Lukas 9

Sinuu di Yisus i TongotulunJo Mongoi Papaabar di Abar do Aandai

(Mat. 10:5-15; Mar. 6:7-13; Luk. 10:4-11)

1Om loovono dii di Yisus iri opulu om duvo tulunJo, om korikot dii iolo siri Disido, onuaiJo nogi dii iolo do sinundu om kuasa do monunsub kasangkat do rogon om mongolingos di tongotoruol do tulun. 2Om suuo nogi dii Disido iolo do mongoi papaabar di tongotulun nong potingkuro i Kinoringan monguasa di tongotulunJo om mongolingos do toruol do tulun. 3Nga kadi Yisus diolo, “Mampanau kou nopo, om ada kouno mongovit do onuu nopo, insan tungkat,#9:3 tungkat: tungkud ko kontungan, ko kokorui ko siinpo nga au buli, om ada koduvoo sabung. 4Om kivaro nopo tulun poindakod dikovu, om mindada kou nopo siri gosob do orikot iri kolombusan muju. 5Nga sombo nopo do pantok do au kou poindokodon dikovu, tantagono i lisovu si lukap muju ontok do mampanau kou mantad di kampung diolo om toliban muju nopo iolo do irino i tanda do popoilo kou di kasalaan diolo,” kadi Yisus. 6Om pampanauno dii iri tongotulun Disido mantad siri om tongkopono dii diolo iri tongokampung do mongoi papaabar diri Abar do Aandai om mongolingos do tongotoruol do tulun.

Kinosuraan diIrudis

(Mat. 14:1-2; Mar. 6:14-16)

7Nga korongou nopo dii i raja do iIrudis ngaranjo, i momorinta si Vonuvo Golilia, do oguu iri najadi do koiran-iran. Om opiduvo i ginavojo osurau om au, do kivaro gia i tulun minitangar do, “Novijau kavagu kama i Yaya do mantad si pialatan di tulun napatai. Nga i Yaya i mamamatis#9:7 mamamatis: momomonsu do tulun di pogulu,” ka.

8Om kivaro nogi minitangar do, “Nokoimvulai iIlia,” ka.

Om kivarono vokon minitangar do, “Novijau kavagu iri iso nabi di napatai diri pogulupo,” ka.

9Nga kadi Raja Irudis, “Aatuk! Nototokkuno i liou di Yaya diri, om isaipo dii kavagu ino tulun dino do orongouku do oguu i kosunduvanJo?” kadi raja. Om sisamungno marong iIrudis di Yisus daa.

Papaakan i Yisus diri Limo Noribu Tulun Kusai

(Mat. 14:13-21; Mar. 6:30-44; Yaya 6:5-13)

10Om koguli nopo dii i tongosusuuon di Yisus om abaraino dii diolo Isido kasangkat diri najadi salaid di manau-panau iolo do mangaabar. Om angataino Disido iolo rumijang di tulun toguu, do mongoi siri Bandar Boitsida supaya kobubugol daa iolo. 11Nga koilaai nopo dii di tongotulun, susuutno iolo di Yisus. Om kaantangai dii di Yisus iolo, om osuau dii Isido diolo. Om tuturanaino dii Disido iolo nong potingkuro i Kinoringan monguasa di tongotulunJo. Om lingasai nogi dii Disido i tongotulun di kitoruol.

12Nga mintotonobno dii i tadau om romutno dii i tongotulun di Yisus, i opulu om duvo siri Disido do kumitatangar Disido do ka, “Gaam nogi do suuon daa ilo tongotulun toguu poongoi silo tongokampung om silo tongodumo do mogium toodopon om taakanon do misoliput diti do okonko kivaro valai siti pantok diti,” kadiolo.

13Nga jawap kadi Yisus, “Paakanon muju nono iolo,” ka.

Nga kadiolo, “Onuu iri ipaakanja diolo, do limopo noinan iti kuui om duvo tinan iti sada naansak? Poongoion ikoi naku Dika momoli taakanon do ipaakan diti tongotulun do okonko aalang-alang sinapou?” kadiolo. 14Do kinoguuo nopo diolo diri om kivaro kama iri do limo noribu tulun, nga kira tongotosukod kusai noopo.

