Popular Bible Verses from ഓഗന്നാന് 12

Share

എനാക്ക് ബേ്ണ്ടി ഗിലാസ ഗേന്റവാന് എന്ന് പിന്ന്‌മേലെ നഡാക്കുഡൊ. അത്തെ നാന് ഇര്‌ക്കുവ പട്ട്‌ല് എനാക്ക് ബേ്ണ്ടി ഗിലാസ ഗേന്റവാന്‌മ് ഇര്‌ക്കുവാന്. എനാക്ക് ബേ്ണ്ടി ഗിലാസ ഗേന്റവാന്‌ന അപ്പാന് സാമിമ് മദ്‌സുവാന്.>>

തന്ന് ഉജുരുന സീവാന്‌പഡ്‌ന്റവാന് അദ്‌ന കെ്ഡേസമാട്ടാന്. ആന ഈ ഉലഗാത്ത്‌ല് തന്നുജുരുന സീവാന്‌പഡാത്തവാന് എന്നാല്‌ക്ക്‌മ് ഇര്‌ക്കുവ പെ്ളേപ്പ്‌ക്ക് ബേ്ണ്ടി തന്നുജുരുന സൂസാരിത്ത് ബെക്ക്‌ന്റാന്.

നാന് സത്ത്യമായി നിമാക്ക് സൊന്റെ, ഗോദിമ്പെ ബെദേന മണ്ണ്‌ക്ക് അലേക്കാദേമ് അദ് സാഗാദേമ് പോന അദ് അത്തെ താനെത്തെ ഇര്‌ക്ക്‌മ്, ആന അദ് സത്തദാന മൊത്തന ബെദെ കെ്ഡേക്ക്‌മ്.

എന്നോഡ നമ്പിക്കെ ബെക്ക്‌ന്റവാന് ആര്‌മ് ഇ്റ്‌ട്ട്‌ല് ഇര്‌ക്കാദിര്‌ക്ക്യ ബേ്ണ്ടി നാന് ബെ്ള്‌സായി ഉലഗാക്ക് ബന്ത്‌റ്‌ക്ക്‌ന്റെ.

എന്ന് നായന കേ്ട്ട് അദേപഡി നഡാക്കാത്തവാന്‌ന നാന് ബിദിക്കുവാദില്ലെ. എന്ത്‌ക്കെന്റ് സൊന്ന ഉലഗാത്ത്‌ല ആള്‌ഗാള്‌ന ബിദിക്ക്യല്ല കാപാറ്റ്യത്തെ നാന് ബന്ത്‌റ്‌ക്കുവാദ്.

അദുക്കുള മറിയ അരെ പഡി നല്ല ബെലെപെറ്റ ബാഡഡിക്കു എ്ണ്ണേന എ്ഡ്‌ത്ത് ബന്ത് ഏസ്സ് കാല്‌ക്ക് ഊറ്റി തന്ന് തലെ മൂരുലു താനെ അയാള് കാല്‌ന തെനേത്താള്. തയില ബാഡെ ബീ്ഡൊട്ടുക്കു തുമ്പുറ്റു.

അവാര് പേരീസ് പുല്ലു എ്ഡ്‌ത്ത് ബന്ത് ഏസ്സ്‌ന ബരവളിക്ക്യ പോയി: <<ഓസാന! <ആണ്ടവാന് പേര്‌ല് ബന്റവാന് ബാഗ്യകേ്ട്ടവാന്!> ഇസ്‌റവേല് രാജാവു ബാഗ്യകേ്ട്ടവാന്>> എന്റ് സൊല്ലി ആലാത്താര്.

അദുക്കുള ഏസ്സ് അവാര്‌ക്ക് ഇത്തെ സൊന്നാന്: <<മന്‌സാനായി പ്‌റാന്തവാന്‌ക്ക് മദ്‌പ്പ് കെ്ഡേക്കുവ നേര ബന്ത്‌റ്‌ക്ക്‌ന്റ്.