Lucas 10

Ri Jesús keb'unab'esaj b'i setenta utijo'n chwach

1Tek'uchiri', ri Qanimajawal xeb'ucha' chi setenta utijo'n y xeb'utaq b'i pa kakab' cha' kenab'ej b'i chwach Rire pa ronoje taq tinamit y luwar pa ke'ek wi. 2Echiri' k'amaja' keb'el b'i, ri Jesús xub'i'ij chike:

«Paqatzij wi kamb'i'ij chiwe: Ri molonik kajawaxik ka'anik, lik nim; no'j raj chak na e k'i taj. E uwari'che chitz'onoj che ri Dios, ri Rajaw ri molonik, cha' keb'utaq lo aj chak re kaki'an ri molonik. 3¡Jix! Pero chitape': Ri'in kixintaq b'i pacha' ix b'exex chikixo'l utiw.#10:3 Ri Jesús xub'i'ij wa' ma e k'o winaq tzel kekil ri kakitzijoj ri Utzilaj Tzij y kaki'an k'ax chike.

4»Echiri' kix'ek, mik'am b'i uk'olib'al imeyo, mik'am b'i iteb', mik'am b'i jun chik mola'j ixajab'. Yey mixtak'i' pa b'e re kiya kan rutzil uwach junoq.

5»We xixok chuchi' juna ja, ri nab'e ich'a'tem kib'i'ij e wa': “K'ola ri utzil chomal re ri Dios pawi' alaq.” 6We k'o junoq chiri' lik karaj kuk'ul ri utzil chomal re ri Dios, kuk'ul k'u ri'. No'j we na jinta kak'uluw re ri utzil chomal re ri Dios, wa' katzelej tanchi lo iwuk'. 7Pa kixk'ul wi, chixkanaj chiri' chupa ri ja; mixq'ax che jujun chik ja. Utz kitij ri kaya' chiwe; ma e junoq kachakunik, lik taqal che katojik. 8We xixok chupa juna tinamit y xixk'ul pa juna ja, chitija' sa' ri kaya' lo chiwach y mitz'onoj ri kiwaj ri'ix.

9»Cheb'ikunaj k'u ri e yewa'ib' e k'o chupa ri tinamit y chib'i'ij chike konoje: “Rutaqanik ri Dios xa naqaj chi k'o wi lo che alaq.”#10:9 Xub'i'ij “Rutaqanik ri Dios xa naqaj chi k'o wi” ma ya xk'un ri Qanimajawal yey rutaqanik ya e ri' kujeq kuk' konoje ri kakikoj rub'i'.

10»We xixok k'u chupa juna tinamit yey na kixk'ul taj, chixelub'i pa taq b'e y chib'i'ij: 11“Tob' ne rulew re wa tinamit alaq k'o che ri qaqan, kaqapu' kanoq cha' keta'maj alaq na utz ta ri x'an alaq. Pero cheta'maj alaq chi utz wa': Rutaqanik ri Dios xa naqaj chi k'o wi lo che alaq” kixcha'. 12Kamb'i'ij k'u chiwe: Más lik k'ax ri kape na pakiwi ri tinamit na kakik'ul ta ri Utzilaj Tzij, chwa ri kape pakiwi ri e aj Sodoma y ri e aj Gomorra.#Gn. 19:24-28

Ri k'axk'ob'ik kape pakiwi ri tinamit na kakitzelej ta kitzij

(Mt. 11:20-24)

13»¡Lik toq'o' iwach ri ix aj Corazín! ¡Lik toq'o' iwach ri ix aj Betsaida! Ma we ta chupa ri tinamit Tiro y ri tinamit Sidón#10:13 Lik eta'matalik ri ejeqel pa wa keb' tinamit Tiro y Sidón e aj tioxab' y lik e aj makib'. Is. 23:1-18 xilitaj wi wa k'utub'al re ruchuq'ab' ri Dios xin'an chiwach ri'ix, k'o tan q'ij ta lo ri' xkitzelej kitzij chwach ri Dios, kikojom k'u kiq'u' k'ax rij y kitz'uyub'am kib' pa chaaj ruma ri kib'is. 14E uwari'che echiri' kopon ri q'ij re ri q'atb'al tzij, más nim ri k'axk'ob'ik kape piwi' chwa ri k'axk'ob'ik kape pakiwi ri winaq re ri tinamit Tiro y ri tinamit Sidón.#10:14 Ri tikawex kitom ri Utzilaj Tzij y na kakikoj taj, más k'ax ri kape pakiwi' chikiwa ri tikawex na jinta kitom. 15Ek'u ri ix aj Capernaúm, e chiwach ri'ix lik yakom chi iq'ij k'a chikaj; yey na e ta ri', ma lik kak'aq ne b'i iq'ij y kixk'aq ne b'i k'a chi xib'alb'a' re tijb'al k'ax.

