ഓഗന്നാന് 12
12
മറിയ ഏസ്സ് കാല്‌ക്ക് ബാഡഡിക്കുവ എ്ണ്ണെ പൂസുന്റാള്
1പെസഗെ നോമ്പി ഗേവാദ്‌ക്ക് ആറ് നാള് മുദാല് താനെ സത്തവാര് പട്ട്‌ലിന്ത് താന് ഉജുര്‌ളാക്ക്‌ന ലാസാറ് ഇന്ത ബെദന്യ ഊരുക്കു ഏസ്സ് ബന്ത് എജ്ജ്‌നാന്. 2അദ്‌ലവാര് ഏസ്സ്‌ക്ക് തീനി മാഡ്‌നാര്. മാറ്‌ത്തെത്തെ ബന്തവാര്‌ക്ക് തീറ്റ്യൂട്ടി ഗേന്താദ്. ഏസ്സോഡൊപ്പ തിന്ന്യ കുക്കാന്തവാര്‌ല് ഒരുത്താന്‌ത്തെ ലാസാറ്. 3അദുക്കുള മറിയ അരെ പഡി നല്ല ബെലെപെറ്റ ബാഡഡിക്കു എ്ണ്ണേന എ്ഡ്‌ത്ത് ബന്ത് ഏസ്സ് കാല്‌ക്ക് ഊറ്റി തന്ന് തലെ മൂരുലു താനെ അയാള് കാല്‌ന തെനേത്താള്. തയില ബാഡെ ബീ്ഡൊട്ടുക്കു തുമ്പുറ്റു.
4ആന ഏസ്സ് സൊല്ലുപഡി നഡാന്തവാര് കൂട്ടാത്ത്‌ലവാന്‌മ് ഏസ്സ്‌ന കാട്ടി കൊഡുക്ക്യ ഉള്ളവാന്‌മ് ആയിന്ത കര്യോത്തുഗാറാന് ജൂദാന് എന്റവാന്: 5<<ഈ ബാഡെ എ്ണ്ണേന മുന്നൂറു ദിനാറ്‌ക്ക് ബിറ്റ് അയി ദിനാറ്‌ന ഏ്ളെഗാള്‌ക്ക് കൊഡുക്കത്താദ് എന്ത്‌ക്ക്?>> എന്റ് സൊന്നാന്. 6അയാള് ഇത്തെ സൊന്നാദ് ഏ്ളെഗാള്‌ന കറ്‌മ്മ പ്‌ഡിക്കുവാദ്‌നാലെ അല്ല, അയാള് ത്‌റ്‌ട്ടാന് ആനാദ്‌നാലേത്തെ. പണ പയി അയാള് കയില് ഇന്താദ്‌നാലെ അദ്‌ക്കിക്കുവ പണാന അയാള് എ്ഡ്‌ത്ത് കൊണ്ടിന്താന്.
7ആന ഏസ്സ് അദ്‌ക്ക്: <<അവാള്‌ന അര്‌സാദേന്, എന്ന് സാവുന പാത്തുവ നാള്‌ക്ക് ബേ്ണ്ടി അവാള് ഇദ്‌ന പേ്ണിസി ബെത്തിന്താള് എന്റ് നെനേന്. 8ഏ്ളെഗാള് ഒപ്പ നിമ്മ് പട്ട്‌ല് ഇര്‌ക്ക്‌ന്റാരല്ല, ആന നാന് ഒപ്പ നിമ്മ് പട്ട്‌ല് ഇര്‌ക്കമാട്ടെ>> എന്റ് സൊന്നാന്.
