LUKE 9
9
Jhigin khusi dangyaba
(Mt. 10.5-15; Mk. 6.7-13)
1Jisu jarni rikphayarao jhigin khe longthim hi bonsi sgo sgain khrip ni basao ha, khusi dangphu mani hukhum ri ba. Ode limyarao sayarao khe ham rimane raothai ri ba. 2Odehe, Madaini rajini grao khe sainthi mane ar limyarao sayarao khe hamri mane bo bonsi khe haiha ba. 3Bo bonsi khe thi ba, Nisi thangba ha goda, juli, hon ar rang bo da langpha. Ode sola bo grang gin da langpha. 4Ode nisi thangba ha, sere nisi khe lamjao hi noh mathao ridu, oraha dong lah. 5Nisi khe sere noh ma thao riya, bo nolei ni phrang baigoba ha, bonsini gajaithai khe mithi rimane khlai hi nisi ni yapha ni haduri khe thisa khla lah. 6Odehe, bonsi thanghi khrip nolei ha daopha langhi, hamba graojma khe sainthi ba. Ode khrip hathan ha subung buthu khe ham ripha lang ba.
Herod ni khah waimu
(Mt. 14.1-12; Mk. 6.14-29)
7Raja Herod, bo grao khe khnahi hamsi ning waimu nang ba. Bede thikhade subung buthu gejesi Johan githi ni phrang baija phin kha thihi thi ba. 8Subung buthu gejesi, Elija nujao phai ba thihi thi ba. Ode gibin subungrao gdani gorasali saosi baija phinba se thihi thi ba. 9Odebani, Herod thi ba, Ang Johan ni bokhro khe dainso rikha, thikhabo boni grao khnayaba la sere kho? thihi bo khe numa nangjao ba.
Rjing bowa khe ji ri ba
(Mt. 14.13-21; Mk. 6.30-44; Jn. 6.1-14)
10Jisu ni rikphayarao phaiphin hi, bonsi khusi dangyaba khe boni ha sainthi ba. Ode bo bonsi khe gibin lang hi Bethsaida nolei ha thang ba. 11Thikhabo, subung buthu mithi hi, bonsi jang baosi rikpha ba. Ode bo bonsi khe lamjao ba, ode bonsi niha Madaini raji ni grao khe sainthi ba. Ode hamma nangjaoyarao khe ham riba.
12Sainbli japhaiba ha, boni rikphayarao boni ha phaihi thi ba, Ebo de hajengling se, odebani nolei ar haphlai buthu ha jima lingma ar thu mane subung buthu khe haithar hah.
13Bo bonsi khe thi ba, Nisi ji mane ri lah.
Bonsi thiphin ba, Jini ha hon pher bowa ar nah magin khe garhi de musibo giri. Ebo subung buthune jing thanghi baraihi ma? 14(Oraha ni subung rjing bowa lai ja du)
Jisu boni rikphayarao khe sani ba, Subung buthu khe jomsi ha dan dan khlaihi kham ri lah.
15Odelei ning bonsi khrip khe bo kham ri kha. 16Jisu hon pher bowa ar nah magin khe lahahi, nokhasao gede naikhu dada, Madai niha hamthai ri ba. Ode sbaihi subung buthu ne boni rikphayarao niha ri ba. 17Bonsi jihi hoh gablai thar bani yaohon ha, haglaiyaba khamphlu jhigin rikphayarao khonthim ba.
Peter Jisu khe bai ba
(Mt. 16.13-19; Mk. 8.27-29)
18Sainsi khali bo sao jang Madai bihi dongba ha, boni rikphayarao boni ha phai ba. Ode bo bonsi khe sing ba, Subung buthu ang khe sere thihi thi du?
19Bonsi thiphin ba, Subung buthu ning Baptisma riyaba Johan thi du. Gejesi Elija thi du, gejesi gdani gorasali raoni bisingha saosi baijaphin ba thihi thilai du.
20Bo bonsi khe singphin ba, Odethikhala, nisi ang khe sere thihi thi du?
