Yoana 16

1“Mbakeererye amangʼana gonsego gayo, naho mutatiga okunyikirirya. 2Abhantu bharibha bharabhaahura bheenyu mumasinagogi. Ririija eribhaga rinú kira omuntu unú aribheeta, ariiganirirya ega, arakora emirimu gya Waryubha. 3Bharibhakorera ego, kwa okubha bhatamumanyiri Taata, na kora oni nonse bhataammanyiri. 4Mbakeererye gayo, naho eribhaga ryabho rya okukora gayo hanú ririhika, muhiituke ega, naabhakeerya.

Emirimu gya Omutima Omurabhu

“Ntaabhakeerya gayo gonsego kubhwambiro, kwa okubha naaringa hamwi na bheenyu. 5Mbe bhoono, ndagya ku Taata, uyo ngʼo yaantuma kubheenyu. Nawe, atariho wowonse gati yeenyu owa okumbuurya ega, ‘Bhoono, oragya-ha?’ 6Musurumbeeri bhukongʼu mumitima gyenyu, kwa okubha mbakeererye ega, ndagya ku Taata.

7“Ndabhakeerya obhuheene ega, m-bujomu kubheenyu oni ngye ku Taata. Nyoore ntaagye, Omubheeri urya atakutura okuuja kubheenyu. Nawe, hanú oni ndigya, ndimutuma kubheenyu. 8Hanú ariija, aribha arabhoorokya abhantu bhonsego ega, m-bakori bha obhusarya, na ega, oni m-muheene, kweki ega, Waryubha ariija okubhabhuturira ekiina. 9Aribha arabhoorokya ega, bheeki m-bakori bha obhusarya, kwa okubha bhatakunyikirirya oni. 10Aryorokya ega, oni m-muheene, kwa okubha ndagya ku Taata na mutarindora kweki. 11Aribha arabhoorokya aharabhu ega, Waryubha aribhabhuturira ekiina, kwa okubha abhuturiiri ekiina Erisambwa rinú riratunga mukyaro hanu.

12“Nkyari na amangʼana amaaru ga okubhakeerya, nawe, kwibhaga rinu mutakutura okugeegumirirya. 13Hanú ariija Omutima Omurabhu, aribhoorokererya obhuheene bhonsego. Atarigamba kwa obhutungi bhwaye omwene, nawe, arigamba ganú yeegwa na okubhakeerya ganú garimaahikana. 14Omutima Omurabhu uyo aribha arabhoorokya obhukuru bhwani, kwa okubha aribhakeerya gonsego ganú ariigwa okurwa kuoni. 15Ebhintu bhyonsego bhinú Taata yaanabhyo, m-byani. Nkyo kirakora ndagamba ega, Omutima uyo, aribhakeerya gonsego ganú aribha areegwa okurwa kuoni.

Okusurumbara kurihunjurwa kubhe okujomerwa

16“Rikyari eribhaga ekego na bheenyu mutarindora, kweki hanú eribhaga ekego ririhwa, murindora.” 17Mbe, abheehigira bhaaye abhandi bhakabhuuranʼya ega, “Bhoono, ensonga yaaye niki hanú aragamba ega, ‘Rikyari eribhaga ekego na bheenyu mutarindora, kweki eribhaga ekego murindora,’ na ega, ‘Ndagya ku Taata’?” 18Kweki, bhakagendererya okubhuuranʼya ega, “Ensonga ya ‘Eribhaga ekego’ niki? Bheetu tutakumanya ganú aragamba.” 19Yeesu akamanya ega, bheendanga okumubhuurya ganú agambiri, kimwi akabhabhuurya ega, “Bhoono, murabhuuranʼya ganú ngambiri ega, ‘Rikyari eribhaga ekego na bheenyu mutarindora, na hanú ririhwa eribhaga ekego murindora kweki?’ 20Ndabhakeerya obhuheene ega, bheenyu murikuura na okusurumbara, nawe, abhantu bha mukyaro munu bharijomerwa. Murisurumbara, nawe, obhusurumbaru bhwenyu bhurihunjura okubha obhujomerwa. 21Omukari hanú aratuna okwibhura arasurumbara, kwa okubha eribhaga rya enyanko yaaye rihikiri. Nawe, hanú aramara okwibhura, atakuhiituka kweki enyanko iyo, kwa ekisigo kya obhujomerwa bhwa okwibhurwa omwana mukyaro. 22Bheenyu bhonse musurumbeeri kwa eribhaga rinu. Nawe, ndiija kweki kubheenyu, mbe, murijomerwa mumitima gyenyu. Atariho omuntu unú ariruusya-ho obhujomerwa bhuyo mumitima gyenyu. 23Kweki hanú eribhaga riyo rihikiri, mutarimbuurya eringʼana ryoryonse.

“Ndabhakeerya obhuheene ega, gonsego ganú murasabha kwa eriina ryani, Taata aribhahaana. 24Okuhikira bhoonwego, mutarasabha kyokyonse ku Waryubha okutumira eriina ryani. Musabhe Waryubha, na bheenyu murinyoora. Kwa enjira iyo, murigendererya okubha na obhujomerwa bhukongʼu mumitima gyenyu.

Yeesu ahigiri eginguru egimbiibhi gya mukyaro

25“Mbakeererye amangʼana gayo gonsego kwa enjira ya ebhirengyo. Eribhaga riraaja rinú ntarihaira na bheenyu kwa enjira ya ebhirengyo, nawe, ndibhakeerya aharabhu eguru ya Taata. 26Kwibhaga riyo, muritumira eriina ryani okumusabha Waryubha. Ntakugamba ega, oni ndibhasabhira ku Taata. 27Taata omwene abhahanjiri bheenyu, kwa okubha bheenyu munhanjiri oni, kweki mureekirirya ega, naarwa ku Taata. 28Naaja mukyaro munu okurwa ku Taata, nawe, bhoono, ndarwa mukyaro munu, ndahunjuka ku Taata.” 29Mbe, abheehigira bhaaye bhakamukeerya ega, “Bhoono wambiri okugamba na bheetu harabhu bira okutumira ebhirengyo! 30Bhoono mbe, tumanyiri ega, omanyiri amangʼana gonsego, kweki otakwenda omuntu akubhuurye ryoryonse. Gayo ngo gatukoreri okwikirirya ega, waarwa ku Waryubha.” 31Yeesu akabhabhuurya ega, “Bhoono mwambiri okwikirirya? 32Eribhaga riringi haangʼi, kweki riringi haangʼi bhukongʼu, hanú bhonsego murinyaragana. Bhonsego murigya oweenyu, na okuntiga oni omwene. Nawe, ntaribha oni omwene, kwa okubha Taata aringi hamwi na oni. 33Ndabhakeerya amangʼana gayo gonsego, naho mubhe na omurembe mumitima gyenyu, kwa okubha muringi munsi waani. Mukyaro munu murinyoora enyanko enjaru, nawe, mutoobhoha, kwa okubha oni nkihigiri ekyaro.”

Currently Selected:

Yoana 16: Kabwa

Highlight

Copy