Maariko 5

Yeesu kaawosha Omugeraasi unu ꞉aariga ari na ebhiwi

(Mataayo 8:28-34; Ruuka 8:26-39)

1Yeesu na abheeyigira bhaaye mbayika ngʼambu, mu-kyaro kya Abhageraasi. 2Bhunu Yeesu ꞉eekire mu-bhwato, ˆnaanyookana na omuunu unu ꞉aariga awungirwe ebhiwi ˆnaasookaga mu-nsenga#5:2 Abhayawudi ꞉bhaariga mbabhiika abhafuuye mu-nsenga, egindi ꞉gyariga gibhaajirwe mu-matare ga mu-bhiima. ginu ꞉bhaabhiikaga-mo abhafuuye. 3Omuunu uyo ꞉eekaraga mu-nsenga muyo. ꞉Aariga ari na amanaga maafu, na atariwo woonewoone unu ꞉aariga ˆnaatura okumubhoya eminyororo. 4Abhaanu ꞉bhaariga mbamubhoya eminyororo kaafu ku-maguru na gimpingu ku-mabhoko, nawe omwene ꞉aariga ˆnaagibhutura gyone kutyo. ꞉Aariga atariwo omuunu wa amanaga unu ꞉aaturaga okumuyiga. 5Nsiku gyone kutyo mu-ngeta na mu-mwisi ꞉eekaraga mu-nsenga na mu-bhiima, ˆnaamwaya enu ˆneekebhakebhaga na amagina.

6Bhunu omuunu uyo ꞉aarorere Yeesu ariwo areera, ˆnaamubhirimira, ˆnaamwifukamira ˆnaakuunʼya ansi ekisuusu. 7ˆNaamura obhuraka ˆnaaika ati, “Yeesu Omwana wa Nyamuwanga Unu ari iiguru wa bhyone kutyo, owukyagara-koki? Enikurayisha ku-Nyamuwanga, usige okuunyansha.” 8꞉Aaikire kutyo kwa okubha Yeesu ꞉aariga abhwiriiye ekiwi kiyo ati, “Awe, sooka mu-muunu unu!”

9Yeesu ˆnaabhuusha ekiwi kiyo ati, “Riisiina ryawo ni niga?” Kyeki nkimusubhya ati, “Riisiina ryani, ni Ruyijo, kwa okubha kiri bhaafu.” 10Ekiwi kiyo nkimwisaasaama asige okubhibhirimya mu-kyaro kiyo.

11Na ku-kisuumwa ayo ꞉ryariga ririwo eyijo enene rya gingurubhe, ngireebhaga. 12Niwe ebhiwi bhiyo mbyaika ati, “Ekikwisaasaama ati nuukiikirisishe, kiingire mu-ngurubhe giyo.” 13Yeesu ˆnaabhiikirisisha. Mmbe ebhiwi bhiyo mbisooka mu-muunu uyo, mbiikuurira mu-ngurubhe giyo. Riiyijo ryone kutyo erya gingurubhe ndyoromoka ribhirimire muno, ndigwirira mu-nyanja. Obhukumi bhwa gingurubhe giyo ꞉bhwariga mbuyika bhiwumbi bhibhiri.

14Abhareefi bha gingurubhe giyo mbabhirima, mbagenda mu-musi agati na mu-magunguri. Woonewoone anu ꞉bhaayikaga, ꞉bhaariga mbabhwira abhaanu amangʼana gayo. Abhaanu bhoone mbaaja, insonga bheerorere kinu kyabha. 15Bhunu ꞉bhaayikire ku-Yeesu, mboobhaya muno okurora omuunu unu ꞉aariga ari na oruyijo rwa ebhiwi eekaaye, afwaye gingibho, ari muworu aswereene obhwenge. 16Bhanu ꞉bhaarorere amangʼana gayo kutyo ꞉gaabheeye ku-muunu uyo, na ku-ngurubhe, mbatondera na abhandi. 17Niwe abhaanu bhayo mbaamba okwisaasaama Yeesu asooke mu-kyaro kyebhwe.

18Bhunu Yeesu ꞉aariga ˆneengira mu-bhwato, omuunu unu ꞉aariga ari na ebhiwi, ˆnaasabha Yeesu ati amwikirisishe abhe amwi nawe. 19Nawe Yeesu ꞉ateekirisiishe, ˆnaamubhwira ati, “Genda ewaanyu, ubhabhwire kutyo Raatabhugenyi aakufwira ekigongo, ˆnaakukorera amangʼana amanene.” 20Niwe omuunu uyo ˆneemuka, ˆnaamba okuraasha amangʼana gayo mu-misi gya Dekapoori, ˆnaaika amangʼana amanene ganu Yeesu ꞉aamukoreeye. Abhaanu bhoone kutyo mbaruguura.

Yeesu kaawosha omugasi wumwi na okusuura omuyara

(Mataayo 9:18-26; Ruuka 8:40-56)

21Yeesu na abheeyigira bhaaye mbaambuka omwaro na obhwato okusubha ngʼambu. Bhunu ꞉bhaayikire ku-murambo, abhaanu bhaafu mbamusangira. 22ˆNaaja omutangasha wumwi wa riisunagoogi, riisiina ryaye ˆnaatogwa Yayiro. Bhunu ꞉aarorere Yeesu, ˆnaamuuja-ko, ˆnaamwifukamira, 23ˆnaamwisaasaama muno, ˆnaaikaga ati, “Omuyara waani ni murwaye musinge. Enisabha kigende, umutuure-ko okubhoko kwawo, awore.” 24Yeesu ˆneemuka mbagenda owa omutangasha uyo. Na riisangi rya abhaanu ꞉ryariga ndimuseeta, rimuyiganyiishe muno.

