Lukas 8

I Tongotongondu i Minaja di Yisus

1Om au kalalaid mantad diri om pitongkopno dii i Yisus si kababandaran om kokokompungan do papaabar diri Abar do Aandai nong potingkuro i Kinoringan momorinta di tongotulunJo. Om iri nopo opulu om duvo tulun di Yisus nga maja-vaja nogi Disido. 2Om kivaro nogi tongotongondu di sinunsubanJo do rogon om iri liningasanJo do toruol do nakavaja Disido, irad di Moria i roitan diolo do, “Tondu mantad si Bandar Madala,” ka. Om isidono i sinunsuban di Yisus diri turu rogon. 3Om nogi i Juana, i savo di Kusa, iri momimiara do barang di Raja Irudis, om i Susana, om oguupo i tongotongondu vokon do minaja di Yisus, do sambil papaakan Disido om iri tongotulunJo do siin kondiri diolo onuon do balanja.

Pinoiradan do Iso Tulun Mongungumo

(Mat. 13:1-23; Mar. 4:1-20)

4Om kountun diri i tongotulun dii, nga okonko naalang-alang i ginuu di sonrikot-rikot i tongotulun siri di Yisus do mantad siri tongobandar. Om minaganu i Yisus do iso poiradan di ponudukan ka, 5“Kivaro iso tulun do mongungumo do minongoi pasasad di linsou. Om pasasadono dii iri linsou disido, kivaroi nokotijas siri ralan, nga opiulak-ulakan do tulun, om rikotno dii i tongotombolog do mongoi monutuk diri linsou gosob do naavi. 6Om kivaro nogi i nakasasad siri kovotuvan iri tana tonipis, om sinumobul iri, nga rinumujou dii iri do notuuvan do vaig i tana. 7Om kivaro nogi i nakasasad siri pantok do korugijan, om iri nga sinumobulno dii i linsou nga tinolidan i korugijan, irino dii do rinumujou iri nisasad do nokoluputan. 8Nga kivaro dii iri nakasasad siri tana di aandai do sinumobul, om alanggauno om irino dii i minonguva. Kopumpung nopo dii iri, kivaro aatus i tuvajo,” kadi Yisus.

Om mingompusno dii Isido monuduk om puadaiJo mitangar do ka, “Isaai nopo iri kitolingo, rumongouno marong diti tinangaranKu,” kadi Yisus.

9Om pongoduatno dii i tongotulunJo nong onu komoion di pinoiradanJo diri. 10Nga kadi Yisus diolo, “Ikovu nopo nga onuan kovi do toilaan supaya koilo kou diri aupo nivantang si di tongotulun pogulu pasal do potingkuro i Kinoringan momorinta di tongotulunJo. Nga ii nopo tongotulun vokon nga tudukan do poiradan supaya mongontong daa iolo nga aui koontong, om mongkinongou daa iolo nga aui kaarati di komoionKu.#Antangai Yasaya 6:9.

11Om itino i komoion di poiradan, do iri nopo i linsou nga irino i tinangaran do Kinoringan. 12Om iri nopo linsou diri i nakasasad siri ralan nga irino irad di tinangaran do Kinoringan i nakasasad siri ginavo do tulun di rinumongou. Nga rikotno i kotua do rogon do mongoi popoidu diri tinangaran siri ginavo diolo, supaya au iolo aparsaya di Kinoringan om aui kaanu do kovijaan. 13Om iri nopo linsou i nakasasad siri kovotuvan nga irino irad di tinangaran do Kinoringan di nakasasad siri ginavo do tulun, om karangaai nopo dii diolo nga asanang dii i ginavo diolo om aparsaya. Nga au dii minomugamut i tinangaran si ginavo diolo om au alaid i kaparsayaan diolo. Om rikoto nopo iolo do ponsubaan, luoino dii i kaparsayaan diolo. 14Om iri nopo i nakasasad siri korugijan nga irino irad di tinangaran do Kinoringan i norongou di tulun, do ontok do sumurut i kaparsayaan diolo kinamno iri ginavo diolo sumusa, om kiuvang do kumaya om kasanangan siti vonuvo, om irino dii nga au dii sumundur i kaparsayaan diolo. 15Jadi iri nopo dii i nakasasad siri tana aandai nga irino irad di tinangaran do Kinoringan nakasasad siri ginavo di tongotulun do minongkinongou marong, om pinataau#8:15 pinataau: pinotoo diolo kaandai-andai siri ginavojo gosob do alanut iri ginavo diolo, om irino tuvajo,” kadi Yisus.

