Jọnụ 18

Isi Nke Mmẹsatọ

A Nwụnrụn Wẹ Jesu

(Mat 26.47-56; Mak 14.43-50; Luk 22.47-53)

1Ogẹn Jesu gi mẹgụ ekpereni, ya lẹ ndị nsọnmazụụn a nọ pụ ebẹhụ, fetu Ọdanmgbugbu Kidrọnụ, banye ugbo-nta ohu rị ebẹhụ. 2(Judasị, hụn jẹnkọ d'e ren'ẹ a marịnzịghọ ebahụn, makẹni Jesu lẹ ndị nsọnmazụụn a a nọ ebẹhụ e zu mbụ-lẹ-ẹbụọ.)

3Ya Judasị nọ weri igunrun ndị-agha Rom lẹ ndị-nche Ụlọ-nsọ, ndị hụn ndị-isi nchụn-ẹjan lẹ ndị itu-Farisi zihẹ, o webanhan wẹ ebẹhụ. Wẹ busọnmẹ ihiẹn-ọgụn ichẹn-ichẹn lẹ ọwa lẹ ukpẹ.

4Jesu a marịngụọ ihiẹn ile jẹnkọ d'e mẹn'ẹ: ọ nọ jẹnpụha, sị wẹ, “Onyẹ kẹ ụnụ rị a chọ?” 5Wẹ nọ sị, “Jesu, onyẹ Nazarẹtị.” Ọ nọ sị wẹ, “Mmẹ rọ.” (Judasị hụn rị e ren'ẹ wuzoyeni wẹ ebahụn ogẹnni.) 6Ogẹn Jesu gi sị wẹ, “Mmẹ rọ”, wẹ nọ jẹnkin azụụn, danchanrịn alị. 7Jizọsị nọzị sị, “Onyẹ kẹ ụnụ chọkọ?” Wẹ nọ sị, “Jizọsị onyẹ Nazarẹtị.” 8Jizọsị nọ sị, “A gwagụọ m ụnụ nị mmẹ rọ. O mẹ nwan nị mmẹ kẹ ụnụ rị a chọ, nị nị ndịnị lama.” 9(O ku ihiẹnni kẹni okunẹi o ku bụn: “Onwọnni hụn ọwụlẹ la iwi imẹ ndị hụn i ye m.”)

10Saịmọnụ wụ Pita bu ọpịa-agha, ya k'ọ nọ sepụha a, banpụ odibo onyẹ-isi nchụn-ẹjan ntịn ẹka-ihiẹn. (Ẹfan odibo ahụn wụ Mal'kusu.) 11Jizọsị nọ sị Pita, “Wekin ọpịa-agha ị ọbụọ a! Nị m jụ mkpu afụnfụn Nẹdi m ye m ra?”

E We Wẹ Jesu Jẹnni Anasị N'o Kin Ẹ Ikpe

12Ya ndị-agha Rom lẹ Onyẹ-isi agha wẹ kanị lẹ ndị-nche ndị-isi ndị Ju zihẹ nọ kwọndọn Jesu, kẹn ẹ ẹgbụn. 13Wẹ nọ bu ụzọ we ẹ jẹnni Anasị, nẹdi nwunyẹ Kayafasị. Kayafasị wụ onyẹ-isi nchụn-ẹjan ahụa hụ. 14(Kayafasịnị wụ hụn dụn ndị-isi ndị Ju ọdụn n'ọ kakwọ wẹ mma nị onyẹ ohu nwụndọnni ịhịan ile ọnwụn.)

Pita A Ghọrị, Sị Ọ Marịnzị Jesu

(Mat 26.69-75; Mak 14.66-68; Luk 22.55-57)

15Saịmọnụ wụ Pita lẹ onyẹ nsọnmazụụn Jesu ọzọ nọ sọnmẹ Jesu. (Onyẹ-isi nchụn-ẹjan marịn onyẹ nsọnmazụụn hụn-ẹbọ hụ amarịn, ya onyẹ nsọnmazụụn hụ nọ sọn Jesu banye ezi ọgwa onyẹ-isi nchụn-ẹjan.) 16Kanị Pita abanhannị. Onyẹ nsọnmazụụn hụ marịn onyẹ-isi nchụn-ẹjan nọ kin azụụn d'a gwa okpoho rị ọnụ-mgbọn oku, webanhan Pita. 17Okpoho ahụn rị ọnụ-mgbọn nọ sị Pita, “Yụ nwẹn arị ndị nsọnmazụụn okẹnnyẹ hụ?” Pita nọ sị, “Ẹlẹ mmẹ!”

18Oyi rị a tụ; ya ndị idibo lẹ ndị-nche hụ nọ fiye ọkụn, fihunmẹ ọkụn hụ, a nyan a. Ya Pita nọ jẹn d'e sọn wẹ turu ebẹhụ, a nyan ọkụn.