Peter thiphin ba, Ning ning Madaini Basa se.
Jisu jar thihginyaba khe thida ba
(Mt. 16.20-28; Mk. 8.30—9.1)
21Odehe, bo grao khe saosi niha bo sainthiya mane bonsi khe magna ba.
22Odehe, Jisu jarni rikphayarao khe thi ba, Marsini Basa khe hamsi ning dukhu rima, ode hojarao, jonthairao, ode Dara khe slingriyarao bo khe nangjaoya ja ma. Bo khe sthai ma, ode saintham ha baijaphin ma se.
23Odehe, bonsi khrip niha thi ba, Asaba bo ang jang rikphama nangjao kha de, jar khe blao hi, nalai bo jarni kross khe bain hi, ang jang rikpha thing. 24Sere jarni hayu khe sogoma nangjao re, bo de gma ma se. Thikhabo, sere ani khlai hi jarni hayu khe gma ri re, bo sogo ma se. 25Subung habsao khe gibim jang mai la kha bo, hayu khe khma re thikha la, boni khlai hi sumjadi lab jama kho? 26Asaba bo ang khe ode ani grao ni khlai hi laji re thikhade, Marsini Basa bo boni muima jang, ar boni Bupha ni muima jang, ar boni degla gatharrao ni muima jang phai khali ha, bobo laji pha ma se. 27Odebani, ang nisi khe gibi jang thi du, eraha songyarao ni bising ha gejesi Madai ni raji khe nuya si de thihyaba khe jennaiyayaba dong.
Mukhang gibin jaba
(Mt. 17.1-8; Mk. 9.2-8)
28Ebo grao khe bo thiba ni phrang sainjai ni yaohon ha Peter, Jakob ar Johan thu khe langpha hi hading ha bi mane thang ba. 29Boha bo bihi dongba ha, boni mukhang bo gibin jalang la ba. Ode boni rih phinyaba bo guphu jahi jdan ba. 30Boha subung gini phaihi bo jang grao sainlai ba, bo buthu de Moses jang Elija se. 31Bonsi muima jang nujao phai ba, ar Jerusalem ha Jisu dukhu jang thihmani grao khe sainlai ba. 32Peter ar boni lugurao thuhi mudri thang ba. Thikhabo, smaohi baija ba jang Jisu ni muima ar bo jang baosi songphayaba subung gini khe bonsi nu ba. 33Subung gini Jisu khe degaolang hi thangma jaba ha Peter bo khe thi ba, “Slingriyah, jini khlaihi eraha dongba hambi. Jing khepsa matham slam nang, ningthane masi, Moses ne masi ar Elija ne masi.” Bo sumjadi grao khe thiba bo mithiya.
34Bo olei thisaiba ha, jimi andar japhai hi, bonsi khe khlip phung bani, rikphayarao khin ba. 35Jimi ni phrang khurang masi baigo hi thi ba, Ebo ning ang khasaoyaba ani basa, boni grao khe khna lah!
36Khurang thaoba jang, Jisu khe se ning nu ba; bonsi phirik phirik thao kha. Thikhabo bonsi nuyaba grao khe saosi niha bo sainthiya.
Sgo sgain gajaoyaba khe ham ri ba
(Mt. 17.14-18; Mk. 9.14-27)
37Phin gibin basain ha, boni rikphayarao gatham jang hading ni phrang akhai buba ha, subung buthu bo jang goron lai ba. 38Odehe, subung githim laiyarao ni bising ha miyah subung saosi jirik khao ba, Slingriyah, ani basa saosi mang mang khe naiphai mane nini ha ang khainsu du. 39Bese gusu bo khe rem hi, bo jirikkhao bai du; ode, bo khe hah ha galai ri dada, boni bukhuh ni phrang khudi galai si bo khe dukhu rihi, hamsi ning bumai phnang hi, bo khe haiger re. 40Nini rikphayarao khe rikkhlai rimane khainsu kha bo, bonsi bo khe blaiya.
