Popular Bible Verses from Lukas 8

Share

Jadi iri nopo dii i nakasasad siri tana aandai nga irino irad di tinangaran do Kinoringan nakasasad siri ginavo di tongotulun do minongkinongou marong, om pinataau diolo kaandai-andai siri ginavojo gosob do alanut iri ginavo diolo, om irino tuvajo,” kadi Yisus.

Om iri nopo i nakasasad siri korugijan nga irino irad di tinangaran do Kinoringan i norongou di tulun, do ontok do sumurut i kaparsayaan diolo kinamno iri ginavo diolo sumusa, om kiuvang do kumaya om kasanangan siti vonuvo, om irino dii nga au dii sumundur i kaparsayaan diolo.

Om iri nopo linsou i nakasasad siri kovotuvan nga irino irad di tinangaran do Kinoringan di nakasasad siri ginavo do tulun, om karangaai nopo dii diolo nga asanang dii i ginavo diolo om aparsaya. Nga au dii minomugamut i tinangaran si ginavo diolo om au alaid i kaparsayaan diolo. Om rikoto nopo iolo do ponsubaan, luoino dii i kaparsayaan diolo.

Nga kadi Yisus diolo do, “Ombono dii i kaparsayaan muju?” ka. Nga korosijaino iolo mivaja do osumboijan marong, om poitatangarno dii iolo do irad diti, “Isai naku Tulun diti, do i sarup om umbak nga mikuboobojo tumingkod do tangaranJo?” kadiolo.

Om iri nopo linsou diri i nakasasad siri ralan nga irino irad di tinangaran do Kinoringan i nakasasad siri ginavo do tulun di rinumongou. Nga rikotno i kotua do rogon do mongoi popoidu diri tinangaran siri ginavo diolo, supaya au iolo aparsaya di Kinoringan om aui kaanu do kovijaan.

Do kasaangkat di nilosok nga pointalangoni do insan tadau, om onuu nopo i inolim di tulun do maino, nga oilaani do laaid, sabap poimbulajoni do Kinoringan.

Nga koilaai nopo dii di tongondu do noilaan di Yisus iri, om songkokopor nopo dii isido rumikot. Om tungubno dii isido siri takod di Yisus, om pangaabarno dii isido si gotuvang di kasangkat do tongotulun diri tujuan disido minongombit di sabung di Yisus, om irino dii nontodon do turus nolingasan isido. Om pitangarno dii i Yisus disido do ka, “Abu, nolingasankono dii di toruolnu do aparsayako Dogo. Nga ulino pogi om antatangaino,” ka.

Om sumurauno dii i tongotulunJo om ongoiono dii diolo posikai i Yisus do, “Ou Tuan, matai tokouno dii diti!” ka. Om koposikno dii i Yisus om pitangarno dii do potingkod marong di sarup om i umbak tagajo, om turus tinumingkod i sarup om i umbak gosob do linumomomno dii kavagu iri vaig.