Yesaya 40
40
Wurubuarɛ balaŋ kekyɔlɛɛ
1Ɛ kyɔlɛɛ, ɛ kyɔlɛɛ me balaŋ,
Ɛ Wurubuarɛ yakola.
2Ɛ kolosi wɔe kefɛɛ nombia fa Yerusalɛm,
na ɛ ke yako e
nyi ɔ tom nedoŋ keyɛɛ te kɔŋ ɔto,
nyi ba te tɔ ɔ dukum kom,
nyi ɔ te nyiŋ ɔ dukum kom
akpeŋ ala lee Degbeŋgyoo nyiŋmaa man.
3Ŋolo ne fae yeesa nyiaa,
<<Ɛ desina
gbɛɛ depampaa man fa Degbeŋgyoo,
ɛ tenee gbɛɛneŋ depampaa man fa de Wurubuarɛ.
4Ɛ mo tɛɛle wulu detaŋgya kamasɛ,
ɛ yɛlɛɛ bulase na bulasebia pou,
ɛ tala tɛɛle keŋ be kyalasɛɛ ya nɛ.
ɛ tenee gbɛɛneŋ ŋan be gokii nɛ.
5Na baa lese Degbeŋgyoo gyoorobiiri wola,
na balaŋ pou ke debodokoloŋ naa ke,
Nawolo nyi Degbeŋgyoo gyuusuna ɔ nɔɔ yako.>>
6Woya ŋaale yakowɔ nyi, <<Gyɔ dekpeŋkpeŋ.>>
Te me bɔɔsewɔ nyi, <<Maa gyɔ dekpeŋkpeŋ sena?>>
<<Balaŋ pou yɛɛ ŋgba ŋale nɛ,
te ba weeya yɛɛ ŋgba ŋale man kyeŋkyeŋkɔɔse nɛ.
7Ŋale na boto na kyeŋkyeŋkɔɔse te kpiisi,
nawolo nyi Degbeŋgyoo na lee ɔ weesɛɛ ŋe dɔɔ.
Ampaŋ denibalaŋ yɛɛ ŋale ke.
8Ŋale na boto na kyeŋkyeŋkɔɔse te kpiisi,
mɔna de Wurubuarɛ nombii keŋ kyaa kekpaakekpaa.>>
9Nyaŋ ŋon n na mo nombia kpaakpaa kɔŋ Siyɔn,
gyeŋ gyu bula dɔɔloŋ nyeeman,
Nyaŋ ŋon n na mo nombia kpaakpaa kɔŋ Yerusalɛm,
gyina n woya fae yeesa,
fae yeesa, naa yee ya,
yako Yuda donɔɔse nyiaa,
<<Ɛ Wurubuarɛ yaa.>>
10Kɛɛ, Degbeŋgyoo Doŋ Pou Nyee ne kɔŋ na doŋ,
te waa mo ɔ baam doŋte keŋ di gyoori.
Kɛɛ, ɔ dana ɔ komketɔ,
te ɔ balaŋ baŋ ɔ be lɛɛ wɔ kpuɛna e.
11Ɔ ne kɛɛ ɔ wonembia ŋgba namense kɛɛlere nɛ.
Ɔ na tela namensebia baŋ ɔ nyiŋmaase man,
na ɔ te gɔtaa wɔ kyaŋna ɔ konɔɔ,
ɔ ne tɛɛ namense talabose baŋ siaman dɛɛdɛɛ.
12Amɔte moona ɔ nyiŋmaatɔɔ maa loŋ,
yaa waa mo ɔ nyiŋmaa maa adido see?
Amɔte moona tɛɛle kei dɔɔ aŋasa do doŋa man,
yaa waa mo sikeli maa bulase,
na waa mo bulasebia gyakaa sikeli dɔɔ?
13Amɔte ne gyaela waa tale gyeŋ keŋ Degbeŋgyoo feliŋ#40:13 Nyeempɔ ŋon waa yɛɛ,
yaa waa tale wola Degbeŋgyoo nombia?
14Amɔ gyaŋ te Degbeŋgyoo gyuuwɔ nyi waa lese nombia man fa e,
te amɔte wolana e gbɛɛ keŋ tenɛɛ?
Amɔte wolana e nombia kagyeŋ,
yaa wola e nombia man kenyii gbɛɛ?
15Ampaŋ tɛɛlese pou yɛɛ ŋgba loŋ ketɔ yala som man nɛ,
bɛɛ kɛɛ wɔ ŋgba akuŋkuŋ gyakaala sikeli dɔɔ nɛ.
