Maariko 6
6
Yeesu kaaremwa Naajareeti
(Mataayo 13:53-58; Ruuka 4:16-30)
1Niwe Yeesu ˆnaasooka eyo, ˆnaasubha ewaabho mu-musi gwa Naajareeti, ari amwi na abheeyigira bhaaye mbamuseetaga. 2Bhunu orusuku rwa Insabhaato ꞉rwayikire, ˆnaamba okwiyigisha mw-isunagoogi. Abhaafu mu-bhanu ꞉bhaamuunguuywe mbaruguura, ꞉bhaariga mbabhuushaanya ati, “Unu anyoorere aaki amangʼana ganu goone kutyo? Anyoorere aaki obhwenge bhunu, na amanaga ga okukora ebhigwa bhiyo? 3Unu, atari omubhaaji wa ebhiinu urya, omumura wa Maryamu? Abhamura bhaabho bhatari bhaaYakobho, Yoose, Yuuda na Simooni? Na abhasubhaati bhaaye kitari nabho anu?” Mbamubhiiyirirwa, mbarema okumwikirisha.
4Yeesu ˆnaabhabhwira ati, “Omuragi atakubhurwa ekibharo woonewoone, tari kaabhurwa ekibharo mu-kyaro kya ewaabho, ku-bhayiiri bhaaye na ewaaye.” 5Na Yeesu ꞉ataaturire okukora ekigwa kyonekyone eyo, tari ꞉aatuuriiye-ko amabhoko bharwaye bhatooto era, ˆnaabhawosha. 6ˆNaaruguura muno, kwa okubha abhaanu bhayo ꞉bhataabheeye na bhwikirisha.
Yeesu kaatuma abheeyigira ekumi na bhabhiri
(Mataayo 10:5-15; Ruuka 9:1-6)
Yeesu ˆnaamara ˆneeyinda mu-magunguri ga ayeeyi okwiyigisha abhaanu. 7ˆNaabhirikira abheeyigira bhaaye ekumi na bhabhiri, ˆnaabhatuma bhabhiriibhiri. ˆNaabhayaana obhuturo bhwa okubhirimya ebhiwi mu-bhaanu. 8ˆNaabhagaanya ati, “Mwasiga kugega kiinu kyonekyone ekya okugenda nakyo mu-rugendo rwemwe, tari mugege nsimbo era. Mwasiga okugega ebhyokurya, esandiko rya ngibho, amwi ati yera, 9na gingibho gya okubharanywa. Tari mufware ebhikwirya era.” 10ˆNaabhabhwira kweki ati, “Woonewoone anu murigenda, iinyumba inu bharibharamira, mwikare muyomuyo, okuyikira orusuku runu murisooka eyo. 11Na woonewoone anu abharema okubharamira amwi ati okubheetegeeresha, musooke-wo mukuukumuraga oruteeri rwa ku-maguru geemwe. Okukora kutyo, okuuja okweresha ati Nyamuwanga aabharema kwa okubha abheene bhoone ꞉bhaamuremere.”
12Abheeyigira mbeemuka, mbaamba orugendo, mbaraasishaga abhaanu ati bhanuge ebhikayo bhyebhwe. 13Mbasooshaga na ebhiwi bhyafu mu-bhaanu, mbayakaga bharwaye bhaafu amafuta#6:13 Mbayakaga bharwaye bhaafu amafuta. Kuyo ni kweresha ati Nyamuwanga niwe kaabhawosha. mbabhawosha.
Okwitwa kwa Yowana Omubhatiisha
(Mataayo 14:1-12; Ruuka 9:7-9)
14Omukama Yerode Antipa,#6:14 Yerode Antipa. Ringira riingʼana rinu mu-Mangʼana Amakomeeye. ꞉oonguuywe amangʼana ga Yeesu, kwa okubha riisiina rya Yeesu ꞉ryariga ryakumukire mu-kyaro kyone kutyo. Abhaanu abhandi ꞉bhaariga mbaaika ati, “Ni Yowana Omubhatiisha asuukire okusooka mu-bhafuuye, kyakora ari na obhuturo bhwa okukora ebhigwa.” 15Abhandi mbaaika ati, “Yeesu ni Eriya.”#6:15 Eriya. Ni muragi wa kara. Ringira 1 Abhakama 17 okuyikira 2 Abhakama 2. Abhandi mbaaika ati, “Ni muragi wa Nyamuwanga rwa abharagi abhandi abha kara.” 16Bhunu Yerode ꞉oonguuywe amangʼana gayo, ˆnaaika ati, “Uyo ni Yowana, unu ꞉naabhutuuye-ko omutwe. Asuukire okusooka mu-bhafuuye!”