Poiradan do Momuang do Lampu

(Mat. 7:2; 13:12; Mar. 4:21-25; Luk. 19:26)

16Om minaganu kavagu i Yisus di iso poiradan do monuduk diolo do ka, “Ausoi tulun do momuang di lampu om tinggouban nogi do suvangan ko posusutonpo siri susut do toodopon, nga pokoyon siri potimpakan do lampu supaya isai-isaipo i kaasu siri valai nga koontong diri vinaang di lampu. 17Do kasaangkat di nilosok nga pointalangoni do insan tadau, om onuu nopo i inolim di tulun do maino, nga oilaani do laaid, sabap poimbulajoni do Kinoringan. 18Sabap diri do soromonon mujuno iti ponudukanKu dikovu do rongoon muju, do iri nopo tulun di kivaro nunu nopo nga onuan kavagu. Nga iri nopo tulun di auso, nga insan kivaropo okuyak si disido do kasaramanan nga solodon kasangkat,” kadi Yisus.

IinoJo om OiadiJo di Yisus

(Mat. 12:46-50; Mar. 3:31-35)

19Nga ontok diri rikotno iinoJo di Yisus om oiadiJo kusai do mongoi daa siri Disido, nga au dii koromut iolo Disido do okonko nokudik-kudik i tongotulun. 20Om poiloono di tulun Isido do ka, “Alono iinoNu om oiadiNu songingkakat silo labus do mongoi sumamung Dika daa,” kadi tulun.

21Nga jawapno i Yisus diolo do, “PinokotidiKu nopo om pinakatadiKu nga irino i mongkinongou di tangar do Kinoringan om maja marong,” kadi Yisus.

Minoningkod i Yisus diri Sarup om i Umbak

(Mat. 8:23-27; Mar. 4:35-41)

22Kivaro insan tadau do sinumako i Yisus om i tongotulunJo siri talud, om pitangarno Isido do, “Kayo tokou silo sondipau do botung tagajo,” ka, om tulakno dii iolo. 23Nga salaid diolo do sumondipau nokoodop i Yisus. Tigogi do rinumikot i sarup tologod gosob do silolosod i talud diolo do nolimpakan do vaig om oruaino do osuat iolo do kosusaan.

24Om sumurauno dii i tongotulunJo om ongoiono dii diolo posikai i Yisus do, “Ou Tuan, matai tokouno dii diti!” ka.

Om koposikno dii i Yisus om pitangarno dii do potingkod marong di sarup om i umbak tagajo, om turus tinumingkod i sarup om i umbak gosob do linumomomno#8:24 linumomom: minondod dii kavagu iri vaig. 25Nga kadi Yisus diolo do, “Ombono dii i kaparsayaan muju?” ka.

Nga korosijaino iolo mivaja do osumboijan marong, om poitatangarno dii iolo do irad diti, “Isai naku Tulun diti, do i sarup om umbak nga mikuboobojo tumingkod do tangaranJo?” kadiolo.

