Eksodas 7
7
1Nao Hae God i talem long hem se, “Taem yu go luk king ya, bambae mi mi mekem yu yu olsem wan god, mo brata ya blong yu Eron, hem bambae i olsem profet blong yu blong talemaot tok blong yu long hem. 2Olgeta samting we bambae mi talem long yu, yu mas talem long Eron, blong hem bambae i talemaot long king. Hem i mas talem long king, se hem i mas letem ol laen* ya blong Isrel* oli aot long kantri blong hem oli go. 3#Wok 7.36Be mi bambae mi mekem king ya i mekemhed, nao hem bambae i no save lesin long yu, nating we bambae mi mekem plante bigbigfala saen long kantri blong hem, we hem bambae i luk. 4Nao bambae mi mekem ol man blong hem oli kasem bigfala panis, mo biaen, bambae mi tekemaot yufala long kantri blong hem, mi lidim yufala i wokbaot kampani long ol laen blong yufala blong go. 5Mo taem ol man Ijip oli luk paoa blong mi we bambae mi tekem yufala i kamaot long han blong olgeta, bambae oli save nao se mi mi Hae God.”
6Nao biaen, Moses mo Eron, tufala i go luk king, tufala i mekem ol samting we Hae God i talem long tufala. 7Mo long taem ya, yia blong Moses i kasem eiti, mo yia blong Eron i kasem eiti tri.
Wokingstik blong Eron i jenis i kam snek
8Mo Hae God i talem long Moses mo Eron se, 9“Moses, sipos king i talem long yutufala se, ‘Ale, yutufala i traem mekem wan merikel blong soemaot paoa blong yutufala,’ bambae yu yu talem long Eron blong i sakem wokingstik blong hem i godaon long graon long fes blong king, nao stik ya bambae i jenis i kam snek.”
10Nao tufala i go luk king wetem ol haeman blong hem, tufala i mekem olsem we Hae God i talem long tufala. Eron i sakem wokingstik ya blong hem i go long graon long fes blong olgeta, nao stik ya i kam snek. 11Be king i singaot ol waes man blong hem, wetem ol kleva blong hem blong oli kam wokem ol majik blong olgeta, nao oli mekem stret olsem we Eron i mekem. 12Oli sakem ol wokingstik blong olgeta i go long graon, nao ol wokingstik ya oli kam snek. Be hemia we i blong Eron i solemdaon ol stik ya blong olgeta. 13Be nating we king ya i luk ol samting ya, hem i stap mekemhed moa, mo i no save lesin long tufala, mo samting ya i stret olsem nomo we Hae God i talem fastaem.
Faswan long ol bigbigfala panis we i kasem ol man Ijip, olgeta wota i kam blad
14Nao Hae God i talem long Moses se, “King ya i stap mekemhed tumas, mo hem i no wantem nating blong letem ol man ya oli go fri. 15Long moning, bambae hem i godaon long Nael Reva#7.15: Nael Reva. Long taem ya ol man Ijip oli stap mekem wosip long hem, from we oli luk se hem i wan god blong olgeta. Reva ya i stap givhan gud long olgeta, i stap mekem ol garen blong olgeta oli gat plante kakae, mo from samting ya i no klia we king ya i stap godaon long reva blong swim nomo, no blong mekem wosip. Yu luk tu long 8.20. Be bambae yu wetem Eron, yutufala i tekem wokingstik ya we fastaem i kam snek, yutufala i go fastaem, yutufala i stap wet long hem long saed blong reva. 16Nao taem hem i kamtru, bambae yu talem long hem se, ‘Mifala ol Hibru,* mo Hae God i God blong mifala, mo hem i sanem mi finis blong mi kam talem long yu, se yu mas letem ol man blong hem oli go blong mekem wosip long hem long draeples. Be kam kasem naoia, yu yu no harem tok blong hem nating. 17#Rev 16.4King. Hae God i talem se bambae yu save luk paoa blong hem long ol samting ya we bambae hem i mekem. Naoia bambae mi mi kilim wota ya long wokingstik ya, mo wota ya bambae i kam blad. 18Ol fis blong hem bambae oli ded, mo wota ya bambae i sting we i sting. Ol man blong yu bambae oli no moa save dring wota ya.’ ”
19Mo bakegen, Hae God i talem long hem se, “Mo bambae yu talem long Eron blong i tekem wokingstik ya, i leftemap antap long olgeta wota blong kantri ya, blong ol reva, wetem ol raonwota mo ol narafala wota long ples ya, olgeta evriwan bambae i kam blad, mo olgeta ples bambae i kam fulap long blad. Olgeta samting olsem besin mo botel we i gat wota long hem, be ol wota ya tu bambae i kam blad.”
20Nao tufala i mekem olsem we Hae God i talem long tufala. Long fes blong king wetem olgeta haeman blong hem, Eron i leftemap wokingstik blong hem, i kilim reva ya long hem, nao olgeta wota long ples ya i kam blad. 21Ol fis blong wota ya oli ded evriwan, mo sting blong wota i mekem we ol man Ijip oli no moa save dring long hem. Mo long olgeta ples long kantri ya, i gat fulap blad i stap long hem. 22Be ol kleva blong king oli wokem majik blong olgeta, mo oli mekem sem samting tu. Nao from samting ya, king i stap mekemhed bakegen olsem fastaem. Hem i no save lesin nating long tufala ya, mo samting ya i stret nomo olsem we Hae God i talem fastaem. 23Hem i gobak long haos blong hem, we i no tingting nating long ol samting ya. 24Mo ol man Ijip oli stap digim graon klosap long saed blong reva ya blong faenem wota blong dring, from we oli no moa save dring long reva ya.
Seken panis, frog i kam fulap long ol ples
25Biaen long taem ya we Hae God i mekem wota i kam blad, seven dei i pas,
Currently Selected:
Eksodas 7: OBBR
Highlight
Share
Compare
Copy
Want to have your highlights saved across all your devices? Sign up or sign in
Open Bislama Bible Revised
Bible Society of the South Pacific © 2012
