Ijɔ̍ɔn 17

Iji̍sɔ̄ɔsi jɔhā de a̍chi̍kpo̍ yī nū

1Iji̍sɔ̄ɔsi kwɛ̍ɛjī lɛlā nūma̍ la ɔkɔ̄ka ma̍, o̍ hu eyī hwa̍a̍ ga ichō jɔhā de Ɔwɔ hīka, “Ādā! Yɛ̄grāa ɔ̍lɔma̍ de gbajɛ mɛ̍. De rīgā de Ɔyi̍ yī wɔ gɛ, hɛ̄ɛbɛ nīi Ɔyi̍ titi ge̍ de rīgā de wɔ. 2Wu̍chē oji̍ nɛ, a de wɔhu̍ de ɔ̍, de āchɛ̄ɛchɛ tū ɔ̄ la apli̍kpo̍; hɛ̄ɛbɛ nīi o̍ ge̍ē de ɔhɔ̄leyī i̍mɔ̄mɛni̍ ē de āchɛ ɛla̍ā nīi a de de ɔ̍ ma̍ mɛ̍. 3Āchɛ ge̍ je̍ wɔ hīka aɔ̍lɔ ūkpo̍he ɔ̍lɔ - Ɔwɔ olēchi̍ lēchi̍ a̍nɛ, gba̍a je̍ ami Iji̍sɔ̄ɔsi Ikra̍yisi nīi a de tɛ̄rɔ̄ ma̍, ɔla̍ā re̍ka ɔhɔ̄leyī i̍mɔ̄mɛni̍ nūma̍ a̍nɛ. 4N de rīgā yī wɔ chabɔ̄ amu la yɛchɛ nūma̍ mɛ̍. N kwɛ̍ɛjī la u̍ku̍rɔ̍ nīi a de de u ma̍ mɛ̍. 5Ādā! De rīgā de u la iyɔ̄bū yī awɔ ɔlɔjā gɛ. Rīgā ɔla̍ā nīi - iyī ami ba̍la awɔ o̍bo̍bū nīi yɛchɛ ngma̍ ma̍ nɛ.

6“N ka ochi̍chi̍ yī wɔ de āchɛ nīi a de de u amu yɛchɛ ma̍ mɛ̍. Awɔ lɛ wa̍ ɔlɔ̄lɛ a̍nɛ. A chī de wa̍ de u. E̍ yɛ̍ɛ̄lā yī wɔ lɔkɔ nīi a ka ɛ̍lɛ ge̍ ya̍ ma̍ mɛ̍. 7U̍ma̍ama nūma̍, e̍ jo̍ōkū hīka ɔjā wa̍a̍ nīi aɔ̍lɔ de de amɔ̍lɔ ma̍ ɔ̍lɔ bū la abɔ̄ yī aɔ̍lɔ ichɛ̄ɛhi mɛ̍. 8Wu̍chē oji̍ nɛ, ɛrɔ̄ nīi a tū u wa̍a̍ ma̍, n de koko̍o de wa̍ mɛ̍. E̍ chī nāa ɛrɔ̄ yī wɔ ɔla̍ā, de jo̍ōkū hīka amɔ̍lɔ bū la abɔ̄ yī aɔ̍lɔ ichɛ̄ɛhi mɛ̍. E̍ chɛ̄ hīka aɔ̍lɔ de amɔ̍lɔ tɛ̄rɔ̄ wā a̍nɛ.

9“N yɛ ē jɔhā de wa̍. I̍ āchɛ yī yɛchɛ nūma̍ nīi n yɛ ē jɔhā de wa̍ a̍ni̍; āchɛ nīi a de de u ma̍ nīi n yɛ ē jɔhā de wa̍ a̍nɛ. Wu̍chē oji̍ nɛ, aa̍ - āchɛ yī wɔ a̍nɛ. 10Ɔjā nīi n lɛ wa̍a̍ ma̍ - iyī wɔ nɛ. Onīi awɔ chī lɛ wa̍a̍ ma̍ - iyī u nɛ. Bū la aa̍ nīi rīgā yī u hi̍yɛchɛ a̍nɛ. 11U̍ma̍ama, n pīya yɛ ē wā dikpo̍ ē ba̍ wɔ mɛ̍. N i̍ hɔ̄ amu la yɛchɛ nūma̍ gɛ ni̍ mɛ̍. Aa̍ ma̍ chī hɔ̄ amu la yɛchɛ we̍. Ādā Ɔnɛ̄ɛhɛhi! Chu̍chu̍u, de wa̍ gbōgbō hwɔhi hwɔhi bū la wɔhu̍ yī riyī yī wɔ; riyī nīi awɔ ɔlɔjā de de u ma̍. Ya̍ i̍ngɔ̍ɔ hɛ̄ɛbɛ nīi e̍ ge̍ re̍ka āchɛ ūkpo̍he lɔkɔ nīi ami ba̍la awɔ lɛ ūkpo̍he ma̍. 12Yɛ̄grāa nīi n e̍e hɔ̄ ba̍la aa̍ ma̍, n de wa̍ gbōgbō bū la wɔhu̍ yī riyī yī wɔ, riyī nīi awɔ ɔlɔjā de de u ma̍. N gbō wā ogbōgbō hwɔhi hwɔhi. Ɔ̄chɔ̄chɛ yī wā i̍ pīyabi̍ ni̍; ɔ̍chi̍kpa̍kpa̍ ɔ̄chɛ ūkpo̍he nīi chikpo̍ ge̍ē pīyēbi̍ pi̍i̍ ma̍. Ɔla̍ā chī ya̍ hɛ̄ɛbɛ nīi lɛlā yī Īpū yī Ɔwɔ ge̍ē de ē pīya ichɛ̄ɛhi. 13U̍ma̍ama nūma̍, n pīya yɛ ē wā dikpo̍ ē ba̍ wɔ mɛ̍. N yɛ ē kɛlā nūma̍ amu la yɛchɛ hɛ̄ɛbɛ nīi e̍ ge̍ē lɛ ɔwɔ̄wīyā yī u ē mōmu la ūkpɔ̄tū yī wā. 14N de ɛrɔ̄ yī wɔ ka de wa̍ mɛ̍. E̍ chī de ta̍ yɛchɛ anyī. Wu̍chē oji̍ nɛ, lɔkɔ nīi ami i̍ ɔlyɛchɛ nūma̍ ni̍ ma̍, i̍ngi̍ngɔ̍ɔ nīi aa̍ titi i̍ alyɛchɛ nūma̍ gɛ ni̍ a̍nɛ. 15N i̍ chī yɛ ē ka hīka a ge̍ de wa̍ kpo̍ pīya hī yɛchɛ nūma̍ ni̍. N yɛ ē ka hīka a ge̍ gbō wā hī Anu̍ Ɔdwɔ̄bi̍ ɔla̍ā. 16Lɔkɔ nīi ami i̍ ɔ̄chɛ yī yɛchɛ nūma̍ ni̍ ma̍, i̍ngi̍ngɔ̍ɔ nīi aa̍ titi i̍ āchɛ yī yɛchɛ nūma̍ ni̍ a̍nɛ. 17De wa̍ kwɔbɔ̄ ke̍e̍ de iyī wɔ bū la lɛlā olēchi̍ lēchi̍. Lɛlā yī wɔ - lɛlā olēchi̍ lēchi̍ a̍nɛ. 18Ami titi de wa̍ tɛ̄rɔ̄ ga lipu̍ yī yɛchɛ lɔkɔ nīi a de u tɛ̄rɔ̄ wā ma̍ mɛ̍. 19Wu̍chē yī wā, n de iyī u kwɔbɔ̄ ke̍e̍ de wɔ, hɛ̄ɛbɛ nīi aa̍ titi ge̍ē de ē pīya āchɛ ɔgblāa ke̍e̍ de wɔ lēchi̍ lēchi̍.

