Ijɔ̍ɔn 18

E̍ de Iji̍sɔ̄ɔsi ku̍

(Ima̍tiyu 26:47-56; Ima̍aki 14:43-50; Ilu̍uku 22:47-53)

1Iji̍sɔ̄ɔsi kwɛ̍ɛjī la ɔhā nūma̍ la ojōji ma̍, o̍ ku̍ pīya ba̍la a̍chi̍kpo̍ yī nū. E̍ ga hɛ̍ Ɔmi̍yɛnɔrɛ̄ɛnya yī Iki̍drɔn ārɛ̄ ga oe̍. Yɛrɔ̄ yī īkpɔ̄ɔ̄chi̍ ɔha̍ hɔ̄ abɔ̍ɔ la ɛbɛ ɔla̍ā. Iji̍sɔ̄ɔsi ba̍la a̍chi̍kpo̍ yī nū pīya chɛ̄ gānyɔ̄. 2Iju̍dasi nīi - ɔlɔwɛ ma̍ chī je̍ ɛbɛ ɔla̍ā mɛ̍. Wu̍chē oji̍ nɛ, Iji̍sɔ̄ɔsi ba̍la a̍chi̍kpo̍ yī nū ē gāa abɔ̍ɔ ogbo̍gbe̍. 3Iju̍dasi wā ge̍ pīya ga yɛrɔ̄ ɔla̍ā bɛ̍ɛ̄nɛ̄. O̍ bī ribi yī icho̍ojiya ɔha̍ ba̍la āchɛ ogbō u̍nu̍ yī Ɔwɔ ku iyī nū gāa. Alɛhu̍ aligbe ba̍la Āchɛ yī Ifa̍rasīi de āchɛ nūma̍ tɛ̄rɔ̄ a̍nɛ. E̍ bī ɛjālɛ̄wu̍, bī otīnīkā ba̍la itɔ̍ɔchi cha̍cha̍. 4Iji̍sɔ̄ɔsi je̍ ɔjā wa̍a̍ nīi yɛ abɔ̍ɔ ge̍ē ya̍ ɔ̄ ma̍. Wu̍chē yī ɔla̍ā, o̍ wu̍ rɛ ga iyɔ̄bū, che wa̍ ikpo̍ hīka ɔ̄nyɛ nīi ɛ̍lɛ ē gāla̍ ma̍.

5Āchɛ ɛla̍ā ka ɔ̍lɔ “Iji̍sɔ̄ɔsi yī Ina̍jārɛ̄ɛti nɛ.”

Iji̍sɔ̄ɔsi ka de wa̍ ka anɔ̍lɔ hɔ̄ ma̍ a̍nɛ.

Iju̍dasi nīi - ɔ̄chɛ ɔchɔ̄ɔwɛ tū ɔ̄ ma̍ rɛ abɔ̍ɔ ba̍la āchɛ ɛla̍ā. 6Iji̍sɔ̄ɔsi ka hīka anɔ̍lɔ hɔ̄ ma̍ a̍nɛ, aa̍ wa̍a̍ chē gbūdūū gwāajɛ ga okwi̍ihi. 7Iji̍sɔ̄ɔsi gba̍a che wa̍ ikpo̍ hīka, ɔ̄nyɛ nīi ɛ̍lɛ ē gāla̍ ma̍?

E̍ ka ɔ̍lɔ, “Iji̍sɔ̄ɔsi yī Ina̍jārɛ̄ɛti nɛ.”

8Iji̍sɔ̄ɔsi koko̍o de wa̍ hīka, “Je̍ka n ka de ala̍ mɛ̍ hīka ami hɔ̄ ma̍ a̍nɛ! O̍ ge̍ - ami nīi ala̍ ē gāla̍ a̍nɛ, ɔ̍lɔma̍ ala̍ ā pi̍ye̍mā hī aa̍ enūma̍ nīi e̍ ge̍ pīya.” 9Lɛlā nūma̍ nīi Iji̍sɔ̄ɔsi ka ma̍ ya̍ lɛbɛ nīi lɛlā nīi o̍ ka o̍bū ma̍ ge̍ē de ē pīya ichɛ̄ɛhi. O̍ hīka, “Ādā! N i̍ de ɔ̄chɔ̄chɛ lipu̍ yī āchɛ nīi a de de u ma̍ pīyabi̍ ni̍.”

