โยฮัน 5

เยซู ปือบือลา ซือมียา จาเปะ

1ลือปัซ อีตู_ รอจ กะ ลาฆู บรามัย นะ ลูมอฮ ยิว. กะฆีเตอ_ เยซู ญา ปี กะ นังฆรี เยรูซาเลม ดัฮ. 2ปัจ นังฆรี เยรูซาเลม_ เดะ บีดิก ปีตู_ นู กูญา บลาโลก จะ_ ปีตู กาเมก_ อาดา กูบัก อาเย ซา กูบัก_ นู อาดา รูมัฮ บราดู รือมัย_ ลีมา บีฌี. กูบัก อีตู บาซา ฮีบรู บลาโลก จะ_ เบดซาทา. 3-5เดะ โกะ รูมัฮ อีตู_ อาดา ซือมียา ซาเกะ บาญะ อูรัก_ อาดา ซือมียา มาตา บูตา_ ซือมียา จาเปะ_ ซือมียา เตด บือเลฮ ฌาลัด.#5.3-5 ซูรัจ ลามา ซือตืองัฮ ตามัฮ ปือมือเลา กะฆีนี จะ_ “กูญา นาตี อาเย เดะ กูบัก นะ ลีฆัจ. กรานา จะ_ อาดา ฮูลู บาลัก นะ ตูฮัด ซืออูรัก_ ญา ตูโรด มาแรฮ ฮารู อาเย เดะ กูบัก ซือกาลีๆ. ตานา อาเย อีตู ญา บือดรัซ ดัฮ_ ซือมียา ดีฮา บือเลฮ ตูโรด กะ อาเย ดูลู_ ซือมียา อีตู นะ ซือนัง เดะ ปือญาเกะ_ นู ญา ฌาดี เลอ.” ปัจ อีตู_ อาดา กีลากี ซืออูรัก_ เตด ซือนัง บือเลฮ ตีฆา ปูโลฮ ลาปัด ตาโฮด ดัฮ. 6ตานา เยซู ญา ลีฮัจ ซือมียา อีตู ตืองัฮ ตีโนะ_ ญา ตาฮู จะ_ ญา เตด ซือนัง_ ดูโดะ กะฆีเตอ ลามา ดัฮ. เยซู มือเลา ฌางัน ญา จะ_ “เกา ซูกา นะ บรี ซือนัง เดะ ปือญาเกะ อีนี เฆอ?”

7ซือมียา นู เตด ซือนัง อีตู_ ญา ตีกัฮ จะ_ “จา เออ_ กาลา อาเย ญา ตืองัฮ บือดรัซ เตอ_ ฮอย ซือมียา ดีฮา โปด_ นะ บาวา กู บือปี ตูโรด กะ กูบัก. ตาปี ตืองัฮ กู ปี เตอ_ ซือมียา อาซิก_ ญา นะ ตูโรด ปี ดูลู เดะ กู ดัฮ เลอ.”

8เยซู มือเลา ฌางัน ญา จะ_ “บีกัซ เลอ_ อาเกะ บาวา ลือปัจ นะ เกา_ บือฌาลัด ปี เลอ.” 9ดัดดัด_ ซือมียา อีตู โปด_ ญา ซือนัง เดะ ปือญาเกะ อีตู ดัฮ. กะฆีเตอ_ ญา อาเกะ บาวา ลือปัจ นะ ญา_ บือฌาลัด ปี ดัฮ.

อารี อีตู เลอ_ ฌาดี อารี บราดู กรือฌา. 10กะฆีเตอ_ โกะ กือปาลา ลูมอฮ ยิว_ กูญา มือเลา ซัจๆ_ ฌางัน ซือมียา นู ซือนัง เดะ ปือญาเกะ อีตู จะ_ “อารี อีนี ฌาดี อารี บราดู เลอ. นู เกา บาวา ลือปัจ ปี เตอ_ ญา ซาลัฮ เดะ ฮาดัจ ฮูโกบ ลูมอฮ กีตา เลอ.”