20“I̍ āchɛ nūma̍ ke̍e̍ nīi n yɛ ē jɔhā de wa̍ a̍ni̍. N yɛ ē jɔhā i̍ngi̍ngɔ̍ɔ ē de āchɛ nīi chɛ̄ku u wu̍chē yī ɛrɔ̄ yī āchɛ yī u nīi e̍ po̍ ma̍. 21N yɛ ē jɔhā hīka aa̍ wa̍a̍ ge̍ de pīya āchɛ ūkpo̍he. Ādā! E̍ ge̍ hɔ̄ la alɔ lɔkɔ nīi ami ba̍la awɔ hɔ̄ la ɔ̍nyīnū ma̍. E̍ ge̍ de pīya āchɛ ūkpo̍he hɛ̄ɛbɛ nīi yɛchɛ wa̍a̍ ge̍ chɛ̄ hīka aɔ̍lɔ de amɔ̍lɔ tɛ̄rɔ̄ wā a̍nɛ. 22Ami titi de rīgā ɔla̍ā nīi a de de u ma̍ de wa̍ mɛ̍. N ya̍ i̍ngɔ̍ɔ hɛ̄ɛbɛ nīi e̍ ge̍ē de pīya āchɛ ūkpo̍he lɔkɔ nīi ami ba̍la awɔ lɛ ūkpo̍he ma̍. 23Ami hɔ̄ la aa̍ nīi awɔ chī hɔ̄ la ami ma̍, e̍ ge̍ē de pīya āchɛ ūkpo̍he kpo̍kpo̍ la ɔgɔ̄grāa. Bū la ɛbɛ ɔla̍ā, yɛchɛ wa̍a̍ ge̍ē jo̍ōkū hīka aɔ̍lɔ de amɔ̍lɔ tɛ̄rɔ̄ a̍nɛ, hɛ̄ɛbɛ nīi e̍ ge̍ jo̍ōkū hīka aɔ̍lɔ yɔ̍ɔhɔtū yī aa̍ lɔkɔ nīi a yɔ̍ɔhɔtū yī ami ma̍.

24“Ādā! Awɔ de wa̍ de u a̍nɛ. N chikpo̍ nīi e̍ ge̍ hɔ̄ tāa ami la ɛbɛ nīi n hɔ̄ ma̍, hɛ̄ɛbɛ nīi e̍ ge̍ ma̍ rīgā nīi a de de u ma̍. Wu̍chē oji̍ nɛ, a yɔ̍ɔhɔtū yī u i̍ngɔ̍ɔ o̍bo̍bū nīi yɛchɛ ngma̍ a̍nɛ. 25Ādā! Awɔ ɔ̄chɛ ɔlɛkpakpa gɔ̄grāa nɛ. Yɛchɛ nūma̍ ma̍ i̍ je̍ wɔ ni̍. Ami je̍ wɔ. Aa̍ āchɛ yī u nūma̍ titi jo̍ōkū hīka aɔ̍lɔ de amɔ̍lɔ tɛ̄rɔ̄ wā a̍nɛ. 26N ka ochi̍chi̍ yī wɔ de wa̍, n chī ge̍ē ya̍ i̍ngɔ̍ɔ ē gāa iyɔ̄bū iyɔ̄bū, hɛ̄ɛbɛ nīi ɔhɔtū nīi a lɛ la ami ma̍ ge̍ hɔ̄ la aa̍ nīi ami ɔlɔjā titi ge̍ hɔ̄ la aa̍.”

Currently Selected:

Ijɔ̍ɔn 17: YBASR

Highlight

Copy