Popular Bible Verses from โยฮัน 5

Share

“กู มือญาเระ กะ กาเญา ลาฆู นู ซูโงฮ จะ_ ดัฮ ซือมียา ดีฮา มือนีงัย กะ ปือมือเลา นะ กู_ ปือจายา กะ ตูฮัด นู ซูโรฮ กู มาแรฮ เตอ_ ซือมียา อีตู เลอ_ ญา อาดา ลาฆู ฮีโดะ ซูโงฮ นู ซือลาลู. ญา นะ เตด กือนา กรัจ ฮูโกบ_ ตาปี ญา บือเลฮ ลือปัซ เดะ ลาฆู มาตี_ ปี กะ ลาฆู ฮีโดะ ดัฮ เลอ.

ตานา เยซู ญา ลีฮัจ ซือมียา อีตู ตืองัฮ ตีโนะ_ ญา ตาฮู จะ_ ญา เตด ซือนัง_ ดูโดะ กะฆีเตอ ลามา ดัฮ. เยซู มือเลา ฌางัน ญา จะ_ “เกา ซูกา นะ บรี ซือนัง เดะ ปือญาเกะ อีนี เฆอ?”

กาเญา มือรูมะ เดะ ดาลับ ซูรัจ ปือมือเลา นะ ตูฮัด กรานา จะ_ กาเญา บรีงัจ จะ_ เดะ ดาลับ ซูรัจ อีตู_ อาดา ลาฆู ฮีโดะ ซูโงฮ นู ซือลาลู. ตาปี อีซี ซูรัจ ปือมือเลา อีตู เลอ_ ญา ฌาดี ซะซรี ปาซัน ลาฆู นะ กู. ตาปี กาเญา ตีเมา มาแรฮ มียา กู_ บีดา นะ บือเลฮ ฮีโดะ เลอ.

เยซู มือเลา ฌางัน ญา จะ_ “บีกัซ เลอ_ อาเกะ บาวา ลือปัจ นะ เกา_ บือฌาลัด ปี เลอ.” ดัดดัด_ ซือมียา อีตู โปด_ ญา ซือนัง เดะ ปือญาเกะ อีตู ดัฮ. กะฆีเตอ_ ญา อาเกะ บาวา ลือปัจ นะ ญา_ บือฌาลัด ปี ดัฮ. อารี อีตู เลอ_ ฌาดี อารี บราดู กรือฌา.

กะฆีเตอ_ เยซู มือเลา ตีกัฮ กะ กูญา จะ_ “กู นะ มือญาเระ ฌางัน กาเญา_ ลาฆู นู ซูโงฮ จะ_ นานะ นะ ตูฮัด นะ บูวัจ ลาฆู นามา_ ตูโรจ กะ ฮาตี ตะอาซิก_ เตด บือเลฮ เลอ_ ลือเบฮ ซา ลาฆู อีตู นู ญา ลีฮัจ อาโปก เดะ ญา บูวัจ เลอ. กรานา จะ_ ลาฆู นามา นู อาโปก บูวัจ เตอ_ ลาฆู อีตู นานะ นะ ญา_ บูวัจ กะฆีเตอ ฌูฆา เลอ.