11ตาปี ซือมียา อีตู ญา ตีกัฮ กะ กูญา จะ_ “ซือมียา นู ปือบือลา กู บรี ซือนัง เดะ ปือญาเกะ เตอ_ ญา ปือซัด เดะ กู จะ_ ‘อาเกะ บาวา ลือปัจ นะ เกา_ บือฌาลัด ปี เลอ.’ ”

12โกะ ซือมียา อีตู กูญา ตาญา ญา จะ_ “ซือมียา นู ซูโรฮ เกา จะ_ อาเกะ บาวา ลือปัจ_ บือฌาลัด ปี เตอ_ ญา ฌาดี ซือมียา ดีฮา เลอ?”

13ตาปี ซือมียา นู ซือนัง เดะ ปือญาเกะ เตอ_ ญา โปด เตด ตาฮู จะ_ ฌาดี ซือมียา ดีฮา_ ซาเบะ จะ_ เยซู เตอ_ ญา บือเลฮ ซือลูนี ปี ดัฮ_ กรานา จะ_ วะตู อีตู อาดา โกะ ซือมียา บาญะ_ เดะ ตือปัจ อีตู เลอ.

14เดะ บลากัก_ เยซู ญา บือเลฮ ดาปัจ ฌางัน ซือมียา อีตู_ เดะ รูมัฮ มือญือมัฮ ตูฮัด_ มือเลา ฌางัน ญา จะ_ “นี เลอ_ เกา ซือนัง เดะ ปือญาเกะ ดัฮ. ฌางัน บูวัจ ดูซา ปูลัก เลอ. ดัฮ เตด กะฆีเตอ_ ลาฆู ฌาฮานัม ลือเบฮ เดะ อีตู_ นะ บือฌาดี เดะ เกา เลอ.”

15กีลากี อีตู_ ญา บือเลฮ ตรือเบะ มือญาเระ กะ โกะ กือปาลา ลูมอฮ ยิว จะ_ ซือมียา นู บือเลฮ ปือบือลา ญา_ บรี ซือนัง เดะ ปือญาเกะ เตอ_ ฌาดี เยซู เลอ. 16ซาเบะ ลาฆู อีนี เลอ_ ลูมอฮ ยิว อีตู_ กูญา ปรือกัด เยซู_ กรานา จะ_ เยซู ญา บือเลฮ บือกรือฌา ปือบือลา กะฆีเตอ เดะ อารี บราดู กรือฌา. 17ตาปี เยซู ญา ตีกัฮ กะ กูญา จะ_ “อาโปก เดะ กู ญา ตืองัฮ บือกรือฌา_ ตือดะ รอจ กะ วะตู อีนี เลอ. กู โปด ตืองัฮ บือกรือฌา กะฆีเตอ ฌูฆา เลอ.”

18ซาเบะ ลาฆู อีนี เลอ_ โกะ กือปาลา ลูมอฮ ยิว_ กูญา ซือมาตา มียา จือลัฮ นะ บูนอฮ เยซู บูวัก_ บูกัด ซาเบะ เยซู ญา บูวัจ ซาลัฮ เดะ ฮาดัจ อารี บราดู_ ซา ลาฆู เตอ_ ตาปี ซาเบะ ญา บือเลฮ บลาโลก กะ ตูฮัด เดะ อาตัซ จะ_ ฌาดี อาโปก เดะ ญา ตะอาซิก เลอ. กะฆีเตอ_ ญา มืองากู จะ_ ญา ซามา บายา ฌางัน ตูฮัด เลอ.

