnmazụụn a ahụn nọ gha ẹrịra weri nnẹ Jesu shi iwe ẹ, nnẹ Jesu nọ du ẹ biri.

Kẹ Jesu Dọn Nwụn

(Mat 27.45-56; Mak 15.33-41; Luk 23.44-49)

28Omẹgụ, makẹni Jesu a marịngụọ nị ihiẹn ile k'e mẹni e mẹchanrịngụọ, ọ nọ sị, “Ẹgụn mirin rị a gụn m.” O ku okuni n'o gi ẹ mẹzu ihiẹn Ẹkụkwọ-nsọ ku. 29Ite manya rụ-ụka jun rị ebahụn; ya wẹ nọ gi ẹru suru manya hụ, gi hisopu wẹ tigiri weshi ẹ elu, bu ẹ che ẹ ụgb'ọnụ. 30Manyanị a bangụ Jizọsị ọnụ, ọ nọ sị, “Ọ gụgụọ!” Ya ọ nọ bu isi kọma alị, nwụnhụn.

A Dụn Wẹ Jesu Obo Ẹkụnkụn

31Makẹni Ụhụọhịn Nkwademẹ Ezumikẹn rọ, ndị-ndu ndị Ju achọnị nị wẹ latọ ẹhụ#19.31 Ozun. ndị ahụn elu-obe ebẹhụ, ebe o mẹ ni Ụhụọhịn Ezumikẹn hụ lalanị arịkẹnmẹkẹ nsọ. Ya wẹ nọ sị Paịleti ya sị ndị-agha a kpagi ndị hụ wẹ kpọma elu obe ụkụ#19.31 Ọnwan kẹ wẹ gi e mẹ wẹ a nwụnkẹnrin., kẹni wẹ butu ẹhụ wẹ elu obe. 32Ya kẹ ndị-agha hụ nọ jẹnmẹ d'a kpagisọnmẹ ikẹnnyẹ ndị hụ wẹ kpọgbu wẹ lẹ Jesu ụkụ: a kpagi wẹ nke onyẹ ibuzọ, kpagizikwọ nke hụn-ẹbọ. 33Kanị e ru wẹ ebe Jesu rị, wẹ nọ hụn n'ọ nwụnhụngụọlẹ, ya wẹ nọlẹni kpagi ẹ ụkụ. 34Kanị onyẹ ohu imẹ ndị-agha hụ nọ dụn Jesu obo ẹkụnkụn, ẹdeke lẹ mirin nọ gbapụha.

35(Onyẹ hụn kẹ ihiẹnni mẹ e kugụọ a, kẹni ụnụ lẹ enwẹn ụnụ hụn ụzọ kweri. Ihiẹn o ku wụ ezioku; ọ marịnghọ nị ezioku rọ).

36Ihiẹn ndịnị mẹ kẹni Ẹkụkwọ-nsọ bụn, makẹni Ẹkụkwọ-nsọ sị, “Onwọnni ọkpụkpụ a jẹnkọ d'a kpagini#19.36 Lele Ọpụ 12.46; Ọgụ 9.12; Ẹbụ 34.20..” 37Ẹkụkwọ-nsọ e kugụọzị a ebe ọzọ, sị, “Wẹ jẹnkọ d'a gba onyẹ hụ wẹ dụn ihiẹn ilee.”

Kẹ Wẹ Dọn Li Jesu

(Mat 27.57-61; Mak 15.42-47; Luk 23.50-56)

38Omẹgụ, Josẹfụ onyẹ alị Arịmatịa#19.38 Wụ obodo ẹ. hụn rị ndị gi nzuzue e sọn ụzọ Jesu makẹ egun ndị-ndu ndị Ju nọ jẹn d'a sị Paịleti ya buye ẹ ẹhụ Jizọsị. Paịleti nọ kweri, sị a d'e buru; ya ọ nọ jẹn d'e buru ẹ. 39Nikodimọsụ nkẹ, hụnnẹi bịa d'e kunrun Jizọsị imẹ ukinkin ogẹn mbụ nọ sọnmẹ Josẹfụ. Nikodimọsụ wẹhẹ ihiẹn e kun fuẹin — maa lẹ alo wẹ hugbama — hụn k'a nyịnhan kẹ ẹkpa-nnu ohu lẹ mkpikpi#19.39 Kilo mmisẹn kwasị ọgụn.. 40Ikẹnnyẹ ẹbụbụọ hụ nọ buru ẹhụ Jesu, gi ẹkwa linẹ fụgbama ya lẹ ihiẹn ndị ahụn e shin ọhụnma — kẹ ndị Ju dọn a kwama ozun.

41O nwọn ugbo-nta rị ebahụn wẹ nọ gbu Jesu; ili ọhụn nọ kẹ mmughẹ hụn wẹ kelẹni liyetu ịhịan rị imẹ ugbo-nta hụ. 42Makẹni Ụhụọhịn hụ ndị Ju gi a kwademẹ Ezumikẹn a gụmagụọ lẹni ili hụ rị nsue, wẹ nọ gwarị li Jesu ebẹhụ.

Currently Selected:

Jọnụ 19: ikkBI

Highlight

Copy