Onyẹ-isi Nchụn-ẹjan A Jụ Jesu Ajụjụ

(Mat 26.59-66; Mak 14.55-64; Luk 22.66-71)

19Onyẹ-isi nchụn-ẹjan hụ a jụ Jesu oku ndị nsọnmazụụn a lẹ nkuzi ẹ. 20Jesu nọ sị, “Idẹnya ịhịan ile kẹ m nọ ku ihiẹn m ku; imẹ ụlọ-ofufe rị ichẹn-ichẹn lẹ imẹ Ụlọ-nsọ ndị Ju ile nọ e zu kẹ m nọ kuzi; onwọnni hụn m ku nzuzue. 21K'ị rị nwan a jụnị m ajụjụ? Jụ ndị hụn nụ ihiẹn m ku, a marịngụọ wẹ ihiẹn m ku.” 22Ogẹn Jesu gi ku ihiẹnni, onyẹ-nche ohu turu ẹhụ ebahụn nọ ma Jesu ọra, sị, “Ẹrịra kẹ ya a gwa onyẹ-isi nchụn-ẹjan oku!”

23Jesu nọ sị a, “Omẹni o nwọn eje-oku m ku, gwa ịhịan ile rị ebeni ihiẹn ọ wụ; kanị, omẹni ezioku kẹ m ku, k'ị manị m ọra?”

24Ya Anasị nọ sị wẹ weri ya lẹ ẹgbụn hụ wẹ kẹn ẹ jẹnni Kayafasị onyẹ-isi nchụn-ẹjan.

Pita A Ghọrịzị N'ọ Marịn Jesu

(Mat 26.71-75; Mak 14.69-72; Luk 22.58-62)

25Pita turukwọ ebẹhụ a nyan ọkụn. Ya ndị ọzọ nọzị sị, “Y'a rị nwan ndị nsọnmazụụn okẹnnyẹ hụ?” Kanị, Pita nọ ghọrị, sị, “Ẹlẹ mmẹ.”

26Onyẹ ohu imẹ ndị idibo onyẹ-isi nchụn-ẹjan, nwẹnẹ okẹnnyẹ hụ Pita banpụ ntịn, nọ sị Pita, “Ahụnnị m yụ lẹ ya imẹ ugbo ahụn?”

27Ya Pita nọ ghọrịzị. Ozigbo, ọkpa nọ kwan.

E We Wẹ Jesu D'e Kunrun Gọvanọ Wụ Paịleti

(Mat 27.1-2,11-14; Mak 15.1-5; Luk 23.1-5)

28Ụzụtụntụn biribiri, wẹ nọ gha iwe Kayafasị weri Jizọsị shi ọgwa Gọvanọ rị a kịnị. Kanị, abanyeni wẹ imẹ ọgwa hụ, makẹni achọnị wẹ nị wẹ mẹrụ enwẹn wẹ, kẹni wẹ hụn ụzọ ri Oriri-nghafe hụ. 29Ya Paịleti nọ jẹnburu wẹ ezi, sị, “Elee ikpe kẹ ụnụ rị e kpe okẹnnyẹni?” 30Wẹ nọ sị a, “Omẹni okẹnnyẹni ẹlẹ eje-ịhịan, ẹnyi eke wẹhẹni i y'ẹ.” 31Paịleti nọ sị wẹ, “Weri n'ẹ d'e gi iwu ụnụ kin ẹ ikpe.” Ndị-ndu ndị Ju nọ sị a, “Iwu ụnụ tini ẹnyi sị ẹnyi egbulẹ onyẹ ọwụlẹ.” 32(Hụnnị kẹ oku Jesu gi bụn — oku o gi ghọsị ụdị ọnwụn o jẹnkọ d'a nwụn.)

33Ya kẹ Paịleti nọ shizi imẹ ọgwa a, zi wẹ kpọ Jesu; ya ọ nọ jụma Jesu, “Ịyụ wụ eze ndị Ju?”

34Jesu nọ sị a, “Uche i k'i gidẹ nwan a jụ ajụjụnị ra wẹ gwa ị oku m?”

35Paịleti nọ sị a, “I rodẹ ni m wụ onyẹ Ju ra? Ndị Ju ibe i lẹ ndị-isi nchụn-ẹjan bu i che m ẹka; k'i mẹ?”

36Jesu nọ sị, “Alị-eze m ẹlẹ nke ụwanị. Omẹni alị-eze m te wụ nke ụwanị, nkẹ ihu m a lụ ọgụn gbọndọn wẹ ebulẹ m che ẹka ndị-ndu ndị Ju. Mba, alị-eze m ẹlẹ nke ebeni.”

37Ya Paịleti nọ jụ a, “Eze k'ị wụ nwan?” Jizọsị nọ sị a, “Ọ ghagụọ ọnụ ị pụha ni m wụ eze. M bịa d'a shịanị ezioku ẹri: ufiri ẹ kẹ wẹ gi mụ m; ịya haịn m gi bịa imẹ ụwa. Onyẹ wụ nke ezioku e gọn ntịn oku m.” 38Paịleti nọ sị a, “Kị wụ ezioku?”

Paịleti a jụgụ a ya, buruzi ndị hụ ezi, sị wẹ, “Ahụnnị m ihiẹn o mẹ m'e gi ma a ikpe. 39Ụnụ sị m a hatuni ụnụ onyẹ-ngan ohu Mmẹmmẹ-nghafe ọwụlẹ; nị m hatuni nwan ụnụ Eze ndị Ju?” 40Ya wẹ nọ yizi, “Mba, ẹlẹ ọnwan! Barabasị kẹ ẹnyi chọ!!” (Barabasịnị rị ndị bunụmanị ndị Rom rị a kịnị.)

Currently Selected:

Jọnụ 18: ikkBI

Highlight

Copy