Ijɔ̍ɔn 16

1“Lɛlā nūma̍ wa̍a̍, n yɛ ē koko̍o ē de ala̍ hɛ̄ɛbɛ nīi ala̍ i̍ ge̍ē wa̍ābɔ̄ ni̍. 2E̍ ge̍ē de ala̍ ē wu̍ligbo̍ hī u̍nu̍ ogrēeyī yī wā. Yɛ̄grāa ɔha̍ hɔ̄ abɔ̍ɔ nīi ɔ̄chɛ nīi ge̍ ngmo̍ ala̍ ge̍ē gbɛri̍ya̍ ka u̍ku̍rɔ̍ yī Ɔwɔ nīi anɔ̍lɔ yɛ ē ya̍ a̍nɛ. 3E̍ ge̍ē ya̍ ala̍ lɛlā nūma̍ i̍ngɔ̍ɔ wa̍a̍ wu̍chē lɔkɔ nīi e̍ i̍ je̍ Ɔwɔ A̍dā kɛ̄ɛ ami ni̍ ma̍. 4Onūma̍ wa̍a̍, n yɛ ē koko̍o ē de ala̍ hɛ̄ɛbɛ nīi yɛ̄grāa ge̍ gbajɛ nīi e̍ yɛ ē ya̍ ala̍ i̍ngɔ̍ɔ ma̍ nīi ala̍ ge̍ē bla hīka amɔ̍lɔ ka i̍ngɔ̍ɔ de ala̍ mɛ̍.

U̍ku̍rɔ̍ yī Uhu Ɔnɛ̄ɛhɛhi yī Ɔwɔ

“N i̍ koko̍o de ala̍ bū la owu̍tu ni̍; wu̍chē oji̍ nɛ, n hɔ̄ amu ba̍la ala̍. 5U̍ma̍ama, n pīya yɛ gāa dikpo̍ba̍ ɔ̄chɛ nīi de u tɛ̄rɔ̄ wā ma̍. Ɔ̄chɔ̄chɛ lipu̍ yī ala̍ i̍ chī che um ikpo̍ hīka, ‘Aba̍ nīi a yɛ gāa ma̍?’ ni̍. 6U̍ma̍ama nīi n chī de koko̍o de ala̍ ma̍, ūkpɔ̄tū i̍ chī lɛ ala̍ wɔnyɛ gɛ ni̍ mɛ̍. 7Lēchi̍-lēchi̍, n ā koko̍o de ala̍! O̍ ge̍ē hwɔhi gba̍a̍ ē de ala̍ nīi n ge̍ pīya. Wu̍chē oji̍ nɛ, n i̍ ge̍ pīya ni̍, Ɔtwɔ̄bɔ̄ ɔla̍ā i̍ ge̍ē wā dikpo̍ ē ba̍ ala̍ ni̍. N ge̍ pīya mɛ̍, n ge̍ē de ɔ̍ ē tɛ̄rɔ̄ hu ala̍. 8O̍ ge̍ wā mɛ̍, o̍ ge̍ē de lɛlā ɔdwɔ̄bi̍ yī āchɛ yī yɛchɛ nūma̍ ē chabɔ̄ hīka ɔ̍lɔ i̍ ku ni̍. O̍ ge̍ē gba̍a ē chabɔ̄ yī lɛlā nīi lɛ kpakpa ma̍ ē hu̍ wā; chabɔ̄ yī lɛpɔ̄ ɔhɔ̍ɔ̄hɛ̍ yī Ɔwɔ ē hu̍ wā i̍ngi̍ngɔ̍ɔ. 9Lɛlā ɔdwɔ̄bi̍ ɔyɔ̍ɔ̄ya̍ i̍ ku de alyɛchɛ nūma̍ ni̍; wu̍chē oji̍ nɛ, e̍ i̍ chɛ̄ku u ni̍. 10Lɛlā nīi - lɛlā ɔlɛkpakpa ma̍, o̍ ge̍ē de ē chabɔ̄ hu̍ wā, wu̍chē oji̍ nɛ, ami pīya yɛ gāa dikpo̍ ē ba̍ Ɔwɔ A̍dā mɛ̍; ala̍ i̍ ge̍ē ma̍ u ē gɛ ni̍. 11O̍ chī ge̍ē chabɔ̄ hīka lɛpɔ̄ ɔhɔ̍ɔ̄hɛ̍ yī Ɔwɔ ɔ̍lɔ de gbajɛ mɛ̍ wu̍chē oji̍ nɛ, āchɛ obī wɔhu̍ yī yɛchɛ nūma̍, Ɔwɔ hɛ̍ wā lɛpɔ̄ lɔ̄lā mɛ̍.

