Popular Bible Verses from Rom 12

Share

Ene mogl pai eraiglmara i, yoba meda God bogl moglkrikwa i mogl pai erimere yegl erekrio! Ene God nomane norabedi agai tebi, God ene nomane kor kor inaiglmedi tenabuka. Tenan, God ene siragl mere eraiglmedi prukwa i, ene pre pogl sinaiglkwa. God mabuno tau wakai kanugwa i, mabuno wakai ya mabuno du i, ene kaima pre pogl sinaiglkwa pre diga.

Agrama abarama wagle, God mitno podo goglsre, nono ere wakai ere noro kodugwa i pre na ene di tenagledi prika i, ene ogono nagino God tenaiglmedi prika. Yoba sipsip si gogl, mudu gagl tawa teimere mere yegl, ene kor meglmere i, ogono nagino mudu God tenaiglkwa i pre diga. Ene ka kaima God kagie kade tenamnedi pribi, ene yegl eraiglkwa. Yegl eribi, God ama wakai prabuka.

Ene okuo God bogl akie wakai kaima moraiglkwa i, ege ege poglo di prisre, gun yei, ama kamage ege ege erio. Te, yubun ta ene meglmara unan, adigl giglede molo.

Te, mabuno kide ene yobuglo ere norabedi kanige erekrio. Ene mabuno wakai ersre, mabuno kide egre atne edio.

Pre mediglkwa yoba ta moraiglkwa i, ye no agroma abaroma meglmedi kandre, deno muduno ikne ikne teo. Ene enene mogl atne edidre, agroma abaroma ta moraiglkwa i pre i mitna ede teo.

Ene yoba gumuglno mina ye deno muduno teigwa dagl ere, ye mokono mina deno muduno ta tekribi, kuno erekrukwa. Ene yoba ka kaima deno muduno teo. Te, mabuno kide ta panabuka i, ene kide kan, erekre, mabuno wakai ta panabuka i ake gi di mogl, erio.

Ene ege ege yoba pere bogl deno muduno swara yedre, wakai moraiglkwa mabuno i erio. Ene yegl eribi, ene erikwa i yene ta kide pribi, yene mina panabuka ba ene siragl mere eraiglkwa pre diga.

Na agrama abarama dena muduna suna meglkwa i, na ka mitna di kodiga, yoba ta ene ere kide ere tebi, ene ere ikne ede tekrio diga. I siragl pre ene God agai tebi, ye yene yoba mabuno kide eraiglkwa i dem kubro tedre, ere te ikne edenabuka. God kamo mina okna ibo yegl beglkwa, Yoba mabuno kide beglbi, nana ere ikne ede tenaglka. I na nana kogona pamiwe di, yegl dugwa.

Te, ene Yagl Kade kogonmo erikwa i, ene nomano mina ka kaima eramnedi prisre, oglka erekre, kogon podo ere pai molo.

Ana God yene na ere wakai ere narsre, na ye kamo i pi yoba di tenatnedi na dedugwa. God kogon yegl narukwa pre na erme ye dra idre, ene swara swarade yegl di tenaglka, ene mogl mitna edekrio! Ene ka mem pamere pribi, ene yegl praiglkwa, No pre medungo, God yene prumere ere mogl, no ye kogonmo eraiglmedi noro pere pere edugwa ba no yoba kuno keme munedi yegl praiglkwa.

Ana yoba ta ene ere kide ere tebi, ene ere ikne ede tekrio. Te, ene mabuno ta duglo beglbi, yoba wakai kanaiglkwa i keme duglo bolo.

Ene ikne ikne deno muduno swara yei moraiglkwa. Te, ene mogl mitna edidre, yoba kade munedi prikre, yoba ta kagno paikrukwa i bogl akie wan, ye meglmere yegl, kuno moraiglkwa.

Te, God kamo bage ta ama yegl dugwa, Ene kudanen ikne kidan goran, ene kaya mokna gagl to. Mo, ye nigl goran, ene nigl kogl to. Ene yegl etn, ye ene ere kide ere tomara i, agai podo gorabiwe di, God kamo yegl dugwa.

Yoba ta ene ere kide ere tebi, God yoba i ere kide ere tenabedi agle di prikrio. God ye ake ple di tenabedi agle di teo. Yoba ta gun yenaiglkwa igne i ene ama ye bogl akie gun yeo. Te, ye yubun idre, kai eraiglkwa igne, ene ama ye bogl akie kai erio.

Te, God yobama ta kaya mokna mo ki ta yeikrabuka i, ake ple di tedre, agroma abaroma yogugl ta unaiglkwa i, ere wakai ere teo.

Nono Jisas yugobunomo mina munga i, yoba swara mogl, kuno keme munga. Nono ogono nagino kunga i, ene kanio! Yoba ogo nagie swara paugwa ba ogo nagie swara i mina gumuglo paugo, guma dra paugo, ogo kagle pere pere paigwa i, ye ama kogono pere pere paugwa. Kuno yegl mere nono mudu Krais yugobunomo mina munga i, kogono pere pere paugwa ba nono ye ogo nagie swara mere yegl munga pre nono swara kaima munga.