Lucas 11

Ri Jesús kak'utun chwi ri oración

(Mt. 6:5-15; 7:7-11)

1K'o jun q'ij ri Jesús kach'a't ruk' ri Dios. Y echiri' xuk'is u'anik orar, jun chike rutijo'n xub'i'ij che:

—Qajawal, k'utu la chiqe su'anik kaqa'an orar, jela' pacha' xu'an ri Juan kuk' rutijo'n —xcha'.

2Y ri Jesús xub'i'ij chike:

—Echiri' kixch'a't ruk' ri Dios, utz jewa' kib'i'ij:

Qaqaw Dios, Lal k'o la chila' chikaj,

¡lik cheta'maxoq nim uq'ij ri b'i' la!

Peta la, taqana la paqawi';

chu'ana k'u ri rajawal k'u'x la wara che ruwachulew,

jela' pacha' ri ka'an chila' chikaj.

3Ya'a ko la waq'ij ri qawa, ri kajawax chiqe ronoje q'ij.

4Kuyu ko la qamak,

jela' pacha' ri'oj kaqakuy kimak konoje ri emakuninaq chiqij.

Y maya ko la luwar chiqe kojtzaq pa mak;

e lik chojkolob'ej la chwach ritzel winaq

—xcha'.

5Ek'u ri Jesús xub'i'ij tanchi chike:

«We ta e la' k'o junoq chiwe, pa tik'il aq'ab' ke'ek chirocho juna ramigo y jewa' kub'i'ij che: “Wamigo, ma'an ko ri' kanjal oxib' nuwa chawe, 6ma xk'un jun wamigo petinaq naj y na jinta chi nuwa re kantzuqu” kacha che.

7»Ek'u rire kuk'ul lo uwach k'a pa ja, jewa' kub'i'ij lo che: “Minach'ich'a', ma ri puerta tz'apil chik y oj kotz'ol chi kuk' ri walk'o'al. Na utz ta k'u ri' kinyaktajik cha' ki'nya'a b'i chawe” kacha'.

8»Kamb'i'ij k'u ri'in chiwe: Rachi tob' na kayaktaj ta lo che uto'ik ri ramigo ruma kamigos kib', pero kuto'o xa ruma ri ramigo lik na xroq'otaj ta utz'onoxik.

9E uwari'che kamb'i'ij ri'in chiwe: Janipa ri kajawax chiwe, chitz'onoj che ri Dios y kaya'i' chiwe; chitzukuj ruk' Rire janipa ri kajawax chiwe y kiriqo; chich'a'b'ej Rire y kixukajmaj loq. 10Ma china ri kel uchi' che utz'onoxik, kuk'ul na; china ri k'o kutzukuj, kuriq na; y china ri kach'aw pan che ruchi' ja, kajaqi' na lo che.

11»¿K'o neb'a juna achi chixo'l, we ruk'ajol kutz'onoj pam, kuya juna ab'aj che; o we kutz'onoj kar, kuya juna kumatz che? 12¿O k'o neb'a juna achi we ruk'ajol kutz'onoj saqmolob' che, kuya juna sina'j che? ¡Na jinta junoq! 13Ek'u ri'ix tob' xa ix tikawex na lik ta utz ik'u'x, na ruk' ta k'u ri', kiriq uya'ik chomilaj taq sipanik chike riwalk'o'al. ¡Mak'uwari' ri Qaqaw Dios k'o chila' chikaj kuya ne lo ri Santowilaj Ruxlab'ixel chike ri ketz'onow re!» xcha ri Jesús.

Kab'i'x che ri Jesús e uchuq'ab' ritzel ri k'o ruk'

(Mt. 12:22-30; Mr. 3:20-27)

14E xu'an wa' echiri' ri Jesús karesaj b'i jun itzel uxlab'ixel che jun achi me'turisam ruma ri itzel uxlab'ixel. Ek'uchiri' elinaq chub'i ri itzel uxlab'ixel, rachi xujeq kach'a'tik. Yey taq ri winaq lik xkam kanima' che wa'. 15Pero e k'o jujun chike xkib'i'ij: «Rire keb'eresaj b'i ri itzel uxlab'ixel ruma ruchuq'ab' ri Beelzebú, ri kajawal ri itzel uxlab'ixel» xecha'.

16Y e k'o chi jujun xa re kakik'am upa ri Jesús, kakitz'onoj che ku'an juna k'utub'al re chila' chikaj cha' kaq'alajinik we Rire taqom lo ruma ri Dios. 17Pero ri Jesús reta'am sa' ri kakich'ob'o; ruma k'u ri', xub'i'ij chike:

«We ri taqanelab' re juna tinamit kijachom kipa ruma kech'o'jin chikiwach, ri' na kanajtir ta ri kitaqanik. Yey we ri ejeqelel pa juna ja kijachom kipa ruma kech'o'jin chikiwach, ri' na ketiki' ta chi utz.

