Popular Bible Verses from Yoana 15

Share

“Oni m-mujabhibhu, na bheenyu m-masagi. Omuntu unú areekara munsi yaani, na oni nikare munsi yaaye, uyo aribha areebhura emisumo emyaru, kwa okubha bira oni, mutakunagya okukora ryoryonse.

Mwikare munsi yaani, na oni nikare munsi yeenyu. Kya ego erisagi ritakutura okwama emisumo eryenego bira okubha kumujabhibhu, egoego na bheenyu mutakutura okwibhura emisumo bira okwikara munsi yaani.

Nyoore mureekare munsi yaani na amangʼana gaani geekare munsi weenyu, mbe kyokyonse kinú mureenda, musabhe Taata arabhahaana.

Etaringi ega, bheenyu mbo mwansora oni, nawe, nooni naabhasora bheenyu. Naabhasora, naho mwibhure emisumo ginú gitakuhwa. Mukaakora ego, gonsego ganú murasabha kwa eriina ryani, Taata arabhahaana.

Atariho omuntu unú yaana obhuhanje okukira bhunu, obhwa omuntu okuruusya obhuhoru bhwaye kurusumo rwa abhasaani bhaaye.

Kira erisagi munsi yaani rinú ritakwama emisumo, Taata arariruusya-ho. Nawe, kira rinú riraama emisumo, Taata arariharurirya, naho ryame bhukongʼu.

Eriragiriryo ryani n-dinu, muhanjane kya ego oni mbahanjiri bheenyu.

Nyoore mureebhura emisumo emyaru na okubha abheehigira bhaani bha heene, hayo muribha muroorokya harabhu obhukuru bhwa Taata.

Yeesu akagendererya okubheehigirya ega, “Oni nooni omujabhibhu gwa heene, na Taata ngʼo omurimi.

Omuntu wowonse unú atakwikara munsi yaani, areeswa kibhara kya erisagi rinú rireeswa kibhara na okooma. Mbe, abhantu bhararibhooja na okuryesa mumururo, rirarungura.

“Mbakeererye ganu, naho obhujomerwa bhwani bhubhe munsi weenyu, na obhujomerwa bhwenyu bhukunaane.

Mukaagwata amaragiriryo gaani, mureekare mubhuhanje bhwani, kya ego oni naagwata amaragiriryo ga Taata na okwikara mubhuhanje bhwaye.

Mbe, ndabharagirirya bheenyu ega, muhanjane.”

Nyoore mukaabheeri abhantu bha mukyaro munu, mbe abhantu bhayo, bhakaabhahanjiri, kya ego bhabhahanjiri abhantu bhaabho. Bheenyu mutaringi bha mukyaro munu, nawe, mbasoreri okurwa mukyaro munu. Nkyo kirakora abhantu bha mukyaro munu bharabhabhihirirwa.