Ijɔ̍ɔn 19

1Bɛ̍ɛ̄nɛ̄ ma̍ Ipa̍yi̍lēeti ka nīi icho̍ojiya bī Iji̍sɔ̄ɔsi pīya ge̍ gwō ɔ̄ lijē la a̍grɛ̄chi̍. 2Icho̍ojiya ɛla̍ā ya̍ ɔjā ɔkla̍lɛhu̍ la ijīijē ke̍e̍ de kla̍ anu̍ lɛhu̍. E̍ de aru̍ ɔkwajɛ ɔnɔ̄ɔ̍ɔ̄a̍ ɔha̍ ru ɔ̍. 3E̍ ē gāa ge̍ē de ɔ̄ o̍be hīka ɔ̍lɔ ge̍, “Gbo̍kɛkɛ ādā, ɔchwɔ̄lɛ̍ yī Iju̍u,” gāa ge̍ē dra̍ anu̍ itābɔ̄.

4Ipa̍yi̍lēeti gba̍a bīyɛchɛ gāa ge̍ koko̍o de wa̍ hīka, “Ala̍ ma̍ gɛ ko̍ō! N ge̍ē bī ɔngrɔ̄ɔ nūma̍ wā amu yɛchɛ ē dikpo̍ba̍ ala̍, hɛ̄ɛbɛ nīi ala̍ ē ma̍ hīka n i̍ lɛ ochi̍chi̍ yī lɛlɛ̄lā lɛbɛ ge̍ē de lɛpɔ̄ ku̍ ɔ̄ ni̍.” 5Iji̍sɔ̄ɔsi bīyɛchɛ wā la yɛchɛ bɛ̍ɛ̄nɛ̄. O̍ e̍e ru aru̍ ɔnɔ̄ɔ̍ɔ̄a̍ ɔla̍ā ba̍la ɔjā ɔkla̍lɛhu̍ olijīijē ɔla̍ā yɛ abɔ̍ɔ we̍. Ipa̍yi̍lēeti ka ɛ̍lɛ ge̍ ma̍ gɛ! Ɔ̍lɔ hɔ̄ ma̍ mɛ̍.

6Alɛhu̍ aligbe ba̍la āchɛ ɔgbɛ̄ɛbɛ ɛla̍ā ma̍ Iji̍sɔ̄ɔsi ma̍, e̍ to̍ohwe̍e ka ɛ̍lɛ ge̍ de ɔ̍lɔ gwōba̍ oo. Ɛ̍lɛ ge̍ de ɔ̍lɔ gwōba̍ la ɔchi̍ ɔhrɛ̍ɛpa.

Ipa̍yi̍lēeti de wa̍ bɛ̍ɛ̄nɛ̄ hīka, “Ala̍ ɛlɛjā ala̍ bī ɔ̄ pīya gɛ, hɛ̄ɛbɛ nīi ala̍ ge̍ de ɔ̍ gwōba̍ la ɔchi̍ ɔhrɛ̍ɛpa. Ami ma̍ i̍ ma̍ ochi̍chi̍ yī lɛlɛ̄lā nīi n ge̍ē de lɛpɔ̄ ku̍ ɔ̄ ni̍.”

7Iju̍u ɛla̍ā hīya anu̍ ɔkɔ bɛ̍ɛ̄nɛ̄ hīka, “Alɔ lɛ lihɔ. Lɔkɔ nīi lihɔ ɔla̍ā chī ka ma̍, ɔngrɔ̄ɔ nūma̍ i̍ ngma̍ la ɔhɔ̄ amu la eyī gɛ ni̍. Wu̍chē oji̍ nɛ, o̍ ka hīka anɔ̍lɔ - Ɔyi̍ yī Ɔwɔ nɛ.”

8Ipa̍yi̍lēeti plɛ̍ɛ̄lā nūma̍ nīi e̍ ka ma̍, o̍ de tūuhwi ga iyɔ̄bū iyɔ̄bū. 9O̍ ku̍chē ga ipwɔ̍ɔ̄nū ge̍ che Iji̍sɔ̄ɔsi ikpo̍ hīka ɔ̍lɔ bū la aba̍?