18Jek'uri'la', we ta ri Satanás kuk' ri itzel uxlab'ixel kakijeq kech'o'jin chikiwach, ¿su'anik k'u ri' katiki' rutaqanik? Kamb'i'ij wa' ma ralaq kab'i'ij alaq ri'in keb'enuwesaj b'i ri itzel uxlab'ixel ruma ruchuq'ab' ri Beelzebú.

19»We ta e ri', ¿china kaya'w kichuq'ab' ri' ri e tijo'n ralaq cha' kekesaj b'i itzelilaj uxlab'ixel? ¿Ruk' nawi ruchuq'ab' ritzel kaki'ano? Tz'onoj k'u alaq ri' chike ri e tijo'n alaq we e u'anom ri'. 20Pero we ri'in keb'enuwesaj b'i ri itzel uxlab'ixel ruk' ruchuq'ab' ri Dios, wa' e k'utub'al re k'uninaq chi rutaqanik ri Dios chixo'lib'al alaq.

21»We k'o juna achi lik k'o uchuq'ab' y lik k'o uchapab'al puq'ab' re kuchajij ri rocho, na jinta k'u kuk'ulumaj ri' rub'itaq re. 22No'j we xk'un lo junoq chik más k'o uchuq'ab' chwa ri rajaw ja, ri' kuch'ij uchuq'ab', kumaj k'u che ri rajaw ja ri chapab'al ri lik ukub'am uk'u'x ruk', kuk'am b'i ronoje rub'itaq re y kujach chike jujun chik.#11:21-22 Wa jun k'amb'al na'oj e ke'elawi ritzel lik k'o uchuq'ab', pero ri Jesús más k'o uchuq'ab' chwa ritzel. E uwari'che k'o puq'ab' Rire keb'eresaj lo ri winaq puq'ab' ritzel. 23Kamb'i'ij k'u che alaq: China ri na u'anom ta re wuk' ri'in, ri' aj ch'a'oj chwij. Yey china ri na kato'b' ta wuk' ri'in che kik'amik lo jujun chik, ri' e kuwulij wa chak kan'ano.

Ri kuk'ulumaj junoq echiri' juna itzelilaj uxlab'ixel katzelej tanchi ruk'

(Mt. 12:43-45)

24»Echiri' juna itzelilaj uxlab'ixel kel b'i ruk' juna tikawex, ri ku'ano e kasutin pa taq luwar katz'intz'otik re kutzukuj pa kajeqi' wi. Yey we na kuriq taj, kub'i'ij k'u chirib'il rib': “Kintzelej pe chupa ri wocho, pa xinel lo wi” kacha'. 25Ek'uchiri' koponik, ku'riqa rachi pacha' juna ja mesom upa y yijb'ital chi utz. 26Ke'ek k'ut, keb'u'k'ama chi lo wuqub' rach itzel uxlab'ixel más itzel kiwachlib'al chwa rire; y konoje k'u ri' keb'okik y kejeqi' chiri'. Jek'uri'la', rub'inik rachi más kayojtaj chwa ri petinaq loq»#11:26 Wa jun k'amb'al na'oj e ke'elawi we juna tikawex na kuya ta rib' puq'ab' ri Dios, e ritzel ku'an ri're che. Ma qonoje ri oj tikawex k'o qajaw, tob' e ritzel o e ri Dios. xcha ri Jesús.

Nim kiq'ij kalaxik ri kekojow re Rutzij Upixab' ri Dios

27Echiri' k'a katajin ri Jesús che ub'i'xikil wa', k'o jun ixoq chikixo'l ruk'iyal winaq lik ko xch'awik, jewa' xub'i'ij che:

—Nim uq'ij ralaxik rixoq xya'w e la chwachulew y xtz'umtisan e la —xcha'.

28No'j ri Jesús xub'i'ij che:

—Más nim kiq'ij kalaxik ri ketaw re y kekojow re Rutzij Upixab' ri Dios —xcha'.

