Popular Bible Verses from Eksodas 32

Share

Nao taem ol man oli luk we Moses i no moa kamdaon, i stap longtaem tumas antap long hil ya, olgeta oli kam hivap raon long Eron, oli tok strong long hem, oli talem se, “Moses ya i tekemaot yumi long Ijip, i lidim yumi i kam long ples ya, be naoia yumi no moa save wanem i mekem hem. Mifala i wantem yu yu wokem wan god blong yumi, blong i lidim yumi.”

Nao Hae God i talem long Moses se, “Moses. Yu godaon bakegen kwiktaem, from we ol man ya blong yu we yu tekemaot olgeta long Ijip, naoia oli tanem baksaed finis long mi, oli stap mekem sin. Fasin ya we mi mi talem long olgeta blong oli folem, olgeta oli lego finis. Olgeta oli girap, oli wokem pija blong bul long gol, nao oli stap mekem wosip long hem, mo oli stap mekem sakrefaes long hem tu. Mo oli stap talem se bul ya nao i god blong olgeta we i tekemaot olgeta long Ijip.

Nao Eron i wokem wan olta long fran blong bul ya, mo i talemaot long olgeta se, “Tumora, bambae yumi mekem wan lafet blong ona long Hae God ya.” Nao long nekis dei, long eli moning, ol man oli tekem ol anamol i kam, nao oli mekem sakrefaes long bul ya, we sam, oli bonem we i bon evriwan, mo sam, oli bonem haf, oli kakae haf blong soemaot we oli stap fren gud wetem hem. Be taem oli sidaon blong kakae haf blong ol sakrefaes ya, oli kakae mo oli dring gogo oli drong, nao oli stap slip wetem woman olbaot long klia ples nomo.

Nao long nekis dei, Moses i tok long olgeta man, i talem se, “!Olgeta! !Sin ya we yufala i mekem i nogud we i nogud! Naoia bambae mi go antap long hil ya bakegen blong toktok wetem Hae God. Maet mi save mekem rod, blong hem i tekemaot sin ya blong yufala.”