Eksodas 23
23
Bambae yufala i mas jajem man long stret fasin
1 #
Eks 20.16; Lev 19.11,12; Dut 5.20 Mo bakegen, Hae God i talem long Moses se, “Moses. Sipos yufala i harem wan nius we i giaman toktok nomo, bambae yufala i no mas go talemaot olbaot.
Bambae yufala i no mas traem givhan long man we i mekem i no stret, we yufala i traem talem giaman toktok long kot blong givhan long hem. 2Nating sipos bighaf blong ol man oli mekem samting we i no stret, no oli talem giaman toktok long kot we i blong mekem kot i gorong, i no jajem man long stret fasin, be bambae yufala i no folem fasin blong olgeta. 3#Lev 19.15Mo sipos puaman i pas long kot, bambae yufala i no mas saed wetem hem blong givhan long hem from we i puaman nomo, yufala i mas jajem hem long stret fasin.
4 #
Dut 22.1-4
“Samtaem, sipos wan long yufala i faenem wan buluk no wan dongki we i kamaot long rop blong hem, we i blong wan enemi blong hem, bambae hem i mas tekem i gobak long stret man blong hem. 5No sipos wan long yufala i luk enemi blong hem we dongki blong hem i stap karem hevi samting tumas nao i foldaon from, be bambae hem i mas go givhan long enemi ya blong hem, blong tufala i leftemap dongki ya bakegen blong i stanap. Bambae hem i no mas pas nating nomo i go.
6 #
Lev 19.15; Dut 16.19 “Sipos puaman i pas long kot, bambae yufala i no mas traem blong pulum tingting blong jaj, blong i jajem hem long fasin we i no stret. 7Mo bambae yufala i no mas traem mekem ol giaman poen agens long narafala man. Mo sipos man i mekem i stret nomo, bambae yufala i no mas kilim hem i ded, from we fasin ya i nogud olgeta, mo man we i mekem olsem, bambae mi mi kilim hem i ded. 8Sipos wan man i mekem i no stret, nao i wantem givim mane long yufala, blong yufala i haedem rong blong hem long kot, be bambae yufala i no mas folem tingting blong hem. Fasin ya i save mekem yufala i kam olsem we ae blong yufala i blaen, yufala i no moa save luk stret fasin, mo i save pulum kot tu, blong i panisim man we i stap mekem i stret nomo.
9 #
Eks 22.21; Lev 19.33,34; Dut 24.17,18; 27.19 “Bambae yufala i no mas spolem ol strenja, from we bifo, taem we yufala i stap long Ijip, yufala tu i strenja, mo yufala i haremsave fasin ya finis we strenja i stap kasem.”
Ol namba seven yia wetem ol namba seven dei
10 #
Lev 25.1-7
Mo Hae God i talem se, “Ol graon blong yufala, bambae yufala i mas wokem garen long olgeta evri yia go kasem sikis yia, mo yufala i save tekemaot ol kakae we i stap gru long olgeta. 11Be oltaem, long namba seven yia, bambae yufala i mas livim ol graon ya i spel. Ol kakae we bambae oli gru bakegen long hem, bambae yufala i no mas tekemaot, yufala i mas livim i stap, i blong ol puaman. Olgeta bambae oli save kakae ol samting ya, mo haf we i stap we oli no tekem, ol wael anamol oli save kakae. Mo bambae yufala i mas mekem olsem tu long plantesen blong grep* blong yufala, mo long ol plantesen blong olif blong yufala.
12 #
Eks 20.9-11; 31.15; 34.21; 35.2; Lev 23.3; Dut 5.13,14 “Oltaem bambae yufala i mas wok sikis dei, be long namba seven dei, bambae yufala i no mas wok. Nao long fasin ya, bambae ol slef* blong yufala wetem ol strenja we oli stap wok blong yufala oli save spel, mo ol anamol blong yufala tu oli save spel.
13“Mi mi Hae God. Hemia ol tok blong mi, mo yufala i mas lesin gud long hem. Bambae yufala i no mas prea long ol narafala god. Nating we nem blong olgeta nomo, be bambae yufala i no mas talem.”
Tri bigfala lafet
(Eksodas 34.18-26; Dutronome 16.1-17)
14Mo Hae God i talem se, “Evri yia, bambae yufala i mas mekem tri bigfala lafet blong ona long mi.
15 #
Eks 12.14-20; Lev 23.6-8; Nam 28.17-25 “Long manis ya Abib,* bambae yufala i mas mekem Lafet* ya blong Kakae Bred we i No Gat Is long hem, from we hemia manis ya we mi tekemaot yufala long Ijip. Bambae yufala i mas folem fasin ya we mi mi talem long yufala. Olwe long taem blong lafet ya, bambae yufala i no mas kakae bred* we i gat is long hem, gogo kasem we ol seven dei blong hem i finis. Mo oltaem, sipos yufala i kam blong mekem wosip long mi, be bambae yufala i mas karem presen i kam blong givim long mi.
16 #
Lev 23.15-21; Nam 28.26-31;
Lev 23.39-43
“Mo long taem we yufala i stat blong tekemaot ol kakae long garen blong yufala, bambae yufala i mas mekem Lafet* blong Tekemaot Kakae blong Garen.#23.16: Lafet blong Tekemaot Kakae long Garen, narafala nem blong hem “Lafet blong Pentekos”. Mo Lafet blong Tekem Kakae i kam long Haos, narafala nem blong hem “Lafet blong Wokem ol Wansaed Haos”. Yu save luk tok blong tufala Lafet ya long Diksonari.
