JOHN 18
18
Jisu khe rem ba
(Mt. 26.47-56; Mk. 14.43-50; Lk. 22.47-53)
1Jisu ebo grao khe thiblai hi, jar ni rikphayarao jang baosi baigo hi, Kidron dikhong nar bailang ba, oraha masi olive ni bari dong ba, oraha jarni yaohon rikphayarao jang bo hap hi ba. 2Bo khe rem riginyaba Juda bo hathan khe tharmai du, bede thikhala Jisu jarni rikphayarao jang oraha daobai song re. 3Pharisai sarao ode Jonthaima ni gijisa dangyasarao ode siphaiyarao khe labu smai hi Juda bo bari ha phai ba. Waimijing, yaodih, ode lemthon labupha hi bonsi oraha phai ba. 4Jisu bo buthu khrip boni basao ha japhai ginyaba khe tharmai bani, bajiha baigo ba, ode bonsi khe sing ba, Sere khe smai ba?
5Bonsi thiphin ba, Nazareth ni Jisu khe.
Jisu thi ba, Bo de ang ning.
(Rem riginyaba Juda bonsi jang songpha hi dong ba). 6Jisu, Bo de ang ning thiba ha, bonsi yaohon dru ba ode hah ha galai ba. 7Bo bonsi khe singphin ba, Nisi sere khe smai ba?
Bonsi thi ba, Nazareth ni Jisu khe.
8Jisu thi ba, Ang nisi ne thi ri kha, Bo de ang ning. Jodi nisi ang khe se smai ba thikhade bonsi khe haida ha. 9Bo grao jaso thar mani se elei ja ba, snadi khe bo thi langyaba dong ba, Abai, snadi khe ning anthane riba, bo buthu khe ang masi jahibo khmaya.
10Simon Peter boniha masi seng dongyaba khe sikkho hi Jonthaima ni leng ni yaoda ni khmao khe dainkhao khla ba. Bo leng ni bumu Malkus. 11Odebani, Jisu Peter khe hukhum rihi thi ba, “Seng khe boni bokhoh ha sengphin lah! Abai anthane bela riyaba ha ang ling nang niya na somo?”
Jisu khe Anna niha lang ba
12Odehe, siphaiyarao jang bonsi ni hojarao ode Judarao ni dangyasarao Jisu khe remhi khah ba, 13ar bo khe Anna thiyaba ni ha langjen ba. Kaiapha thiyaba ni bahao, bo maithai ha Jonthaima jahi dong ba. 14Khrip subung ni khlai hi saosi subung thiba se hamdao thihi Kaiapha thiyaba Judarao khe thi ba.
Peter jamai si jen ba
(Mt. 26.69,70; Mk. 14.66-68; Lk. 22.55-57)
15Simon Peter ode gibin rikphayasa Jisu ni yaohon rikpha ba. Ebo gibin rikphayasa, Jonthaima khe hamsisi tharmai du, odebani bo Jisu jang Jonthaima ni hakhli sosi thang ba. 16Thikhabo, Peter baji ni derga gabaha song hi dong ba. Gibin rikphayasa, sere Jonthaima jang laiyaba bo phaiphin hi oraha daoglap raokhiya mathla niha thiba, ode Peter khe bising ha lang ba. 17Daoglap raokhiya mathla Peter khe singphin ba, Boni rikphayarao ni saosi ning niya?
Peter thiphin ba, Ang niya
18Boha magain thor bani bonsi dung rimani khlai hi masi wai su hi lengrao ode dangyasarao waisi khamba, jar khe dung rimani khlai hi Peter bo bonsi jang baosi waisi khapha hi ba.
Jonthaima Jisu khe sing ba
(Mt. 26.59-66; Mk. 14.55-64; Lk. 22.66-71)
19Boni rikphayarao ode boni slingrithai ni balam ha Jonthaima Jisu khe sing ba. 20Jisu thiphin ba, Ang habsao khnagothai se grao jo ba, braha khrip Judarao phaihi jomsi ja re, Madai khoh ha nalaibo ang sling ri du. Huikhao hi musi khebo ang thiya. 21Snadi jabani angkhe singba kho? Khnayarao khe singphin lah. Snadi khe ang thiba, bonsi gibi jang tharmai du.