ലാസാറ്‌ന കൊല്ല്യ സട്ട കെ്ട്ട്‌ന്റാര്
9ഏസ്സ് അദ്‌ലിര്‌ന്റാന് എന്റ് കേ്ട്ട് ദൊഡ്ഡ ഒന്റു കൂട്ട എഗുദാര് അദ്‌ക്ക് ബന്താര്. ഏസ്സ്‌ന കാണ്യ ബേ്ണ്ടി താനേമല്ല, ഏസ്സ് ഉജുര്‌ളാക്ക്‌ന ലാസാറ്‌ന കാണ്യാമ് ഗുഡിത്തെ അവാര് അദ്‌ക്ക് ബന്താദ്. 10അദ്‌നാലെ എഗുദാര് പൂസാരി തലെവാര്‌ഗാള് ലാസാറ്‌നാമ് കൊല്ലുഡൊ എന്റ് സട്ട കെ്ട്ട്‌നാര്. 11എന്ത്‌ക്കെന്റ് സൊന്ന ലാസാറ് ഉജുരോഡ ഇര്‌ക്കുവാദ്‌നാലെ എഞ്ചോ എഗുദാര് ഇവാര്‌ന തള്ളി ഏസ്സ്‌ന നമ്പ്‌നാര്.
ഏസ്സ് എര്‌സലേമ്‌ക്ക് മേ്ള്‌സത്തോഡ ബന്റാന്
12ഏസ്സ് എര്‌സലേമ്‌ക്ക് ബന്റാന് എന്റ് നോമ്പിക്ക് ബന്ത ദൊഡ്ഡ ഒന്റു കൂട്ട ആള്‌ഗാള് മറ്‌നാള് കേ്ട്ടാര്. 13അവാര് പേരീസ് പുല്ലു എ്ഡ്‌ത്ത് ബന്ത് ഏസ്സ്‌ന ബരവളിക്ക്യ പോയി:
<<ഓസാന!
<ആണ്ടവാന് പേര്‌ല് ബന്റവാന് ബാഗ്യകേ്ട്ടവാന്!>#സാമി പാട്ട് ബൊക്കു 118:25,26
ഇസ്‌റവേല് രാജാവു ബാഗ്യകേ്ട്ടവാന്>>
എന്റ് സൊല്ലി ആലാത്താര്. 14ഏസ്സ് ഒന്റു കള്‌ദെ കുട്ടിന കണ്ട് അദ്‌ക്ക് ഏ്റി കുക്കാന്താന്.
15<<സീയോനു പട്ടണഗാറാരെ, അഞ്ചബേ്ഡ,
ഇദാ, നിന്ന് രാജാവു കള്‌ദെ കുട്ടി കുദ്ദാക്ക് ഏ്റി ബന്റാന്>>#സെക്കര്യാവു 9:9
എന്റ് സാമി സൊല്ലുസുലാക്കാത്ത്‌ല് എ്ള്‌ദിര്‌ക്കുവ പാസെത്തെ.
16ഏസ്സ് സൊല്ലുപഡി നഡാന്തവാര്‌ക്ക് ഈ നഡാന്ത കാര്യഗാള് എന്തെന്റ് മുദാല് തെര്യാലെ. ആന ഏസ്സ്‌ക്ക് മദ്‌പ്പ് കെ്ഡേത്ത പ്‌റ അയാള്‌ന പറ്റി ഇത്തെ എ്ള്‌ദിര്‌ക്കുവാദ്‌നാമ് തമ്മ അയാള്‌ക്ക് ഇത്തെ ഗേന്താദ്‌നാമ് അവാര്‌ക്ക് നെനേവു ബന്ത്‌ദ്.
17ഏസ്സ് ലാസാറ്‌ന കല്ലളേലിന്ത് ബ്‌ളിത്ത് സത്തവാര്‌ലിന്ത് ഉജുര്‌ളാക്കാട്ടി അയാളോഡൊപ്പ ഇന്തവാര് ഇദ്‌ന പറ്റി ബേ്റെ ആള്‌ഗാള്‌ക്ക് സൊല്ലി കൊണ്ടിന്താര്‌ഗാള്. 18ഏസ്സ് ഈ അദിസ്യമാന അഡ്യാള ഗേന്താന് എന്റ് കേ്ട്ടാദ്‌നാലെ എഞ്ചോ ആള്‌ഗാള് ഏസ്സ്‌ന ബരവളിക്ക്യ പോനാര്. 19ഇദ്‌ന കണ്ട് പരിസാര് ആങ്കീങ്ക്: <<നോഡുനു, നമ്മ ഗേയ ഓരാഡുവ കാര്യഗാള് ഒന്റുമു നഡാക്കുവാദില്ലെ, ആള്‌ഗാള് ഒട്ടുക്കു ഏസ്സ് പിന്ന്‌മേലെ പോന്റാര്>> എന്റ് സൊന്നാര്.
