Popular Bible Verses from Maariko 6

Share

Abhaanu ꞉bhaariga bhari ayo bhaafu, abhandi ꞉bhaariga mbeengira, abhandi mbeemuka. Okuriingʼaana na gayo, Yeesu na abheeyigira ꞉bhataanyoorere na mwanya gwa okurya. Mmbe Yeesu ˆnaabhwira abheeyigira bhaaye ati, “Muuje enu mumuunye-ko, anu bhatari bhaanu.”

Yeesu ˆnaabhabhwira ati, “Omuragi atakubhurwa ekibharo woonewoone, tari kaabhurwa ekibharo mu-kyaro kya ewaabho, ku-bhayiiri bhaaye na ewaaye.”

Bhunu Yeesu ꞉aagobhere ku-kyaro, ˆnaarora esangi enene erya abhaanu. ˆNaabhafwira ekigongo, kwa okubha ꞉bhaariga bhari rwa giingʼondi ginu gitari na mureefi. ˆNaamba okubheeyigisha mangʼana maafu.

Na Yeesu ꞉ataaturire okukora ekigwa kyonekyone eyo, tari ꞉aatuuriiye-ko amabhoko bharwaye bhatooto era, ˆnaabhawosha. ˆNaaruguura muno, kwa okubha abhaanu bhayo ꞉bhataabheeye na bhwikirisha. Yeesu ˆnaamara ˆneeyinda mu-magunguri ga ayeeyi okwiyigisha abhaanu.

Yeesu ˆnaagega emikaate etaanu na ginswi giibhiri giyo, ˆnaaragamira ku-rwire, ˆnaakumya Nyamuwanga. Kimwi ˆnaabhuturabhutura emikaate, ˆnaayaana abheeyigira bhaaye bhagabhire abhaanu, na ginswi giibhiri girya gyone mbagabhira abhaanu bhoone kutyo. Bhoone kutyo mbarya, mbeeguta. Abheeyigira bhaaye mbakumanya emikaate emisaaga na ginswi, mbeejusha bhikapo ekumi na bhibhiri.