Ijɔ̍ɔn 20

Ohye̍ēyī la okū yī Iji̍sɔ̄ɔsi

(Ima̍tiyu 28:1-8; Ima̍aki 16:1-8; Ilu̍uku 24:1-12)

1La obūrɔ̍ɔ̄chī yī Ɔ̄chī I̍kɔ̍ɔbahɛ, yɛ̄grāa nīi ɛbɛ e̍e dobū ma̍, Imeri̍ Oyo̍olima̍gīdala pīya ga abɔ̍ɔ ga ɛbɛ yī u̍nwɔ̍wu̍ ɔla̍ā. O̍ ma̍ nīi e̍ de lɛchɔ̄ mi̍ya hī oko̍o yī wɔ̄gɔ̄ ɔla̍ā. 2O̍ pīya kpa̍ta̍ la ɛnya dikpo̍ba̍ Isa̍yi̍mɔ̄ɔn Ipi̍ta ba̍la a̍chi̍kpo̍ ɔla̍ā nīi re̍ka ɔhɔtū yī Iji̍sɔ̄ɔsi ma̍ gāa ge̍ de koko̍o de wa̍ ka ɛ̍lɛ de Ādā nāa pīya hī u̍nwɔ̍wu̍ ɔla̍ā mɛ̍. Aɛ̍lɛ i̍ chī je̍ ɛbɛ nīi ɛ̍lɛ bī ɔ̍lɔ ge̍ gbo ma̍ ni̍.

3Ipi̍ta ba̍la a̍chi̍kpo̍ yī Iji̍sɔ̄ɔsi ɔla̍ā ga abɔ̍ɔ ga ɛbɛ yī u̍nwɔ̍wu̍ ɔla̍ā bɛ̍ɛ̄nɛ̄. 4E̍ rɛ̄ɛnya. A̍chi̍kpo̍ yī Iji̍sɔ̄ɔsi ɔla̍ā rɛ̄ɛnya gla Ipi̍ta ta̍, gbajɛ ga abɔ̍ɔ yɔbū de Ipi̍ta. 5O̍ pu̍ kpɛ̍ɛ̍ ma̍ ābāchā nīi e̍ de mi̍ya okū yī Iji̍sɔ̄ɔsi ma̍ nīi e̍ gblāa abɔ̍ɔ. O̍ i̍ chī chɛ̄ ga wɔ̄gɔ̄ ni̍. 6Isa̍yi̍mɔ̄ɔn Ipi̍ta nīi yɛ la okwi̍ihi ma̍ wā ge̍ chɛ̄ ga wɔ̄gɔ̄ ɔla̍ā ɔpɔ̄ɔpɛ̄. O̍ ma̍ ābāchā ɛla̍ā nīi gblāa abɔ̍ɔ ma̍. 7O̍ chī gba̍a ma̍ ɔ̄pa̍ nīi e̍ de ta̍ Iji̍sɔ̄ɔsi lɛhu̍ ma̍ lā abɔ̍ɔ lɛ̍kɛ̍kɔ̍ hī ābāchā nīi e̍ de mi̍ya Iji̍sɔ̄ɔsi ma̍. O̍ hɔ̄hā ke̍e̍ lā abɔ̍ɔ lɛ̍kɛ̍kɔ̍. 8Bɛ̍ɛ̄nɛ̄ ma̍, anu̍ a̍chi̍kpo̍ yī Iji̍sɔ̄ɔsi ɔla̍ā nīi gbajɛ abɔ̍ɔ yɔbɔ̄ɔbū ma̍ wā ge̍ plɛ̍hu̍ chɛ̄ ga wɔ̄gɔ̄ titi. O̍ ma̍ ɔjā ɔla̍ā wa̍a̍ ma̍, o̍ chɛ̄. 9E̍ i̍ chī je̍ ochi̍chi̍ yī lɛlā yī Īpū yī Ɔwɔ nīi ka hīka ɔ̍lɔ ge̍ē hye̍ēyī la okū ma̍ ni̍ kpɔ̍. 10Aa̍ āchɛ ɛpɛpa ɛla̍ā wā ge̍ pīya yī wɔlɛ̍ bɛ̍ɛ̄nɛ̄.