Jadi kadii di Yisus di tongotulunJo, “Suuo muju pogi iti tongotulun do mogom, do torolimo-limo nopulu kojuvan do iso pinurukan,” kadi Yisus. 15Om irino dii tangar di Yisus vinaja diolo, om suuo nogi dii diolo kasangkat i tongotulun diri do pinoogom. 16Om onuono dii di Yisus iri limo noinan i kuui om iri duvo tinan i sada, om tingaa nogi dii Isido soi tavan#9:16 tavan: langit do sumambayang do mangarajou#9:16 mangarajou: mongompod do Kinoringan. Om pikokib-kokibo dii Disido, om popintaako nogi dii di tongotulunJo supaya potikidon diolo di tulun toguu. 17Om pangakanno dii iolo kasangkat gosob do nabajakan. Om koopod nopo dii i tongotulun toguu mangakan om pumpungono dii di tongotulun di Yisus iri tongosongkokiban do noolu-olu diolo mangakan, nga kivaropo dii opulu om duvo vakid noolu.

Pongokuan di Pitrus do i Yisusno i Koristus

(Mat. 16:13-16, 20; Mar. 8:27-29)

18Kivaro insan tadau do bubugol i Yisus sumambayang, om siri iri tongotulunJo somok Disido. Om pongoduatno dii Isido diolo do ka, “Nong kaandaman di tongotulun toguu isai naku Oku diti?” kadi Yisus.

19Nga jawap iolo do ka, “Kivaro diolo mitangar do Ikano i Yaya Mamamatis,#9:19 Mamamatis: Momomonsu om kivaro diolo mitangar do Ikano i nabi Ilia, om kivaro nogi diolo mitangar do Ikano iri iso nabi, i popolombus di tinangaran do Kinoringan, di napatai di pogulupo nga novijau kavagu,” kadi tongotulun di Yisus.

20Nga kadi Yisus, “Nong ikovu, isai Oku kaandaman muju?” ka.

Jawapno dii i Pitrus, “Ikano i Koristus mantad soi Kinoringan,” ka.

21Nga pitangarno dii i Yisus di tongotulunJo do, “Adano marong sangkaabarai di tongotulun vokon do i Koristus Oku,” kaDisido.

Kotimpuunon di Yisus Popoilo diri KapatajanJo

(Mat. 16:21-23; Mar. 8:31-33)

22Om minitangar nogi Isido kavagu do, “Ioku nopo nga i narait di tongonabi i Sinumiliu do Tulun, om potingkuro pun misti do pasansarawon Oku marong, om iada Oku di tongokotua do tulun Joudi, irino i tongomoloingon, om i tongokotua di imam om i tongotulun monunuduk di Undang-undang Ugama do Joudi gosob do patajon Oku diolo, nga ontok di tadau kotolu om vijauon Oku kavagu,” kadi Yisus.

Ponudukan di Yisus pasal di Kovijaan do Tulun

(Mat. 16:24-28; Mar. 8:34-9:1)

23Koopod i Yisus mitangar di tongotulunJo om pitangar nogi dii di tongotulun kinoguuan do ka, “Isaai nopo uvang maja Dogo, misti do olinganno i kouvanganjo kondiri, om monimban di salibjo, irino do mijau matai nga sumangal#9:23 sumangal: tumaan diri kasansaraanjo sabap aparsaya Dogo pointikid-tikid tadau, om maja nogi Dogo. 24Do isaai nopo momiara noopo do kovijaanjo kondiri nga irino oliangan do kovijaanjo diri auso koovion. Nga isaai nopo oliangan kovijaanjo sabap do maja Dogo nga irino kaanu kovijaan di auso koovion. 25Sabap ausoi kountungan do tulun insan asanganupo disido kasangkat iti vonuvo, nong aui asanganu i kovijaan diri auso koovion om orugi kondiri. 26Do isaai nopo dikovu oikuman mangakun do maja Dogo om oikuman mangakun diri ponudukanKu, om Ioku nogi i Sinumiliu do Tulun nga oikuman Okui mangakun disido ontok do rumikot Oku kavagu siti vonuvo saralom do vinaangKu om vinaang diAmoKu om vinaang di tongomoloikat i ongolidang. 27Om patangaronKu marong dikovu iti do kivaropo piipiro dikovu di songingkakat siti do aupo apatai om koontongpo nong potingkukuro i Kinoringan monguasa dikovu,” kadi Yisus.

