Popular Bible Verses from Eksodas 7

Share

Nao Hae God i talem long hem se, “Taem yu go luk king ya, bambae mi mi mekem yu yu olsem wan god, mo brata ya blong yu Eron, hem bambae i olsem profet blong yu blong talemaot tok blong yu long hem.

Be mi bambae mi mekem king ya i mekemhed, nao hem bambae i no save lesin long yu, nating we bambae mi mekem plante bigbigfala saen long kantri blong hem, we hem bambae i luk. Nao bambae mi mekem ol man blong hem oli kasem bigfala panis, mo biaen, bambae mi tekemaot yufala long kantri blong hem, mi lidim yufala i wokbaot kampani long ol laen blong yufala blong go.

Mo taem ol man Ijip oli luk paoa blong mi we bambae mi tekem yufala i kamaot long han blong olgeta, bambae oli save nao se mi mi Hae God.”

Be king i singaot ol waes man blong hem, wetem ol kleva blong hem blong oli kam wokem ol majik blong olgeta, nao oli mekem stret olsem we Eron i mekem. Oli sakem ol wokingstik blong olgeta i go long graon, nao ol wokingstik ya oli kam snek. Be hemia we i blong Eron i solemdaon ol stik ya blong olgeta.

King. Hae God i talem se bambae yu save luk paoa blong hem long ol samting ya we bambae hem i mekem. Naoia bambae mi mi kilim wota ya long wokingstik ya, mo wota ya bambae i kam blad.

“Moses, sipos king i talem long yutufala se, ‘Ale, yutufala i traem mekem wan merikel blong soemaot paoa blong yutufala,’ bambae yu yu talem long Eron blong i sakem wokingstik blong hem i godaon long graon long fes blong king, nao stik ya bambae i jenis i kam snek.” Nao tufala i go luk king wetem ol haeman blong hem, tufala i mekem olsem we Hae God i talem long tufala. Eron i sakem wokingstik ya blong hem i go long graon long fes blong olgeta, nao stik ya i kam snek.