12“N lɛ lɛlā mwɛbɛ ge̍ē ka ē de ala̍. O̍ chī ge̍ē de ē yɔ̍ɔ̄kɔ̄kū de ala̍ u̍ma̍ama. 13Uhu yī Ɔwɔ nīi bī lɛlā olēchi̍ lēchi̍ ma̍ ge̍ē wā ma̍, o̍ ge̍ē chabɔ̄ yī lɛlā olēchi̍ lēchi̍ wa̍a̍ ē hu̍ ala̍. O̍ i̍ ge̍ē kɛlā wɔ̄bɔ̄bɔ̄ yī nū ni̍; lɛlā nīi o̍ po̍ ma̍ ba̍la lɛlā yī ɔ̄chī iyɔ̄bū nīi o̍ ge̍ē koko̍o ē de ala̍ a̍nɛ. 14O̍ ge̍ē de rīgā ɔnɔ̄kɔ̄kū de u. Wu̍chē oji̍ nɛ, ɔjā nīi n lɛ ma̍ nīi o̍ ge̍ē bī wā ge̍ē ka ē de ala̍ a̍nɛ. 15Ɔjāha̍-ɔjāha̍ wa̍a̍ nīi A̍dā yī u lɛ ma̍ - iyī u nɛ. Onūma̍ - ohu̍ nīi n ka hīka ɔjā nīi n lɛ ma̍, anu̍ nīi Uhu yī Ɔwɔ ge̍ē nāa ē bī wā ge̍ē ka ē de ala̍ a̍nɛ.

Eyīwɔnɔ ba̍la ɔwɔ̄wīyā

16“Yɛ̄grāa ɔha̍ pi̍nyɛ̍ u̍uma, ala̍ i̍ ge̍ē ma̍ u ē gɛ ni̍. Yɛ̄grāa ɔha̍ pi̍nyɛ̍ la okwi̍ihi yī ɔla̍ā, ala̍ chī ge̍ē ma̍ u.”

17A̍chi̍kpo̍ yī nū ɛha̍ gblāa abɔ̍ɔ ē che ɔ̍nyīnū ikpo̍ bɛ̍ɛ̄nɛ̄ hīka, “Oji̍ ɔ̍lɔ - ochi̍chi̍ yī lɛlā nūma̍ nīi ɔ̍lɔ ē ka ma̍/? ‘Yɛ̄grāa ɔha̍ pi̍nyɛ̍ u̍uma, ala̍ i̍ ge̍ē ma̍ u ē gɛ ni̍. Yɛ̄grāa ɔha̍ pi̍nyɛ̍ la okwi̍ihi yī ɔla̍ā, ala̍ chī ge̍ē ma̍ u.’ Ba̍la, ‘Wu̍chē oji̍ nɛ, n pīya yɛ gāa dikpo̍ ē ba̍ A̍dā yī u.’ 18E̍ ka oji̍ ɔ̍lɔ u̍tu - ochi̍chi̍ yī ‘yɛ̄grāa ɔha̍ pi̍nyɛ̍’ nūma̍ nīi ɔ̍lɔ ē ka ma̍? Aɛ̍lɛ i̍ chī je̍ ɔjā ɔla̍ā nīi ɔ̍lɔ yɛ ē kɛlā ku̍ ɔ̍lɔ ma̍ ni̍.”

