Jọnụ 20

Isi Nke Ọgụn

Okpokoro Ili

(Mat 28.1-8; Mak 16.1-8; Luk 24.1-12)

1Ụzụtụntụn biribiri ụhụọhịn ibuzọ imẹ izuka#20.1 Hụn wụ nwan ụhụọhịn Sọnde., Meri onyẹ Magidala nọ jẹn ili hụ. Ya k'ọ nọ hụn nị e nupụgụọ wẹ ọmụma wẹ te gi nukin ọnụ ili hụ. 2Ọ nọ gbajẹn d'a gwa Saịmọnụ wụ Pita lẹ onyẹ nsọnmazụụn nẹi ihiẹn ẹ a sụọ Jesu, sị wẹ, “E bupụgụọ wẹ Di-nwọnni-ẹnyi imẹ ili hụ, kanị ẹnyi amarịn ebe wẹ buche ẹ.”

3Ya kẹ Pita lẹ onyẹ nsọnmazụụn ahụn ihiẹn ẹ a sụọ Jesu nọ gbashi ili hụ. 4Onyẹ nsọnmazụụn ahụn nọ gbaghafe Pita, bu ụzọ ru ebahụn. 5O hulụa alị, nyọnye imẹ ili, ọ nọ hụn ẹkwa linẹ ndị ahụn wẹ te gi kwama Jesu ebe wẹ rị alị, kanị ọ banyeni imẹ ili hụ.

6Saịmọnụ Pita hụn sọnkọ a azụụn e ru ebẹhụ, shi imẹ ili hụ. Ọ nọ hụn ẹkwa linẹ ndị hụ alị ebẹhụ; 7ọ hụnzị ẹkwa wẹ te gi kẹnmẹ Jesu isi lẹ ihun. Ya lẹ linẹ ndị ahụn arị ụzọ ohu, a fụmagụọ wẹ hụn wẹ te gi kẹnmẹ ẹ isi lẹ ihun, bu ẹ tọ nkọ ohu. 8Ya onyẹ nsọnmazụụn ahụn te bu ụzọ ru ili hụ nọ banyezi; ọ hụn, ọ nọ kweri. 9(Ogẹn ahụn, w'e ke ghọtakwọ ihiẹn hụ Ẹkụkwọ-nsọ ku n'o jẹnkọ d'a gha ọnwụn lihi.)

10Ndị nsọnmazụụn a ndị ahụn a hụngụ ihiẹn ndịnị, onyẹ-onyẹ nọ la iwe ẹ.

Meri Onyẹ Magidala A Hụn Jesu K'ọ Ghagụ Ọnwụn Lihi

(Mat 28.9-10; Mak 16.9-11)

11Kanị Meri turuhụkwọ ihun ili hụ, a kwan. Hụn ahụn ọ rị a kwan, ọ nọ hulụa alị, nyọnye imẹ ili hụ, 12ọ nọ hụn ndị mmọn-ozi ẹbụọ yi ẹkwa ọchan kẹ wẹ nọdị alị ebahụn ẹhụ Jesu te rị, onyẹ ohu rị ibe isi, hụn-ẹbọ rị ibe ụkụ.

13Wẹ nọ sị Mẹri, “Okpoho, k'ị rị a kwannị?” Ọ nọ sị wẹ, “E bupụgụọ wẹ Di-nwọnni m, kanị amarịn m ebe wẹ buche ẹ!” 14O kugụ ihiẹnni, ya ọ nọ gbehutọ, hụn Jesu k'o turu ebẹhụ, kanị ọ marịn nị ya rọ.

15Jesu nọ sị a, “Okpoho, k'ị rị a kwannị? Onyẹ k'ị rị a chọ?” Meri ro ni hụn e lepụ ugbo-nta hụ ẹnya rọ, ya ọ nọ sị a, “Diọkpa, omẹni yụ bupụ a, gwa m ebe i buche ẹ, m k'e jẹn d'e buru ẹ.” 16Jizọsị nọ hị a, “Meri!” Meri nọ gbehutọ buchanrịn ihun zinmẹ ẹ, gi asụsụ Hibru hị a, “Raboni!” (Ọnụ ndị Ju Raboni wụ Onyẹ-nkuzi) 17Jesu nọ sị a, “Eke kwọndọnlẹ m ẹka, makẹni m'e ke jẹn elu-igwee d'e kunrun Chuku-Nẹdi. Ka jẹn d'e kunrun umunẹ m, y'a sị wẹ, ‘M lakọ elu-igwee d'e kunrun Nẹdi m hụn wụzị Nẹdi ụnụ, Osolobuẹ m hụn wụzị Osolobuẹ ụnụ.’ ”

18Ya kẹ Meri onyẹ Magidala nọ jẹn d'a gwa ndị nsọnmazụụn Jesu, “A hụngụọ m Di-nwọnni-ẹnyi!” Ya kẹ ọ nọzị gwachanrịn wẹ ihiẹn ndị hụ ọ gwa a.