41Jisu thiphinba, Duhani jug ni lonma giriyaba haglai subung buthu, bislei sosi khah lao hi jonphu nang kho? Nini basa khe eraha labu lah.
42Bo phaiba ha bese gusu bo khe hah ha galai rihi, dukhu ri ba. Thikhabo bese gusu khe jo hi, bo ansa khe ham rihi, boni buphane ri ba. 43Subung buthu khrip bo Madaini raothai khe gmang lai ba.
Jisu jarni thihbani grao thiphin ba
(Mt. 17.22,23; Mk. 9.30-32)
44“Ebo grao buthu khe nisi ni khmao ha hap la thing: Marsini Basa de marsirao ni yao ha rem rijao ma se.” 45Thikhabo boni grao khe rikphayarao ni khmao hapya; bonsi mithiya mane grao hui hi dengbani, thikhabo bonsi bo khe singraoya.
Sere dedaothao
(Mt. 18.1-5; Mk. 9.33-37)
46Jini bisingha sere dedaothao ja ma? thihi rikphayarao ni bising ha niyalai ba. 47Bonsini khah ha baoyaba khe Jisu tharmai hi, ansa saosi khe labu hi bonsini gabasi ha song ri ba, 48ode bonsi khe thi ba, Sere ani bumuni khlai hi ebo ansa khe lamjao re, bo ang khe se lamjao ba. Ode sere ang khe lamjao re, ang khe haihayaba khe se lamjao ba. Sere nisini bising ha khasi daothao, bo ning dedao thao jama se.
Nanglaiyaba gede gabayaba se
(Mk. 9.38-40)
49Johan thi ba, Slingriyah, subung saosi, nini bumu jang sgo sgain buthu khe rikkhlai ba khe jing nu ba; jini dol ni subung bo niyabani jing bo khe magna ba.
50Jisu bonsi khe thi ba, Nisi da magna lah, sere nisi jang nanglaiya, bo de nisini gede gaba ba se.
Samari nolei ha Jisu khe lamjaoya
51Jisu sorgo gede sugu langjao mani basain sampha kha bani bo Jerusalem ha thangmane sagang ba. 52Boni sagang ha graodiyahrao khe bo haida ba. Bonsi thang dada bonthane nothao khrip salai rimane Samari ni nolei masi ha thang ba. 53Thikhabo, Jisu Jerusalem gede thangmane sagang bani bo noleini subungrao, bo khe jo ba. 54Odehe, ebo khe nuhi rikphayarao gini, Jakob ar Johan thiba, Gabra bonsi khe saokhrip mane nokhasao ni phrang wai hok khlai mane ning jing khe jajao du?
55Thikhabo, bo bonsi khe naiphin dada, hamsi ning jo ba. 56Odehe, gibin nolei gede thangphin la kha.
Jisu khe rikphama baoyarao
(Mt. 8.19-22)
57Bonsi lama hemba ha, subung miyah saosi boni ha thi ba, Ning braha thang du, ang ning jang rikpha ma.
58Jisu bo khe thi ba, Mosrong buthu ni longkhor dong, birbaiyaba dao buthu nebo bithip dong, thikhabo, Marsini Basa ne de khro dengmani hathan giri.
59Gibin subung saosi niha bo thi ba, Ang jang rikpha lah.
Thikhabo bo thi ba, Gedema, ani bupha khe phip mane ang khe haida ha.
60Jisu bo khe thiphin ba, Githirao de bonsi ni githi khe phip la thing; ning thang dada Madai ni raji ni grao khe sainthi tha.
61Gibin subung saosi thi ba, Gabra, ang ning jang rikpha nang. Ang ani nokhorsi jang sainlai mane ang khe haiger da.
62Odebani Jisu bo khe thi ba, Saosi bo langgol ha yao denghi, yaohon naiphin kha de, Madaini rajini subung ja phuya.
Currently Selected:
LUKE 9: DIMASBSI
Highlight
Share
Copy
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