Sinunsub di Yisus i Rogon Tasapou

(Mat. 8:28-34; Mar. 5:1-20)

26Nga koompit dii oi Yisus siri vonuvo do tulun Garasa,#8:26 Garasa: Kivarono piipiro solinan di poguluupo do nokotulis do: Gadara. Antangai Mat. 8:28. Om kivaro pinotulis do Gorgisa. siri pantok do osontupakan di Vonuvo Golilia. 27-29Om kotindal dii i Yisus, kivaro dii iri iso tulun rinosukan do rogon do sinumamung Disido mantad siri bandar. Om tulun nopo diri nga nalaidno do auso sabung, om okonnoko siripo valai ijonon disido nga siisiri kalabangan. Om opogotno poimbokon do rogon do pokoruol diri tulun sampai do pojiilon om tongkongo do rantai i takod om longon, nga pimpukaton nopo disido om mongoi siri padang do kovotuvan do suuon di rogon iri ginavojo. Nga kaantangai nopo dii disido i Yisus, turus do pongogijak, om tungubno siri gotuvang Disido. Om kadi Yisus disido, “Rogon! Labusno mantad sino tulun,” ka.

Om mijak-gijak dii do opuod marong i tulun rinosukan mitangar di Yisus do ka, “Yisus, Tanak do Kinoringan, i Asavat Kuasa do onuu nopo! Kukuroyon oku Dika? Tulungo okuno marong Dika. Ada oku kukuroyo Dika!” ka.

30Om duatono dii di Yisus isido do ka, “Isai ngarannu?” ka.

Jawapno dii isido, “I Tasapou ngaranku,” ka, do oguu marong gia i rogon do rinumasuk. 31Om pokitulungno dii i tongorogon di Yisus do ka, “Ada ikoi pokooyo silo luvang#8:31 luvang do okonko totonungon korolomo: Andasan nopo do tulun do iri nopo tongorogon diri nga uvungon si luvang di kororosi om aralom marong gosob do orikot i kopongukuman diolo di koompusan. do okonko totonungon korolomo,” ka.

32Nga nuka do oguu marong i vogok siri sokid do sonsungal-sungal mangakan. Om pokitulungno dii marong i tongorogon di Yisus do mokitopik siri vogok. Nga pinobojou nopo di Yisus i tongorogon. 33Om labusno dii i tongorogon do mantad siri tulun om topikno dii siri vogok. Nga korosukai nopo dii iri tongovogok di rogon om kinam-kinampo dii i tongovogok diri do santangkus-tangkus#8:33 santangkus-tangkus: songundak-undak rumuuk siri kurimbang do tasavat do lumavog siri vaig gosob do naavi nolosod.

34Nga kaantangai nopo dii di tongotulun momimiara di vogok do inong diri, om piogono dii iolo do mogidu do mongoi soi bandar om soi kokompungan do minangaabar di tongotulun do nopinlolosod iri tongovogok. 35Om ongoino dii i tongotulun do mongontong di komoion diolo nong potingkukuro iri. Jadi korikot nopo dii iolo siri di Yisus, om antangai dii diolo i tulun di sinusuban di Yisus do rogon do poingogomno dii siri somok takod di Yisus, do kisabung om aandaino dii marong i ginavojo. Sabap do inong diri i tongotulun nga rinumosi di Yisus. 36Om pangaabarno dii iri tongotulun di nokoontong nong potingkukuro dii iri tulun di rinosukan do rogon do nolingasan. 37Jadi kasangkat diri tongotulun di pointongkop siri Vonuvo Garasa nga mokianu di Yisus supaya mogidu mantad siri diolo sabap rumosi marong iolo Disido. Om sakono dii kavagu i Yisus siri talud do sumondipau kavagu.

38Om sivavaja daa marong dii iri tulun di iniduan do rogon, nga suuo dii di Yisus isido pouli do, 39“Uli pogi silo valainu, om paabarono do sinunsubanko do rogon mantad do kuasa di Kinoringan,” kadi Yisus.

Om pampanauno dii i tulun do tumongkop papaabar siri bandar om siri kampung misoliput pasal do sinunsuban di Yisus isido do rogon.