Iji̍sɔ̄ɔsi i̍ chɛ̄ hīya anu̍ ɔkɔ ni̍. 10Ipa̍yi̍lēeti da Iji̍sɔ̄ɔsi hīka, “A i̍ chɛ̄ ge̍ē kɛlā tāa ami ni̍? A i̍ jo̍ōkū hīka amɔ̍lɔ lwɔhu̍ ge̍ē hɛ̍ aɔ̍lɔ ē ta̍ kɛ̄ɛ ē ka nīi ɛ̍lɛ ē de aɔ̍lɔ ē gwōba̍ la ɔchi̍ ɔhrɛ̍ɛpa ē mɛ ni̍?”

11Iji̍sɔ̄ɔsi hīya anu̍ ɔkɔ bɛ̍ɛ̄nɛ̄ hīka, “A i̍ lwɔhu̍ ɔha̍lɔha̍ lɛhu̍ yī u ni̍, ɔ̍chi̍kpa̍kpa̍ wɔhu̍ nīi Ɔwɔ de de wɔ ma̍! Wu̍chē yī ɔla̍ā, ɔ̄chɛ nīi ku̍ u wā ge̍ de wɔ ma̍, anu̍ gblɛfiyɛ yī lɛlā ɔdwɔ̄bi̍ gɔ̄ga a̍nɛ.”

12Ipa̍yi̍lēeti po̍ i̍ngɔ̍ɔ ma̍, o̍ gāla̍ ɔpɔ̄pū kpɛ̍ɛ hɛ̄ɛbɛ ge̍ē de Iji̍sɔ̄ɔsi ē hɛ̍ta̍. Āchɛ yī Iju̍u to̍ohwe̍e ka grāa anu̍ hīka ɔ̍lɔ ge̍ tu̍labɔ̄ hī ɔngrɔ̄ɔ ɔla̍ā, ɔ̍lɔma̍ ɔ̍lɔ i̍ ɔya yī Isi̍sa Ɔchwɔ̄lɛ̍ Ɔnɔ̄kɔ̄kū ni̍. Wu̍chē oji̍ nɛ, ɔ̄chɛmɔ̄chɛ nīi - ɔ̍lɔ ge̍ ka hīka anɔ̍lɔ ɔchwɔ̄lɛ̍ nɛ, ɔlɔjā ɔ̍lɔ - oluji yī Isi̍sa nɛ!

13Ipa̍yi̍lēeti plɛ̍ɛ̄lā nūma̍ wa̍a̍ ma̍, o̍ ngmɛ̍ɛchɛ la Iji̍sɔ̄ɔsi ga yɛchɛ, gāa ge̍ hyāhɔ̄ la igblɛ̍chi̍ yī ihiyo yī nū abɔ̍ɔ la ɛbɛ nīi re̍ka, “Lɛchɔ̄ Ɔkla̍ patapata” ma̍. E̍ ē hī ɛbɛ ɔla̍ā ka “Igaba̍ta” la oko̍o yī Ihi̍bru. 14Yɛ̄grāa ɔla̍ā, yɛnɔ gbajɛ yakpalɛ̄hu̍ yɛ gāa mɛ̍. O̍ chī ɔ̄chī nīi lā che ɔ̄chī yī Ɔwɔ̄wīyā yī Owu̍lā ma̍ nɛ. Ipa̍yi̍lēeti koko̍o de Iju̍u hīka ɔchwɔ̄lɛ̍ yī ɛ̍lɛ hɔ̄ ma̍ mɛ̍ ko̍ō!

15Aa̍ wa̍a̍ to̍ohwe̍e hīka ɛ̍lɛ ge̍ de ɔ̍lɔ ngmo̍! Ɛ̍lɛ ge̍ ngmo̍ ɔ̍lɔ! Ɛ̍lɛ ge̍ de ɔ̍lɔ gwōba̍ la ɔchi̍ ɔhrɛ̍ɛpa!

Ipa̍yi̍lēeti ka ɔ̍lɔ ge̍ u̍ū! Re̍ka ɛ̍lɛ chikpo̍ nīi anɔ̍lɔ ge̍ē de ɔchwɔ̄lɛ̍ yī ɛ̍lɛ ē gwōba̍ la ɔchi̍ ɔhrɛ̍ɛpa?