Minundaliu i Kojuvan di Yisus

(Mat. 17:1-8; Mar. 9:2-8)

28Kivaro kama sominggu mantad diri pinonudukan di Yisus diri, om angataino dii Disido i Pitrus, i Yaya om i Yakub do tinumakad siri kulud#9:28 kulud: kotud do mongoi sambayang. 29Nga minundaliu iri pamarasan#9:29 pamarasan: vuros di Yisus ontok di sambayang Isido, om i sabungJo nga minurak gosob do tumitiu i kopurakojo. 30-31Om tigogi dii do kivaro dii duvo kusai mimvulai do kivinaang do kumituturan di Yisus. Ii nopo duvo tulun diri nga i Musa om i nabi Ilia, irino i nabi di pogulupo. Om poitatangaran nopo dii diolo tolu tulun diri nga pasal do orikot i kapatajan di Yisus silo Bandar Yorusalim irad diri naatur laaid do Kinoringan. 32Nga ontok diri siodop marong i Pitrus om i tongosongkoruanganjo. Nga noposikan dii iolo om koontong dii iolo diri vinaang di Yisus om i duvo tulun songkoruanganJo do poingkakat siri somok Disido. 33Om ontok di rumijangno i duvo kusai di Yisus, om pitangarno i Pitrus di Yisus do, “Tuan! Songkuro kaandai do siti tokou nogi. Gaam mamaal ikoi do tolu sulap: iso Dika, iso di Musa om iso diIlia,” ka. Nga aui osoromo disido nong onu i komoion diri tinangaranjo.

34Nga mangar-tangarpo dii i Pitrus, rundukno dii i kavut do tinumopuk diolo. Nga nokorosi marong iolo do notopukan di kavut. 35Om kivaro dii norongou diolo di dolou mantad si saralom do kavut minitangar do ka, “Itino TanakKu di piniliKu. Pongkinongou kouno di tangar Disido!” kadi Kinoringan.

36Om kotingkod dii i mitangar om antangai dii diolo i Yisus nga sosoisopo dii Isido siri. Nga ootos dii iolo ontokpo diri, auso iiso tulun do tinuturanan diolo nong onu iri naantangan diolo diri.

Minonunsub i Yisus do Rogon siri Tanak

(Mat. 17:14-18; Mar. 9:14-27)

37Susuvab diri om ruukno dii i Yisus om i tolu tulunJo mantad siri kulud,#9:37 kulud: kotud om okonko nokuyak-kuyak ginuu di tulun do minongoi rumomut di Yisus. 38Nga kivaro dii iso tulun siri tongotulun do linumuvap do ka, “Ou Guru, tulungo okupo, antangaipo dogo iti tanakku kusai, do isoi isido tanakku. 39Om tanakku nopo diti nga obinsoupan sabap rosukan do rogon, jadi tigogi dino do gumijak isido, om mopor-koporno dii do pinaadan di rogon, gosob do momuputa i kabang, om sampai do pokorualan di rogon om auno dino tingkadan di rogon gosob do linumimomoi i kojuvanjo.#9:39 kojuvan: tinan 40Om pinokisunsubankuno daa di tongotulunNu, nga au kosunsub iolo diri rogon,” kadiamojo#9:40 kadiamo: kadiapa di tanak.

41Nga jawapno dii i Yisus, “Ikovuno tulun do maso maino do au aparsaya Dogo om nokoombo mantad diri oinomod! Komuropo linaidKu do poirunggum dikovu? Om komuropo linaidKu do asabar dikovu? Nga pokoyo siti Dogo ino tanaknu,” kadi Yisus.

42Nga ontok diri rumikot iri tanak siri di Yisus, turus nokodumpau madan i tanak om songkopor-kopor dii i kojuvan di tanak do kinuvo di rogon. Nga turus sunsubo dii di Yisus i rogon om kolingasai nogi dii i tanak, om pokoyo nogi dii di Yisus si diamojo.#9:42 diamo: diapa 43Nga oirananno marong iri tongotulun di kogojoo di sinundu do Kinoringan.

Kumoinduvo di Yisus Popoilo diri KapatajanJo

(Mat. 17:22-23; Mar. 9:30-32)

Nga masipo dii i tongotulun do oiranan diri kuasa di Yisus do monusub do rogon, om pitangarno dii Isido di tongotulunJo do ka, 44“Rongoo mujuno om rotiono marong iti tangaronKu dikovu! Do Ioku nopo nga pataakon siri tulun tongogagajo do Iokuno i Sinumiliu do Tulun,” kadi Yisus. 45Nga au kaarati iolo di komoion di Yisus, do aralom marong karangaan diolo i tangar Disido om kavagupo nga aupo nokointalang i komoion. Om nogi au iolo kopusu mongoduat di Yisus nong onu i komoion Disido diri.