“Mo bakegen, long taem we wok blong garen i finis#23.16: Long fasin blong olgeta long taem ya, oli luk se bigfala wok blong garen i finis samwe long en blong Septemba, long taem we oli tekemaot ol kakae blong garen i kam. mo yufala i tekemaot ol frut blong grep,* mo ol frut blong ol tri blong yufala, bambae yufala i mas mekem Lafet* blong Tekem Kakae i kam long Haos.#23.16
17“Mi mi Hae God, mi God blong yufala, mo evri yia, long trifala lafet ya, yufala ol man bambae yufala evriwan i mas kam mekem wosip long mi.
18“Sipos yufala i kilim anamol blong mekem sakrefaes long mi, nao yufala i givim blad blong hem i kam long mi, be bambae yufala i no mas givim bred we i gat is long hem i kam wetem. Mo ol gris blong ol anamol we bambae yufala i kilim blong mekem sakrefaes long mi long trifala lafet ya, bambae yufala i no mas livim haf i stap go kasem nekis moning.
19 #
Dut 26.2; Eks 34.26; Dut 14.21 “Mi mi Hae God, mi God blong yufala, mo evri yia, bambae yufala i mas tekem ol nambawan kakae long ol fas kakae blong garen blong yufala i kam long haos blong mi, yufala i givim long mi.
“Sipos yufala i wantem kukum wan yang sipsip no wan yang nani, bambae yufala i no mas yusum melek blong mama blong hem bakegen blong kukum long hem.”
Hae God i mekem promes long olgeta, mo i givim tok blong hem long olgeta
20Mo Hae God i talem se, “Mi bambae mi sanem wan enjel* blong mi i stap go fastaem long yufala. Hem bambae i stap lukaot long yufala taem yufala i stap wokbaot, mo bambae i lidim yufala i go long kantri ya we mi mi mekem i rere finis blong yufala. 21Bambae yufala i mas lesin gud long hem, mo yufala i mas obei long hem. Bambae yufala i no mas girap agens long hem, from we hem i kam long nem blong mi, mo bambae hem i no save fogivim man we i girap agens long hem. 22Be sipos yufala i stap obei long hem, mo yufala i stap mekem olgeta samting we mi mi talem, mi bambae mi faet agens long olgeta enemi blong yufala. 23Enjel ya blong mi bambae i go fastaem long yufala, nao bambae i tekem yufala i go long kantri ya blong ol laen* blong Amoro,* wetem ol laen blong Het, mo ol laen blong Perij, mo ol laen blong Kenan,* mo ol laen blong Hivi,* mo ol laen blong Jebus. Olgeta man blong kantri ya, mi bambae mi kilim olgeta evriwan oli ded. 24Bambae yufala i no mas bodaon long ol god blong olgeta, mo yufala i no mas mekem wosip long ol god ya. Bambae yufala i no mas tekem fasin blong wosip blong olgeta. Bambae yufala i mas brekemdaon ol aedol blong olgeta, mo yufala i mas brekemdaon ol longlongfala ston tu we oli stanemap blong mekem wosip long olgeta. 25Mi mi Hae God, mi God blong yufala, mo sipos yufala i stap mekem wosip long mi nomo, bambae mi mi blesem yufala, we bambae yufala i gat plante kakae mo plante wota, mo bambae mi tekemaot olgeta sik blong yufala tu. 26Long kantri ya we bambae yufala i stap long hem, bambae i no gat woman we taem i gat bel, be pikinini blong hem i lus bakegen, no we i stap nating nomo, i no gat pikinini. Mo bambae mi mekem we yufala i gat longfala laef.
27“Ol man ya we oli stap agens long yufala, bambae mi mekem we oli fraet long mi. Olgeta ya we oli stap faet agens long yufala, bambae mi mekem we oli lusum hed, mo olgeta ya we oli enemi blong yufala, bambae mi mekem we oli tanemraon, oli ronwe long yufala. 28Bambae mi sanem ol honet oli go fastaem long yufala blong ronemaot ol laen blong Hivi, mo ol laen blong Kenan, mo ol laen blong Het. 29Be bambae mi no save ronemaot olgeta ya long wan yia nomo, from we sipos mi mekem olsem, bambae graon ya i stap nating, nao ol wael anamol bambae oli kam plante, mo bambae yufala i no naf blong ronemaot olgeta. 30Bambae mi stap ronemaot olgeta smosmol, gogo kasem taem we bambae yufala i kam plante, yufala i save holem graon ya. 31Bambae mi putum mak blong kantri ya i stat long Red Si long saot, i go kasem Yufretes Reva long not, mo i stat long Mediterenian Si long wes, i go kasem bigfala draeples ya long is. Bambae mi mekem we yufala i kam strong, yufala i gat paoa blong winim ol man blong kantri ya, nao taem yufala i stap go insaed long hem, bambae yufala i stap ronemaot olgeta. 32Bambae yufala i no mas mekem wan promes wetem olgeta, no wetem ol god blong olgeta, blong letem olgeta oli stap gud wetem yufala. 33Bambae yufala i no mas letem olgeta ya oli stap long kantri ya blong yufala. Sipos olgeta oli stap, bambae oli mekem we yufala i mekem sin agens long mi. Sipos yufala i mekem wosip long ol god blong olgeta, fasin ya bambae i kam olsem wan trap we bambae yufala i foldaon long hem.”
Currently Selected:
Eksodas 23: OBBR
Highlight
Share
Compare
Copy
Want to have your highlights saved across all your devices? Sign up or sign in
Open Bislama Bible Revised
Bible Society of the South Pacific © 2012