Alɛhu̍ aligbe hīya anu̍ ɔkɔ hīka aɛ̍lɛ i̍ lɛ ɔchwɔ̄lɛ̍ ɔha̍lɔha̍ ba̍la Isi̍sa gɛ ni̍ oo!

16Ipa̍yi̍lēeti tu̍labɔ̄ hī Iji̍sɔ̄ɔsi de wa̍ nīi e̍ ge̍ē bī ɔ̄ pīya ge̍ē gwōba̍ la ɔchi̍ ɔhrɛ̍ɛpa bɛ̍ɛ̄nɛ̄.

E̍ de Iji̍sɔ̄ɔsi gwōba̍ la ɔchi̍ ɔhrɛ̍ɛpa

(Ima̍tiyu 27:32-44; Ima̍aki 15:21-32; Ilu̍uku 23:26-43)

Bū la ɛbɛ ɔla̍ā, Iji̍sɔ̄ɔsi hɔ̄ la abɔ̄ yī āchɛ yī Iju̍u bɛ̍ɛ̄nɛ̄. 17Anu̍ ɔlɔjā yɛɛ, bī ɔchi̍ ɔhrɛ̍ɛpa yī nū ga ɛbɛ nīi re̍ka, “Ɛbɛ yī Īkplɛ̄hu̍ Āchɛ” ma̍ a̍nɛ. E̍ ē hī ɛbɛ ɔla̍ā ka, “Igo̍li̍gōta” la oko̍o yī Ihi̍bru. 18E̍ de Iji̍sɔ̄ɔsi gwōba̍ la ɔchi̍ ɔhrɛ̍ɛpa abɔ̍ɔ. E̍ gba̍a de angrɔ̄ɔ āchɛ ɛpa ɛha̍ gwōba̍ la ɔchi̍ ɔhrɛ̍ɛpa ɛha̍ i̍ngi̍ngɔ̍ɔ abɔ̍ɔ. Iyī ɔha̍ rɛ la oe̍ ɔha̍, ɔha̍ rɛ la oe̍ ɔmɛpa, iyī Iji̍sɔ̄ɔsi tū la ɔprɛ̍ɛpa yī wā. 19Ipa̍yi̍lēeti ta̍ ɔjā ɔha̍ nīi e̍ de ba̍ abɔ̍ɔ la ɔchi̍ ɔhrɛ̍ɛpa yī Iji̍sɔ̄ɔsi. O̍ ta̍ ba̍ abɔ̍ɔ hīka, “IJI̍SƆ̄ƆSI YĪ INA̍JĀRƐ̄ƐTI - ƆCHWƆ̄LƐ̍ YĪ IJU̍U.” 20Iju̍u yɛ̄mɛ̄mɛ̄ yɛ ē ga ma̍, e̍ ē ma̍ ɔjā ɔla̍ā nīi o̍ ta̍ ba̍ ma̍. Wu̍chē oji̍ nɛ, ɛbɛ ɔla̍ā lɛ kurɛkurɛ ga ipwɔ̍ɔ̄lɛ̍. O̍ ta̍ ɔjā ɔla̍ā la oko̍o yī ɔcha yī Ihi̍bru ba̍la Ila̍tin ba̍la Igri̍iki. 21Alɛhu̍ aligbe yī Iju̍u gāa ge̍ ka de Ipa̍yi̍lēeti ka ɔ̍lɔ ge̍ e̍e ta̍ ba̍ hīka, “Ɔchwɔ̄lɛ̍ yī Iju̍u” ni̍. Ɔ̍lɔ ge̍ ta̍ ba̍ hīka, “Ɔngrɔ̄ɔ nūma̍ ka anɔ̍lɔ - Ɔchwɔ̄lɛ̍ yī Iju̍u nɛ.”

22Ipa̍yi̍lēeti koko̍o de wa̍ hīka ɔjā nīi anɔ̍lɔ ta̍ ba̍ ma̍, anɔ̍lɔ de ta̍ ba̍ mɛ̍.