Iji̍sɔ̄ɔsi de iyī nū chabɔ̄ hu̍ Imeri̍ Oyo̍olima̍gīdala

(Ima̍tiyu 28:9-10; Ima̍aki 16:9-11)

11Imeri̍ wā ge̍ rɛ abɔ̍ɔ ē drɛ̄ɛgba la oko̍o yī wɔ̄gɔ̄ yī u̍nwɔ̍wu̍ ɔla̍ā. O̍ yɛ ē drɛ̄ɛgba ma̍, o̍ pu̍ eyī kpɛ̍ɛ̍ myɛ̍ma̍ ga wɔ̄gɔ̄. 12O̍ ma̍ ayɛ̍ɛ̄chɛ̄rɔ̄ yī Ɔwɔ āchɛ ɛpa nīi tū ɛjā ɛnɛ̄rɛ̍ɛ̄rɛ̍ fre̍te̍te̍ gblāa abɔ̍ɔ la ɛbɛ nīi e̍ de okū yī Iji̍sɔ̄ɔsi gbo o̍bū ma̍. Ɔha̍ hɔ̄ la ablɛ̄hu̍, ɔha̍ hɔ̄ la ablīkpo̍. 13E̍ che Imeri̍ ikpo̍ hīka, “Oji̍ nīi a yɛ ē drɛ̄ɛgba ma̍, ɔnyā?”

Imeri̍ koko̍o de wa̍ hīka, “Āchɛ ɛha̍ de Ādādā yī u nāa pīya. N i̍ chī je̍ ɛbɛ nīi e̍ bī ɔ̄ ge̍ gbo ma̍ ni̍.” 14Imeri̍ ka i̍ngɔ̍ɔ ɔpɔ̄ɔpɛ̄ ma̍, o̍ pīyeyīhii ge̍ ma̍ Iji̍sɔ̄ɔsi nīi yarɛ abɔ̍ɔ. O̍ i̍ chī jo̍ōkū hīka ɔ̍lɔ - Iji̍sɔ̄ɔsi ni̍. 15Iji̍sɔ̄ɔsi che ɔ̍ ikpo̍ hīka, “Oji̍ nīi a yɛ ē drɛ̄ɛgba ma̍, ɔnyā? Ɔ̄nyɛ nīi a yɛ ē gāla̍ ma̍?”

Imeri̍ je̍ka ɔ̍lɔ - ɔlɔjā yī yɛrɔ̄ yī īkpɔ̄ɔ̄chi̍ ɔla̍ā nɛ. Wu̍chē yī ɔla̍ā, Imeri̍ da ɔ̍ hīka, “Ādā, o̍ ge̍ - awɔ nāa anu̍ pīya a̍nɛ. Chabɔ̄ yī ɛbɛ nīi a de ɔ̍ gbo ma̍ hu̍ u nīi n gāa ge̍ nāa anu̍ gɛ.”

16Iji̍sɔ̄ɔsi hī ɔ̄ ɛra̍ ka ɔ̍lɔ ge̍ Imeri̍!

Imeri̍ pīyeyīta̍ ɔ̄ ɔpɔ̄ɔpɛ̄ ka la oko̍o yī Ihi̍bru ka ɔ̍lɔ ge̍, “Ira̍bɔ̄ni!” Ochi̍chi̍ yī ɔla̍ā re̍ka, “Ɔngūlɛ̄lā.”

17Iji̍sɔ̄ɔsi koko̍o de ɔ̍ hīka, “A ā de abɔ̄ gwō u ni̍. Wu̍chē oji̍ nɛ, n i̍ gāa dikpo̍ba̍ A̍dā yī u we̍ ni̍. Pīya dikpo̍ba̍ aɛ̍nɛ̍ yī u ge̍ koko̍o de wa̍ gɛ hīka, ‘N pīya yɛ amu gāa dikpo̍ba̍ A̍dā yī u nīi - A̍dā yī ala̍ i̍ngi̍ngɔ̍ɔ ma̍ mɛ̍. N pīya yɛ gāa dikpo̍ ē ba̍ Ɔwɔ yī u nīi - Ɔwɔ yī ala̍ i̍ngi̍ngɔ̍ɔ ma̍ mɛ̍.’ ”

