Popular Bible Verses from Ijɔ̍ɔn 16

Share

N yɛ ē koko̍o yī lɛlā nūma̍ ē de ala̍ hɛ̄ɛbɛ nīi ala̍ ge̍ē lɛ ogbodɔ̍dɔ̍ ē bū la ongmo̍tu̍chɛ̄ ba̍la ami. Yɛchɛ ge̍ē ya̍ nīi ala̍ ē mi̍chi̍. Ala̍ ā kū grigri; ma̍a n de yɛchɛ gwō mɛ̍.”

Uhu yī Ɔwɔ nīi bī lɛlā olēchi̍ lēchi̍ ma̍ ge̍ē wā ma̍, o̍ ge̍ē chabɔ̄ yī lɛlā olēchi̍ lēchi̍ wa̍a̍ ē hu̍ ala̍. O̍ i̍ ge̍ē kɛlā wɔ̄bɔ̄bɔ̄ yī nū ni̍; lɛlā nīi o̍ po̍ ma̍ ba̍la lɛlā yī ɔ̄chī iyɔ̄bū nīi o̍ ge̍ē koko̍o ē de ala̍ a̍nɛ.

Ɔkpɛɛ ku u̍ma̍ama nūma̍, ala̍ i̍ chī chikpo̍ yī ɔjɔ̄jā la riyī yī u je̍ ni̍. Ala̍ ā chikpo̍ gɛ ma̍a ala̍ ge̍ē nāa; hɛ̄ɛbɛ nīi ɔwɔ̄wīyā yī ala̍ ge̍ gɔ̄grāa.

Lēchi̍-lēchi̍, n ā koko̍o de ala̍! O̍ ge̍ē hwɔhi gba̍a̍ ē de ala̍ nīi n ge̍ pīya. Wu̍chē oji̍ nɛ, n i̍ ge̍ pīya ni̍, Ɔtwɔ̄bɔ̄ ɔla̍ā i̍ ge̍ē wā dikpo̍ ē ba̍ ala̍ ni̍. N ge̍ pīya mɛ̍, n ge̍ē de ɔ̍ ē tɛ̄rɔ̄ hu ala̍. O̍ ge̍ wā mɛ̍, o̍ ge̍ē de lɛlā ɔdwɔ̄bi̍ yī āchɛ yī yɛchɛ nūma̍ ē chabɔ̄ hīka ɔ̍lɔ i̍ ku ni̍. O̍ ge̍ē gba̍a ē chabɔ̄ yī lɛlā nīi lɛ kpakpa ma̍ ē hu̍ wā; chabɔ̄ yī lɛpɔ̄ ɔhɔ̍ɔ̄hɛ̍ yī Ɔwɔ ē hu̍ wā i̍ngi̍ngɔ̍ɔ.

I̍ngi̍ngɔ̍ɔ nīi iyī ala̍ lɛ a̍nɛ. U̍ma̍ama, ala̍ hɔ̄ la eyīwɔnɔ. N chī ge̍ē ma̍ ala̍ we̍. Yɛ̄grāa ɔla̍ā ma̍, ɔwɔ̄wīyā ge̍ē mu ala̍ ūkpɔ̄tū bɛ̍ɛ̄nɛ̄. Ita yī ɔwɔ̄wīyā nūma̍, ɔ̄chɔ̄chɛ i̍ ge̍ē de ē nāa ē hī ala̍ abɔ̄ mɛ ē gɛ ni̍. “Yɛ̄grāa ɔla̍ā ge̍ē gbajɛ ma̍, ala̍ i̍ ge̍ē che um ikpo̍ yī ɔjɔ̄jā gɛ ni̍. Lēchi̍, n ā koko̍o de ala̍! Ɔwɔ A̍dā ge̍ē de ɔjāha̍-ɔjāha̍ nīi ala̍ ge̍ che ɔ̍ ikpo̍ la riyī yī u ma̍ ē de ala̍.

Lēchi̍-lēchi̍, n ā koko̍o de ala̍! Ala̍ ge̍ē drɛ̄ɛgba ē gwe̍ejrīkā; yɛchɛ wa̍a̍ chī ge̍ē lɛ ɔwɔ̄wīyā. Ala̍ ge̍ē he̍ēyīwɔnɔ; eyīwɔnɔ yī ala̍ chī ge̍ē de pīya ɔwɔ̄wīyā ɔnɔ̄kɔ̄kū.