23Icho̍ojiya ɛla̍ā de Iji̍sɔ̄ɔsi gwōba̍ la ɔchi̍ kwɛ̍ɛjī ma̍, e̍ kpo̍ ɛjā otūlibi̍īyē yī nū de kɔ̄ la ɛbɛ ɛnɛ tāa iyī wā, aa̍ āchɛ ɛnɛ. E̍ gba̍a de aru̍ ɔkwajɛ yī nū ɔla̍ā nīi e̍ bī ɔ̄pa̍ ūkpo̍he nōnu ke̍e̍ nīi e̍ i̍ gɔ̍ɔ̄gɔ̍ la ɛbɛbɛ ni̍ ma̍ nāa. 24Icho̍ojiya ɛla̍ā ka de iyī wā ka aɛ̍lɛ ge̍ e̍e de aru̍ ɔkwajɛ ɔla̍ā hi̍ya ni̍. Aɛ̍lɛ ge̍ ta̍ ɔjā ɔha̍ la ajɛ bāa ɛbā ma̍, hɛ̄ɛbɛ nīi aɛ̍lɛ ge̍ ma̍ hīka ɔ̄nyɛ ɔ̍lɔ ge̍ē de ē lɛ ma̍. Lɛlā ɔla̍ā ya̍ nīi lɛlā nīi tū la Īpū yī Ɔwɔ ma̍ ge̍ē de ē pīya ichɛ̄ɛhi,

“E̍ de ɛjā otūlibi̍īyē yī u kpo̍ kɔ̄ tāa iyī wā.

E̍ ta̍ ɔjā ɔha̍ la ajɛ bāa ɛbā ma̍ wu̍chē yī aru̍ ɔkwajɛ yī u.”

I̍ngɔ̍ɔ ke̍e̍ nīi icho̍ojiya ɛla̍ā ya̍ a̍nɛ.

25Ɛ̍nɛ̍ yī Iji̍sɔ̄ɔsi, ba̍la ɔɔ̍nɛ̍nɛ̍ yī nū ɔnɔ̄nyā ɔha̍ ba̍la Imeri̍ nīi - ɔnyā yī Iklo̍pasi ma̍ ba̍la Imeri̍ Oyo̍olima̍gīdala gblāa abɔ̍ɔ bla̍a ɔchi̍ ɔhrɛ̍ɛpa yī Iji̍sɔ̄ɔsi. 26Iji̍sɔ̄ɔsi ma̍ ɛ̍nɛ̍ yī nū ba̍la a̍chi̍kpo̍ yī nū nīi re̍ka ɔhɔtū yī nū ma̍ nīi e̍ rɛ abɔ̍ɔ ma̍, ka grāa ɛ̍nɛ̍ yī nū hīka, “Ɛ̄nɛ̄, ɔyi̍ yī wɔ rɛ aa̍ a̍nɛ.”

27O̍ gba̍a ka de a̍chi̍kpo̍ yī nū ɔla̍ā nīi re̍ka ɔhɔtū yī nū ma̍ hīka, “Ɔyi̍, ɛ̍nɛ̍ yī wɔ rɛ aa̍ a̍nɛ.” Bū la i̍chi̍chɛ ɔla̍ā, a̍chi̍kpo̍ yī Iji̍sɔ̄ɔsi ɔla̍ā bī ɛ̍nɛ̍ yī nū pīya ge̍ hɔ̄ la wɔlɛ̍ yī nū.

Ɔpīyaku̍ yī Iji̍sɔ̄ɔsi

(Ima̍tiyu 27:45-56; Ima̍aki 15:33-41; Ilu̍uku 23:44-49)

28Iji̍sɔ̄ɔsi jo̍ōkū hīka lɛlāha̍-ɛlāha̍ wa̍a̍ ɔ̍lɔ de chlɛhu̍ mɛ̍. Wu̍chē lɔkɔ nīi lɛlā yī Īpū yī Ɔwɔ ge̍ē de pīya ichɛ̄ɛhi ma̍, o̍ ka hīka, odīyenyi ɔ̍lɔ yɛ amu ē ya̍ anu̍.