นานะ นะ ตูฮัด นะ บือเลฮ บูวัจ ลาฆู นามา

19กะฆีเตอ_ เยซู มือเลา ตีกัฮ กะ กูญา จะ_ “กู นะ มือญาเระ ฌางัน กาเญา_ ลาฆู นู ซูโงฮ จะ_ นานะ นะ ตูฮัด นะ บูวัจ ลาฆู นามา_ ตูโรจ กะ ฮาตี ตะอาซิก_ เตด บือเลฮ เลอ_ ลือเบฮ ซา ลาฆู อีตู นู ญา ลีฮัจ อาโปก เดะ ญา บูวัจ เลอ. กรานา จะ_ ลาฆู นามา นู อาโปก บูวัจ เตอ_ ลาฆู อีตู นานะ นะ ญา_ บูวัจ กะฆีเตอ ฌูฆา เลอ. 20กรานา จะ_ อาโปก เดะ อาตัซ ญา ซายัก กะ นานะ นะ ญา เลอ. กะฆีเตอ_ ญา บูวัจ บรี นานะ นะ ญา ลีฮัจ โกะ ลาฆู ซือมูฮา_ นู อาโปก ตืองัฮ บูวัจ. อาดา ลาฆู บือกรือฌา นู บือซัยํ ซูโงฮ_ ลือเบฮ เดะ อีตู ปูลัก_ นู อาโปก นะ ปลีฮัจ กะ นานะ นะ ญา_ บีดา กาเญา นะ ปือและ ฮาตี. 21กรานา จะ_ อาโปก เดะ อาตัซ ญา อาเกะ ซือมียา มาตี บรี ฮีโดะ ปาเระ กะฮามี เตอ_ นานะ นะ ตูฮัด โปด_ ญา ซูกา นะ บรี ซือมียา ดีฮา นะ ฮีโดะ ซูโงฮ เตอ_ ญา นะ บูวัจ กะฆีเตอ ฌูฆา เลอ. 22กรานา จะ_ อาโปก เดะ อาตัซ_ ญา เตด กรัจ ฮูโกบ ซือมียา ดีฮา โปด_ ตาปี ญา บือเลฮ ซรัฮ บรี นานะ นะ ญา_ ฌาดี ซือมียา กรัจ ฮูโกบ ลาฆู ซือมูฮา เลอ. 23อาโปก ญา บูวัจ กะฆีเตอ_ บีดา โกะ ซือมียา ซือมูฮา_ นะ บือเลฮ ตูเฮะ กะ นานะ นะ ตูฮัด อีตู เลอ_ ซือรูปา บือกะ กูญา ตูเฮะ กะ อาโปก เดะ อาตัซ. ดัฮ ซือมียา ดีฮา เตด ตูเฮะ กะ นานะ นะ ตูฮัด_ ซือรูปา จะ_ ญา เตด ตูเฮะ กะ อาโปก เดะ อาตัซ_ นู ซูโรฮ นานะ นะ ญา มาแรฮ เลอ.

24“กู มือญาเระ กะ กาเญา ลาฆู นู ซูโงฮ จะ_ ดัฮ ซือมียา ดีฮา มือนีงัย กะ ปือมือเลา นะ กู_ ปือจายา กะ ตูฮัด นู ซูโรฮ กู มาแรฮ เตอ_ ซือมียา อีตู เลอ_ ญา อาดา ลาฆู ฮีโดะ ซูโงฮ นู ซือลาลู. ญา นะ เตด กือนา กรัจ ฮูโกบ_ ตาปี ญา บือเลฮ ลือปัซ เดะ ลาฆู มาตี_ ปี กะ ลาฆู ฮีโดะ ดัฮ เลอ. 25กู มือญาเระ กะ กาเญา_ ลาฆู นู ซูโงฮ จะ_ อาดา ซา วะตู นะ มาแรฮ เตอ_ โงฮซูโงฮ วะตู อีตู ญา รอจ ดัฮ เลอ_ จะ_ ซือมียา นู มาตี ดัฮ_ นะ ดืองัยํ ซือวารา นะ นานะ นะ ตูฮัด. โกะ ซือมียา นู ดืองัยํ อีตู เตอ_ นะ อาดา ฮีโดะ ซูโงฮ เลอ. 26กรานา จะ_ อีซี อาโปก เดะ อาตัซ_ ญา ฌาดี ตือปัจ นู บรี ฮีโดะ กะฮามี_ ญา โปด บรี กะ นานะ นะ ญา_ ฌาดี ตือปัจ นู บรี ฮีโดะ กะฆีเตอ ฌูฆา เลอ. 27ญา บือเลฮ บรี นานะ นะ อาดา ปือมือฆัฮ นะ กรัจ ฮูโกบ ฌูฆา_ ซาเบะ จะ_ ญา ฌาดี นานะ นะ อูมัจ ซือมียา เลอ. 28กาเญา ฌางัน นะ ปือและ ฮาตี เดะ ตือนอซ อีนี เลอ_ กรานา จะ_ ดาปิก นะ รอจ วะตู_ นู โกะ ซือมียา มาตี ซือมูฮา_ นู ตานัม ดัฮ_ นะ ดืองัยํ ซือวารา นะ ญา_ 29นะ ตรือเบะ มาแรฮ เลอ. โกะ ซือมียา นู บือเลฮ บูวัจ บาฌิ_ กูญา นะ ฮีโดะ ปาเระ_ บรี ฮีโดะ ซูโงฮ ซือลาลู. ตาปี โกะ ซือมียา นู บือเลฮ บูวัจ ฌาฮัจ เตอ_ กูญา นะ ฮีโดะ ปาเระ บีดา นะ กือนา กรัจ ฮูโกบ เลอ.”

