Popular Bible Verses from Lucas 11

Share

Ek'u ri'ix tob' xa ix tikawex na lik ta utz ik'u'x, na ruk' ta k'u ri', kiriq uya'ik chomilaj taq sipanik chike riwalk'o'al. ¡Mak'uwari' ri Qaqaw Dios k'o chila' chikaj kuya ne lo ri Santowilaj Ruxlab'ixel chike ri ketz'onow re!» xcha ri Jesús.

E uwari'che kamb'i'ij ri'in chiwe: Janipa ri kajawax chiwe, chitz'onoj che ri Dios y kaya'i' chiwe; chitzukuj ruk' Rire janipa ri kajawax chiwe y kiriqo; chich'a'b'ej Rire y kixukajmaj loq.

Ma china ri kel uchi' che utz'onoxik, kuk'ul na; china ri k'o kutzukuj, kuriq na; y china ri kach'aw pan che ruchi' ja, kajaqi' na lo che.

Y ri Jesús xub'i'ij chike: —Echiri' kixch'a't ruk' ri Dios, utz jewa' kib'i'ij: Qaqaw Dios, Lal k'o la chila' chikaj, ¡lik cheta'maxoq nim uq'ij ri b'i' la! Peta la, taqana la paqawi'; chu'ana k'u ri rajawal k'u'x la wara che ruwachulew, jela' pacha' ri ka'an chila' chikaj.

Kuyu ko la qamak, jela' pacha' ri'oj kaqakuy kimak konoje ri emakuninaq chiqij. Y maya ko la luwar chiqe kojtzaq pa mak; e lik chojkolob'ej la chwach ritzel winaq —xcha'.

Ya'a ko la waq'ij ri qawa, ri kajawax chiqe ronoje q'ij.

»Ri qawach e pacha' candil re ri qacuerpo, ma ruma wa' kojtzu'nik cha' utz kojb'inik. Jek'ula', we ri qawach lik utz u'anom, ronoje ri qacuerpo nojinaq che q'ijsaq y kaqil k'u ronoje chi utz. No'j we ri qawach na utz taj, ronoje ri qacuerpo k'o pa q'equ'm.

»Na jinta junoq echiri' kutzij juna aq', ke'rewaj lo chupa juna luwar pa na q'alaj ta wi. Na kuch'uq tane uwi' ruk' juna mulul re pajb'al; ri ku'an che, e kuya lo chupa ruk'olib'al chikaj cha' jela' kutzij kiwi' ri keb'ok b'i.