10Isa̍yi̍mɔ̄ɔn Ipi̍ta bī oge abɔ̍ɔ. O̍ pi ɔ̍ hi̍ya̍a̍ de ɔfiyɛ yī A̍dā Aligbe kpo̍ wɔrɔ̄ yī abɔ̄ līre̍ ɔpɔ̄ɔpɛ̄. Riyī yī ɔfiyɛ ɔla̍ā re̍ka Ima̍li̍kusi. 11Iji̍sɔ̄ɔsi ka tāa Ipi̍ta hīka, “De oge yī wɔ ɔla̍ā gatū la apɛ̍ yī nū. A gbɛri̍ya̍ ka amɔ̍lɔ i̍ ge̍ē nāa ɔgba̍galā yī ichi̍ nīi A̍dā yī u de de u ma̍ ni̍?”

E̍ bī Iji̍sɔ̄ɔsi ga ɛbɛ yī A̍nāasi

12Ribi yī icho̍ojiya ɔla̍ā ba̍la ɔlɛhu̍ yī wā tūla Iju̍u ɛla̍ā nīi - āchɛ ogbō u̍nu̍ yī Ɔwɔ ma̍ de Iji̍sɔ̄ɔsi ku̍ bɛ̍ɛ̄nɛ̄, de orī wā ɔ̄. 13E̍ bī ɔ̄ pīya ga ɛbɛ yī A̍nāasi yɔbɔ̄ɔbū. Anu̍ - a̍dā ɔlwɔlɛ̍ yī Ike̍yāfasi nīi re̍ka A̍dā Aligbe lɛ̍yi̍ ɔla̍ā ma̍ a̍nɛ. 14Anu̍ Ike̍yāfasi nūma̍ koko̍o de Iju̍u hīka, ɔ̍lɔ ngma̍ nīi ɔ̄chɛ ūkpo̍he ɔ̍lɔ ē pīyēku̍ de āchɛ wa̍a̍ a̍nɛ.

Ipi̍ta ta̍ahu̍ yī Iji̍sɔ̄ɔsi

(Ima̍tiyu 26:69-70; Ima̍aki 14:66-68; Ilu̍uku 22:55-57)

15Isa̍yi̍mɔ̄ɔn Ipi̍ta ba̍la a̍chi̍kpo̍ yī Iji̍sɔ̄ɔsi ɔha̍ de ku Iji̍sɔ̄ɔsi la u̍tu. A̍dā Aligbe je̍ a̍chi̍kpo̍ yī Iji̍sɔ̄ɔsi ɔmɛpa ɔla̍ā yɛ̍yɛ̍ ma̍, anu̍ de ku Iji̍sɔ̄ɔsi la u̍tu ga abɔ̍ɔ ga ipwɔ̍ɔ̄nū yī A̍dā Aligbe. 16Ipi̍ta ma̍ hɔ̄ abɔ̍ɔ la yɛchɛ la oko̍no̍grīgba. A̍chi̍kpo̍ yī Iji̍sɔ̄ɔsi ɔmɛpa ɔla̍ā nīi A̍dā Aligbe je̍ ɔ̄ yɛ̍yɛ̍ ma̍ chōo̍chē bīyɛchɛ wā ge̍ ka de ɔyi̍ ɔnɔ̄nyā nīi rɛ la oko̍nɔ̄ɔpu ma̍, o̍bū de Ipi̍ta bī chɛ̄ ga ipwɔ̍ɔ̄nū bɛ̍ɛ̄nɛ̄. 17Ɔyi̍ ɔnɔ̄nyā ɔla̍ā nīi rɛ la oko̍nɔ̄ɔpu ma̍ de Ipi̍ta hīka. “Je̍ka awɔ - a̍chi̍kpo̍ yī ɔngrɔ̄ɔ ɔla̍ā ɔha̍ nɛ?”

Ipi̍ta ta̍ hīka ɔ̍lɔ i̍ anu̍ ni̍!