ซือมียา นู ฌาดี ซะซรี ปาซัน ลาฆู นะ เยซู

30เยซู ญา มือเลา ปูลัก จะ_ “กู นะ บูวัจ ซือบารัก นามา โปด_ ตูโรจ กะ ฮาตี ตะอาซิก_ เตด บือเลฮ เลอ. กู ดืองัยํ กะฮามี_ กู กรัจ ฮูโกบ กะฆีเตอ. ลาฆู นู กู กรัจ ฮูโกบ เตอ_ ญา รือมัก ดัฮ_ กรานา บูกัด จะ_ กู ซือมาตา นะ ตูโรจ กะ ฮาตี นะ กู ตะอาซิก_ ตาปี กู ตูโรจ บือกะ ฮาตี นะ ตูฮัด_ นู ซูโรฮ กู มาแรฮ เลอ.

31“ดัฮ กู ฌาดี ซะซรี ปาซัน ญาวา นะ กู ตะอาซิก_ ปือมือเลา ซะซรี นะ กู เตอ_ ฮอย ซาปา นะ ซาโมจ ฌาดี ซูโงฮ เลอ. 32ตาปี อาดา ซืออูรัก นู ฌาดี ซะซรี ปาซัน ลาฆู นะ กู_ นู กู ตาฮู จะ_ ปือมือเลา ซะซรี นู ญา มือเลา เตอ_ ฌาดี ซูโงฮ. 33โซะ กาเญา_ บือเลฮ ซูโรฮ ซือมียา ปี มียา โยฮัน. กะฆีเตอ โยฮัน โปด_ บือเลฮ ฌาดี ซะซรี ปาซัน ลาฆู นู ซูโงฮ. 34ตาปี โซะ กู_ เตด ฆาโดฮ อาดา ปือมือเลา ซะซรี_ นู มาแรฮ ดาตัก เดะ โกะ ซือมียา_ ตาปี กู มือเลา ปือมือเลา กะฆีเตอ_ บีดา กาเญา นะ บือเลฮ ฮีโดะ ลือปัซ บาฌิ เลอ. 35โยฮัน เตอ_ ฌาดี ซือรูปา ปลีตา นู จูโจฮ จรัฮ บือซายา. กะฆีเตอ_ กาเญา บือเลฮ ยอม ซูกา ฮาตี ซา วะตู_ เดะ ลาฆู นู จรัฮ นะ ญา. 36ตาปี กู โปด_ อาดา ปือมือเลา ซะซรี_ ปาซัน ญาวา นะ กู เตอ_ นู บือซัยํ ลือเบฮ เดะ ปือมือเลา ซะซรี นะ โยฮัน ลาฆี เลอ. กรานา จะ_ ลาฆู บือกรือฌา_ นู ตูฮัด บือเลฮ บรี กะ กู กรือฌา บรี ซุจ เตอ_ ลาฆู บือกรือฌา อีตู เลอ_ นู กู ตืองัฮ บือกรือฌา_ ฌาดี ซะซรี ปาซัน ลาฆู นะ กู จะ_ อาโปก เดะ อาตัซ บือเลฮ ซูโรฮ กู มาแรฮ. 37กะฆีเตอ_ อาโปก นู ซูโรฮ กู มาแรฮ เตอ_ ญา ตะอาซิก โปด_ ฌาดี ซะซรี ปาซัน ลาฆู นะ กู. กาเญา ฮอย เตด ดือละ ดืองัยํ ซือวารา นะ อาโปก เตอ_ เตด ดือละ ลีฮัจ ญาวา นะ ญา เลอ. 38กาเญา ฮอย ปือมือเลา นะ ญา_ ดูโดะ เดะ ฮาตี นะ กาเญา_ กรานา จะ_ กาเญา เตด ปือจายา_ กะ ซือมียา นู อาโปก บือเลฮ ซูโรฮ มาแรฮ เตอ. 39กาเญา มือรูมะ เดะ ดาลับ ซูรัจ ปือมือเลา นะ ตูฮัด กรานา จะ_ กาเญา บรีงัจ จะ_ เดะ ดาลับ ซูรัจ อีตู_ อาดา ลาฆู ฮีโดะ ซูโงฮ นู ซือลาลู. ตาปี อีซี ซูรัจ ปือมือเลา อีตู เลอ_ ญา ฌาดี ซะซรี ปาซัน ลาฆู นะ กู. 40ตาปี กาเญา ตีเมา มาแรฮ มียา กู_ บีดา นะ บือเลฮ ฮีโดะ เลอ.

