Popular Bible Verses from John 16

Share

“Dıı hazǫǫ̀ naxıts'ǫ̀ haehsı̨ hǫt'e, hanì-ı̨dè sı̨ set'à naxıgha ts'èwhı̨į̀ hòɂǫ ha. Dıı nèk'e naxıxè hoìla ha hǫt'e. Hanìkò sı̨ sìı dıı nèk'e hazǫǫ̀ gıghǫèhnǫ ne t'à, naxınì nàtsoò aahłe,” Zezì gòhdı.

Hanìkò Yedàyeh Nezı̨ı̨ nììtła nı̨dè t'asìı hazǫǫ̀ ehkw'ı ne sìı naxıts'ǫ̀ hadı ha, ehkw'ı zǫ gode ne t'à. Ededahxà gode ha nıìle, dàehsı̨ı̨ yeèhkw'ǫǫ sìı eyı zǫ t'à gode ha, eyıts'ǫ ı̨daà ayìı dàgode ha sìı naxıts'ǫ̀ hadı ha.

Dıı haı̨wa gots'ǫ̀ sıızì t'à t'asìı wı̨ı̨zìı Setà weahkè whìle hǫt'e. Eyıt'à t'asìı weahkè nı̨dè naxıghàɂà ha ne, hanì-ı̨dè sıì naxınà agode ha.

Hanìkò ehkw'ı anaxèehsı̨: Naxıts'ǫǫ̀ naehtła ha nı̨dè naxıgha sìghà agode ha hǫt'e. Naehtła lenǫsıı eyı naxıts'àdıı elı̨ı̨ sìı naxıts'ǫ̀ ade ha-le. Hanìkò naehtła nı̨dè naxıts'ǫ̀ awehłe ha. Naxıts'àdıı elı̨ı̨ sìı nììtła nı̨dè dıı nèk'e dǫ hołı̨ı̨ k'ę̀ę̀ geedaa gınıedì agole ha, dànì ehkw'ıì agede ha eyıts'ǫ dànì dǫ ehkw'ı gısınìyaetı ha sìı gınıedì agole ha.

Dıı naxı̨ sı haaht'e: Dıì naxıdzeè nànııtì hǫt'e, hanìkò k'achı̨ naxeehɂı̨ nı̨dè sıì naxıgha sìgoèt'ı̨ ha, eyı sìı dǫ wı̨ı̨zìı naxıghǫ yìhchı ha nıìle. Eyı dzęę̀ k'e nı̨dè k'achı̨ t'asìı seahkè ha-le. Ehkw'ı anaxèehsı̨, ayìı dahwhǫǫ sìı sıızì t'à Setà weahkè nı̨dè naxıghàyele ha hǫt'e.

Ehkw'ı anaxèehsı̨, dıı nèk'e dǫ gıgha sìgoèt'ı̨, hanìkò naxı̨ hòtł'ò aahtse ha hǫt'e. Sıì naxıdzeè nànııtì ha, hanìkò naxınì ładı̨į̀ ade ha. Naxıdzeè nànııtì ı̨lèe sìı wet'à naxınà agode ha.