Jọnụ 21

Isi Nke Ohu-kwasị-ọgụn

Jesu E Nwọnpụhazị D'e Kunrun Ndị nsọnmazụụn A

1Ihiẹn ndịnị e mẹgụ, Jesu nọzị nwọnpụha d'e kunrun ndị nsọnmazụụn a mkpẹnrẹn Ohimin Taịberiasị. Ẹnịna k'o dọn mẹ: 2Saịmọnụ wụ Pita lẹ Tamọsị w'a kpọ Ejimẹ lẹ Natanẹlụ onyẹ obodo Kana rị Galili lẹ ụmụ-ikẹnnyẹ Zẹbẹdi lẹzi ndị nsọnmazụụn Jesu ẹbụọ ọzọ gba rị. 3Ya Saịmọnụ wụ Pita nọ sị, “E shi m d'e gbu azụụn.” Wẹ nọ sị a, “Ẹnyi k'e sọn i.” Ya wẹ nọ jẹnmẹ, banye ụgbọ-mirin. Kanị, egbuni wẹ ihiẹn ọwụlẹ ukinkin hụ ile.

4Eki e fọnmẹ, Jesu nọ turu mkpẹnrẹn mirin; kanị ndị nsọnmazụụn a amarịn nị Jesu rọ.

5Ya kẹ Jesu nọ jụ wẹ, sị, “Ụmụẹka, o ke nwọn azụn ụnụ gbu?” Wẹ nọ za, sị, “O ke nwọn.”

6Ọ nọ sị wẹ, “Tụ nị ọga ụnụ ye azụụn ẹka-nni ụgbọ ụnụ, ụnụ jẹnkọ d'e gbu azụn.” Ya wẹ nọ tụye ọga hụ. Ọga ete nịzịnị wẹ dọbanhan imẹ ụgbọ, makẹni azụn wẹ gbu e bukẹ ọda.

7Onyẹ nsọnmazụụn hụ ihiẹn ẹ a sụọ Jesu nọ sị Pita, “Di-nwọnni-ẹnyi rọ maị!” Ogẹn Pita gi nụ nị Di-nwọnni-ẹnyi rọ, ọ nọ yiri ẹwuru o yiye elu ẹ (makẹni o te yipụgụọ a). Ya ọ nọ tụban imẹ mirin. 8Ndị nsọnmazụụn a họdụ imẹ ụgbọ nọ gi ụgbọ lịlịma dọkpụnpụha ọga hụ azụn jun mkpẹnrẹn mirin, makẹni mkpẹnrẹn-mirin eteni, ọ karịnị usue ebe w'a nọ a gba bọlụ#21.8 Ihiẹn rịkẹ amụkụ iri kwasị ọgụn-isin sụọ rọ.. 9Ogẹn wẹ gi pụha mkpẹnrẹn mirin, wẹ nọ hụn oboko ọkụn ebahụn; azụn hụ elu ẹ; brẹdi hụzịkwọ ebẹhụ. 10Jesu nọ sị wẹ, “Wẹhẹ ni azụn imẹ ndị hụn ụnụ gbu kikẹnni.” 11Ya Saịmọnụ wụ Pita nọ shi imẹ ụgbọ-mirin, dọkpụnpụha ọga hụ mkpẹnrẹn mirin. Azụn mmẹtọ-kwasị-ọgụn-ẹsa hi ogbe nchaịn rị imẹ ọga hụ bụ o tikanị. 12Jesu nọ sị wẹ, “Bịa nị nwan d'e ri ihiẹn-oriri ụtụntụn.” Makẹni a marịngụọ wẹ nị Di-nwọnni-ẹnyi rọ, onwọnni onyẹ nsọnmazụụn a ọwụlẹ egun nị jụ a, “Onyẹ k'ị wụ?” 13Ya kẹ Jesu nọ jẹn d'e weri brẹdi hụ ye wẹ, werizikwọ azụn hụ ye wẹ.

14Ọnwan mẹ ẹ mgbe ẹtọ ndị nsọnmazụụn Jesu hụn a k'ọ ghagụ ọnwụn lihi.