ഏസ്സ് താന് സായ പോവാദ്‌ന പറ്റി സൊന്റാന്
20നോമ്പി നാള് സാമിന കുമ്മുഡ്യ ബന്തവാര് കൂട്ടാത്ത്‌ല് ലേസ എവനഗാറാര്‌മ് ഇന്താര്. 21അവാര് ഗലീല നാഡ്‌ല് ബേദ്‌സയിദഗാറാന് പീലിപോസു പട്ട്‌ക്ക് പോയി: <<പണ്ണാഡി എമ്മ ഏസ്സ്‌ന കാണുഡൊ എന്റ് ആസെപഡ്‌ന്റേമ്>> എന്റ് ബേ്ണ്ട്‌നാര്. 22അദുക്കുള പീലിപോസു പോയി അന്ത്‌റാസ്‌ക്ക് സൊന്നാന്. പ്‌റ അവാര് റാഡാള്‌മ് പോയി ഈ കാര്യന ഏസ്സ്‌ക്ക് സൊന്നാര്.
23അദുക്കുള ഏസ്സ് അവാര്‌ക്ക് ഇത്തെ സൊന്നാന്: <<മന്‌സാനായി പ്‌റാന്തവാന്‌ക്ക് മദ്‌പ്പ് കെ്ഡേക്കുവ നേര ബന്ത്‌റ്‌ക്ക്‌ന്റ്. 24നാന് സത്ത്യമായി നിമാക്ക് സൊന്റെ, ഗോദിമ്പെ ബെദേന മണ്ണ്‌ക്ക് അലേക്കാദേമ് അദ് സാഗാദേമ് പോന#12:24 സാഗാദേമ് പോന ഇദ് ബെദെ സത്ത്‌തള്ളുവാദ്‌ന പറ്റ്യല്ല സൊല്ലിര്‌ക്കുവാദ്, അയി ബെദെ ഇല്ലാദെ ആവാദ്‌ന പറ്റിത്തെ സൊല്ലിര്‌ക്കുവാദ്, ഇദ് അര്‌ത്ത മാഡുവാദ് സൊന്ത ആസെഗാള്‌ന ഇല്ലാദെ മാഡുവാദ്‌ന പറ്റിത്തെ. അദ് അത്തെ താനെത്തെ ഇര്‌ക്ക്‌മ്, ആന അദ് സത്തദാന മൊത്തന ബെദെ കെ്ഡേക്ക്‌മ്. 25തന്ന് ഉജുരുന സീവാന്‌പഡ്‌ന്റവാന് അദ്‌ന കെ്ഡേസമാട്ടാന്. ആന ഈ ഉലഗാത്ത്‌ല് തന്നുജുരുന സീവാന്‌പഡാത്തവാന് എന്നാല്‌ക്ക്‌മ് ഇര്‌ക്കുവ പെ്ളേപ്പ്‌ക്ക് ബേ്ണ്ടി തന്നുജുരുന സൂസാരിത്ത് ബെക്ക്‌ന്റാന്. 26എനാക്ക് ബേ്ണ്ടി ഗിലാസ ഗേന്റവാന് എന്ന് പിന്ന്‌മേലെ നഡാക്കുഡൊ. അത്തെ നാന് ഇര്‌ക്കുവ പട്ട്‌ല് എനാക്ക് ബേ്ണ്ടി ഗിലാസ ഗേന്റവാന്‌മ് ഇര്‌ക്കുവാന്. എനാക്ക് ബേ്ണ്ടി ഗിലാസ ഗേന്റവാന്‌ന അപ്പാന് സാമിമ് മദ്‌സുവാന്.>>
