Ruku 12

Aroaroti Namijuji Ronarena Jujuvua 'Waramajina

(Matiu 10:26-27)

1Ea mapoka'e Huni rora kajaho ani rene ajime ateji tauta'aravi'i hi'eme Hu Huni tisaiporu amura Peresi rone ijá 'iama Ja hami Parasia puni isitia ki'avara. Ijihuni maijaho pu ira'asina. 2Uneunecha mapoka ka'ene vaji navu'e ea mapoka pakivura'omo túna'i samahirahuna. 'Ene ea mapoka hemi navujaho ni'i ni'i hena kihuna. 3Vu'a iraka ka'ene nututi jahejajaho ja samaumai 'wara'avara. 'Ene vu'a ka'ene sei vaji koravajaho ja ata huri namine 'ume'avara.

Irá Juhahunijina

(Matiu 10:28-31)

4Ehu nune Na nimaa ja 'waravu. Ike haha huriji erapo 'anaa kwahuniji ja ju'ava. Pu areri ijihuni túna'ijaho unenu pina pavehuna. 5'Enakaivo ja irá juhahunijaho Na ja 'warahuna. Godi ka'ene areri 'anaa kwavakavi'i pi'onama'e veni vahuniji juha'avara. I'a Na ja 'waravu. Hua'e juha'avara. 6'Enakaivo 'ú ea uka iropu ma'u'u maa toia no'o 'imejure? 'Ena'avo Godira ijí uka ma'u'u maa kajija hena ki'eju'e hijura. 7'Ene ijí joni húmata sapasa icharo namujaho Hu nihena kamu. 'Enakúne ja paju'avara. Ijihuni maijaho jara uka ma'u'u maa kajija asitahara.

Keriso Nimai Rone 'Warahuna Ho Pataarohunijina

(Matiu 10:19-20, 32-33; 12:32)

8'Ena'omo Na nimaa ja 'waravu. Ea irara Na ronareje ea mapoka puni una'i 'wara'amajaho Emaa Puni Harihijara 'u'o ea kaji rone kahino akúpa 'ahi Godoni 'ona oji'ini jihipuni una'i nahama 'warahuna. 9'Enakaivo ea irara Na hemihareje ea 'aho'a panaja'amajaho ea kaji 'u'o Godoni 'ona oji'ini jihipuni una'ijaho panahama 'warahuna. 10'Ene ea irahipo Emaa Puni Harihi jihuna'i ira sisea 'wa'avajaho puni sisea vwihanie arehuna kaivo Godoni 'Aveni jihuna'i sisea 'wa'avajaho Hu niho'o puni sisea pavwihana arehuna. 11'E'eje pu ja 'eka va'e Sinakoku 'ajohi'ina 'ee ea mama'ini jihipuni una'i nama'iro va'a ki'avajaho vu'a raka ka'ene 'warahunijaho oja pahiana'avara. 12Ijihuni maijaho ijí vea muka kajino iraka ka'ene jara 'warahunijaho Godoni 'Avenijara naja'eje 'warahuna 'iamana.

Uneunecha Rukima'ura Ka'ene Puruva Reji'inijihuni Haa

13Ea pini ijí ea rira kajino ijá 'wama Najahi'ine nuni poka 'wave nuni aachia ka'ene nuni omijara irechamaji ahaama nuna vajihama 'wamana. 14Hu ijá 'wama Ea ikera! Ea irara Na joni 'otuae hehuna iji pijihane? 'wamana. 15Hu pu ijá 'iama 'Unama ani ani'ina ka'ene niho'o ituname urarena parajujija hami 'ajohe ki'avara. Ijihuni maijaho ema ijihuni hiijaho kukua mapoka ka'ene huni navujipo reje hihuna pana 'iamana. 16'Enarena Hu ike haakaho 'waramarena pu ijá 'iama Ea 'iruma niho'o mapoka ani reji'ini jihuni mwe'i soa savu'e juara 'urina paranana. 17Hu hine hu husumano vwihanu va'o ijá rona Nara nuni 'iruma'e irechahuni ruha itu'ona paranana'omo na ichá ve'eju ronana. 18Hu ijá rona Na ika'ina'e ve'eju. Na nuni ara tirasame mama'ina'e vene ijino nuni 'iruma 'ee kukua 'aho'a irecha'eju ronana. 19'Enarena hu ori'ini ijá rona Na niho'o ea teamanima paraji'ina renareje na hi'eju. Na uneunecha ka'ene juara mapokijino ura renia parahunijaho 'ekuta. 'Enajihuna'e masuani hine 'iruma ine 'ee toa kisina ine teamani'eje hi'eju ronana. 20'Enakaivo Godira ijá 'wama Ike niho'o vwiha pa'akera. A iviasi na'iakino kwa'amajaho ea irara ike kukua ka'ene ara irechama hinujaho 'eka'ena 'wamana. 21'Enajihuna'e ea ka'ene mwe'a kakino uneunecha mapoka rukina renujaho hu Godoni una'ijino areri uneunecha pa'ana'e renuna.

