Yoana 15

Yeesu m-mujabhibhu gwa heene

1Yeesu akagendererya okubheehigirya ega, “Oni nooni omujabhibhu gwa heene, na Taata ngʼo omurimi. 2Kira erisagi munsi yaani rinú ritakwama emisumo, Taata arariruusya-ho. Nawe, kira rinú riraama emisumo, Taata arariharurirya, naho ryame bhukongʼu. 3Bheenyu mwamariri okubha abhajomu, kwa okubha mweekirirya ameehigiryo gaani. 4Mwikare munsi yaani, na oni nikare munsi yeenyu. Kya ego erisagi ritakutura okwama emisumo eryenego bira okubha kumujabhibhu, egoego na bheenyu mutakutura okwibhura emisumo bira okwikara munsi yaani.

5“Oni m-mujabhibhu, na bheenyu m-masagi. Omuntu unú areekara munsi yaani, na oni nikare munsi yaaye, uyo aribha areebhura emisumo emyaru, kwa okubha bira oni, mutakunagya okukora ryoryonse. 6Omuntu wowonse unú atakwikara munsi yaani, areeswa kibhara kya erisagi rinú rireeswa kibhara na okooma. Mbe, abhantu bhararibhooja na okuryesa mumururo, rirarungura. 7Nyoore mureekare munsi yaani na amangʼana gaani geekare munsi weenyu, mbe kyokyonse kinú mureenda, musabhe Taata arabhahaana. 8Nyoore mureebhura emisumo emyaru na okubha abheehigira bhaani bha heene, hayo muribha muroorokya harabhu obhukuru bhwa Taata. 9Kya ego Taata yaanhanjiri oni, niigo na oni mbahanjiri bheenyu. Mbe mwikare mubhuhanje bhwani. 10Mukaagwata amaragiriryo gaani, mureekare mubhuhanje bhwani, kya ego oni naagwata amaragiriryo ga Taata na okwikara mubhuhanje bhwaye.

11“Mbakeererye ganu, naho obhujomerwa bhwani bhubhe munsi weenyu, na obhujomerwa bhwenyu bhukunaane. 12Eriragiriryo ryani n-dinu, muhanjane kya ego oni mbahanjiri bheenyu. 13Atariho omuntu unú yaana obhuhanje okukira bhunu, obhwa omuntu okuruusya obhuhoru bhwaye kurusumo rwa abhasaani bhaaye. 14Nyoore murakora ganú ndabharagirirya, bheenyu murabha abhasaani bhaani. 15Ntakubhabhirikira kweki abhagaya, kwa okubha omugaya atamanyiri kinú omukuru waaye arakora. Nawe, bheenyu mbatubhuriiri gonsego ganú neegwa okurwa ku Taata, kwa ego ndaabhabhirikirenga ega, abhasaani bhaani. 16Etaringi ega, bheenyu mbo mwansora oni, nawe, nooni naabhasora bheenyu. Naabhasora, naho mwibhure emisumo ginú gitakuhwa. Mukaakora ego, gonsego ganú murasabha kwa eriina ryani, Taata arabhahaana. 17Mbe, ndabharagirirya bheenyu ega, muhanjane.”

Abhantu bha mukyaro munu bharabhabhihirirwabhanú bharamwikirirya Yeesu

18Yeesu akagendererya okubheehigirya ega, “Nyoore abhantu bha mukyaro munu bharabhabhihirirwa bheenyu, mumanye ega, bhaakangata okumbihirirwa oni. 19Nyoore mukaabheeri abhantu bha mukyaro munu, mbe abhantu bhayo, bhakaabhahanjiri, kya ego bhabhahanjiri abhantu bhaabho. Bheenyu mutaringi bha mukyaro munu, nawe, mbasoreri okurwa mukyaro munu. Nkyo kirakora abhantu bha mukyaro munu bharabhabhihirirwa. 20Muhiituke eringʼana rinú naabhakeerya ega, ‘Omugaya ataringi omukuru okukira omukuru waaye.’ Mbe, nyoore bhaannyankya oni, mbaribhanyankya na bheenyu bhonse. Nawe, nyoore bhareekirirya ameehigiryo gaani, bhariikirirya na ageenyu gonse. 21Nawe, bharibhakorera gonsego gayo, kurusumo rwa okunsoorana oni, kwa okubha bhatamanyiri unú yaantuma. 22Nyoore ntakaajiri na okuhaira nabho, mbe bhatakaabheeri na obhusarya. Nawe, bhoono, bhatakutura okwibhagirira ega, bhataana obhusarya. 23Omuntu wowonse unú arambihirirwa oni, aramubhihirirwa na Taata wonse. 24Naakora ebhika ebhinene bhinú ataakakoreri omuntu wowonse. Nyoore bhatakaabhiruuji, bhatakaabheeri na obhusarya. Nawe bhoono, bharuuji gonsego ganú naakora, kora ego bhakyambihiriirwe, na bhamubhihiriirwe Taata wonse. 25Gayo gakorekeri, naho gakunaane ganú gaangʼoorwa mu Mangʼoore Amarabhu ega, ‘Bhaamubhihirirwa bhusa.’#15:25 Maaha mukitabho kya Egijabhuri 35:19, 69:4.

26“Ndamutuma kubheenyu Omubheeri, unú m-Mutima Omurabhu, wa okubhatubhurira abhantu bhonsego obhuheene. Ararwa ku Taata, na hanú arihika kubheenyu, aribhatubhurira obhuheene eguru yaani. 27Kweki na bheenyu bhonse muriimiririra amangʼana gaani, kwa okubha mwaringa hamwi na oni okurwa kubhwambiro.

Currently Selected:

Yoana 15: Kabwa

Highlight

Copy