Pongoduatan Nong Isai Agajo Pangkat

(Mat. 18:1-5; Mar. 9:33-37)

46Om timpuunno dii i tongotulun di Yisus do moisisival do, “Isaino daton diti agajo marong pangkat,” ka. 47Nga noilaanno di Yisus i ginavo diolo, om sabap diri do inongoi Disido iri iso tanak, om poingkokoto siri sonib Disido. 48Om pitangarno Isido diolo do ka, “Isaai nopo monorima irad diti tanak sabap aparsaya Dogo nga irino i monorima Dogo; om isaai nopo i monorima Dogo om irino i monorima Disido i minonuu Dogo siti vonuvo. Sabap isaai nopo dikovu iri osuribak marong i ginavo om irino i agajo pangkat,” kadi Yisus.

Isai iri Au Lumavan Dikovu, Irino Poirunggum Dikovu

(Mar. 9:38-40)

49Om pitangarno i Yaya di Yisus do ka, “Tuan, kivaro iso tulun naantanganja do mangarait di ngaranNu do monunsub di rogon. Nga pinotingkodja dii isido, do okoniko songkoruangan tokou isido,” kadi Yaya.

50Nga kadi Yisus di Yaya om i tongotulunJo vokon, “Ada kou potingkod diri tulun do mangarait do ngaranKu, do isaai nopo iri au lumavan dikovu om irino poirunggum dikovu,” kadi Yisus.

Au Monorima i Tulun Somoria di Yisus

51Om muai-ruai nopo dii i maso koinsavatan di Yisus soi suruga, om tatapoJo nogi dii iri kaangaianJo soi Bandar Yorusalim. 52Om poguluvono dii Disido iri piipiro susuuonJo. Om nokopogulu nopo dii iolo do mongoi siri iso kampung do tulun Somoria do posodia laaid di ijonon di Yisus. 53Nga au moo monorima i tongotulun kampung di Yisus, do noilaanno diolo do mongoi gia Isido soi Yorusalim, do au kopiontungul gia i tulun Somoria om i tulun Joudi. 54Nga koilaai nopo dii di tulun di Yisus, irino i Yakub om i Yaya, do au iolo monorima di Yisus, om pitangarno dii iolo do ka, “Tuhan, uvangNui naku nong mokianu ikoino do tapui mindaau mantad silo tavan do monorob diri tulun Somoria?” kadiolo. 55Nga kovili dii i Yisus do mongogur diolo, 56om lombusno dii kavagu iolo mongoi siri kampung do sondiang.

Uvang daa i Tongotulun Maja di Yisus

(Mat. 8:19-22)

57Om ontok diri manau-panaupo i Yisus om i tongotulunJo, kivaro iri iso tulun rumikot mitangar di Yisus do ka, “Maja oku daa Dika inombo noopo i ongoionNu,” ka.

58Nga jawapno dii i Yisus disido do ka, “Iri nopo i tongodupot irad di kaakaa nga kiluvang om i tongotombolog nga kirumuni. Nga Ioku nopo i Sinumiliu do Tulun om auso pantok do ingkojodon om odopon,” kadi Yisus.

59Om pitangarno dii i Yisus di iso tulun vokon do, “Vajano pogi Dogo,” ka.

Nga jawapno dii i tulun do ka, “Ba Tuan, nga uli okupo. Apataipo iamoku#9:59 amo: apa om olobong om maja oku nogi Dika,” ka.

60Nga jawapno dii i Yisus do ka, “Isaai nopo i tulun di aupo nakaanu do kovijaan do auso koovion om irino i mongolobong diri tulun di napatai. Nga ika nopo om pampanauno mongoi inombo-nombo pantok do porongou do tongotulun nong potingkuro i Kinoringan momorinta di tongotulunJo,” kadi Yisus.

61Om pitangarno kavagu iri iso tulun vokon do ka, “Tuan, ioku nogi nga maja Dika, nga mongoi okupo sumalam diri sanganak-anakku,” kadisido.

62Nga jawapno dii i Yisus do, “Nong i tulun di mangaradu om obingkovili nga auso koompusan. Om iri nogi tulun do maja di Kinoringan om obingkovili nga au dii atatap maja di ponudukanKu do monguasa i Kinoringan di tongotulunJo,” ka.

Currently Selected:

Lukas 9: LabukPKV

Highlight

Copy