16»China ri kataw iwe'ix, in ri kinuto; china ri tzel kilow iwe, in ri tzel kinrilo; china ri tzel kilow we ri'in, e tzel karil ri Jun taqayom lo we ri'in» xcha ri Jesús.

17Xeb'ek k'u ri' ri setenta. Y ek'uchiri' xetzelej loq, lik keki'kotik. Xkitzijoj k'u che ri Jesús:

—Qajawal, ¡taq ri itzel uxlab'ixel xkikoj qatzij echiri' chupa ri b'i' la xojtaqan che keb'el b'i chike ri winaq! —xecha'.

18Ri Jesús xub'i'ij chike:

—Ri'in xinwil ri Satanás xk'aq lo chikaj pacha' jun rayo.#Ap. 12:7-9 19¡Chiwilape'! Ri'in nuya'om ichuq'ab' cha' kich'ij uchuq'ab' ritzel winaq y na jinta k'o kik'ulumaj tob' ne kiyiq'iya' kiwi' kumatz y sina'j.

20Pero ri'ix mixki'kot ruma kakikoj itzij ri itzel uxlab'ixel; e chixki'kota ruma tz'ib'ital rib'i'#Flp. 4:3; Ap. 13:8 chila' chikaj —xcha'.

Ruki'kotemal ri Jesús

(Mt. 11:25-27; 13:16-17)

21Ek'u la' la joq'otaj, ri Jesús lik xki'kot ruma ri Santowilaj Ruxlab'ixel ri Dios y xub'i'ij:

«Nuqaw, kanyak q'ij la, Lal Rajaw ruwa kaj y ruwachulew, ma taq ri q'alajisam la chike ri lik kaki'an ch'uti'n che kib', wa' ewam la chikiwach ri lik k'o kina'oj y lik k'o kimajom. Jela' x'an la, Nuqaw, ma e x'aj la ri'» xcha'.

22Tek'uchiri', xub'i'ij chike ri tikawex:

«Ronoje taq ri k'olik ya'tal lo panuq'ab' ruma ri Nuqaw. Na jinta k'u junoq umajom usuk' chi utz sa' ruwach Ruk'ajol ri Dios; xew ri Qaqaw Dios eta'mayom re. Y na jinta ne junoq umajom usuk' chi utz sa' ruwach ri Qaqaw Dios, xew Ruk'ajol ri Dios eta'mayom re; yey puq'ab' k'u ri' Ruk'ajol k'o wi china chike karaj kuq'alajisaj wi wa'» xcha'.

23Tek'uchiri' xqib' kuk' rutijo'n y e la' xa kitukel xub'i'ij chike:

«Nim kiq'ij kalaxik ri kakilo janipa ri iwilom ri'ix. 24Ma kamb'i'ij k'u chiwe lik e k'i ri q'alajisanelab' y ri taqanelab' re ojertan lik xkaj kakil b'i janipa ri kiwil ri'ix wo'ora, pero na xkimaj ta chi rilik b'i. Lik xkaj kakita b'i janipa ri kita ri'ix wo'ora, pero na xkimaj ta chi utayik b'i»#Heb. 11:13, 39-40 xcha'.

Ri k'amb'al na'oj puwi rachi aj Samaria lik utz uk'u'x

25K'o jun aj k'utunel re ri tzijpixab' xyaktajik y jewa' xub'i'ij cha' kuk'am upa ri Jesús:

—Wajawal, ¿sa' ri kan'ano cha' k'o nuk'aslemal na jinta utaqexik? —xcha'.

26Ri Jesús xub'i'ij che:

—¿Sa' ri tz'ib'ital chupa Rutzij Upixab' ri Dios? ¿Sa' ri kamaj la usuk' che? —xcha'.

27Y raj wach xuk'ul uwach:

—Jewa' tz'ib'italik:

K'ax chana'a ra Dios Qajawxel ruk' ronoje awanima',

ruk' ronoje ak'u'x, ruk' ronoje achuq'ab' y ruk' ronoje ana'oj; Dt. 6:5

yey

K'ax chana'a rawatz-achaq'

jela' pacha' ri k'ax kana' awib' ri'at Lv. 19:18

—xcha'.