I Tanak do Jorius om i Tongondu di Kinumombit di Yisus

(Mat. 9:18-26; Mar. 5:21-43)

40Om poguliai dii di Yisus kavagu si sondipau, om osuau dii marong iri tongotulun di korikot Isido sabap alaidno iolo do mongindad Disido. 41Nga di kinorikatan Disido om kivaro iri iso tulun rinumikot do i Jorius ngaran. Isido nopo nga kotua do valai sasambayangan siri. Om tungub dii isido siri somok takod di Yisus do mokitulung supaya rumikot i Yisus siri valaijo, 42sabap kivaro tanakjo tongondu do opulu nogi om duvo toun umurjo do sipapataino do noolian toruol.

Nga di manau-panauno dii i Yisus, opitotomping Isido diri tongotulun do oguu marong. 43Om kivaro nogi iso tongondu siri do opuluno om duvo toun do au ototoduan di raa. Nga okonko aalang-alang ginuu i barangjo naavi do pinokilingasan disido di tongoduktur, nga auso iiso tulun kadapat mongolingos di toruoljo. 44Nga soriatno dii isido di tongotulun do minsomok marong ponong likud di Yisus om kombitno dii di soririg sabungJo. Om pogkombit disido turus do tinumodu iri raajo.

45Nga kadi Yisus, “Isai naku iri kinumombit Dogo?” ka.

Nga ausoi diolo mangakun do nokokombit. Jadi kadi Pitrus, “Ombopo dii oilaan, Tuan, do opitomping-tompingonKo di tulun do oguu,” kadi Pitrus.

46Nga kadi Yisus, “Aui, tantu kivaro iso tulun kinumombit Dogo, om oilaanKui do nopurimananKu i sinunduKu do linumabus,” kadi Yisus.

47Nga koilaai nopo dii di tongondu do noilaan di Yisus iri, om songkokopor nopo dii isido rumikot. Om tungubno dii isido siri takod di Yisus, om pangaabarno dii isido si gotuvang di kasangkat do tongotulun diri tujuan disido minongombit di sabung di Yisus, om irino dii nontodon do turus nolingasan isido. 48Om pitangarno dii i Yisus disido do ka, “Abu, nolingasankono dii di toruolnu do aparsayako Dogo. Nga ulino pogi om antatangaino,” ka.

49Nga di mangar-tangarpo i Yisus di tongondu, om rikotno dii iri iso tulun mantad siri valai di Jorius, i kotua do valai sasambayangan, om mitangar di Jorius do ka, “Tuan, mokimaap oku dikau, om popoilo oku dikau, adano porikoto i Guru sabap noovongno i tanaknu,” kadisido.

50Nga norongoui di Yisus i tangar di tulun, jadi pitangarno Isido di Jorius do ka, “Ada korosi, aparsaya noopo Dogo, nga olingasani isido!” kadi Yisus.

51Nga pampanauno dii iolo, om korikot nopo dii i Yisus siri valai di Jorius, om au linilaan Disido i tongotulun do masu, nga i Pitruspo, i Yaya, i Yakub, om iinojo om iamojo#8:51 amo: apa di tanak do pinaasu. 52Om kasangkat di tulun siri valai nga songiad-iad do moginupus di tanak. Nga pitangarno i Yisus do, “Ada kou mogiad do okoniko napatai ilo tanak dilo, nga nokoodop noopo,” kadi Yisus.

53Nga irak-irakai nogi dii diolo Isido, do noilaanno diolo do napatai i tanak. 54Nga kuutaino dii di Yisus i longon di tanak, om pitangar do opuod do, “Tanak, tungagno!” ka. 55Om turus do nokoibo i tanak, om tungagno, om miningkakat, om suuono dii di Yisus iolo do papaakan di tanak. 56Om koiranaino dii marong i moloing di tanak do inong diri. Nga minitangar i Yisus diolo do, “Ada muju sangkaabarai i tongotulun vokon pasal di najadi diti,” ka.

Currently Selected:

Lukas 8: LabukPKV

Highlight

Copy