MATTHEW 25
25
Mala jhi ni daogari
1Boha sorgo raji de, mala gathar jhi, jar ni thaophari lang hi, daman khe lamjao mane baigoyarao jang daogari lahi thiyaba se. 2Bonsi ni bising ha bowa girikyaba ode bowa de gibir se. 3Gibir buthu bonsi ni thaophari buthu ha thaophari ni thao lang phaya, 4Thikhabo girikyarao bonsi ni thaophari thao ni bokhoh ha lusing hi thaophari buthu habo bonsi langpha du. 5Daman phaiba len bani, bonsi khrip bo mudim hi bonsi thuthar kha.
6Hokjer japhaiba ha, Daman phai kha dou, bokhe lamjao mani khlai hi baigo phai lah thihi jirikkhaoba khe khurang khna kha. 7Boha ning, mala gatharrao baija thar hi, bonsi ni thaophari buthu khe slamlai ba. 8Odehe, gibirrao girikyarao niha, Nisini thaophari thao anthane ri, jini thaophari thima ja kha, thihi bonsi thiba. 9Thikhabo, bo girikyarao de, Jing jang nisi ni khlai hi de ja nang niya. Phainyarao niha thanghi barai lai tha, thihi bonsi thiphin ba. 10Odehe, bo barai mani thangba hatho ha ning daman sophai kha; ode, sere salai hi dongba bo jang baosi disingyaba ni noh ha jima ni hapsing kha; ode, derga phrao kha.
11Boni yaohon ha, mala gathar gibin buthubo, bonsi sophai hi, O Gedeba, O Gedeba, jinthane derga khuru ri, thihi bonsi thiba. 12Gibi jang ang nisi khe thi du, ang nisi khe tharmaiya, thihi bo thiphin ba.
13Odebani, smao hi dong lah, bo basain jang bubli khede nisi tharmai laya.
Talent ni daogari
(Lk. 19.11-27)
14Bo bubli ha, sorgo ni raji de elei ja ma. Subung saosi raji gibin ha thangma jaba ha, jar ni lengrao khe long hi, jar ni rang buthu khe bonsi ni yao ha dengba lai jasosi se. 15Saosi leng ne talent mabowa ri ba, gibin leng ne talent magin, ode gibin leng ne talent masi rihi, bonsi dangphu gothai khrip nebo rilang hi bo thangla kha. 16Talent mabowa rijaoyaba de bo buthu khe srap bephar khlai hi, talent gibin mabowa bangdao hi bo khaikho kha. 17Olei jasosi ning talent magin rijaoyababo talent gibin magin bangdao hi khaikho kha. 18Thikhabo, talent masi rijaoyaba de bo thanghi hakhor khu hi boni bubra ni rang khe bo hui ba.
19Basain glao ni yaohon ha bo leng ni bubra phai hi, bonsi niha boni rang ni balam ha sain rik hi la ba. 20Talent mabowa rijaoyaba leng de phai hi, talent gibin mabowa labu hi thiba, Gedeba, ning talent mabowa a ne yaopha dengba khe nai lah, talent gibin mabowa bangdao hi ang khaikho kha. 21Boni bubra boni ha thiba, Hamba leng, lonjaoma gnang, ning hamba khusi dang kha dou! Gijisa ni basao ha nini lonma dong, gabang ni basao habo ning khe ang dong ri ma se, jar ni bubra khajayaba ha ningbo khaja pha phudu. 22Talent magin rijaoyaba leng bo phai hi, Gedeba, ning ani yao ha talent magin dengyaba khe, nai lah, talent magin bangdao hi ang khaikho kha, ode bo thi ba. 23Boni bubra boni ha thiba, Hamba leng ode lonjaoma gnang, ning hamba khusi dang kha dou! Gijisa ni basao ha nini lonma dong, gabang ni basao habo ning khe ang dong ri ma se, nini bubra khajayaba ha ningbo khaja pha laphu du. 24Talent masi rijaoyaba bo phai hi thiba, Gedeba, ning khe ang tharmai du, ning khah raoyaba subung se. Ning gaiyayaba habo ning ra du, ning saiyayaba habo ning bojom khlai du; 25Odebani, ang khin hi, thang dada, nini talent masi khe hah ha ang hui ba; nai lah, nini khe ning ning maiphin kha. 26Boni bubra boni ha thiba, Leng hamyayaba ode sele, ang gaiyayaba habo ang ra du, ang saiyayaba habo ang bojom khlai du thiyaba ning khna kha? 27Olei ning thikha la, ani rang khe bephar khlaiyarao niha ning rikha la, ode ang phaiphinba ha jar ni don bara ba khe ang maiphin kha mu. 28Odebani, boni talent masi khe lala hi, talent majhi dongyaba niha ri lah. 29Sere niha dong, bonthane ar bangdao hi rising ma se, ode boniha bang ma se; thikhabo, sere niha giri boni ha dongyaba khebo langso lama se. 30Odehe, leng hamyayaba khe hakhli andaryaba ha danghun khlah, oraha se bo gra hi hathai wai ma se.