Jesu E Wekinhẹnzi Pita Ọnọdị A

15Ogẹn wẹ gi rigụ ihiẹn-oriri ụtụntụn ahụn, Jesu nọ sị Saịmọnụ wụ Pita, “Saịmọnụ nwa Jọnụ, ihiẹn m a sụọghọ ị karị ndịnị?” Ọ nọ za, sị, “Ẹghẹẹ Di-nwọnni-ẹnyi, y'a marịnghọ nị ihiẹn i a sụọghọ m.” Jesu nọ sị a, “Lepụ ụmụ-atụnrụn m ẹnya.” 16Ya Jesu nọ jụ a hụn mẹ ẹ mgbe ẹbụọ, sị, “Saịmọnụ nwa Jọnụ, ihiẹn m a sụọghọ ị?” Ọ nọ za, sị, “Ẹghẹẹ Di-nwọnni-ẹnyi, y'a marịnghọ nị ihiẹn i a sụọghọ m.” Jesu nọ sịzị a, “Lepụ atụnrụn m ẹnya.” 17Jesu nọ jụzị a ya hụn mẹ ẹ mgbe ẹtọ, “Saịmọnụ nwa Jọnụ, ihiẹn m a sụọghọ ị?” Ọ nọ fụ Pita nị Jesu jụ a mgbe ẹtọ, “Ihiẹn m a sụọghọ ị?” Pita nọ sị a, “Di-nwọnni-ẹnyi, y'a marịnghọ ihiẹn ile; y'a marịnghọ nị ihiẹn i a sụọghọ m.” Jesu nọ sị a, “Lepụ atụnrụn m ẹnya. 18M rị a gwa ị ezioku, ebe ị rị okoro, y'e kọnrin, e jẹn ebe ọwụlẹ sụọn'ị; kanị ị kagụ ẹgẹdi, i jẹnkọ d'a tịnpụ ẹka ị, ndị ọzọ e yimẹ i ẹwuru i, we i shi ebe i chọlẹni n'i jẹn.” 19(Jesu gi ihiẹnni o ku ghọsị ụdị ọnwụn Pita jẹnkọ d'a nwụn gi wẹhẹni Osolobuẹ ọghọ).

Jesu e kugụ ihiẹnni, ọ nọ sị Pita, “Sọnmẹ m!”

Ihiẹn Jesu Ku Banyeni Jọnụ

20Pita e lee ẹnya azụụn, ọ nọ hụn onyẹ nsọnmazụụn hụ ihiẹn ẹ a sụọ Jesu k'o sọnkọ wẹ, (hụn nọkunmẹ Jizọsị ogẹn wẹ gi rị e ri ihiẹn-oriri ẹnyasị ụhụọhịn ahụn, hụn sị Jizọsị, “Di-nwọnni-ẹnyi, onyẹ jẹnkọ d'e re i?”) 21Ogẹn Pita gi hụn a, ọ nọ jụma Jesu, “Di-nwọnni-ẹnyi, okẹnnyẹni nkẹ?”

22Jizọsị nọ sị a, “Omẹni m chọ n'ọ rị ndụn d'e ru mgbe m bịa, ele hụn biri i? Sọnmẹ m!” 23Ya okuni nọ kpọgbama imẹ igunrun ndị e sọn Jesu, nị onyẹ nsọnmazụụn a nị anwụnkọ. Kanị, Jizọsị ekuni n'ọ nwụnkọ, ihiẹn o ku wụ, “Omẹni, m chọ n'ọ rị ndụn d'e ru mgbe m bịa, ele hụn biri i?”

24Onyẹ nsọnmazụụn a ahụn wụ hụn rị nwan e ku oku ihiẹn ndịnị; ịya detuzikwọ ndịnị wẹ; ẹnyi a marịnghọ nị ihiẹn o ku wụ ezioku.

Mmẹkin

25O nwọnzighọ ihiẹn bu ọda Jesu mẹ. Omẹni wẹ dechanrịn wẹ ile ohu-ohu, e roghọ m'a nị ụwa ile erugụkọ ẹkụkwọ wẹ sikọ d'e gi de wẹ.

Currently Selected:

Jọnụ 21: ikkBI

Highlight

Copy