Popular Bible Verses from YOHANES 16

Share

Wene yoma obogar yigi eti, kir kinakla adeknggen aruwak nen yiluk yigi o. Nenaluk An ninom dambulik arar. O agar paga yoma, kir anggon panggon ekinabugun o. Ogwe kiniliti yanggo yiluk dogono o. Nen An o agar paga yoma, muk nakma tebelogo arar bigi o!”

Nen Ar Roh Allah eti waga kalok, Ar nen wene Allah abok ebebar mende eti, bagalka kalok, wene ebebar mende eti, kir kinil kobagik nen yiluk, yamakinagin o. Wene Ar aburak nen ambi yigin mondok dek arar o, ogwe wene Ar aruk kolaligin mende eti mban, yigin o. Nen Ar nen yabongga nena arigin mende eti, kir yokeragin ar o.

Yogondak ya kudi paga, kir nen nena-nena kwak ambi, An nendaga paga nggino yugwi dek agoktip o. Ma, nggino yokni o, yogwi kalok kir yorugun mende eti kodagun o. Eti erugun paga, kir kinadeknggen mende enogo pani pano arar etarigin o,” yiluk yorarige.

Ogwe wene ebebar mende kwak yi, yokerak o: An ligin kalok, kir kinake paga eti mondok pano arar o; nenaluk An ligin dek kalok, kir yamak kinaga dogu mende eti warigin dek arar o. Ogwe An ligin kalok, An nen Ar eti kir kinoba lakbi warigin o. Nen Ar waga kalok, Ar nen o agar paga yoma, maduk ekwi eti nena, yiluk enggen mende bugalka, tuguluk, Ar Allah nen maduk onggo erigin eti, ebebar mende kwak nggi yiluk, enam erogo bigin o.

Eti ndak-ndak kir etegerogon arar o: yogondak kir kinakla maduk ari tagwi ogwe, An kir ninom abuk arugun ar o, nen o eta paga, kir kinakla adeknggen nggok mondok arugun o. Nen ar ambi ta nen kwak kinadeknggen eti ndilogo waganigin mondok dek o. O eta paga, kir An wene kinok ambi yornirugun mondok dek arar o. Ebebar andani o: Kir An Nombae oba, ye mende nde mende, An nendaga paga nggino yorugun kalok, An Nombae nen kir nggino yorugun mende eti wokiragin arar o.

Kinakla ebebar andani o, kir de yugu dogolir nen de nggu makwi, erugun ogwe, o agar paga yoma inakla adeknggen ambik erugun o. Kir kinakla yiduk maduk arugun eti ogwe, kinakla yiduk maduk arugun eti elokte medak togon kinadeknggen mende arar etarigin o.