Godi Nimaa Vetihunijina

(Matiu 6:25-34)

22'Enarena Hu Huni tisaiporu ijá 'iama Na ja 'waravukúne jara ichá'ina hihunijaho pavwiha'avare 'ee ika'ina pavwiha'avara. Nú 'iruma iraki i'eja pavwiha'avara. 'Ene joni haha ika'ina pavwihana 'wahuna. 23Nú iraki núni haha nuha'ara'eja? pa'wahuna kaivo ijí 'iruma kajara venuakame majama hihuna pane 'ee ateha kajara venuakame majama hihuna pana. 24'Enakúne ikaho vwihaha. Uka ka'ene jaijasaha oju kare kiha. Pu niho'o puni 'ina pa'one 'ee puni 'iruma pa'eke rira kwino ahuma irechavu kaivo Godira 'iruma vajihu. 'Enakaivo jara uka niho'o asitaha parajara. 25Ja ea irahipo hine vwihananavi'i temuka ape'avajaho 'ú ijí temuka kajara veje joni hia vea pina kú'o huri ranave hi va'eja? 26Ja uneunecha ma'u'umai areri pave'avajaho ja irakijihuna'e uneunecha 'aho'akija vwihajo? 27Ike heha sinara ka'ene nechi orijija ma'opuipo 'urijura kaivo pu opuina harura pavene 'ee opuina majikaria pamarasahura. 'Enakaivo Na nimaa nimai ja 'waravu. Saramaniho nitama huni haha sarira 'enana kaivo ijí hura sarira ka'ene 'enajaho areri sinara huni nia vaja'e kimuja'ina paasimana. 28'Ena'omo Godira sinara ka'ene iviasi mai'o navura'omo niari ato'uve veni rehunijija 'ajoha'amajaho Hu ichá'ina'e ja 'ajohahuna vwihajo? Ema ka'ene joni nimairoa ma'u'umaakije! 29'Enakúne jara 'unama ka'ene 'iruma 'eka ine 'ee toa ihunijaho pahine sarame vwiha'avara. 30Ike uneunecha kijahija ea ka'ene kwaa ara mapokakino hijujija hina saravura. 'Enakaivo joni Oma ka'ene kahi akúpa 'ahi hinujara uneunechaka mapoka ka'ene ja pivusahujija nihe paranuna. 31'Enakaivo ja maraku'a Huni ara 'unamiji 'ee Huni 'unama ka'ene arimaiji saravakame iji'a uneunechaka mwe'akaki jara pivusahujaho Hura vajihuna.

Akúpa 'Ahi Kukua Rukina Rehunijina

(Matiu 6:19-21)

32'Enakúne eakije niho'o patea juna'avara. Ijihuni maijaho joni Omijaho ura rene teamama para'eju'e Huni arijaho ja mihu. 33Joni uneunecha 'eke 'imenareje monijaho ea ka'ene 'iruma pa'ajihi vajiha. Ja ojono tuja ka'ene panapavi'iniji 'eka'avara. 'Ee joni uneunecha kahino akúpa 'ahi irechave ea panesi eke kapura pa'uhusa'avara. 34Joni uneunechaka mamaa kajipo na'avari tinijikano joni oja 'ee vwihijaho 'u'o ijí nahuna.

Pwea 'Aiha Veji'ine 'Ee Amairiaravi'inijina

35Ja joni kukua same amairiarama parane joni naheha 'ena pijinamie hana'eje hiha. 36'Ene areri pwehwapo puni natohwijara ea mai'o napasi nejujihipuni sori va'ana'e ro'amarono 'ajoha hijuja'ina. Hu roe vwicha 'ana'ana'amajaho pu vwicha ni'aha kwino tirasamahuna. 37Pwea ka'ene puni natohwijara kú'o 'unama ro'amarono amairiarame 'ajaha hijujija niho'o teamana'eju'e hiju. Na nimaa nimai ja 'waravu. Hu huni ateha apúsame 'warave asuma hi'eje hura 'iruma 'eke vajihe ihuna. 38'Ena'omo Hu na'ia rimai ro'ena 'aho sú'usú'u vea aharasa'amaji ro'amajaho pwehwaha ka'ene niamairiarame areri rena hijajija teamanahuna. 39'Enakaivo ja niheju sea anesurijara he'eje nesa apeji'inijara vea muka irakiji roe nesa ape'iro'ipisa hu tanurahakame hu paroe huni sea ruarahe nesa apeja'a. 40Ijihuni hahi amairie nirisave areri rena para'eje 'ajaha hi'avara. Vea muka ka'ene Ema Puni Harihijara rohunijaho ja pakame paheji'inakúne ijá ve'avara 'iamana.