18Bū la ɛbɛ ɔla̍ā, Imeri̍ Oyo̍olima̍gīdala pīya ga wɔlɛ̍ gāa ge̍ de koko̍o wa̍a̍ de a̍chi̍kpo̍ yī Iji̍sɔ̄ɔsi ka anɔ̍lɔ ma̍ Abā yī aa̍ mɛ̍. Ɔ̍lɔ kɛlā nūma̍ i̍ngɛ̍ɛ̄nɛ̄ wa̍a̍ de anu̍ a̍nɛ.

Iji̍sɔ̄ɔsi de iyī nū chabɔ̄ hu̍ a̍chi̍kpo̍ yī nū

(Ima̍tiyu 28:16-20; Ima̍aki 16:14-18; Ilu̍uku 24:36-49)

19La ɔ̄nɛ̄ yī Ɔ̄chī I̍kɔ̍ɔbahɛ ɔla̍ā, a̍chi̍kpo̍ yī Iji̍sɔ̄ɔsi grēeyī gblāa abɔ̍ɔ de ɔpu gū tū iyī wā. Wu̍chē oji̍ nɛ, e̍ yɛ ē tūuhwi yī alɛhu̍ yī Iju̍u. Bɛ̍ɛ̄nɛ̄, Iji̍sɔ̄ɔsi bū kpu̍u̍ wā ge̍ rɛ abɔ̍ɔ la olo̍ōlo̍ yī wā. Iji̍sɔ̄ɔsi da wa̍ hīka, “Ogbodɔ̍dɔ̍ ge̍ hɔ̄ ba̍la ala̍!” 20O̍ de ka i̍ngɔ̍ɔ bɛ̍ɛ̄nɛ̄ ma̍, o̍ de ipi̍ītābɔ̄ yī nū ba̍la yɛgɔ̄ yī nū chabɔ̄ hu̍ wā. A̍chi̍kpo̍ yī nū lɛ ɔwɔ̄wīyā kpɛ̍ɛji nīi e̍ ma̍ Ādā Iji̍sɔ̄ɔsi ma̍. 21Iji̍sɔ̄ɔsi gba̍a ka de wa̍ hīka, “Ogbodɔ̍dɔ̍ ge̍ hɔ̄ ba̍la ala̍! Lɔkɔ nīi Ɔwɔ A̍dā de u tɛ̄rɔ̄ ma̍, i̍ngi̍ngɔ̍ɔ nīi ami yɛ ma̍ ē de ala̍ ē tɛ̄rɔ̄ a̍nɛ.” 22O̍ ka i̍ngɔ̍ɔ ɔpɔ̄ɔpɛ̄ ma̍, o̍ mu owu kla̍ āā ka de wa̍ hīka, “Ala̍ ā nāa Uhu Ɔnɛ̄ɛhɛhi yī Ɔwɔ gɛ! 23Āchɛ nīi ala̍ ge̍ de lɛlā ɔdwɔ̄bi̍ yī wā kɔ̄ de wa̍, o̍ re̍ka Ɔwɔ titi de kɔ̄ de wa̍ mɛ̍. Ala̍ i̍ ge̍ chī de kɔ̄ de wa̍ ni̍, o̍ re̍ka Ɔwɔ titi i̍ de kɔ̄ de wa̍ ni̍.”

Iji̍sɔ̄ɔsi ba̍la Itɔ̍mɔ̄ɔsi

24A̍chi̍kpo̍ yī Iji̍sɔ̄ɔsi ɔha̍ nīi re̍ka Itɔ̍mɔ̄ɔsi nīi e̍ ē hī ɔ̄ hīka, “Ayɛ̍ɛpa” ma̍ i̍ hɔ̄ abɔ̍ɔ ba̍la āchɛ ehēhī yɛ̄grāa ɔla̍ā nīi Iji̍sɔ̄ɔsi wā ma̍ ni̍. 25A̍chi̍kpo̍ yī Iji̍sɔ̄ɔsi āchɛ ehēhī koko̍o de ɔ̍ bɛ̍ɛ̄nɛ̄ hīka aɛ̍lɛ ma̍ Ādā Iji̍sɔ̄ɔsi mɛ̍.