19Iji̍sɔ̄ɔsi de jo̍ōkū bɛ̍ɛ̄nɛ̄ hīka ɛ̍lɛ yɛ ē chikpo̍ ge̍ē che anu̍ ikpo̍. Wu̍chē yī ɔla̍ā, o̍ koko̍o de wa̍ hīka, “Ala̍ ma̍ ko̍ō! N hīka ‘Yɛ̄grāa ɔha̍ pi̍nyɛ̍ u̍uma, ala̍ i̍ ge̍ē ma̍ u ē gɛ ni̍. Yɛ̄grāa ɔha̍ pi̍nyɛ̍ la okwi̍ihi yī ɔla̍ā, ala̍ chī ge̍ē ma̍ u.’ I̍ lɛlā nūma̍ nīi ala̍ yɛ ē che iyī ala̍ ikpo̍ a̍ni̍? 20Lēchi̍-lēchi̍, n ā koko̍o de ala̍! Ala̍ ge̍ē drɛ̄ɛgba ē gwe̍ejrīkā; yɛchɛ wa̍a̍ chī ge̍ē lɛ ɔwɔ̄wīyā. Ala̍ ge̍ē he̍ēyīwɔnɔ; eyīwɔnɔ yī ala̍ chī ge̍ē de pīya ɔwɔ̄wīyā ɔnɔ̄kɔ̄kū. 21Ɔnyā ge̍ gbo yɛ ē lwɔ̄ɔma yī ɔyi̍ ma̍, o̍ ē he̍ēyīwɔnɔ. Wu̍chē oji̍ nɛ, yɛ̄grāa yī akanya yī nū hɔ̄ aa̍ a̍nɛ. O̍ ge̍ de ɔyi̍ ma mɛ̍; o̍ ē mwanyī yī akanya ɔla̍ā. Wu̍chē oji̍ nɛ, o̍ ē lɛ ɔwɔ̄wīyā yī ɔyi̍ ɔla̍ā nīi o̍ de ma wā la yɛchɛ ma̍. 22I̍ngi̍ngɔ̍ɔ nīi iyī ala̍ lɛ a̍nɛ. U̍ma̍ama, ala̍ hɔ̄ la eyīwɔnɔ. N chī ge̍ē ma̍ ala̍ we̍. Yɛ̄grāa ɔla̍ā ma̍, ɔwɔ̄wīyā ge̍ē mu ala̍ ūkpɔ̄tū bɛ̍ɛ̄nɛ̄. Ita yī ɔwɔ̄wīyā nūma̍, ɔ̄chɔ̄chɛ i̍ ge̍ē de ē nāa ē hī ala̍ abɔ̄ mɛ ē gɛ ni̍.

23“Yɛ̄grāa ɔla̍ā ge̍ē gbajɛ ma̍, ala̍ i̍ ge̍ē che um ikpo̍ yī ɔjɔ̄jā gɛ ni̍. Lēchi̍, n ā koko̍o de ala̍! Ɔwɔ A̍dā ge̍ē de ɔjāha̍-ɔjāha̍ nīi ala̍ ge̍ che ɔ̍ ikpo̍ la riyī yī u ma̍ ē de ala̍. 24Ɔkpɛɛ ku u̍ma̍ama nūma̍, ala̍ i̍ chī chikpo̍ yī ɔjɔ̄jā la riyī yī u je̍ ni̍. Ala̍ ā chikpo̍ gɛ ma̍a ala̍ ge̍ē nāa; hɛ̄ɛbɛ nīi ɔwɔ̄wīyā yī ala̍ ge̍ gɔ̄grāa.