27<<ഇന്നാല് എന്ന് മനേസ്സ് ബെന്ത് ഇ്ഡിന്റ്, നാന് എന്ത്‌ന സൊല്ല്യ? <അപ്പാ, ഈ ഗളിഗേലിന്ത് എനാന കാപാറ്റുഡോമെ> എന്റ് നാന് കേ്ള്‌ക്കുവേന? ഇല്ലെ, ഇദ്‌ക്ക് ബേ്ണ്ടിത്തെ നാന് ഈ ഗളിഗേക്ക് എജ്ജിര്‌ക്ക്‌ന്റെ. 28അപ്പാ, നിന്ന് പേര്‌ക്കുള്ള മദ്‌പ്പ്‌ന കാട്ടുഡോമെ.>>
അദുക്കുള മേലോഗാത്ത്‌ലിന്ത്: <<നാന് എന്ന് പേര്‌ക്കുള്ള മദ്‌പ്പ്‌ന കാട്ടിര്‌ക്ക്‌ന്റെ, ഇന്നിമ് അയി മദ്‌പ്പ്‌ന കാട്ടുവെ>> എന്റ് ഒന്റു ജദ്ദ ബന്ത്‌ദ്. 29ഈ ജദ്ദന കേ്ട്ട് അയാള്‌ക്കര്‌ഗെ നിന്റിന്ത ആള്‌കൂട്ട: <<ഇ്ഡി ബെ്ട്ട്‌റ്റ്>> എന്റ് സൊന്നാര്. ബേ്റെ ലേസ ആള്‌ഗാള്: <<ഒന്റു സാമിദൂദാന് അയാളോഡ നായ നൊഡിന്താന്>> എന്റ് സൊന്നാര്.
30അദ്‌ക്ക് ഏസ്സ്: <<ഈ ജദ്ദ ബന്താദ് എനാക്ക് ബേ്ണ്ട്യല്ല, നിമാക്ക് ബേ്ണ്ടിത്തെ. 31ഈ ഉലഗാത്ത്‌ല ആള്‌ഗാള്‌ന സാമി ബിദിക്കുവ ഗളിഗെ ഇന്നാല്‌ത്തെ. ഈ ഉലഗാന ആള്‌ന്റവാന്‌ന സാമി ഇന്നാല് മുഡിക്കി ബ്‌ഡുവാന്. 32എനാന ബൂമിലിന്ത് ഉജാത്ത്‌ഗാട്ടി എല്ലാ ആള്‌ഗാള്‌നാമ് എന്ന് സാരി ബരുസ്സുവെ>> എന്റ് സൊന്നാന്. 33താന് ഏദ് ദിന്‌സ്‌ല് സാവാന് എന്റ് കാട്ടി കൊഡുക്ക്യ ബേ്ണ്ടിത്തെ ഏസ്സ് അവാര്‌ക്ക് ഇത്തെ സൊന്നാദ്.
34ആള്‌ഗാള് അയാള്‌ന: <<ക്‌റ്‌സ്‌ത്ത് എന്നാല്‌ക്ക്‌മ് പെ്ളേക്കുവാന് എന്റ് സാമി സട്ടാത്ത്‌ല് പഡിത്ത് കാട്ട്‌നാദ്‌ന എമ്മ കേ്ട്ട്‌റ്‌ക്ക്‌ന്റേമ്. അന്നാപ്പ് <മന്‌സാനായി പ്‌റാന്തവാന്‌ന ഉജാത്തുഡൊ> എന്റ് നിനാക്ക് എത്തെ സൊല്ല്യ മുഡിമ്? മന്‌സാനായി പ്‌റാന്തവാന് ആര്?>> എന്റ് കേ്ട്ടാര്.
