Popular Bible Verses from Yesaya 40

Share

Ɔ na do baŋ be takaa wɔ nɛ doŋ, na ɔ te fa baŋ bɔɔ yɔkɔse nɛ doŋ kpu

Nombia ne takaa tewulɛɛ na alebia na ba te yɔkɔse, na tewulɛɛ te kpaŋte na ba te yale. Mɔna baŋ be loo gyakaa Degbeŋgyoo dɔɔ nɛ, baa nyiŋ doŋ wɔle. Baa nyiŋ beŋkelɛɛ furufu ŋgba otolokuse nɛ, baa yeu keŋ bɔɔ kaa ya, baa ta keŋ ba wose be yɔkɔse wɔ ya.

Ɛ ba gyeŋ ke yee? Ɛ te nyii ke yee? Degbeŋgyoo yɛna Wurubuarɛ kekpaakekpaa ŋon, Ŋon yɛɛna tɛɛle pou. Ɔ bɛɛ kaa ya te kolo bɛɛ takaa e ya, te ŋolo be tale nyii ɔ nombia kenyii man ya.

Ŋolo ne fae yeesa nyiaa, <<Ɛ desina gbɛɛ depampaa man fa Degbeŋgyoo, ɛ tenee gbɛɛneŋ depampaa man fa de Wurubuarɛ.

Ŋale na boto na kyeŋkyeŋkɔɔse te kpiisi, mɔna de Wurubuarɛ nombii keŋ kyaa kekpaakekpaa.>>

Na baa lese Degbeŋgyoo gyoorobiiri wola, na balaŋ pou ke debodokoloŋ naa ke, Nawolo nyi Degbeŋgyoo gyuusuna ɔ nɔɔ yako.>>

Ɛ mo tɛɛle wulu detaŋgya kamasɛ, ɛ yɛlɛɛ bulase na bulasebia pou, ɛ tala tɛɛle keŋ be kyalasɛɛ ya nɛ. ɛ tenee gbɛɛneŋ ŋan be gokii nɛ.

Ɔ ne kɛɛ ɔ wonembia ŋgba namense kɛɛlere nɛ. Ɔ na tela namensebia baŋ ɔ nyiŋmaase man, na ɔ te gɔtaa wɔ kyaŋna ɔ konɔɔ, ɔ ne tɛɛ namense talabose baŋ siaman dɛɛdɛɛ.

Ɛ gyina ɛ sia na ɛ ke kɛɛ adido, Amɔte yɛɛna abɔɔ kɛŋa pou? Ŋon yɛɛna adido abɔɔ pou dokoloŋ dokoloŋ, te ɔ doo be man kamasɛ yele baake e. Lee ɔ doŋ keŋ ka dokoso be kyaa ya na ɔ wɔɔle dɔɔ, be man dokoloŋ gba ta yoo ya.

Ɔ kyaa ɔ gyooro gbeli dɔɔ adido, te tɛɛle dɔɔ balaŋ yɛɛ ŋgba akpataana nɛ. Ɔ ne fɛlɛɛ adido ŋgba kanyaŋ nɛ, na ɔ te baŋ ke ŋgba kanyaŋ deni nɛ na baa kyaa ke man.

Ɛ kolosi wɔe kefɛɛ nombia fa Yerusalɛm, na ɛ ke yako e nyi ɔ tom nedoŋ keyɛɛ te kɔŋ ɔto, nyi ba te tɔ ɔ dukum kom, nyi ɔ te nyiŋ ɔ dukum kom akpeŋ ala lee Degbeŋgyoo nyiŋmaa man.

Woya ŋaale yakowɔ nyi, <<Gyɔ dekpeŋkpeŋ.>> Te me bɔɔsewɔ nyi, <<Maa gyɔ dekpeŋkpeŋ sena?>> <<Balaŋ pou yɛɛ ŋgba ŋale nɛ, te ba weeya yɛɛ ŋgba ŋale man kyeŋkyeŋkɔɔse nɛ. Ŋale na boto na kyeŋkyeŋkɔɔse te kpiisi, nawolo nyi Degbeŋgyoo na lee ɔ weesɛɛ ŋe dɔɔ. Ampaŋ denibalaŋ yɛɛ ŋale ke.

Kɛɛ, Degbeŋgyoo Doŋ Pou Nyee ne kɔŋ na doŋ, te waa mo ɔ baam doŋte keŋ di gyoori. Kɛɛ, ɔ dana ɔ komketɔ, te ɔ balaŋ baŋ ɔ be lɛɛ wɔ kpuɛna e.

Ɛ kyɔlɛɛ, ɛ kyɔlɛɛ me balaŋ, Ɛ Wurubuarɛ yakola.

Amɔte moona ɔ nyiŋmaatɔɔ maa loŋ, yaa waa mo ɔ nyiŋmaa maa adido see? Amɔte moona tɛɛle kei dɔɔ aŋasa do doŋa man, yaa waa mo sikeli maa bulase, na waa mo bulasebia gyakaa sikeli dɔɔ? Amɔte ne gyaela waa tale gyeŋ keŋ Degbeŋgyoo feliŋ ŋon waa yɛɛ, yaa waa tale wola Degbeŋgyoo nombia? Amɔ gyaŋ te Degbeŋgyoo gyuuwɔ nyi waa lese nombia man fa e, te amɔte wolana e gbɛɛ keŋ tenɛɛ? Amɔte wolana e nombia kagyeŋ, yaa wola e nombia man kenyii gbɛɛ?