18Ohū yɛ ē ya̍ la yɛ̄grāa ɔla̍ā. A̍chɛ̍ ba̍la āchɛ nīi ē gbɛ̄ɛbɛ ma̍ kpla̍ ɔla̍ tū la ɛhā, gblāa abɔ̍ɔ ta̍kakatū yɛ ē jɛ̄ ɔla̍. Ipi̍ta titi pīya ge̍ rɛ abɔ̍ɔ tāa aa̍ ē jɛ̄ ɔla̍.

A̍dā aligbe che Iji̍sɔ̄ɔsi ikpo̍ yī lɛlā

(Ima̍tiyu 26:59-66; Ima̍aki 14:55-64; Ilu̍uku 22:66-71)

19A̍dā Aligbe che Iji̍sɔ̄ɔsi ikpo̍ yī a̍chi̍kpo̍ yī nū ba̍la lɛlā nīi o̍ ē ngū ma̍. 20Iji̍sɔ̄ɔsi hīya anu̍ ɔkɔ hīka, “N ē kɛlā yī u hwōō la ɔgbādu ē de āchɛ wa̍a̍. Lɛlā yī u wa̍a̍ nīi n ē ngū āchɛ ma̍, n ē ngū abɔ̍ɔ la u̍nu̍ ogrēeyī yī Iju̍u ba̍la u̍nu̍ yī Ɔwɔ nīi re̍ka ɛbɛ ogrēeyī yī Iju̍u wa̍a̍ ma̍. N i̍ kɛlɛ̄lā la i̍kplɛ̍pa̍ je̍ ni̍. 21Oji̍ - ohu̍ nīi a chōo̍chē ge̍ē che um ikpo̍ ma̍? Che āchɛ nīi plɛ̍ɛ̄lā yī u ma̍ ikpo̍! Che wa̍ ikpo̍ yī lɛlā nīi n ka de wa̍ ma̍, ma̍a e̍ je̍ ɔjā nīi n ka ma̍!”

22Iji̍sɔ̄ɔsi kɛlā nūma̍ ma̍, ɔ̄chɛ ɔgbɛ̄ɛbɛ ɔha̍ nīi rɛ abɔ̍ɔ ma̍ dra̍ Iji̍sɔ̄ɔsi abɔ̄ ɔpɔ̄ɔpɛ̄, da Iji̍sɔ̄ɔsi hīka, kana̍ nīi ɔ̍lɔ u̍tu ē kɛlā i̍ngɔ̍ɔ ē tāa A̍dā Aligbe ma̍?

23Iji̍sɔ̄ɔsi hīyɔkɔ hīka, “N ge̍ kɛlā ɔha̍ ɔdwɔ̄bi̍, ɔ̍lɔma̍ de ka de āchɛ nīi gblāa ma̍ wa̍a̍ ma̍ gɛ! Lɛlā nīi n ka ma̍ ge̍ chī ku kpakpa, abɔ̄ ma̍ a chī dra̍ ami i̍ngɔ̍ɔ yī oji̍?”

24I̍ngɛ̍ɛ̄nɛ̄ nīi o̍ lɛ nīi A̍nāasi de Iji̍sɔ̄ɔsi tɛ̄rɔ̄ hu Ike̍yāfasi nīi - A̍dā Aligbe ma̍ a̍nɛ. E̍ de orī wā Iji̍sɔ̄ɔsi yɛ abɔ̍ɔ kpɔ̍ɔ̍ we̍.

Ipi̍ta gba̍a ta̍ahu̍ yī Iji̍sɔ̄ɔsi

(Ima̍tiyu 26:71-75; Ima̍aki 14:69-72; Ilu̍uku 22:58-62)

25Ipi̍ta e̍e rɛ abɔ̍ɔ ē jɛ̄ ɔla̍. Āchɛ ehēhī da ɔ̍ hīka, je̍ka ɔ̍lɔ - a̍chi̍kpo̍ yī ɔngrɔ̄ɔ ɔla̍ā ɔha̍ nɛ?

Ipi̍ta ta̍ahu̍ ka ɔ̍lɔ i̍ anu̍ ni̍.

26Ɔfiyɛ yī A̍dā aligbe ɔha̍ nīi - ɔɔ̍nɛ̍ yī onīi Ipi̍ta pi̍i̍ de ɔ̍ kpo̍ wɔrɔ̄ ma̍ rɛ abɔ̍ɔ. O̍ da Ipi̍ta hīka, “Je̍ka n ma̍ wɔ i̍gba̍a ba̍la Iji̍sɔ̄ɔsi abɔ̍ɔ la yɛrɔ̄ yī īkpɔ̄ɔ̄chi̍ ɔla̍ā?”

