Lukas 10
10
Minonuu i Yisus diri Turu Nopulu om Duvo TulunJo
(Mat. 10:9-15; Luk. 9:2-5)
1Nga koopod dii iri, om pomili kavagu i Yisus di turu nopulu om duvo#10:1 turu nopulu om duvo; kivaro piipiro solinan sondiang di poguluupo do nokotulis do, “Turu nopulu”. tongosusuuonJo vokon, om poiboboogijo dii Disido soroduvo-duvo tulun do poguluvonon mampanau tumikid do bandar om kampung diri opitan Disido. 2Om diri aupo mampanau iolo om minaganu Isido do iso poiradan do oguu tulun do sirongou di Abar do Aandai irad do parai naansak, do kaDisido, “Agajo daa iti tomoton nga okuyak tokou do mongomot. Sabap diri do pokianu kouno do Tuhan, i sanganu do tomoton, supaya monuu Isido di tongotulun vokon do mongoi mongomot siri dumoJo.#Antangai Matius 9:35-38. 3Pampanau kouno! SuuonKu ikovu irad di tanak do kambing biri-biri mongoi siri pantok do tulun taraat irad di kaakaa. 4Ada kouno mongovit do poijanan do siin, ko kontungan ko kasut sopiar; om ada kou kumiantara di tulun siri tanga ralan.
5Om koindakod kou nopo di valai do tulun, om mitangarpo mantad do, ‘Pokibarakatanku do Kinoringan iti valainu,’ kanto nono. 6Om kivaro nopo tulun siri valai do uvang do barakatan om patatapon nopo i barakat muju diri si disido. Nga nong au isido uvang om gumuli kavagu siri dikovu i barakat muju. 7Om nong korikot kou si kampung om kivaroi monorima dikovu, om indada kouno siri valai diri, om akanon om iupon muju nopo iri ipalak diolo dikovu do irino irad do gaji muju, do mimang i tulun di kumaraja nga apatuti do onuan di igaji disido. Om ada kou mimban-imban do valai sondiang ijonon.
8Om inombo nopo do kampung do rikoton muju om poindokodon kouno di tulun siri, nga onuu nopo ipalak diolo dikovu akanon muju nopo iri; 9om pililingasaino i tongotulun kitoruol siri, om abaranno marong iolo do, ‘Noinsamakan kouno do Kinoringan do monguasa,’ kanto nono diolo. 10Nga korikot kou nopo di bandar di ongoion muju om au kou poindokodon, om ongoi kouno siri tongoralan om mitangar kou nogi do, 11‘Insan pun lisovu do siti bandar muju do kosokot siti lukapja nga atantagjai; nga intutunan mujuno do oruaino daa i Kinoringan do momorinta dikovu nga au kou uvang,’ kanto nono diolo. 12Mitangar Oku dikovu do agaanpo kosusaan di tulun soi Bandar Sudom mantad di tulun silo bandar diri ontok do Tadau di Kopongukuman,” kadi Yisus.
Araat Nasip di Tulun do Au Aparsaya
(Mat. 11:20-24)
13Om pitangarno i Yisus kavagu, “Ooi dikovu tulun silo Bandar Kurasin om Bandar Boitsida! Atukpo dii kararaat nasip muju, do oguu kosunduvan vinaalKu si bandar muju nga au kou aparsaya Dogo, do nong iradno dino kosunduvan vinaalKu do poontong di tongotulun soi Bandar Tirus om Sidun di pogulu, alaidno daa iolo manampakai do karut om mogom-ogom misingavu do tavu tanda do rumorogo iolo diri dusojo. 14Nga agaanpo i kosusaan di tulun soi Tirus om soi Sidun ko i kosusaan muju tulun silo Kurasin om silo Boitsida ontok do Tadau Kopongukuman. 15Ooi tulun silo Bandar Kaparnaum! Ikovu nogi, panantaman muju nopo daa om poinsavaton kou soi suruga? Aui! Porotuon kou nono siri poijanan do tongotulun di nongapatai nong aui rumorogo kou,” kadi Yisus.