41“กู เตด นาตี ซาโมจ ลาฆู มือโอจ_ นู ดาตัก เดะ อูมัจ ซือมียา. 42ตาปี กู กราลา กาเญา บาฌิ จะ_ เดะ ฮาตี นะ กาเญา_ ฮอย ลาฆู ซายัก กะ ตูฮัด เดะ อาตัซ เลอ. 43กู นี_ บือเลฮ มาแรฮ เดะ ปือนามา นะ อาโปก เดะ กู. ตาปี กาเญา เตด บือเลฮ ซาโมจ กู ดัฮ. ตาปี ดัฮ ซือมียา อาซิก มาแรฮ_ เดะ ปือนามา นะ ญา ตะอาซิก_ ซือมียา อีตู เลอ_ กาเญา นะ ซาโมจ. 44กาเญา ซูกา นะ บรี กาวัด มือโอจ กะ กาเญา_ บือซามา-ซามา เตอ_ ตาปี ตีเมา นะ มียา ลาฆู มือโอจ นู ดาตัก เดะ ตูฮัด_ นู ฌาดี ตูฮัด แนฮ ซา เลอ. กะฆีเตอ_ กาเญา นะ ปือจายา กะ กู บือเลฮ กะฮามี เลอ? 45ฌางัน บรีงัจ จะ_ กู นะ อาดู กาเญา กะ อาโปก เดะ อาตัซ เตอ. อาดา ซือมียา นู อาดู กาเญา ดัฮ_ ปือนามา จะ_ มูซา_ ซือมียา นู กาเญา ฮาระ กะ ญา เตอ เลอ. 46ดัฮ กาเญา ปือจายา กะ มูซา เตอ_ กาเญา นะ ปือจายา กะ กู ดัฮ_ ซาเบะ จะ_ มูซา บือเลฮ ฆาแรฮ_ มือเลา ปาซัน ลาฆู นะ กู เลอ. 47ตาปี ดัฮ กาเญา เตด ปือจายา กะ ลาฆู นู มูซา บือเลฮ ฆาแรฮ ดัฮ_ กาเญา นะ ปือจายา กะ ปือมือเลา นะ กู_ บือเลฮ กะฮามี เลอ?” เยซู ญา จะ.

Currently Selected:

โยฮัน 5: ULBIBLE

Highlight

Copy