29Ɛ̍mwɔ̄ ɔmɔ̍ɔ̄ma̍-mɔ̍ɔ̄ma̍ ɔha̍ mu u̍kpu̍ūhā rɛ abɔ̍ɔ. E̍ gāa ge̍ nāa ipu yī owu̍, de ru ɛ̍mwɔ̄ ɔla̍ā, de pla̍tū la ɔchi̍ ɔha̍ nīi re̍ka ihi̍sɔ̄pu ma̍, nā ɔ̄ kpaa ge̍ ku Iji̍sɔ̄ɔsi la oko̍o. 30Iji̍sɔ̄ɔsi pi ɛ̍mwɔ̄ ɔla̍ā gwa̍ ɔpɔ̄ɔpɛ̄ ka hīka ɔ̍lɔ kwɛ̍ɛjī mɛ̍!

O̍ chlɛhu̍ kpɔkɔ̍ɔ̍, hīya ɔtū du̍mɔ̍.

E̍ gwō abada tū Iji̍sɔ̄ɔsi la yɛgɔ̄

31Āchɛ yī Iju̍u gāa ge̍ ra̍ābɔ̄ de Ipa̍yi̍lēeti ka aɛ̍lɛ ge̍ē kpo̍ āchɛ ɛla̍ā nīi e̍ de wa̍ ngmo̍ ma̍ ē chrīkpo̍. Aɛ̍lɛ ge̍ē de ɛ̍lɛ ē kpo̍ ē hrāa ē hī ɔchi̍ ɔhrɛ̍ɛpa nīi e̍ de wa̍ gwōba̍ ma̍. Ɔjā nīi ohu̍ nīi e̍ ya̍ i̍ngɔ̍ɔ ma̍, i̍chi̍chɛ ɔla̍ā - ɔ̄chī nīi lā che Ɔ̄chī Ɔmyɛ̍nyɛ̍ ma̍ a̍nɛ. E̍ i̍ chikpo̍ nīi okū yī wā ge̍ pla abɔ̍ɔ la ɔchi̍ ɔhrɛ̍ɛpa la Ɔ̄chī Ɔmyɛ̍nyɛ̍ ni̍. Ɔ̄chī Ɔmyɛ̍nyɛ̍ ɔla̍ā pi̍i̍ nīi yɛ ē wā ma̍ gba̍a - ɔ̄chī ɔnɔ̄kɔ̄kū ode kwɔbɔ̄ de Ɔwɔ nɛ. 32Wu̍chē yī ɔla̍ā, icho̍ojiya gāa ge̍ de ɔngrɔ̄ɔ ɔrāarāa ba̍la ɔmɛpa yī wā nīi e̍ de gwōba̍ ba̍la Iji̍sɔ̄ɔsi ma̍ kpo̍ chrīkpo̍. 33E̍ ga ɛbɛ yī Iji̍sɔ̄ɔsi ma̍, e̍ ma̍ hīka ɔ̍lɔ pīyaku̍ mɛ̍. Wu̍chē yī ɔla̍ā, e̍ i̍ de ɔ̍ chrīkpo̍ gɛ ni̍. 34Icho̍ojiya ɔha̍ gāa ge̍ de abada gwōtū Iji̍sɔ̄ɔsi la yɛgɔ̄. Ɔpɔ̄ɔpɛ̄, yeyī ba̍la yenyi pɛ̍ hunū. 35Oko̍o yī lɛlā yī ɔ̄chɛ nīi bī eyī mɔ̍ɔ̄ma̍ ma̍ hɔ̄ ma̍ a̍nɛ. Lɛlā nīi o̍ ka ma̍ chī - ichɛ̄ɛhi nɛ. Anu̍ ɔlɔjā jo̍ōkū hīka lɛlā lēchi̍ nīi anɔ̍lɔ ka a̍nɛ. O̍ ya̍ hɛ̄ɛbɛ nīi ala̍ titi ge̍ē chɛ̄ku ɔ̍. 36Lɛlā ɔla̍ā wa̍a̍ ya̍ lɛbɛ nīi lɛlā nūma̍ nīi tū la Īpū yī Ɔwɔ ma̍ ge̍ē de ē pīya ichɛ̄ɛhi. “Ukpoku̍ yī anu̍ pi̍i̍, ɔ̄chɔ̄chɛ i̍ ge̍ē chē ɔha̍lɔha̍ ārɛ̄ ni̍.” 37Ɛbɛ ɔha̍ yī īpū yī Ɔwɔ gba̍a ka hīka, “Āchɛ ge̍ē de eyī kɔ̍ anu̍ ɔ̄chɛ nīi e̍ gwō ɔjā tū ɔ̄ ma̍.”