27Ipi̍ta gba̍a ka ɔ̍lɔ ge̍ īchāha̍-īchāha̍! Ɔpɔ̄ɔpɛ̄, ugū tɛ̄ra̍ yɛ̄grāa ɔla̍ā.

E̍ bī Iji̍sɔ̄ɔsi ga ɛbɛ yī Ipa̍yi̍lēeti

(Ima̍tiyu 27:1-2, 11-14; Ima̍aki 15:1-5; Ilu̍uku 23:1-5)

28La ɔ̄chɔ̄chī, e̍ bī Iji̍sɔ̄ɔsi pīya bū la wɔlɛ̍ yī Ike̍yāfasi ga ipwɔ̍ɔ̄nū yī Ipa̍yi̍lēeti nīi - ɔ̄chɛ odeyīrɛ ajɛ ɔla̍ā wa̍a̍ ma̍. Āchɛ yī Iju̍u i̍ chɛ̄ ga ipwɔ̍ɔ̄nū ni̍. Wu̍chē oji̍ nɛ, e̍ chikpo̍ ge̍ē de iyī wā la cha̍cha̍ hī lɛlā ɔdwɔ̄bi̍ hɛ̄ɛbɛ ge̍ē re̍ ojōre̍ yī Ɔwɔ̄wīyā yī Owu̍lā ɔla̍ā. 29Wu̍chē yī ɔla̍ā, Ipa̍yi̍lēeti wā ge̍ bīyɛchɛ gāa ge̍ che wa̍ ikpo̍ hīka, “Oji̍ nīi ala̍ lɛ ge̍ē ka ē ku̍ ɔngrɔ̄ɔ nūma̍ ma̍?”

30E̍ hīya Ipa̍yi̍lēeti ɔkɔ hīka, “Ma̍ ko̍ō, ɔngrɔ̄ɔ nūma̍ i̍ ge̍ē yɛ̍ɛ̄lā abi̍ ni̍ nɛ, alɔ i̍ ge̍ bī ɔ̄ wā la ɛbɛ yī wɔ ni̍?”

31Ipa̍yi̍lēeti da wa̍ hīka, “Ɔ̍lɔma̍, ala̍ ā bī ɔ̄ pīya ge̍ klɛpɔ̄ tāa anu̍ lɔkɔ nīi Lihɔ yī ala̍ chikpo̍ ma̍ gɛ.”

Āchɛ yī Iju̍u ɛla̍ā gba̍a hīya anu̍ ɔkɔ hīka, “Alɔ i̍ lwɔhu̍ ge̍ē de ɔ̄chɛ ē ngmo̍ wu̍chē yī lɛlā nīi o̍ ya̍ ma̍ ni̍.” 32Lɛlā nūma̍ ya̍ lɛbɛ nīi lɛlā yī Iji̍sɔ̄ɔsi ɔlɔjā nīi o̍ ka yɛ̄grāa ɔha̍ ku̍ ita yī ɔpīyaku̍ nīi o̍ ge̍ē ku̍ ma̍ ge̍ē de pīya ichɛ̄ɛhi.

33Ipa̍yi̍lēeti wā ge̍ ku̍chē pīya ga ipwɔ̍ɔ̄nū bɛ̍ɛ̄nɛ̄. O̍ de Iji̍sɔ̄ɔsi hɛ̄ra̍, che ɔ̍ ikpo̍ hīka ɔ̍lɔ - ɔchwɔ̄lɛ̍ yī Iju̍u nɛ?

34Iji̍sɔ̄ɔsi da Ipa̍yi̍lēeti hīka, “Ikpo̍ yī lɛlā nūma̍ bū la abɔ̄ yī awɔ ɔlɔjā kɛ̄ɛ āchɛ ɛha̍ kɛlā yī u i̍ngɔ̍ɔ de wɔ ma̍?”