Ɔ ne keri tɛɛlesebia ŋan loŋ be kilisi ŋa nɛ ŋgba ŋe yɛɛ akuŋkuŋ buu nɛ.
16Lebanɔn daase ta boo fa kedeesa boalaŋ kado ya,
te ke man wonembia ta boo fa katoo kedeesa ya.
17Ɔ siaman na tɛɛlese pou yɛɛ yakaa,
ɔ ne kɛɛ ŋa nyi ŋɔɔ taŋ tɔnɔɔ ya,
te ŋe yɛɛ yakaa.
18Amɔte yaa ɛ ka mo Wurubuarɛ maana?
Dinɔɔ woŋti yaa ɛ ka mo e maana?
19Bane dɔɔ, nyeele luure yɛɛna ke,
te kɔba yayam luure mɔ moo kɔba yayam gyilaa ke,
te ɔ moo kɔba wolom agbaraagbaraase desina ke.
20Diyemte ŋon ɔ be gyae waa tale yɛɛ kei ya nɛ,
ne gyae daŋ keŋ be gyae ke dala ya nɛ,
na ɔ te gyae ŋon ɔ gyeŋ nyiŋmaa man adao nideli nɛ,
na ɔ te yae bane ŋon ɔ be gyae waa yala ya nɛ fa e.
21Ɛ ba gyeŋ yee?
Ɛ te nyii yee?
Ba te yako ŋon leenaŋ kewalaŋ yee?
Ɛ te nyii ke man leenaŋ tɛɛle kewalaŋ keŋ yee?
22Ɔ kyaa ɔ gyooro gbeli dɔɔ adido,
te tɛɛle dɔɔ balaŋ yɛɛ ŋgba akpataana nɛ.
Ɔ ne fɛlɛɛ adido ŋgba kanyaŋ nɛ,
na ɔ te baŋ ke ŋgba kanyaŋ deni nɛ na baa kyaa ke man.
23Ɔ ne yɔkɔse siamantena doŋnyibaŋ baŋ,
na ɔ te yele ba te yɛɛ yakaa.
24Be ka betaa duu wɔ pɛ,
be ka betaa duu wɔ pɛ,
ŋe ka betaa nyiŋ lila tɛɛle man pɛ,
te ɔ lee weesɛɛ woli ŋa te ŋa botowɔ,
te koloŋoloŋ kuu ŋa laŋ ŋgba wura nɛ.
25Fereŋkyeŋte ŋon kpa nyiaa, <<Amɔte yaa ɛ ka mo maŋ maana?
Daa na amɔte yɛɛla kyɛɛkyɛɛ?
26Ɛ gyina ɛ sia na ɛ ke kɛɛ adido,
Amɔte yɛɛna abɔɔ kɛŋa pou?
Ŋon yɛɛna adido abɔɔ pou dokoloŋ dokoloŋ,
te ɔ doo be man kamasɛ yele baake e.
Lee ɔ doŋ keŋ ka dokoso be kyaa ya na ɔ wɔɔle dɔɔ,
be man dokoloŋ gba ta yoo ya.
27Yakɔbe, weera te n na toroŋ?
Iserae, weera te n ne yako nyi,
<<Me gbɛɛ ta yoo lee Degbeŋgyoo gyaŋ,
te me Wurubuarɛ be famenɛna me nombia ya>>?
28Ɛ ba gyeŋ ke yee?
Ɛ te nyii ke yee?
Degbeŋgyoo yɛna Wurubuarɛ kekpaakekpaa ŋon,
Ŋon yɛɛna tɛɛle pou.
Ɔ bɛɛ kaa ya te kolo bɛɛ takaa e ya,
te ŋolo be tale nyii ɔ nombia kenyii man ya.
29Ɔ na do baŋ be takaa wɔ nɛ doŋ,
na ɔ te fa baŋ bɔɔ yɔkɔse nɛ doŋ kpu,
30Nombia ne takaa tewulɛɛ na alebia na ba te yɔkɔse,
na tewulɛɛ te kpaŋte na ba te yale.
31Mɔna baŋ be loo gyakaa Degbeŋgyoo dɔɔ nɛ,
baa nyiŋ doŋ wɔle.
Baa nyiŋ beŋkelɛɛ furufu ŋgba otolokuse nɛ,
baa yeu keŋ bɔɔ kaa ya,
baa ta keŋ ba wose be yɔkɔse wɔ ya.
Currently Selected:
Yesaya 40: NTR
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics Literacy and Bible Translation