Pwea Ka'ene Uchaha Pa'aji'o Uchaha Rukiniji'o Puni Vu'a

(Matiu 24:45-51)

41Pitara ija 'wama 'Ú Natohwe A núa'e haakaho 'warumu 'uho eaka mapokakihi 'waramo? 'wamana. 42Natohwijara ijá 'wama 'Ú pwea irara pasevi'ina 'ee vwiha hami vwihaji'ine huni natohwijara huni pwea 'ajohe 'iruma vea 'ahi areri vajihuna'e ranamane? 43'Enareje pwea irara kaukaraa kaji hine veji'i hi'eje vea ka'ene huni natohwijara ro ka'amajaho hu merajahuna. 44Na nimaa nimai ja 'waravu. Hu ranave huni kukua mapoka kajija maho'o hura 'ajohuna. 45'Enakaivo pwea siseijaho hu oja vaji ika ronu nuni Natohwijaho paro'eju'e 'aha jora renu ro'ika'i aneja vena huni pwea parui napari 'anie 'ee 'iruma ma ina hine 'ee toa sisea ine nana'ena. 46'Ene Hu hine ijí ve'i kaivo pavwihane pave'eje Huni Natohwijaho ro 'e'uhuna. Vea muka ka'ene Hura rohunijaho pakame paheji'ina. 'Enareje Hura heha eha mahareje ranave ea ka'ene ira'asini jihipuni tini ijino vahuna. 47Pwea ka'ene huni Natohwijara 'waramujaho henareje paamairiarava 'aho huni natohwijara iraka ka'ene 'waramuji pavenajaho niho'o 'aha mapoka hijahuna. 48'Enakaivo pwea irara uneka sisea ka'ene hu puruva re'eme venana re'amajaho eha ma'uako apehuna. Ea irahija'e uneunecha mapoka vaji'amajaho hu areri vajiha kaja'ina'e 'ekahuna. Ea irara niho'o mapoka mapoka'e vajihujaho ea kajaho areri vajiha kaja'ina'e mapoka mapoka 'ekahuna.

Jesura Veju'e Ahaavura

(Matiu 10:34-36)

49Na mwe'akake veni 'ena apena jae re'amarono routa. 'Enakaivo iviamai kakaro re'ipisa areri rena paraja'a. 50Na vea kisini vaji va aruhuna namu. 'Enajihuna'e ijí hine vwihajujaho nuni oja ahisina'e renuna'omo ijara ro pa'arehuniji kavi'i hiju. 51Ja vwihajujaho Na matauma hihuniji apene iki mwe'i route? Na nimai ja 'waravu. Matauvi'ina pana kaivo Na ahaama hihuniji apena routa. 52Iviamaikaka renareje kachi'ina iropu re'avajaho no'opisu 'urine no'ohe'i irechamia va'e no'ohe'i 'urine no'opisu irechamia vai'ina rehuna. 53Omahi hariaha ninave 'ee hariahi omaha ninave 'ee oahi 'apajaha ninave 'apajahi oaha ninave sasahi sasaha ninahuna. 'Eje pu ahaama hihuna 'iamana.

Veiji Hena Kahuni Vu'a

(Matiu 16:2-3)

54Hu ea mapoka kajija ijá 'iama Ja 'imitia ka'eju'e vea 'onuja'i savu'e kavujaho ja ni'aha kwino ijá neha pi'i venu 'wa'eju'e neha pinuna. 55'Enakaivo ja he'eju'e asiasia kama'ahuni rene ikikahi 'anau'e hejujaho vea 'e'ui venu 'wa'eju'e vea 'e'ununa. 56Ja ira'asinakije! Ja akúpa 'ee mwe'a kimare'e ijihuni maijaho 'waravura kaivo 'ú ja iviamaa iraka ka'ene rejujaho pakivo?

Ea Ka'ene Onuna'i Sena Venuji'i Amairina'amana

(Matiu 5:25-26)

57Ja irakijihuna'e ojono irakijara nimaijaho pa'eke mina vene kivo? 58'Ene ei pini a 'otua veta'iro vejakame ja no'o 'unama toi va'avajaho ja hu hu'úmo 'wame amairi'avara. Ijihuni maijaho hu a apena va'e 'otua veji'ina natohwi jihuni ija tahi ranamaa ve'enakúne. 'Ejakame ijí 'otua veji'ina natohwa kajara hirisima mihakame pu apena va'e tipura ranamahuna. 59Na nimai ja 'waravu. Ja ijí pu pu'úmo pa'wame amairi'avajaho ja ijí tipura kajino hinu va'o 'imeja pa'are'eje ijí roe samai usehuna 'iamana.

Currently Selected:

Ruku 12: mcq

Highlight

Copy