MATTHEW 16
16
Sorgo ni sin khe phnuma
(Mk. 8.11-13; Lk. 12.54-56)
1Sereba Pharisairao jang Saddukairao phai hi Jisu khe nainai mane khlai hi sorgo ni sin phnu ri mane bonsi sain ba. 2Thikhabo, Jisu bonsi niha thiphin ba, Sainbli japhai kha ning nokhasao gajao jayaba khe nuhi nisi sain ham nang thi hi thi re. 3Ode, phorong ha, nokhasao dongthai khe nai hi, dini de bar hadi phai ma se, bede thikhade nokhasao gisim jahi hadi mao du thi hi nisi thiphu re. Thikhabo, bubli ni sin buthu khe snadi jabani nisi thiphuya ba? 4Ebo jug ni hamyayarao ar Madai khe garhi gaori jayarao sin khe smai du; thikhabo, Jona ni sin khe garhi de bonsi ne musi sin khebo ri nang niya.
Odehe, bonsi khe garlang hi thang la kha.
Pharisai jang Saddukairao ni humao
(Mk. 8.14-21)
5Yaohon rikphayarao dih kharnai ojang nar gede sohiba jang, bonsi hon langphama blao ba. 6Jisu bonsi niha thiba, Pharisairao ode Saddukairao ni humao ni phrang naiso hi girik lah.
7Bonsi jar jang jar ni bising ha, Jing de hon ning labuya thi hi bao ba.
8Jisu bonsi ni baoba khe tharmai hi, Lonma bangyayarao, nisi hon labuya bani khlai hi snadi jabani jar jang jar khe nisi bisar khlai ba? 9Duha sosibo nisi ni khah ha tharmaiya na? Subung rjing bowa ji mane hon pher bowa jihi khamphlu gablai si bojom khlaiba khe nisi blao kha na? 10Subung rjing bri ni khlai hi hon pher sni khe ang ri hi, khamphlu bowa gablai si bojom khlaiyaba khe bo nisi blao kha? 11Hon ni grao khe nisi niha ang sainthiya thi hi nisi bede tharmaiya? Thikhabo, Pharisairao ar Saddukairao ni humao ni phrang girik lah, thi hi bonsi khe thiba.
12Boha ning, hon ni humao ni phrang girik mani khlai hi bo thiya; Pharisairao jang Saddukairao ni slingrithai ni phrang se girik mani khlai hi bo thiba thi hi bonsi tharmai kha.
Peter Jisu khe Krista thi hi baiba
(Mk. 8.27-30; Lk. 9.18-21)
13Jisu Philip Kaisari haphai ha sophaiba ha, boni yaohon rikphayarao niha sing ba, Subung buthu Marsi ni Basa khe sere thihi thi du?
14Sereba ning khe Baptisma riyaba Johan thi du, sereba Elija, sereba Jeremia janai du, sereba gorasali saosi janai du, thihi bonsi thiphin ba.
15Jisu bonsi niha, Niyakhala nisi ang khe sere bao du? thihi sing ba.
16Simon Peter thiphin ba, Ning de Krista, Madai gathang ni basa se.
17Jisu boniha thiba, Simon Bar Jona, nini khophal hambi. Saomang jang thijao ning khe tharmai riyaba niya, ani Bupha, sorgo ha dongyaba se ning khe tharmai riba. 18Odebani, Peter ang ning khe thidu, ebo longthai basao ha jar ni longjomkhoh khe ang dang ma; ode githirao ni khorong daoglap buthubo bokhe de nang niya. 19Ang ninthane sorgo raji ni chabi ri nang; ode phirthi ha asaba khebo ning khah khade, sorgo habo bokhe ning khah ma se; ode, phirthi ha asaba khebo ning khuru khade, sorgo habo bokhe ning khuru ma se.
20Boni yaohon ha bo ning Krista se thi hi saosi nihabo thiya mane khlai hi rikphayarao khe bo magna ba.
Jar thih mani balam ha thidayaba
(Mk. 8.31—9.1; Lk. 9.22-27)
21Bo bubli ni phrang Jisu jar ni yaohon rikphayarao niha thiba, Ang Jerusalem ha thang ma, ode khraorao, Jonthaimarao, Dara khe sling riyarao ni phrang gabang dukhu mai ma; ode, bonsi angkhe sthai ma, thikhabo, nokha saintham ha ang baijaphin ma.
22Peter Jisu khe gibin hathan ha lang hi, Gabra, Madai ningkhe khasao thing; olei nini basao ha ja nang niya, thi hi bo jo ba.
23Boha Jisu naiphin hi Peter khe jo ba, Soithan, ani yaohon ha thang lah; ani khlai hi ning gaso-susoyaba se. Bede thikhade, Madai ni grao buthu khe ning baoya, subung buthu ni grao buthu khe se ning bao ba, thihi thiba.
24Jisu jar ni yaohon rikphayarao khe thiba, Sere ani yaohon rikphama nangjao du, bo jarkhe nangjaoya hi jar ni kross khe bain hi, ani yaohon rikpha la thing. 25Sere jar ni hayu khe sogoma nangjao du, boni hayu jam ma se, sere ani khlai hi hayu ri du, bo hayu maima se. 26Subung habsao ni khrip ni bubra jahi jar ni hayu jam kha la, boni khlai hi snadi lab jama? Niya khala, subung jar ni hang ni baslai ha snadi khe ri ma? 27Marsi ni Basa de jar ni deglarao jang baosi jahi jar ni Bupha ni muima ha phai ma, ode boha se khrip jadi jar khusi dangba lai ning yaosandi saosi saosi ne khlai hi bo ri ma se. 28Gibi jang ang nisi khe thi du, eraha songyarao ni bising ha sereba sereba de Marsi ni Basa jar ni raji ha phaiba khe nuya side bonsi thihba khe jen naiyayaba dong, ode bo thi ba.
Currently Selected:
MATTHEW 16: DIMASBSI
Highlight
Share
Copy
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