25Mw-isangi riyo, ꞉aariga arimo omugasi wumwi unu ꞉aariga arwaye obhureegu gyaturire myaka ekumi na ebhiri. 26Omugasi uyo ꞉aariga anyankire muno ku-bhafumu bhaafu. ꞉Aariga aamariiye ebhiinu bhyaye bhyone kutyo ku-bhafumu, nawe obhurwaye bhwaye ꞉bhutaaworere tari ꞉bhwariga mbwiyongesha era. 27Bhunu omugasi uyo ꞉oonguuywe ganu Yeesu ꞉aariga ˆnaakora, ˆnaaja aturiiye iinyuma wa abhaanu, ˆnaakuunʼya ku-ngibho ya Yeesu. 28Mu-mutima gwaye ꞉aariga ˆneeyaikira ati, “Nikuunʼye ku-gingibho gya Yeesu era, eniwora.” 29Bhunu ꞉aamukuuniishe-ko, ayoayo obhureegu bhwaye mbutemekera. Omwene woone ˆneemenya ati aawora.

30Yeesu woone ˆneemenya ayoayo ati obhuturo bhwaye obhwa okuwosha, bhwakora emirimu. ˆNeekebhuukira, ˆnaabhuusha riisangi rya abhaanu ati, “Niga unu aakuunʼya ku-bhisumi bhya gingibho gyani?” 31Abheeyigira bhaaye mbamubhwira ati, “Abhaanu bhanu bhakwiyindire ni bhaafu! Kubhaki owubhuusha ati, ‘Niga unu aankuunʼya-ko?’”

32Nawe Yeesu ˆnaamagamaga, insonga arore omuunu unu ꞉aamukuuniishe-ko. 33Niwe omugasi unu ꞉aamukuuniishe-ko ˆnaayaya,#5:33 ˆNaayaya. Omugasi unu ari na obhureegu, ku-Bhayawudi ni munaabhi. Omugasi rwa uyo ꞉ateekirisibhwaga na ebhiraagiro bhya Musa, okusangira amwi na abhandi. Kwa okubha omuunu aakamukuunʼya-ko, woone kaabha munaabhi. Ringira Abharaawi 15:25-33. ˆnaaja ˆnaagwa bhwifukame imbere ku-Yeesu, enu ˆnaayararaga. ˆNaamubhwira ekimari kyone kutyo, kwa okubha ꞉aariga amenyere ganu ꞉gaariga gakorekeene mu-mubhiri gwaye. 34Yeesu ˆnaamubhwira ati, “Muyara waani, obhwikirisha bhwawo bhwakuwosha, genda na omurembe, obhurwaye bhusige okukusubha-ko kweki.”

35Bhunu Yeesu ꞉aariga akyaroma na omugasi uyo, abhaanu mbaaja okusooka ewa Yayiro, omutangasha wa riisunagoogi, mbaaika ati, “Yayiro, siga okunyansha omwiyigisha, kwa okubha omuyara waawo aafuuye.”

36Nawe bhunu Yeesu ꞉oonguuywe amangʼana geebhwe, ˆnaabhwira Yayiro ati, “Siga okuubhaya, nuubhe na obhwikirisha era.” 37Yeesu ˆnaasubhya abhaanu abhandi bhoone kutyo bhasige okumuseeta. Tari ˆnaagenda na Peetero, Yakobho na Yowana omumura waabho Yakobho.

38Bhunu ꞉bhaayikire ewa Yayiro, Yeesu ˆnaanyoora-wo inkungu, na abhaanu bhaaririre muno. 39ˆNeengira mu-nyumba, ˆnaaika ati, “Ndora omukorera abhaanu inkungu, murira? Omuyara unu atafuuye, awongeeye era.” 40Abhaanu bhayo mbamuseka muno, nawe omwene ˆnaabhawurusha bhoone kutyo anja. ˆNaagega esemwene mwana, nyiramwene na abheeyigira bhaaye abhasatu, mbagenda mu-kyumba kinu ꞉bhaariga bhamaamiishe-mo omuyara uyo. 41ˆNaagwata omuyara uyo okubhoko, ˆnaamubhwira ati, “Tarita, kumi!” Insonga ya amangʼana gayo ni ati, “Muyara, enikubhwira ati, iimuka!” 42Ayoayo, omuyara uyo, unu ꞉aariga ari na myaka ekumi na ebhiri, ˆnaayambaara, ˆnaamba okuribhata. Abhaanu mbaruguura muno. 43Yeesu ˆnaabhagaanya, ˆnaabhakomeeresha ati, bhaasiga okubhwira muunu woonewoone ganu ꞉bhaarorere. ˆNaabhwira abheebhusi bha omuyara uyo bhamuyaane ebhyokurya.

Currently Selected:

Maariko 5: kya

Highlight

Copy