16Om pitangar Isido kavagu di tongotulunJo do, “Isaai nopo i mongkinongou dikovu om irino mongkinongou Dogo; om isaai nopo i au mongkinongou dikovu om irino au mongkinongou Dogo; om isaai nopo i au mongkinongou Dogo om irino au mongkinongou di Kinoringan i minonuu Dogo siti vonuvo,” kadi Yisus.
Kogulian di Tongosusuuon di Yisus si Disido
17Om pampanauno dii iri turu nopulu om duvo susuuon di Yisus si tongokampung, om kouli nopo dii iolo, om romutno dii di Yisus, om asanang dii marong i ginavo diolo. Om pitangar dii iolo do ka, “Tuhan, kasaangkat do rogon nga mikubobojo sunsubonja do i ngaranNu roitonja do ponunsub,” kadiolo.
18Nga kadi Yisus jumawap diolo, “NaantanganKu nogi i Soitan, i kotua di rogon, do rumatu mantad soi suruga irad do tungkilap. 19Sabap diri do soromono mujuno do noonuanKuno ikovu do kuasa mamasok do vulanut om kalajangking,#10:19 kalajangking: simpupua om kuasa do lumavan#10:19 lumavan: mangatu diri musu, om ausono dii pokoruol dikovu. 20Nga insan pun irad dino misti do asanang marong i ginavo muju do nokotulisno di Kinoringan i ngaran muju soi suruga, nga ada kou kaandaiai noopo sabap mikubobojo dikovu kasaangkat i rogon,” kadi Yisus.
Sinumambayang i Tuhan Yisus diAmoJo
(Mat. 11:25-27; 13:16-17)
21Om ontokno dii do sinuu-suu di Tatod Tolidang i ginavo di Yisus do aandaian om sambayang Isido di Kinoringan do irad diti, do, “Ou Amo!#10:21 Amo: Apa Tuhan do tavan#10:21 tavan: langit om tana! Monorimakasi Oku Dika do onuu nopo iri ponudukan di linosokNu siri tulun do ongopipintar om kitoilaan nga pinointalangNu siri tongotulun diri auso toilalaan irad di tangaanak, do irino kouvanganNu, Amo,” kadi Yisus.
22Om kadii di Yisus kavagu di tongotulunJo, “Kasangkat do onuu nopo nga nipokuasa Dogo diAmoKu.#10:22 diAmo: diApa Om auso kotutun marong nong isai Oku, i Tanak di Kinoringan, nga irino iAmoKu. Om auso kotutun nong isai iAmoKu nga irino Ioku i TanakJo, om iri nogi tulun di kouvanganKu do pointutunanKu,” kadi Yisus.
23Om kovilino dii i Yisus do mitangar di tongotulunJo noopo do ka, “Ososogit kouno do koontong kou diri naantangan muju! 24Do mitangar Oku dikovu, do oguuno i tongonabi om i tongoraja di pogulupo do siontong daa inong diti naantangan muju maino, nga aui dii nokoontong iolo; om sirongou daa iolo inong diti ponudukan i norongou muju, nga aui nokorongou iolo,” kadi Yisus.
Ponuuan di Opigot Marong om i Tulun do Somoria do Obinsianan
(Mat. 22:34-40; Mar. 12:28-34)
25Om ingkakatno dii iri iso guru di Undang-undang Ugama do Joudi, om pitangar do monginam daa di Yisus do ka, “Guru, potingkuro naku i gaagayaku om kaanu oku do kovijaan di auso koovion?” kadisido.
26Om kadii di Yisus do, “Nuu kadiri undang-undang nokotulis siri Kitab? Potingkuro dii pongorotiannu?” kadi Yisus.
27Om jawapno dii isido do ka, “ ‘Misti do ovi-oviono ino ginavonu, om ovi-oviono ino kovijaannu, om ovi-oviono ino kogiratannu, om ovi-oviono ino sinoromonu do auko kojuu di Tuhan i Kinoringannu,’ ka. Om, ‘Misti do auko kojuu di tulun vokon irad dino kojuvannu kondiri,’ kadi nokotulis siri Kitab,” kadi guru do Undang-undang Ugama do Joudi.#Antangai Gulion 6:5; Imam 19:18.