Iji̍sɔ̄ɔsi de wɔhu̍ yī yɛchɛ gwō

25“Lɛlā nūma̍ wa̍a̍ n yɛ ē ka ē de ala̍ la wɔ̄chīije. Yɛ̄grāa ɔha̍ yɛ amu yewā nīi n i̍ ge̍ē bī wɔ̄chīije ē kɛlā tāa ala̍ ē gɛ ni̍ ma̍. N ge̍ē koko̍o yī lɛlā yī Ɔwɔ A̍dā de ala̍ hwōō bɛ̍ɛ̄nɛ̄. 26Yɛ̄grāa ɔla̍ā ge̍ gbajɛ ma̍, ala̍ ge̍ē che Ɔwɔ ikpo̍ yī ɔjā bū la riyī yī u bɛ̍ɛ̄nɛ̄. N i̍ yɛ ē ka hīka ami ge̍ē che ɔ̍ ikpo̍ yī ɔjā de ala̍ ni̍ ko̍ō. 27Wu̍chē oji̍ nɛ, Ɔwɔ A̍dā ɔlɔjā yɔ̍ɔhɔtū yī ala̍ hwɔhi hwɔhi. Wu̍chē lɔkɔ nīi ala̍ yɔ̍ɔhɔtū yī u gba̍a chɛ̄ hīka amɔ̍lɔ bū la abɔ̄ yī Ɔwɔ ma̍ - ohu̍ nīi o̍ yɔ̍ɔhɔtū yī ala̍ a̍nɛ. 28N bū la abɔ̄ yī Ɔwɔ A̍dā wā amu lipu̍ yī yɛchɛ nūma̍. U̍ma̍ama nūma̍, n yɛ amu ge̍ē pīya ē hī yɛchɛ nūma̍ ē dikpo̍ ē ba̍ Ɔwɔ A̍dā mɛ̍.”

29A̍chi̍kpo̍ yī nū ka de ɔ̍ bɛ̍ɛ̄nɛ̄ hīka, “Ma̍ gɛ! U̍ma̍ama a yɛ aa̍ ē de lɛlā ka hwōō mɛ̍. A i̍ bī wɔ̄chīije kɛlā gɛ ni̍. 30U̍ma̍ama nūma̍, alɔ de jo̍ōkū mɛ̍ hīka a je̍ ɔjāha̍-ɔjāha̍ wa̍a̍. A i̍ gba̍a chikpo̍ nīi ɔ̄chɔ̄chɛ ge̍ che wɔ ikpo̍ yī lɛlɛ̄lā gɛ ni̍. Onūma̍ ya̍ nīi alɔ chɛ̄ hīka a bū la abɔ̄ yī Ɔwɔ ichɛ̄ɛhi a̍nɛ.”

31Iji̍sɔ̄ɔsi hīya aa̍ ɔkɔ bɛ̍ɛ̄nɛ̄ hīka, “O̍ re̍ka ala̍ chɛ̄ u̍ma̍ama mɛ̍? 32Ala̍ ma̍ gɛ ko̍ō! Yɛ̄grāa ɔha̍ yɛ amu yewā, o̍ de gbɔ̄gbajɛ mɛ̍! E̍ ge̍ē de ala̍ ē kpo̍ mīyanya cha̍cha̍ nīi ɔnyɔnyɛ ge̍ē bū ɔpɔ̄pū yī nū. Ala̍ ge̍ē pīya wa̍a̍ ē hī ami lōru̍u. N i̍ chī ge̍ē hɔ̄ lōru̍u ni̍; wu̍chē oji̍ nɛ, Ɔwɔ A̍dā hɔ̄ amu tāa ami. 33N yɛ ē koko̍o yī lɛlā nūma̍ ē de ala̍ hɛ̄ɛbɛ nīi ala̍ ge̍ē lɛ ogbodɔ̍dɔ̍ ē bū la ongmo̍tu̍chɛ̄ ba̍la ami. Yɛchɛ ge̍ē ya̍ nīi ala̍ ē mi̍chi̍. Ala̍ ā kū grigri; ma̍a n de yɛchɛ gwō mɛ̍.”

Currently Selected:

Ijɔ̍ɔn 16: YBASR

Highlight

Copy