Itɔ̍mɔ̄ɔsi koko̍o de wa̍ hīka, ɔ̍chi̍kpa̍kpa̍ anɔ̍lɔ ma̍ ukpru yī ayi̍ije la abɔ̄ ɛpɛpa yī alɔ, de oyi̍kɔ̄bɔ̄ ma ɔ̍lɔ la ukpru ɛla̍ā, gba̍a de abɔ̄ ma ɔ̍lɔ la ukpru yī yɛgɔ̄, nɛ̄ni̍ anɔ̍lɔ i̍ ge̍ē chɛ̄ mɛ̍ ni̍.

26Obri̍īhī yī nū wā ge̍ grāa, a̍chi̍kpo̍ yī Iji̍sɔ̄ɔsi gba̍a grēeyī gblāa abɔ̍ɔ la ipu̍nu̍. Itɔ̍mɔ̄ɔsi hɔ̄ abɔ̍ɔ ba̍la āchɛ ehēhī wa̍a̍ i̍chi̍chɛ ɔla̍ā. E̍ de ɔpu gū tū iyī wā. Iji̍sɔ̄ɔsi gba̍a bū kpu̍u̍ wā ge̍ rɛ abɔ̍ɔ la olo̍ōlo̍ yī wā. Iji̍sɔ̄ɔsi da wa̍ hīka, “Ogbodɔ̍dɔ̍ ge̍ hɔ̄ ba̍la ala̍!” 27O̍ pīya kpa̍ta̍ da Itɔ̍mɔ̄ɔsi hīka, “Itɔ̍mɔ̄ɔsi be̍e! De oyi̍kɔ̄bɔ̄ yī wɔ ma u nīi a ā ma̍ u ma̍ la abɔ̄ gɛ! Nā abɔ̄ kpaa nīi a ā de ma u la yɛgɔ̄ gɛ! Pi̍ye̍mā la ahu̍ ɔtɔ̍ɔ̄ta̍ nīi a chɛ̄ bɛ̍ɛ̄nɛ̄!”

28Itɔ̍mɔ̄ɔsi hīya Iji̍sɔ̄ɔsi ɔkɔ hīka, “Awɔ - Ādādā yī u ba̍la Ɔwɔ yī u nɛ!”

29Iji̍sɔ̄ɔsi da Itɔ̍mɔ̄ɔsi hīka, “O̍ re̍ka wu̍chē lɔkɔ nīi a ma̍ u ma̍ nīi a chɛ̄ a̍nɛ? A̍hōhi ge̍ - iyī āchɛ nīi i̍ ma̍ u la eyī ni̍ nīi chɛ̄ku u ma̍.”

Ohu̍ yī Īpū nūma̍

30Iji̍sɔ̄ɔsi ya̍ u̍ku̍rɔ̍ ɔlɛbɛ̍bi̍ ɛha̍ mwɛbɛ mwɛbɛ nīi a̍chi̍kpo̍ yī nū mɔ̍ɔ̄ma̍ la eyī yɛ̄mɛ̄mɛ̄ nīi i̍ chī tū amu la īpū nūma̍ ni̍ ma̍. 31Enīi hɔ̄ ma̍ ma̍ tū amu hɛ̄ɛbɛ nīi ala̍ ge̍ē chɛ̄ hīka Iji̍sɔ̄ɔsi ɔ̍lɔ - Ɔhɔ̍ɔnyɛta̍ Nīi Ɔwɔ Ɔ̍lɔ Hōhu nīi - Ɔyi̍ yī Ɔwɔ a̍nɛ. Bū la ɔchɛ̄ ku ɔ̍ hɛ̄ɛbɛ nīi ala̍ ge̍ē lɛ ɔhɔ̄leyī bū la riyī yī Iji̍sɔ̄ɔsi.

Currently Selected:

Ijɔ̍ɔn 20: YBASR

Highlight

Copy