35അദ്‌ക്ക് ഏസ്സ് അവാര്‌ക്ക്: <<ഇന്നി ലേസ ഗളിഗേത്തെ ബെ്ള്‌സ നിമ്മ് പട്ട്‌ല് ഇര്‌ക്ക്‌മ്, അദ്‌നാലെ ഇ്റ്‌ട്ട് നിമാന ആളാദിര്‌ക്ക്യ ബേ്ണ്ടി ബെ്ള്‌സ ഇര്‌ക്ക മാട്ട്‌ക്ക് ബെ്ള്‌സാത്ത്‌ല് താനെ നഡാന്, എന്ത്‌ക്കെന്റ് സൊന്ന ഇ്റ്‌ട്ട്‌ല് നഡാക്ക്‌ന്റവാന്‌ക്ക് താന് ഏങ്ക് പോന്റാന് എന്റ് തെരിവാദില്ലെ. 36അദ്‌നാലെ നിമ്മ ബെ്ള്‌സാക്ക് പട്ട പ്‌ള്ളെഗാള് ആയ ബേ്ണ്ടി ബെ്ള്‌സ ഇര്‌ക്കാട്ടി അദ്‌ന നമ്പ്‌ന്>> എന്റ് സൊന്നാന്.
നമ്പാത്ത ജനഗാള്
ഇദ്‌ന സൊന്ന പ്‌റ ഏസ്സ് അവാര്‌ന ബ്‌ട്ട് പോയി മറേന്താന്. 37അവാര് കണ്ണ്‌മുന്നുക്കു ഇഞ്ചൊന്റു അദിസ്യമാന അഡ്യാളഗാള് ഗേന്ത് ഗുഡി അവാര് ഏസ്സ്‌ല് നമ്പിക്കെ ബെക്കാലെ.
38<<ആണ്ടവാനെ, എമ്മ സൊന്ന സേദിന ആര് നമ്പ്‌നാര്?
ആണ്ടവാന് സക്‌തി ആര്‌ക്ക് കാട്ട്‌റ്റ്?>>#ഏസ്സയ്യാവു 53:1
എന്റ് ഏസ്സയ്യ സാമിദാസ് സൊന്നാദ് അദേപാസെ നഡാക്ക്യ ബേ്ണ്ടി ഇത്തെല്ല നഡാന്ത്‌ദ്.
39ഇത്തെ അവാര് നമ്പാദിര്‌ക്കുവാദ് എന്ത്‌ക്കെന്നുവാദ്‌ന പറ്റി ഏസ്സയ്യ സാമിദാസ് ബേ്റൊന്റു പട്ട്‌ല്‌മ് ഇത്തെ സൊല്ലിര്‌ക്ക്‌ന്റാന്:
40<<അവാര് കണ്ണാറ കാണാദിര്‌ക്ക്യ ബേ്ണ്ടി
നാന് അവാര് കണ്ണ്‌ന കുറുഡു മാഡിര്‌ന്റെ,
മനേസ്സ്‌ല് ഒന്റുമു നെപ്പ്‌കെ്ഡേസാദിര്‌ക്ക്യ ബേ്ണ്ടി
നാന് അവാര് നെഞ്ച്‌ന മര നെഞ്ച് മാഡിര്‌ന്റെ,
അദ്‌നാലെ അവാര് പാവ ഗേവാദ്‌ന തള്ളി എന്ന് സാരി തിര്‌ഗാമ് മാട്ടാര്,
നാന് അവാര്‌ന തെ്ള്‌സാമ് മാട്ടെ.>>#ഏസ്സയ്യാവു 6:10
41ഏസ്സയ്യാവു ഏസ്സ്‌ക്ക് ഇര്‌ക്കുവ മദ്‌പ്പ്‌ന കണ്ട് അയാള്‌ന പറ്റി നായ നൊഡിന്താദ്‌നാലെത്തെ ഇത്തെ സൊന്നാദ്.