Ri winaq kakitz'onoj che ri Jesús k'utub'al re ruchuq'ab'

(Mt. 12:38-42)

29Echiri' uk'iyal winaq katajin kimolotajik ruk' ri Jesús, rire xujeq ub'i'xikil chike:

«Ri tikawex re waq'ij ora lik itzel kik'u'x, ma e kakitz'onoj kan'an juna k'utub'al re ruchuq'ab' ri Dios chikiwach. No'j na kaya'taj ta k'u wa' chike, ma xew kaya'taj ri k'utub'al x'ani' ojertan ruk' ri Jonás.#Mt. 12:39-40 30Ma jela' pacha' ri Jonás xolu'ana jun k'utub'al chikiwach ri aj Nínive, jek'uri'la' Ralaxel Chikixo'l Tikawex kolu'ana jun k'utub'al chikiwach ri tikawex re waq'ij ora.

31»Echiri' kopon ri q'ij re q'atb'al tzij,#Ap. 20:11-15 kayaktaj lo ri reina re pa sur#11:31 Wa jun ixoq e reina re ri nación Sabá ri k'o pa sur che Israel. 1 R. 10:1-4 y kukoj kimak ri tikawex re waq'ij ora. Ma rojertan lik naj petinaq wi rire cha' kolu'xikinaj runa'oj ri rey Salomón. No'j ri tikawex re waq'ij ora, k'o jun chikixo'l más k'o uwach chwa ri Salomón, yey na keb'ok tane il che.

32»Jek'ula' ri winaq aj Nínive re ojertan keyaktaj chupa ri q'ij re q'atb'al tzij y kakikoj kimak ri tikawex re waq'ij ora. Ma rike xkitzelej kitzij chwach ri Dios ruma ri tzijonik xu'an ri Jonás chikiwach.#Jon. 3:1-10 No'j ri tikawex re waq'ij ora, k'o jun chikixo'l más k'o uwach chwa ri Jonás, yey na keb'ok tane il che.

Ri k'amb'al na'oj puwi ri candil

(Mt. 6:22-23)

33»Na jinta junoq echiri' kutzij juna aq', ke'rewaj lo chupa juna luwar pa na q'alaj ta wi. Na kuch'uq tane uwi' ruk' juna mulul re pajb'al; ri ku'an che, e kuya lo chupa ruk'olib'al chikaj cha' jela' kutzij kiwi' ri keb'ok b'i.

34»Ri qawach e pacha' candil re ri qacuerpo, ma ruma wa' kojtzu'nik cha' utz kojb'inik. Jek'ula', we ri qawach lik utz u'anom, ronoje ri qacuerpo nojinaq che q'ijsaq y kaqil k'u ronoje chi utz. No'j we ri qawach na utz taj, ronoje ri qacuerpo k'o pa q'equ'm.#11:34 Pa ri ch'a'tem hebreo we junoq “utz ruwach”, wa' ke'elawi lik utz uk'u'x y na kaxu'yan taj. Yey we “na utz ta ruwach”, wa' ke'elawi lik ko ruk'u'x y lik xu'y.

35»Lik k'u chajij ib' alaq; e mab'i'ij alaq: “Oj k'o pa q'ijsaq”, yey na kana'b'ej ta alaq pa q'equ'm k'o wi alaq. 36No'j we paqatzij wi k'o chi alaq pa q'ijsaq y na jinta chi re ri q'equ'm che alaq, ri' ronoje kaq'alajin chiwach alaq jela' pacha' juna candil kutzij ri b'e alaq ruk' ruwonib'al» xcha'.

Ri Jesús kuq'alajisaj ri kimak ri fariseos y raj k'utunel re ri tzijpixab'

(Mt. 23:1-36; Mr. 12:38-40; Lc. 20:45-47)

37Ek'uchiri' ri Jesús xuk'is kak'utunik, xsik'ix ruma jun fariseo cha' ke'wo'qa chirocho. Ri Jesús xe'ek, xok k'u chupa ri ja y xtz'uyi' chwa ri mexa. 38Echiri' xril wa' ri fariseo, lik xkam ranima' che ma na xuch'aj ta nab'e ruq'ab' jela' pacha' kaki'an che ri kijosq'ikil ri fariseos.

39Ek'u ri Qanimajawal jewa' xub'i'ij che:

—Ralaq alaq fariseos lik kok alaq il che ri kach'aj alaq chi utz ri rij ri vaso y ri laq pero na kok ta alaq il che uch'ajik rupa. Jek'uri'la' ralaq lik kok alaq il che ri josq'inik re ri cuerpo, pero lik nojinaq ri anima' alaq che rayinik y che ri na utz taj.

40»¡Lik na jinta k'ana na'oj alaq! Ri Jun x'anaw re ri kilitaj che ri cuerpo alaq, ¿na e ta neb'a ri x'anaw re ri anima' alaq? 41We paqatzij wi ka'aj alaq ku'an chom ri b'inik silab'ik alaq chwach ri Qaqaw, sipan alaq chike ri nib'a'ib' ruk' ri k'o uk' alaq.