Jesu E Nwọnpụha Imẹ Igunrun Ndị nsọnmazụụn A

(Mat 28.16-20; Mak 16.14-18; Luk 24.36-49)

19Ẹnyasị ụhụọhịn ahụn wụ ụhụọhịn ibuzọ imẹ izuka, ndị nsọnmazụụn Jesu gi egun ndị-ndu ndị Ju kpọkin enwẹn wẹ ye mmụlọ wẹ rị. Ya Jesu nọ nwọnpụha idẹnmizi, turu imẹ igunrun wẹ, sị, “Udọn ya rịnị ụnụ!” 20Ogẹn o gi kugụ ihiẹnni, ọ nọ ghọsị wẹ ẹka a ẹbụbụọ lẹ ẹkụnkụn a. Ya kẹ ndị nsọnmazụụn a nọ ghọghọ ọda-ọda n'a hụn wẹ Di-nwọnni-ẹnyi. 21Ya Jizọsị nọzị nwan sị wẹ, “Udọn ya rịnị ụnụ. M rị nwan e zi ụnụ kẹ Chuku-Nẹdi dọn zi m.” 22O kugụ ihiẹnni, ọ nọ horokpu#20.22 Worokpu. wẹ, sị, “Narịn nị Mmọn-nsọ. 23Ụnụ gbagharị ịhịan njọ wẹ, Osolobuẹ a gbagharị wẹ ya; ụnụ agbagharịnị ịhịan njọ wẹ, Osolobuẹ agbagharịkọ wẹ.”

Kẹ Tamọsị Dọn Rụ Ụka

24Tamọsị w'a kpọ Ejimẹ, onyẹ ohu imẹ ndị nsọnmazụụn mmẹbụọ, arị imẹ igunrun wẹ kẹ Jesu bịa. 25Ya ndị nsọnmazụụn ibe ẹ nọ sị a, “Ẹnyi a hụngụọ Di-nwọnni-ẹnyi.” Kanị Tamọsị nọ sị wẹ, “Mmanị m hụn ẹnya ntu ndị hụ rị a ẹka ẹbụbụọ, bu mkpịnsịn-ẹka m che ẹnya ntu ndị hụ, bu ẹka m che ẹkụnkụn a — ekwerikọ m!”

26Hụn mẹ ẹ izuka, ebe ndị nsọnmazụụn Jesu rịzị imẹ ụlọ wẹ lẹ Tamọsị; ụzọ kpọkin akpọkin kanị Jesu nọzị nwọnpụha, turu imẹ igunrun wẹ, sị, “Udọn ya rịnị ụnụ.” 27Ya kẹ ọ nọ sị Tamọsị, “Wẹhẹ mkpịnsịn-ẹka ị n'i bu ẹ che ebeni; lee ẹka m ẹbụbụọ; wẹhẹ nwan ẹka ị n'i buche m ẹkụnkụn. Arụzịlẹ ụka; kweri!”

28Tamọsị nọ za a, sị, “Di-nwọnni m lẹ Chuku m!”

29Jesu nọ sị a, “Ẹlẹ hụnnị ị hụngụ m k'i gi kweri? Ngọzi wụ nke ndị kelẹni hụn bụ e kweri wẹ.”

Ihiẹn Wẹ Deni Ẹkụkwọnị

30O nwọnzighọ ọrụn-atụmẹnya bu ọda Jesu rụn idẹnya ndị nsọnmazụụn a hụn wẹ deyelẹni imẹ ẹkụkwọnị. 31Kanị, wẹ deye ndịnị kẹni ụnụ hụn ụzọ kweri nị Jesu wụ Kraịstị (hụn wụ Onyẹ Nzụọpụha Hụ Osolobuẹ Tumẹ), Nwa Osolobuẹ, kẹni ụnụ gi ẹfan a nwọn ndụn ghahanị okweri ụnụ kwerin'ẹ.

Currently Selected:

Jọnụ 20: ikkBI

Highlight

Copy