28Nga kadii di Yisus disido, “Oinomodno ino komoionnu. Om misti do vojoonnu ino om ovijaukoi,” kadi Yisus.
29Nga puupura iri guru di Undang-undang do Ugama Joudi om pongoduat dii di Yisus do, “Isai batoi tulun si somok iri apatut do auku kojuuan?” kadisido.
30Jadi kadii di Yisus do jinumawap disido, “Kivaro iso tulun do minampanau mantad siri Bandar Yorusalim do rumuuk soi Bandar Yorikou. Nga inavangan do tongoparampuk, om labasai, om onuono iri nunuu nopo iri kivaro si disido, om urunai mangalapos, om iduanai nogi dii diolo isido di sipapataino. 31Nga ontok diri kivaro iso imam nokosusuut disido minaja di ralan siri. I imam nopo nga kumaraja siri Valai Sasambayangan Tagajo. Nga kaantangai nopo dii di imam i tulun diri, om sondipau di alun-alun tinumalib di tulun norualan om linumombus mampanau. 32Om irad nogi dii iri iso tulun do Liwi, i tulun do monunulung di karaja di tongoimam. Nga korikot nopo siri, om kaantangaino dii disido i tulun diri, nga irad om irad diri do sinumondipau isido di alun-alun tinumalib diri tulun norualan om linumombus mampanau. 33Nga kivaro dii iri iso tulun do Somoria minampanau do tumalib siri, nga kaantangai dii disido iri tulun norualan om kosianaino dii marong isido. 34Om ongoiojono dii insamakai i tulun, om tuntugai do lana om vaig anggur iri damat, om ongkosojo nogi, om posokoono dii di kaladaijo, om ovito siri valai di sisiwaan, om sampai piarawo disido siri. 35Om kanavau nopo dii di suvab, onuojono iri duvo pirok mantad si dumpitjo, om tunujaijo pataak di sanganu di valai, om pitangar dii do, ‘Piarawopo dogo isido. Koguli oku om barajanku nogi dino kasangkat i nibalanjanu disido sondiang mantad diti nitaakku dika,’ kadi tulun do Somoria,” kadi Yisus.
36Nga pongoduatno dii i Yisus di guru do Undang-undang Ugama do Joudi do ka, “Isaino dii naku diolo tolu tulun do au kojuu di tulun inavangan di tongoparampuk?” kadi Yisus.
37Nga jawapno dii i guru do Undang-undang Ugama, do, “Iri minonulung di tulun kinuvo di parampuk,” ka.
Om kadii di Yisus, “Pampanauno pogi om sugutno di gaagaya di tulun Somoria,” kaDisido.
Nakaapit i Yisus si di Marta om i Moria
38Nga manau-panau dii i Yisus mivaja di tongotulunJo om nakaapit dii Isido siri iso kampung. Om kivaro dii iso tongondu siri do i Marta ngaran do popoindakod di Yisus. 39Om kivaro nogi tadi di Marta, ngaran do Moria. Om minongoi dii i Moria mogom siri somok takod di Tuhan do mongorongou diri ponudukan Disido. 40Nga i Marta nopo om noboringou do magansak. Om soriatno dii isido minsomok di Yisus om pitangar do, “Tuhan, nokokuro do soiso oku kumuri, do iadiku do poindada om au muup dogo do kumuri. Suuopo iadiku monguup dogo!” kadi Marta.
41Nga jawapno dii i Tuhan, “Adii dika Marta! Oguuno dii marong kosuraannu. 42Ombo bala iti kountungan nopo marong nga isooi, irino mongorongou di ponudukan mantad di Kinoringan, om irino nopili di Moria do au osolod di tulun vokon,” kadi Yisus.
Currently Selected:
Lukas 10: LabukPKV
Highlight
Share
Copy
Want to have your highlights saved across all your devices? Sign up or sign in
© 1995, Wycliffe Bible Translators, Inc. All rights reserved.
