Popular Bible Verses from Luca 9

Share

Tawamhã te uburé oto dama tinha, ãne: — Ni'wam norĩ hã ĩsiré 're nomro u'âsi mono da, te te sima 're ĩwẽ za'ra mono wamhã, tihâimanazém na te te 're rosa'rata za'ra mono õ di za. Awẽ sidâpâsi, tiza'ozéb ré, ĩzarina 're inomro mono ne, da te dasiwi uprosi da nherẽ, te za ĩsiré 're nomro.

Ni'wam norĩ hã tihâimanazé te te sima 're sawi za'ra mono wamhã, rowẽ isi'utõrĩ'õ hã te te sina 're uwaimrami za'ra mono õ di za. Ni'wam norĩ hã ĩzarina 're nomro mono da, tihâimanazé te te sima 're sawi za'ra mono õ wapsi, te za te te sina 're uwaimrami za'ra, rowẽ hã.

Tahawa, ma tô tãma ãma romnhimiré'é Zezusi hã, ãne: — Ãté ni'wa hã te za romhuri na sãna'rata, ti'a te te hâibâdâ da. Siwa'rãmi te te nasi 'madâ'â wamhã, tinhib'apito ma, romhuri'wa da hã mare di. Tane duré, 'Re ihâimana u'âsi mono, da'ãma 're isib'a'uwẽ mono zém na romhuri'wa da hã mare di, misi, da te 're pisutu za'ra mono õ wa.

E mahã marĩ zô bâ te za ni'wa hã tinhibro hã te te sima 're a'ubumroi pese, sibrob ahâ uptabi da. Tawamhã dâ'â wamhã, ti'ab ré sibrob ahâ nherẽ, e tãma 're rowẽ mono di za, rowẽ isi'utõrĩ'õ hã te te sina uwaimrami õ wamhã. Mare di. Tãma 're rowẽ mono õ di za.

Ni'wam norĩ hã dapipa te, ĩzazei'wa na, duré ĩmreme 'madâ'â pese 'wa na, ãté dama 're siwasu'u za'ra mono õ di za, 're siséb za'ra mono õ'umnhasite. Ãté te za dawi 're si'udâ za'ra, ĩzazei'õ'wa newa. Ãne wamhã, nimahã na, ti'ai ãma Dasiré Ipodo hã ihâiba na rowa'a za'ẽtẽ na duré Timama te rowa'a za'ẽtẽ na duré hâiwa ãma tãma iromhuri'wa norĩ te rowa'a za'ẽtẽ na za we apâ morĩ wamhã, te za i'udâ'wa norĩ hã asa tizazei'õ'wa na sisi za'ra.

Tahawa, te Zezusi hã asa tãma tinha: — Wapsã wawẽre hã, ab're 're isõrõwa hã. Si norĩ hã te duré tizasi hã te te sima 're 'manharĩ za'ra, tinhorõwa da hã. Tanei õ di ti'ai ãma Dasiré Ipodo hã. Marĩ tãma hâimana õ di, 're iwa'utu mono zéb da hã. Hâiwi si te datẽme 're morĩ u'â.

Te duré tãma nharĩ za'ra, ãne: — Ni'wam norĩ hã te te 're ĩzawi pese za'ra mono wa, ai'uté zô 're tob'uzu za'ra mono wamhã, ta norĩ u'âbâ te duré ĩzô 're tob'uzu za'ra. Tawamhã e ĩzô si te 're tob'uzu za'ra. Mare di. We ĩzatõrĩ'wa zô zama te duré sô 're tob'uzu za'ra. Dama iwapu norĩ hã 're sawi pese za'ra wa'aba mono wamhã, asima ai'maipire zô asõpré wa'aba ãna, wa za aipire na te 're ai'awaihu'u 'wa.