17-20Yerode ꞉aariga agabhuuye Yerodiya, omugasi wa Firipo omumura waabho. Yowana ꞉aariga ˆnaamubhwira ati, “Itakwenderwa mu-bhiraagiro bhya Nyamuwanga okugabhura omugasi wa omumura waanyu, enu omumura waanyu akyarimo omwoyo.” Amangʼana gayo ngakora Yerodiya ˆnaabhiiyirirwa muno Yowana, ˆnaamba okwagara injira ya okumwita, nawe ˆnaataamibhwa. Mmbe okwenda okujomisha Yerodiya, Yerode ˆnaaragirira abhasirikare bhagwate Yowana bhamubhoye mu-jeera. Nawe ꞉aariga ˆnaamwangarira, insonga Yerodiya aasiga okumwita. Yerode ꞉oobhayaga okwita Yowana kwa okubha ꞉aariga amenyere ati, Yowana ni murengeresi na mutaakatiifu. Yerode ꞉aariga eendere muno okwitegeeresha Yowana, nawe amangʼana ga Yowana ꞉gaariga ngamusurumbasha muno.
21Mmbe, rusuku rumwi Yerodiya ˆnaanyoora omwanya gwa okwita Yowana. Orusuku ruyo ꞉rwariga ruri rwa insikukuru ya okwibhurwa kwa omukama Yerode. Yerode ꞉aariga araarikire abhatungi abhakuru mu-bhutungi bhwaye, abhakuru bha abhasirikare, na abhatangasha abhandi bha Gariraaya ayo. 22Bhunu omuyara wa Yerodiya ꞉eengiiye, ˆnaabhina, Yerode na bhagenyi bhaaye mbajomerwa. Omukama ˆnaabhwira omuyara uyo ati, “Nunsabhe kyonekyone kinu oweenda nikuyaane.” 23ˆNaarayira ati, “Enikuyaana kyonekyone kinu oweenda, raabhe ni ebhaara rimwi ku-gabhiri ku-bhukama bhwani enikuyaana.”
24Niwe omuyara uyo ˆnaawuruka anja, ˆnaabhuusha nyiramwene ati, “Maayi, nisabheki?” Nyiramwene ˆnaamusubhya ati, “Sabha omutwe gwa Yowana Omubhatiisha.” 25Mmbe, omuyara uyo ˆnaasubha bhwangubhwangu ku-mukama, ˆnaamubhwira ati, “Eneenda unaane woori anu kutya omutwe gwa Yowana Omubhatiisha kw-isiniya.”
26Omukama ˆnaasurumbara muno, nawe ku-nsonga ya ekirayiro kyaye mu-meeso ga abhagenyi bhaaye, ˆnaataamibhwa okurema. 27ˆNaatuma omusirikare agende okwita Yowana amubhuture-ko omutwe. Omusirikare ˆnaagenda mu-jeera, ˆnaabhutura Yowana omutwe. 28ˆNaagureeta guri kw-isiniya, ˆnaayaana omuyara uyo, omuyara uyo woone ˆnaasirira nyira. 29Bhunu abheeyigira bha Yowana ꞉bhoonguuywe amangʼana gayo, mbagenda, mbagega omubhiri gwaye, mbagubhiika mu-mbiiyira.
Yeesu kaayaana abhaanu bhiwumbi bhitaanu ebhyokurya
(Mataayo 14:13-21; Ruuka 9:10-17; Yowana 6:1-14)
30Mmbe, abhatumwa#6:30 Abhatumwa. Ringira riingʼana rinu mu-Mangʼana Amakomeeye. bha Yeesu bhunu ꞉bhaasubhire, mbamutondera amangʼana goone kutyo ganu ꞉bhaariga bhakorere na okwiyigisha abhaanu eyo. 31Abhaanu ꞉bhaariga bhari ayo bhaafu, abhandi ꞉bhaariga mbeengira, abhandi mbeemuka. Okuriingʼaana na gayo, Yeesu na abheeyigira ꞉bhataanyoorere na mwanya gwa okurya. Mmbe Yeesu ˆnaabhwira abheeyigira bhaaye ati, “Muuje enu mumuunye-ko, anu bhatari bhaanu.” 32Mbeemuka abheene bhari mu-bhwato, mbagenda enu bhatari bhaanu.
33Nawe bhunu ꞉bhaariga mbagenda, abhaanu mbabharora. Abhaafu mbamenya enu ꞉bhaariga mbagenda. Abhaanu okusooka mu-misi myafu egya ayeeyi bhoone mbabhabhirimira maguru, mbabhatangatira okuyika enu ꞉bhaariga mbagya. 34Bhunu Yeesu ꞉aagobhere ku-kyaro, ˆnaarora esangi enene erya abhaanu. ˆNaabhafwira ekigongo, kwa okubha ꞉bhaariga bhari rwa giingʼondi ginu gitari na mureefi. ˆNaamba okubheeyigisha mangʼana maafu.