35Ipa̍yi̍lēeti da Iji̍sɔ̄ɔsi hīka, “Ami u̍tu - ɔ̄chɛ yī Iju̍u nɛ kɛ̄ɛ? Je̍ka āchɛ yī awɔ ɔlɔjā ba̍la alɛhu̍ aligbe yī wā ku̍ wɔ bī wā ge̍ de u a̍nɛ. Lɛlā oji̍ nīi a ya̍ ma̍?”

36Iji̍sɔ̄ɔsi koko̍o de ɔ̍ bɛ̍ɛ̄nɛ̄ hīka, “Ma̍ gɛ ko̍ō! Ɔchwɔ̄lɛ̍ Oro̍ōre̍ yī u i̍ iyī yɛchɛ nūma̍ ni̍. Ɔchwɔ̄lɛ̍ oro̍ōre̍ yī u ge̍ - iyī yɛchɛ nūma̍ nɛ, āchɛ yī u ke̍ ge̍ yɛ amu ē nunu lɛhu̍ yī u. E̍ ke̍ ge̍ yɛ amu ē nyiya hɛ̄ɛbɛ nīi e̍ i̍ ē de u ē ku̍ de āchɛ yī Iju̍u ni̍. Ɔchwɔ̄lɛ̍ oro̍ōre̍ yī u i̍ iyī yɛchɛ nūma̍ ni̍ lachi̍lachi̍.”

37Ipa̍yi̍lēeti gba̍a che ɔ̍ ikpo̍ hīka, “Awɔ - ɔchwɔ̄lɛ̍ nɛ?”

Iji̍sɔ̄ɔsi hīya anu̍ ɔkɔ hīka, “I̍ngɔ̍ɔ nīi a ka a̍nɛ. Ɔla̍ā ohu̍ nīi e̍ ma u wā lipu̍ yī yɛchɛ nūma̍ a̍nɛ. N wā hɛ̄ɛbɛ nīi n ge̍ē tū itɛ̍ɛhi̍yɛ̍ yī lɛlā olēchi̍ lēchi̍. Ɔ̄chɛmɔ̄chɛ nīi ge̍ ɔ̄chɛ yī lɛlā olēchi̍ lēchi̍ ma̍ ē po̍ ɔkɔlɛ̄lā yī u.”

38Ipa̍yi̍lēeti che ɔ̍ ikpo̍ ka oji̍ ɔ̍lɔ chī re̍ka lɛlā olēchi̍ lēchi̍ ma̍?

E̍ hɛ̍ Iji̍sɔ̄ɔsi ɔpīyaku̍

(Ima̍tiyu 27:15-31; Ima̍aki 15:6-20; Ilu̍uku 23:13-25)

Ipa̍yi̍lēeti gba̍a wā ge̍ bīyɛchɛ ga yɛchɛ dikpo̍ba̍ āchɛ yī Iju̍u ge̍ koko̍o de wa̍ hīka, “Ami i̍ ma̍ lɛlɛ̄lā nīi ohu̍ nīi n ge̍ē de lɛpɔ̄ ku̍ ɔ̄ ni̍. 39Bāa lɛlā yī ɔchɔ̍ɔwɔ yī ala̍ ma̍, myɛ̄grāa-myɛ̄grāa nīi Ɔwɔ̄wīyā yī Owu̍lā ge̍ē kū ma̍, n ē de oligbakɔbɔ ɔha̍ ē wu̍ ngmɛ̍ɛchɛ ē de ala̍. O̍ lɛ i̍ngɔ̍ɔ bɛ̍ɛ̄nɛ̄ ma̍, n ē de ɔchwɔ̄lɛ̍ yī Iju̍u wu̍ ngmɛ̍ɛchɛ de ala̍ bɛ̍ɛ̄nɛ̄ ni̍?”

40O̍ ka i̍ngɔ̍ɔ ɔpɔ̄ɔpɛ̄ ma̍, aa̍ wa̍a̍ to̍ohwe̍e ka ɔ̍lɔ ge̍, “Ehe̍ oo! Alɔ i̍ chikpo̍ yī nū ni̍. Ibara̍bāsi nīi alɔ chikpo̍ a̍nɛ oo!” Ibara̍bāsi nūma̍ pi̍i̍ chī ɔba̍ka yī uwī ɔnɔ̄kɔ̄kū gba̍a̍ nɛ.

Currently Selected:

Ijɔ̍ɔn 18: YBASR

Highlight

Copy