Popular Bible Verses from Romanfoɛ 6

Share

Ofikyɛ bɔne akatua yeɛ ole ewue, na akyɛdeɛ bɔ Nyameɛ fa me yeɛ ole daa ngoa bɔ ɔnate y'Awurade Kristo Yesu so ne.

Nnɛmɔ maa bɔne di ɛmɔ so, ofikyɛ ɛmɔnne mmeraa bo, mmom ɛmɔwura adom bo.

Yeti mmerɛ bɔ yɛbɔle asu yɛhɔle ye wue nanu ne, bɛsiele yɛne ye mukoraati, ná kyɛbɔ Baba ne nate ye anuonyam so tingyele Kristo fili ewue nu ne, yɛ koso odikyɛ yɛnate asetena foforɛ nu.

Na sɔ ala yeɛ nnɛmɔfa ɛmɔ nipadua ne bɛma bɔne, maa ɔfa yɛ nningyein bɔ ɔttemaye ɔ. Mmom ɛmɔfa ɛmɔ nwo bɛma Nyameɛ kyɛ mmenia bɔ batingye bɛ bafi ewue nu, na ɛmɔfa ɛmɔ nipadua namukoraati bɛma Nyameɛ ma ɔfa yɛ nikye bɔ ɔtengyɛ.

Afei yɛse kyɛ, babɔ Kristo ne yɛ suban daa ne asɛnnua nu, kyɛbɔ ɔkɔyɛ a yɛ nipadua bɔ bɔne wɔ ye nwo ne kowu, ná yannyɛ ngoaa yamma bɔne kõ.

Yeti ɛmɔ koso, ɛmɔnwu ye kyɛ ɛmɔ awu bama bɔne, na ɛmɔ nate Kristo Yesu so bɛte ase bɛma Nyameɛ.

Ye de, nzu yeɛ yɛka ɔ? Aso odikyɛ yɛkɔ so yɛtena bɔne nu, kyɛbɔ ɔkɔyɛ a, adom ne kobu yɛ so anaa? Dabida! Sɛ yawu yama bɔne a, ɔkɔyɛ sɛɛ né yahɔso yatena nu?

Ɛmɔnze kyɛ, sɛ ɛmɔfa ɛmɔ nwo bɛma ebie kyɛ ngoaa, na ɛmɔyɛ sotie bɛma ye a, etielɛ bɔ ɛmɔtie ye nati, ɛmɔte ye ngoaa? Ɛmɔ kɔhora bɛkɔyɛ ngoaa bɛkɔma bɔne bɔ ɔkɔ ewue nu, anaa sotie bɔ ɔkɔ tenenee nu.

Nakoso yɛda Nyameɛ ase paa, ɔwɔ nu, mmerɛ bie, né ɛmɔte bɔne ngoaa, nakoso ɛmɔ afi ɛmɔ ahone mukoraati nu bayɛ sotie bama ngyerɛkyerɛ bɔ bɛfa bɛmane ɛmɔ ne. Wamaa ɛmɔ alɛ́ ɛmɔ nwo koraa bafi bɔne nwo, na ɛmɔ ayɛ ngoaa bama tenenee.