35Bhunu nsa nyafu egya mu-mwisi ꞉gyaturire, abheeyigira bhaaye mbamuuja-ko, mbamubhwira ati, “Anu kiri, ni mw-ibhara, na riisuubha ryaguuye. 36Raga abhaanu bhanu, bhagende mu-magunguri ganu gari ayeeyi, insonga bheegurire ebhyokurya.” 37Nawe, Yeesu ˆnaabhasubhya ati, “Ni emwe mubhayaane ebhyokurya.” Mbamubhuusha ati, “Angu kimari oweenda kigende kibhagurire emikaate gya dinaari magana gabhiri#6:37 Dinaari magana gabhiri. Iyo ꞉yaariga iri ndiyo ya meesi munaana eya omukosi wa emirimu. kibhayaane bharye?”
38Yeesu ˆnaabhabhuusha ati, “Muri na mikaate eringa? Mugende mugirore.” Mbagenda okurora, mbasubha, mbamubhwira ati, “Kiri na mikaate etaanu na nswi ebhiri.”
39Yeesu ˆnaabhabhwira ati, “Mwikashe abhaanu bhoone kutyo ku-munyerwe, bhabhe ku-makemba.” 40Abhaanu mbeekara ku-makemba ga bhaanu egana rimwirimwi, na aga makumi gataanutaanu. 41Yeesu ˆnaagega emikaate etaanu na ginswi giibhiri giyo, ˆnaaragamira ku-rwire, ˆnaakumya Nyamuwanga. Kimwi ˆnaabhuturabhutura emikaate, ˆnaayaana abheeyigira bhaaye bhagabhire abhaanu, na ginswi giibhiri girya gyone mbagabhira abhaanu bhoone kutyo. 42Bhoone kutyo mbarya, mbeeguta. 43Abheeyigira bhaaye mbakumanya emikaate emisaaga na ginswi, mbeejusha bhikapo ekumi na bhibhiri. 44Bhanu ꞉bhaariiye ebhyokurya bhiyo, abharume era ꞉bhaariga bhari bhiwumbi bhitaanu.
Yeesu kaaribhata iiguru ku-nyanja
(Mataayo 14:22-33; Yowana 6:16-21)
45Ayoayo, Yeesu ˆnaasiiga abheeyigira bhaaye ati, bhariinye mu-bhwato, bhatangate okugenda ngʼambu, bheengire Bheetisayida. Omwene ˆnaasigara akyaragana na riisangi rya abhaanu. 46Bhunu ꞉aamarire okuragana nabho, ˆnaagenda mu-kiima okusaasaama Nyamuwanga.
47Bhunu ekisuute ꞉kyeengiiye, obhwato bhwa abheeyigira bhaaye ꞉bhwariga bhwayikire mu-bhusibha agati, Yeesu ꞉aariga ari omwene era mu-kiima. 48ˆNaabharora kutyo ꞉bhaanyankaga muno okufuga, kwa okubha omuyaga ꞉gwariga ngubhayinga. Bhunu giingʼoko gya okwamba ꞉gyariga gikyari okukookoroma, Yeesu ˆnaabhaaja-ko ˆnaaribhataga iiguru ku-nyanja, ˆneenda abhature-ko. 49-50Nawe, bhunu ꞉bhaamurorere ˆnaaribhata ku-manji, mbatoga ati ni musambwa, mboobhaya muno mbamwaya, kwa okubha bhoone kutyo ꞉bhaamurorere. Kimwi Yeesu ˆnaabhabhwira ati, “Musiiriike era, musige kuubhaya! Ni anye.” 51Yeesu ˆnaariinya mu-bhwato bhunu ꞉bhaariga bharimo, omuyaga ngutemekera. Mbaruguura muno, 52kwa okubha ꞉bhataasombookeeywe na ebhiruguusho bhya emikaate bhirya. Emitima gyebhwe ꞉gyariga giri mikomeeye.
Yeesu kaawosha abharwaye bhaafu Genejareeti
(Mataayo 14:34-36)
53Bhunu Yeesu na abheeyigira bhaaye ꞉bhaambukire mbayika Genejareeti, ꞉bhaagobhiishe obhwato. 54Bhunu ꞉bheekire mu-bhwato era, abhaanu bheenda eyo mbamenya Yeesu. 55Abhaanu bhayo mbasooka ayo bhwangubhwangu mbanyaragana mu-kyaro kiyo kyone kutyo, mbareeta abharwaye bhabhayangire ku-mararo, mbaseeta Yeesu woonewoone enu ꞉bhaamuungwaga ati niyo ari. 56Woonewoone enu ꞉aariga ˆnaaja, ibhe mu-magunguri, amwi ati mu-misi gya ekyaro kiyo, abhaanu ꞉bhaariga mbamureetera abharwaye ku-magusisho. Mbamwisaasaamaga ati, abhasige era bhamukuunʼye-ko ku-bhisumi bhya emwaro ebhya ingibho yaaye. Na abhaanu bhoone kutyo bhanu ꞉bhaamukuuniishe-ko, ꞉bhaaworere.
Currently Selected:
Maariko 6: kya
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved
