Ijɔ̍ɔn 15

Iji̍sɔ̄ɔsi re̍ka ɔchi̍ kpakpa a̍nɛ

1“Ami re̍ka ɔchi̍ kpakpa a̍nɛ. A̍dā yī u re̍ka ɔ̄chɛ odeyīrɛ ɔchi̍ ɔ̍lɔma̍ a̍nɛ. 2A̍bɔ̄ yī ɔchi̍ ɔla̍ā nīi i̍ ge̍ē wa̍ īkpō ni̍ ma̍, o̍ ē kpo̍ wā hɛ̍ hunū. A̍bɔ̄ nīi ē wa̍ īkpō ma̍, o̍ gbla̍a aa̍ hwɔhi hwɔhi, hɛ̄ɛbɛ nīi e̍ ē lɛ cha̍cha̍ ē jɔ̍ɔkɔ ē wa̍ īkpō gāa iyɔ̄bū iyɔ̄bū. 3Ala̍ ma̍ de lɛ cha̍cha̍ bū la ɛrɔ̄ nīi n ka de ala̍ ma̍ mɛ̍. 4Ala̍ ā hɔ̄ ngmo̍tu̍chɛ̄ ba̍la ami gɛ; ami titi ge̍ē hɔ̄ ba̍la ala̍. Wu̍chē oji̍ nɛ, a̍bɔ̄ yī ɔchi̍ ɔha̍lɔha̍ i̍ ē wa̍ īkpō wɔ̄bɔ̄bɔ̄ yī nū mɛ ni̍. A̍bɔ̄ nīi ge̍ ku la ɔchi̍ kpakpa ma̍, anu̍ ē wa̍ īkpō a̍nɛ. I̍ngi̍ngɔ̍ɔ nīi iyī ala̍ titi lɛ a̍nɛ: ɔ̍chi̍kpa̍kpa̍ ala̍ hɔ̄ la ami, nɛ̄ni̍ ala̍ i̍ ge̍ē wa̍ īkpō mɛ ni̍.

5“Ami re̍ka ɔchi̍ kpakpa, ala̍ re̍ka a̍bɔ̄ yī ɔchi̍ ɔla̍ā a̍nɛ. Ɔ̄chɛ nīi ge̍ hɔ̄ la ami nīi ami titi hɔ̄ la ɔ̄chɛ ɔ̍lɔma̍, ɔlɔjā ge̍ē wa̍ īkpō mwɛbɛ. Wu̍chē oji̍ nɛ, ami i̍ ge̍ tū ni̍, ala̍ i̍ ge̍ē ya̍ lɛlɛ̄lā wɔ̄bɔ̄bɔ̄ yī ala̍ ē mɛ ni̍. 6Ɔ̄chɛ nīi i̍ ge̍ hɔ̄ la ami ni̍, e̍ ge̍ē de ɔlɔjā hɛ̍ ē ta̍anū bāa a̍bɔ̄ yī ɔchi̍ ma̍ nīi o̍ ē de ē ngmo̍ōngmo̍ ju̍wɛ̍ju̍wɛ̍. Ita yī a̍bɔ̄ yī ɔchi̍ ɛla̍ā, āchɛ ē kpo̍ ge̍ē chīyētū la ɔla̍ nīi e̍ ē de ē wɔla̍. 7Ala̍ ge̍ hɔ̄ la ami nīi lɛlā yī u ge̍ hɔ̄ la ūkpɔ̄tū yī ala̍, ɔ̍lɔma̍ ala̍ ā chikpo̍ yī ɔjāha̍-ɔjāha̍ nīi ku̍ ala̍ ɔkɔ ma̍ gɛ; ala̍ ge̍ē lɛ ɔjā ɔ̍lɔma̍. 8Bū la īkpō ɔwɔ̍ɔ̄wa̍ mwɛbɛ yī ala̍ nīi rīgā yī A̍dā yī u hi̍yɛchɛ a̍nɛ. Bū la ɔpɔ̄pū ɔla̍ā nīi ala̍ ge̍ē bī re̍ka a̍chi̍kpo̍ yī u a̍nɛ. 9Lɔkɔ nīi Ɔwɔ A̍dā yɔ̍ɔhɔtū yī u ma̍, i̍ngi̍ngɔ̍ɔ nīi ami titi yɔ̍ɔhɔtū yī ala̍ a̍nɛ. Ala̍ ā hɔ̄ la ɔhɔtū yī u gɛ! 10Ala̍ ge̍ ya̍ lɔkɔ nīi n ka ma̍, ɔ̍lɔma̍ o̍ re̍ka ala̍ ge̍ē hɔ̄ la ɔhɔtū yī u. I̍ngɔ̍ɔ nīi ami titi ya̍ lɔkɔ nīi A̍dā yī u ka ma̍ nīi n hɔ̄ la ɔhɔtū yī nū a̍nɛ.

11“Onūma̍, n yɛ ē ka ē de ala̍ hɛ̄ɛbɛ nīi ɔwɔ̄wīyā yī u ge̍ē hɔ̄ la ūkpɔ̄tū yī ala̍, hɛ̄ɛbɛ nīi ɔwɔ̄wīyā yī ala̍ ge̍ē gɔ̄grāa. 12Lɛlā yī u nīi n ka hīka ala̍ ge̍ē ya̍ ma̍ hɔ̄ ma̍ a̍nɛ: Ala̍ ā yɔ̍ɔhɔtū yī ɔ̍nyīnū lɔkɔ nīi ami yɔ̍ɔhɔtū yī ala̍ ma̍. 13Ɔ̄chɛ ge̍ de ɔhɔ̄leyī yī nū nāa de wu̍chē yī aɛ̍ɛya anu̍, ɔhɔtū ɔna̍ gba̍a hɔ̄ abɔ̍ɔ nīi gla ɔla̍ā ta̍ ma̍? 14Ala̍ re̍ka aɛ̍ɛya ami a̍nɛ nīi o̍ ge̍ re̍ka ala̍ yɛ̍ɛ̄lā nīi n ka ma̍. 15N i̍ ge̍ē hī ala̍ ka a̍chɛ̍ ē gɛ ni̍. Wu̍chē oji̍ nɛ, ɔ̍chɛ̍ i̍ ē je̍ ɔjā nīi abābā ē ya̍ ma̍ ni̍. Ɔkɔkɔ ɔla̍ā, n hī ala̍ ka aɛ̍ɛya ami wu̍chē oji̍ nɛ, ɔjāha̍-ɔjāha̍ wa̍a̍ nīi n po̍ bū la oko̍o yī A̍dā yī u ma̍, n de koko̍o de ala̍ mɛ̍. 16I̍ ala̍ hu um ohōhu a̍ni̍, ami hu ala̍ a̍nɛ. N hu ala̍ nīi ala̍ ge̍ē gāa ge̍ē wa̍ īkpō nīi ē ri̍yɛchɛ ma̍ ē mwɛbɛ. Bū la ɛbɛ ɔla̍ā, ɔjāha̍-ɔjāha̍ nīi ala̍ ge̍ che Ɔwɔ A̍dā ikpo̍ bū la riyī yī u, o̍ ge̍ē de ē de ala̍. 17Ɔjā nīi n ka de ala̍ ka ala̍ ge̍ ya̍ ma̍ hɔ̄ ma̍ a̍nɛ: Ala̍ ā yɔ̍ɔhɔtū yī ɔ̍nyīnū.

Ɔta̍anyī nīi yɛchɛ lɛ ma̍

18“Ala̍ ge̍ de ta̍ alyɛchɛ nūma̍ anyī, ala̍ lɛ ɔbɔ̄bla gɛ; i̍ngɔ̍ɔ nīi ami ta̍ wā anyī yɔbɔ̄ɔbū a̍nɛ. 19O̍ ge̍ re̍ka ala̍ - āchɛ yī yɛchɛ nūma̍ nɛ, yɛchɛ ke̍ ge̍ yɔ̍ɔhɔtū yī ala̍ bāa āchɛ yī nū ma̍. N chī de abɔ̄ ku ala̍ bū la yɛchɛ nūma̍ mɛ̍ ma̍, ala̍ i̍ āchɛ yī nū gɛ ni̍. Ɔla̍ā - ohu̍ nīi ala̍ de ta̍ alyɛchɛ anyī a̍nɛ. 20Je̍ka aa̍ ala̍ bla lɛlā nīi n ka de ala̍ ma̍? ‘Ɔfiyɛ ɔha̍lɔha̍ i̍ ē ga abābā ɔgɔ̄ga ni̍.’ E̍ ge̍ ya̍ um ichi̍ ɔdwɔ̄bi̍, e̍ ge̍ē ya̍ ala̍ ichi̍ ɔdwɔ̄bi̍ i̍ngi̍ngɔ̍ɔ. E̍ ge̍ nāa lɛlā nīi n ka ma̍, e̍ ge̍ē nāa iyī ala̍ i̍ngi̍ngɔ̍ɔ. 21Wu̍chē lɔkɔ nīi ala̍ - āchɛ yī u nɛ ma̍ nīi e̍ chī ge̍ē yɛ̍ɛ̄lā nūma̍ wa̍a̍ tāa ala̍ a̍nɛ. Wu̍chē - oji̍ nɛ, e̍ i̍ je̍ ɔ̄chɛ nīi de u tɛ̄rɔ̄ ma̍ ni̍. 22N i̍ ge̍ wā ge̍ koko̍o de wa̍ ni̍ nɛ, e̍ i̍ ge̍ gblɛfiyɛ yī lɛlā ɔdwɔ̄bi̍ ni̍. O̍ chī de lɛ i̍ngɔ̍ɔ ma̍, e̍ i̍ lɛ ɛbɛbɛ ge̍ē pīyaloko̍o wu̍chē yī lɛlā ɔdwɔ̄bi̍ yī wā gɛ ni̍. 23Ɔ̄chɛ nīi ami ge̍ ta̍ ɔ̄ anyī, o̍ re̍ka A̍dā yī u ta̍ ɔlɔjā anyī i̍ngi̍ngɔ̍ɔ. 24N i̍ ge̍ wā ge̍ ya̍ u̍ku̍rɔ̍ ɔlɛbɛ̍bi̍ ita nīi ɔ̄chɔ̄chɛ i̍ ya̍ je̍ ni̍ ma̍ amu la olo̍ōlo̍ yī wā ni̍ nɛ, e̍ i̍ ge̍ gblɛfiyɛ yī lɛlā ɔdwɔ̄bi̍ ni̍. Onūma̍, e̍ chī ma̍ ɔjā nīi n ya̍ wa̍a̍ ma̍, ami ba̍la A̍dā yī u chī gba̍a ta̍ wā anyī. 25Lɛlā nūma̍ wa̍a̍ ge̍ē ya̍ hɛ̄ɛbɛ nīi lɛlā nīi tū la īpū yī Lihɔ yī wā ma̍ ge̍ē de ē pīya ichɛ̄ɛhi: ‘N de ta̍ wā anyī i̍ngɔ̍ɔ ji ke̍e̍.’

26“Ɔtwɔ̄bɔ̄ nīi re̍ka Uhu yī Ɔwɔ nīi bī lɛlā olēchi̍ lēchi̍ nīi bū la abɔ̄ yī Ɔwɔ A̍dā ma̍ ge̍ē wā. N ge̍ē de ɔ̍ ē tɛ̄rɔ̄ bū la abɔ̄ yī Ɔwɔ A̍dā wā ma̍, anu̍ ge̍ē tū itɛ̍ɛhi̍yɛ̍ yī u a̍nɛ. 27Ala̍ titi ge̍ē tū itɛ̍ɛhi̍yɛ̍ yī u, wu̍chē oji̍ nɛ, ala̍ hɔ̄ tāa ami bū la owu̍tu.

Currently Selected:

Ijɔ̍ɔn 15: YBASR

Highlight

Copy