42എന്റിന്ത് ഗുഡി എഗുദാര് തലെവാര്‌ഗാള്‌ല് എഞ്ചോ ആള്‌ഗാള് ഏസ്സ്‌ല് നമ്പിക്കെ ബെത്താര്. ആന പരിസാര് തമാന എഗുദാര് പരേസുവ ബീ്ഡ്‌ക്ക് സേത്താദെ മുഡുക്കുവാര് എന്റ് നെനേത്ത് ഏസ്സ്‌ല് നമ്പിക്കെ ബെക്ക്‌ന്റേമ് എന്റ് അവാര് എദ്‌ക്ക സൊല്ലാലെ. 43സാമിലിന്ത് കെ്ഡേക്കുവ പേര്‌പെരിമെന ബ്‌ഡ മന്‌സാന്‌ലിന്ത് കെ്ഡേക്കുവ പേര്‌പെരിമെനാത്തെ അവാര് ദൊഡ്ഡാദെന്റ് നെനേത്താര്.
നായ ബിദിക്കുവ ഏസ്സ് നായഗാള്
44ഏസ്സ് ഇത്തെ ദൊഡ്ഡാദ്‌ക്ക് സൊന്നാന്: <<എന്നോഡ നമ്പിക്കെ ബെക്ക്‌ന്റവാന് എനാന താനേമല്ല, എനാന സൊല്ലി ബ്‌ട്ടവാന്‌ല്‌മ് നമ്പിക്കെ ബെക്ക്‌ന്റാന്. 45എനാന കാണ്‌ന്റവാന് എനാന സൊല്ലി ബ്‌ട്ടവാന്‌ന കാണ്‌ന്റാന്. 46എന്നോഡ നമ്പിക്കെ ബെക്ക്‌ന്റവാന് ആര്‌മ് ഇ്റ്‌ട്ട്‌ല് ഇര്‌ക്കാദിര്‌ക്ക്യ ബേ്ണ്ടി നാന് ബെ്ള്‌സായി ഉലഗാക്ക് ബന്ത്‌റ്‌ക്ക്‌ന്റെ.
47എന്ന് നായന കേ്ട്ട് അദേപഡി നഡാക്കാത്തവാന്‌ന നാന് ബിദിക്കുവാദില്ലെ. എന്ത്‌ക്കെന്റ് സൊന്ന ഉലഗാത്ത്‌ല ആള്‌ഗാള്‌ന ബിദിക്ക്യല്ല കാപാറ്റ്യത്തെ നാന് ബന്ത്‌റ്‌ക്കുവാദ്. 48എന്ന് നായന കേ്ള്‌ക്ക്യ മനേസ്സില്ലാദെ എനാന തള്ള്‌ന്റവാന്‌ന ബിദിക്ക്‌ന്റവാന് ഇര്‌ക്ക്‌ന്റാന്. നാന് സൊന്ന നായഗാള് താനെത്തെ അയാള്‌ന കഡേസി നാള്‌ല് ബിദിക്ക്‌മ്. 49എന്ത്‌ക്കെന്റ് സൊന്ന നാന് സൊന്ന നായഗാള് എന്ന് അദിഗരാത്ത്‌ല് സൊന്നാദല്ല, നാന് എന്ത് സൊല്ലുഡൊ എന്റ്‌മ് എത്തെ സൊല്ലുഡൊ എന്റ്‌മ് എനാന സൊല്ലി ബ്‌ട്ട അപ്പാന് സാമി കല്‌പനെ തന്ത്‌റ്‌ന്റാന്. 50അയാള് കല്‌പനെഗാള് എന്നാല്‌ക്ക്‌മ് ഇര്‌ക്കുവ പെ്ളേപ്പ്‌ന തന്റ് എന്റ് എനാക്ക് തെരിന്റ്. അദ്‌നാലെ നാന് എന്ത് സൊല്ലുഡൊ എന്റ് അപ്പാന് സാമി സൊല്ലിര്‌ക്ക്‌ന്റാനൊ അദ്‌ന താനെത്തെ നാന് സൊല്ലുവാദ്.>>
Currently Selected:
ഓഗന്നാന് 12: സാമി സേദി
Highlight
Share
Copy
Want to have your highlights saved across all your devices? Sign up or sign in
New Life Computer Institute