28Y ri Jesús xub'i'ij che:

—Lik utz ri xk'ulub'ej wi la uwach. 'Ana k'u la wa' y kak'oji' k'aslemal la na jinta utaqexik#Lv. 18:5 —xcha'.

29Pero raj wach na karaj taj kutzaq rib' y xub'i'ij k'u che ri Jesús:

—¿Yey china ri watz-nuchaq'? —xcha'.

30Ri Jesús jewa' xub'i'ij che:

«K'o jun achi xel chupa ri tinamit Jerusalem y xe'ek pa ri tinamit Jericó. Pa b'e k'ut xtzaq pakiq'ab' jujun eleq'omab'. Releq'omab' xkimaj b'i ronoje rub'itaq re y lik xki'an kan k'ax che. Kajek'owik xkiya kanoq y xeb'ek.

31»Ek'uchiri', chupa ri b'e xk'un lo jun aj chakunel pa Rocho Dios. Y echiri' xril rachi 'anom kan k'ax che, xa xutzu' kanoq y xik'owik.

32»Tek'uchiri' xk'un lo jun chik achi aj levita, to'b'el ke raj chakunel pa Rocho Dios. Echiri' xopon chunaqaj rachi 'anom kan k'ax che, xa xutzu' kanoq y xik'owik.

33»Xk'un k'u lo jun achi aj Samaria. Echiri' xk'un chunaqaj rachi 'anom kan k'ax che y xrilo sa' ru'anom, lik xjuch' ka'n pa ranima'.#10:33 Wa'chi aj Samaria xuto' rachi e kuk'il raj judi'ab', tob' ri e aj Samaria y ri e aj judi'ab' lik tzel kakil kib'. 34Xqib' k'u ruk', xukunaj uwach ruk'ax ruk' aceite y ruk' vino, y xuch'uq uwach ruk'ax ruk' k'ul. Xuyak b'i chwi rukawayu', xuk'am b'i chupa jun mesón y xuchajij chi utz. 35Echiri' xel chiri' chuka'm q'ij, xresaj lo ka'ib' denarios pub'olxa y xuya kan che ri rajaw ri mesón, y jewa' xub'i'ij che: “Chajij ko la wa'chi chwe. We na xu'an ta k'u wa puaq kanya kan che'la, echiri' kintzelej loq, kanyijb'a' che'la” xcha'.»

36Tek'uchiri' ri Jesús xub'i'ij che raj k'utunel:

—Chiwach rilal, ¿china chike wa oxib' achijab' xu'an ratz-uchaq' rachi xchapataj kuma releq'omab' pa b'e? —xcha'.

37Raj k'utunel xub'i'ij:

—Chinuwach ri'in, e ri jun xuk'ut ri k'axna'b'al uk'u'x che —xcha'.

Ek'uchiri' xub'i'ij ri Jesús che:

—Lik are'. Jela' k'u ri' 'ana la rilal —xcha'.

Ri Jesús ke'b'ina kuk' ri Marta y ri María

38Echiri' ri Jesús k'o chi b'e, xok chupa jun aldea. Chiri' k'o jun ixoq Marta rub'i' y rire xuk'ul ri Jesús chirocho. 39Wi'xoq Marta k'o jun uchaq' María rub'i'. Ek'u ri María xtz'uyi' chwach ri Jesús cha' kuta ri kub'i'ij. 40No'j ri Marta lik e ub'is uk'u'x taq ri ka'an pa ja. Ek'uchiri', xqib' ruk' ri Jesús y jewa' xub'i'ij che:

—Wajawal, ¿lik kami e la' na kok ta la il che ri ku'an ri nuchaq'? Ma inuya'om kan nutukel chwach ri nimanik. B'i'ij ko la che kinuto'o —xcha'.

41No'j ri Jesús xub'i'ij che:

—Marta, Marta, ri'at lik e ub'is ak'u'x y e sachinaq ana'oj puwi ri ka'ano. 42Xa jun k'u ri lik chirajawaxik wi ka'anik, wa' e ri más utz, y ri María e ucha'om wa';#10:42 Ri xu'an ri María e xuya rib' che utayik ri kub'i'ij ri Jesús; ek'u ri nimanik xu'an ri Marta che ri Jesús, utz pero wa' xa re joq'otaj ma xa re ruwachulew y na jinta ukowil. yey na jinta junoq kamajaw wa' che —xcha'.

Currently Selected:

Lucas 10: acrN

Highlight

Copy