42»¡Lik toq'o' wach ralaq alaq fariseos! Lik kok alaq il che jujun tzijpixab', ma kaya alaq che ri Dios ri diezmo re ri arweno, re ri ruda y re ronoje ichaj; no'j na ka'an ta alaq ri lik usuk' y na k'ax ta kana' alaq ri Dios. Yey ri lik chirajawaxik wi e ka'an alaq ri usuk' y k'ax kana' alaq ri Dios, junam ruk' ri kaya alaq ri diezmo alaq.

43»¡Lik toq'o' wach ralaq alaq fariseos, ri lik ka'an nim che ib' alaq! Ma lik kuk'ul k'u'x alaq ri katz'uyi' alaq pa taq sinagogas chupa ri tz'ulib'al ke ri lik k'o kiwach y lik kuk'ul k'u'x alaq ri kaya' rutzil wach alaq pa kilitaj wi alaq.

44»¡Lik toq'o' wach ralaq alaq aj k'utunel re ri tzijpixab' y alaq fariseos! Xa keb' palaj alaq, ma e kech'ulaj alaq ri winaq ruk' ri kak'ut alaq. Pacha' alaq muqub'al ke anima' na kilitaj taj; ek'u ri winaq keb'ik'ow puwi' y na kakina'b'ej taj ruk' wa' kakich'ulaj kib'»#11:44 Pa ri tzijpixab' re ojertan kub'i'ij juna tikawex kuch'ulaj rib' we kuchap juna anima' o katak'i' puwi juna muqub'al. Nm. 19:16 xcha'.

45Ek'uchiri', jun chike ri e aj k'utunel re ri tzijpixab' jewa' xub'i'ij che ri Jesús:

—Lal tijonel, echiri' kab'i'ij la wa', oj jun ri'oj kojyaj la —xcha'.

46Ri Jesús xub'i'ij:

«¡Lik toq'o' wach ralaq alaq aj k'utunel re ri tzijpixab'! Lik ka'an alaq k'ax chike ri winaq ruk' ri taqanik alaq. Ma wa taqanik alaq e pacha' nimaq taq eqa'n lik al y lik k'ayew ruk'axik; ketaq k'u alaq ri winaq cha' kakeqaj b'i yey ralaq na ka'aj tane alaq kato'b' k'ana alaq ruk' wa'.

47»¡Lik toq'o' wach alaq! Ma kayak alaq chomilaj muqub'al chike ri q'alajisanelab' xekamisax kuma ri mam alaq ojertan. 48Ruk' ri ka'an alaq kaq'alajisaj alaq junam tzij alaq kuk' ri mam alaq. Ma rike na xkik'ul ta ri e q'alajisanelab' y xekikamisaj; jenela' ralaq na kata ta alaq ri kitzij tz'ib'ital kanoq, tob' kayijb'a' alaq ri' ri kimuqub'al.

49»E uwari'che ri Dios, ri lik k'o saqil na'oj ruk', jewa' kub'i'ij: “Keb'enutaq b'i e q'alajisanelab' y e taqo'n chikiwach wa tikawex. Y chike k'u wa' wa aj chak we'in, k'o ri kekikamisaj y k'o ri kekiternab'ej ruk' k'ax” kacha ri Dios. 50Ek'u uwari'che, ri alaq tikawex re waq'ij ora, pawi' alaq k'o wi ri kikik'el ri q'alajisanelab' ekamisam chwi lo ri jeqeb'al re ruwachulew, 51chwi lo rukamik ri Abel#Gn. 4:8 k'a chwa rukamik ri Zacarías, ri xkamisax chuxo'l raltar y ri Rocho Dios.#2 Cr. 24:19-21 Paqatzij wi kamb'i'ij che alaq, ri Dios kuq'at tzij pawi' alaq ruma ri kikamik rike.

52»¡Toq'o' wach ralaq alaq aj k'utunel re ri tzijpixab'! Ma alaq latz'anel chike ri kakaj kaketa'maj ri Q'ijsaq. Ewam alaq rusuk' Rutzij Upixab' ri Dios, jek'ula' na kok ta alaq pa ri Q'ijsaq yey na kaya tane alaq luwar chike ri winaq keb'okik» xcha'.

53Echiri' ri Jesús katajin che ub'i'xikil wa' chike, raj k'utunel re ri tzijpixab' y ri fariseos lik xpe koyowal chirij y xkijeqo kakichapala' ruk' uk'iyal tz'onob'al. 54Lik xkitij ri' che cha' rire kub'i'ij ri na usuk' taj y ruk' wa' kakikoj umak.

Currently Selected:

Lucas 11: acrN

Highlight

Copy