22Ebo khe Jisu thi khali ha, boni rogong ha dongyaba saosi dangyasa, bakhao lai rihi thiba, Jonthaima niha elei grao thiphin thao re?
23Jisu thiphin ba, Jodi ang thiba gajai kha thikhade, bo gajai ni basao ha thiphin ri. Thikhabo, ang gibi khe se jo ba thikhala, snadi jabani ning ang khe do ba?
24Odehe, bokhe khahi ning Anna bokhe Jonthaima Kaiapha niha haiha ba.
Peter jamaisi phin ba
(Mt. 26.71-75; Mk. 14.69-72; Lk. 22.58-62)
25Peter wai rogong ha songhi jar khe dung rila ba. Bonsi bo khe thi ba, Ningbo boni saosi rikphayasa niya?
Peter jamaisi hi thi ba, Niya, ang niya.
26Jonthaima ni saosi dangyasa, sereni khmao khe Peter dainkhao jaoyaba ni apna saosi Peter khe thi ba, Bo jang baosi barising ha ning khe ang nuya niya?
27Phin Peter thi ba, Niya, ar boha ning daola gisi ba.
Jisu Pilat ni sagang ha
(Mt. 27.1,2,11-14; Mk. 15.1-5; Lk. 23.1-5)
28Odehe Kaiapha ni noh ni phrang Judarao Jisu khe Rom ni Latsap ni bangla ha lang ba. Bo bubli phorongma se ode Baiglai ni Busu jima nang du. Odebani bonsi gusu jajao nang bani, Judarao bangla bising ha hapsingya. 29Odehe, Pilat bajiha baigophai hi bonsi ni ha phaihi sing ba, Ebo subung khe nisi snadi gajai maihi labu ba?
30Bonsi thiphin ba, Jodi bo masi hamya khusi dangya thikhade, jing nini ha bo khe yaophaya mu.
31Pilat bonsi niha thi ba, Nisi jar ning bokhe lang lah, ode nisi ni jar ni dara lai bisar khlai lah.
Bonsi thiphin ba, Saosi khe bo sthai mani jini dara ha giri. 32Ebo ja ba, Jisu ni bo grao buthu, bedehe bo thi ma, bo grao jathar mani khlai hi se elei ja ba.
33Pilat bangla bising ha hapsing phin ba. Ode Jisu khe longha hi bokhe sing ba, Ning ning Judarao ni Raja?
34Jisu thiphin ba, Ning ebo khe jarni baoma jang thiba na, ani balam ha gibin subung nini ha thi riba?
35Pilat thiphin ba, Ang khe saosi Judasa bao ba? Nini subung buthu ode Jonthaimarao ning khe remhi anthane yaopha phai ba; ning snadi khlai ba?
36Jisu thiphin ba, Ani raji ebo habsao ha niya; jodi ani raji ebo habsao ha se thikhade ani rikphayarao ripha laima se. Ode ang khe Judarao ni yao ha nepha nang niya; thikhabo, duha ani raji eraha niya.
37Odehe Pilat bokhe sing ba, Ode thikhala, ning saosi raja se na?
Jisu thiphin ba, Ning gibi khe thi la kha, ang saosi raja se; odebani se ang hajai phai ba; odebani se ang ebo habsao ha phai ba, gibi grao khe jo mane; sere gibi ha dongba bonsi ani grao khe se khna ba.
38Pilat singphin ba, Gibi la snadi kho?
Jisu khe sthai mani hukhum ri ba.
(Mt. 27.15-31; Mk. 15.6-20; Lk. 23.13-25)
Ebo khe thiblai hi Pilat baji ha baigo langhi Judarao niha thang ba ode thi ba, Ang bokhe musibo gajai nuya. 39Thikhabo, ebo nisi ni dara ha dong, ang Baiglai ni Busu ni bubli ha nisi ni khlai hi saosi phatho ha dongba khe haiger re. Ang nisi ni khlai hi Judarao ni raja khe haiger re thikhala nisi jajao nang?
40Odehe, bonsi jirik khaohi thiphin ba, Bokhe niya. Jini khlai hi Barabba khe haiger ri! (Barabba saosi dakhat se.)
Currently Selected:
JOHN 18: DIMASBSI
Highlight
Share
Copy
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