Yaohonthao ni bisar
31Marsi ni Basa de jar ni deglarao jang baosi jar ni muima ha phai khali ha, jar ni muima khamthan ha bo kham nang; 32Odehe, boni sagang ha khrip jadi bonsi bojom ja ma. Melma naisoyaba burun ni bising ha melma buthu khe gibin degao riba lai bonsi khe bo degao ri ma; 33Melma buthu khe jar ni yaoda gede deng ma, thikhabo burun buthu khede jar ni yaosi gede dengma thi du. 34Boha se Raja jar ni subung buthu yaoda gede dengyarao khe thima, Phai lah, ani bupha khe khaja riyarao, habsao sangsai jenba ni phrang nisi ne khlai hi hathan salaiyaba khe bubra ja lah. 35Ang hukhri jaoba ha nisi a ne jima ri ba, ang dih gangjaoba ha nisi a ne dih lingma ri ba, ang naorai jahi dongba ha nisi ang khe nohma thao riba. 36Ang langtha dongba ha nisi a ne rih phin riba, ang limba ha nisi ang khe naiphai ba, ang phatho ni noh ha dongba ha nisi ang khe goron mane phai ba, ode bo thi ma se. 37Boha, subung hamba buthu thi ma, Gabra, jing bakhali hukhri jaba nuhi ninthane jima ri ba? Dih gangjao ba nuhi dih lingma jing ri ba? 38Bakhali jing ning khe naorai nuhi, ode jar ni noh ha nohma thao ri ba? Ode, ning khe langtha nuhi jing rih phin ri ba? 39Bakhali ha limba ja thing phatho ni noh ha ja thing ning khe nuhi jing nini ha thang ba? thihi bonsi thiphin ma. 40Raja bonsi khe thiphin ma, Gibi jang ang nisi khe thi du, ebo ani basa khasi daothaoyarao ni bising ha subung saosi ni basao ha nisi dangba de, ani basao ha se nisi dang ba, thihi bo thiphin ma se.
41Boni yaohon ha, boni yaosi gede subung dongyaba buthu niha thi ma, Sot rijaoyarao, thaoglao ni wai ha Soithan jang boni deglarao ne bonsi salaiyaba ha angkhe haiger lang hi thang lah. 42Ang hukhri jaoba ha, nisi a ne jima riya, ang dih gangjaoba ha nisi a ne dih ling riya, 43Ang naorai jahi dongba ha nisi angkhe nohma thao riya, ang langtha dongba ha nisi a ne rih phin riya, ang limba ha ode phatho ni noh ha dongba ha nisi angkhe naiphaiya. 44Boha bonsi bo thiphin ma, Gabra, jing bakhali ning khe hukhriba ha, dih gangjaoba ha, naorai jahi dongba ha, phatho ni noh ha dongba ha jing ning khe nuhi ning khe seba khlaiya na? 45Odehe, bo bonsi niha thiphin ma, Gibi jang ang nisi khe thi du, ebo subung khasi daothaoyaba ni bising ha subung saosi ni basao ha nisi dangya khade, ani basao ha se nisi dangya ja ba. 46Odehe, ebo buthu de thaoglao ni norok ha bonsi thang ma se; thikhabo, subung hamba buthu de thaoglao ni hayu ha thang ma se.
Currently Selected:
MATTHEW 25: DIMASBSI
Highlight
Share
Copy
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