Onyōnyi yī Iji̍sɔ̄ɔsi

(Ima̍tiyu 27:57-61; Ima̍aki 15:42-47; Ilu̍uku 23:50-56)

38La okwi̍ihi yī ɔla̍ā, Ijo̍sɛ̄ɛfu nīi - Ɔlarīmati̍ya ma̍ gāa ge̍ ra̍ābɔ̄ de Ipa̍yi̍lēeti ka anɔ̍lɔ ge̍ē nāa okū yī Iji̍sɔ̄ɔsi. Ijo̍sɛ̄ɛfu nūma̍ - a̍chi̍kpo̍ yī Iji̍sɔ̄ɔsi nɛ. O̍ ē chī yɛ lɛ̍bɛ̍ba, wu̍chē oji̍ nɛ, o̍ ē tūuhwi yī alɛhu̍ yī Iju̍u. Ipa̍yi̍lēeti de wɔhu̍ de ɔ̍ ka ɔ̍lɔ ge̍ nāa okū gɛ. Ijo̍sɛ̄ɛfu pīya gāa ge̍ de okū nāa bɛ̍ɛ̄nɛ̄. 39Ɔngrɔ̄ɔ ɔha̍ nīi re̍ka Inikode̍mūusi, nīi ē ga ɛbɛ yī Iji̍sɔ̄ɔsi la oto̍tu̍ ma̍ yɛ abɔ̍ɔ ba̍la Ijo̍sɛ̄ɛfu. O̍ bī ɔchi̍ oni̍pī kwɛ̍kwɛ̍ ɔha̍ nīi e̍ ya̍ la ɔchi̍ nīi re̍ka ima̍a ba̍la a̍lōosi ma̍ gāa. Yɛnu̍ yī ɔchi̍ oni̍pī kwɛ̍kwɛ̍ ɔla̍ā ke̍e̍ gbajɛ la iki̍lōgram ohu ɛpa che ɛrwɔ̄. 40Aa̍ āchɛ ɛpɛpa ɛla̍ā de okū yī Iji̍sɔ̄ɔsi nāa, de ābāchā onīpīpɛ̄ mi̍ya anu̍ gblɛ̍ɛgblɛ̍ɛ ba̍la ɔchi̍ oni̍pī kwɛ̍kwɛ̍ ɔla̍ā. E̍ ya̍ lɔkɔ nīi Iju̍u ē tū okū yī wā iho̍ ma̍. 41Yɛrɔ̄ yī īkpɔ̄ɔ̄chi̍ ɔha̍ hɔ̄ abɔ̍ɔ bla̍a ɛbɛ nīi e̍ ngmo̍ Iji̍sɔ̄ɔsi ma̍. Abɔ̍ɔ la yɛrɔ̄ ɔla̍ā, wɔ̄gɔ̄ yī u̍nwɔ̍wu̍ ɔha̍ nīi e̍ bū nīi e̍ i̍ nyi ɔ̄chɔ̄chɛ la anu̍ je̍ ni̍ ma̍ hɔ̄ abɔ̍ɔ. 42Wu̍chē lɔkɔ nīi i̍chi̍chɛ ɔla̍ā lā che Ɔ̄chī Ɔmyɛ̍nyɛ̍ yī Iju̍u wa̍a̍ ma̍, ba̍la ɔkɔ nīi ɛbɛ lɛ kurɛkurɛ gba̍a̍ ma̍, e̍ de Iji̍sɔ̄ɔsi nyi abɔ̍ɔ.

Currently Selected:

Ijɔ̍ɔn 19: YBASR

Highlight

Copy