Popular Bible Verses from Eksodas 23

Share

Mi mi Hae God, mi God blong yufala, mo sipos yufala i stap mekem wosip long mi nomo, bambae mi mi blesem yufala, we bambae yufala i gat plante kakae mo plante wota, mo bambae mi tekemaot olgeta sik blong yufala tu. Long kantri ya we bambae yufala i stap long hem, bambae i no gat woman we taem i gat bel, be pikinini blong hem i lus bakegen, no we i stap nating nomo, i no gat pikinini. Mo bambae mi mekem we yufala i gat longfala laef.

Mo Hae God i talem se, “Mi bambae mi sanem wan enjel* blong mi i stap go fastaem long yufala. Hem bambae i stap lukaot long yufala taem yufala i stap wokbaot, mo bambae i lidim yufala i go long kantri ya we mi mi mekem i rere finis blong yufala.

Be sipos yufala i stap obei long hem, mo yufala i stap mekem olgeta samting we mi mi talem, mi bambae mi faet agens long olgeta enemi blong yufala.

Nating sipos bighaf blong ol man oli mekem samting we i no stret, no oli talem giaman toktok long kot we i blong mekem kot i gorong, i no jajem man long stret fasin, be bambae yufala i no folem fasin blong olgeta. Mo sipos puaman i pas long kot, bambae yufala i no mas saed wetem hem blong givhan long hem from we i puaman nomo, yufala i mas jajem hem long stret fasin.

Mo bakegen, Hae God i talem long Moses se, “Moses. Sipos yufala i harem wan nius we i giaman toktok nomo, bambae yufala i no mas go talemaot olbaot. Bambae yufala i no mas traem givhan long man we i mekem i no stret, we yufala i traem talem giaman toktok long kot blong givhan long hem.