MARKA 1

Baptisma riyaba Johan ni graojma

(Mt. 3.1-12; Lk. 3.1-18; Jn. 1.19-28)

1Madai ni basa, Jisu Krista ni graojma edehe jenjen ba. 2Gorasali Isai ni laisi ha reb ba lai:

Nai lah, nini sagang ha, ani haiyasa khe haiha du,

Bo nini lama khe slam hi deng nang

3Hajengling ha subung saosi jirikkhaoyaba khurang:

‘Gabra ni lama khe slam hi deng lah

Boni lama khe beleng rihi deng lah’, thi hi reb ba lai.

4Hajengling ha Johan Baptisma riyaba nujao phai dada phap ni phrang khah phin hi baptisma jamani grao khe sainthi ba. 5Odehe, Juda raji ni subung buthu jang Jerusalem ni subung buthu, boni ha thang hi, jar ni phap khe sainthi ba, ar Jordan dihbu ha baptisma laha ba.

6Johan de mihhajeng ni bikhim jang slamyaba rih khe gain hi, jengkhong ha migur ni jengsdu sop ba. Ar boni jimu de guyung jang hagra ni beredih se. 7Bo subung buthu niha, Ang tha raodaoyaba saosi ani yaohon ha phai du. Angde gonggalai hi boni yaphadap ni khayaba khe khru mane bo gathaya. 8Angde nisi khe dih jang baptisma khlai du. Thikhabo, bode nisi khe Bese Gathar jang baptisma khlai ma se, thi hi grao sainthi ba.

Jisu ni baptisma ode naigrik

(Mt. 3.13—4.11; Lk. 3.21,22; 4.1-13)

9Okhali ni basain ha Galili raji ni Nazareth nolei ni phrang Jisu phai ba, ar Jordan dihbu ha Baptisma riyaba Johan ni yao ha bo baptisma laha ba. 10Ode, bo dih ni phrang baigo phaiba jang nokhasao khru hi Bese daothu lai boni basao ha birkhlai buba khe nu ba. 11Odehe, nokhasao ni phrang khurang masi sophai hi thi ba, Ning ning ani maya ni basa. Nini basao ha ang khaja du.

12Bese jang boha ning Jisu khe hajengling ha haiha ba. 13Oraha basain bisagin bohor bisagin Soithan ni naigrik ha nainai mani khlai hi hajenglingha dong ba; ar hagra ni mih buthu jang dongpha hi, sorgo ni deglarao bokhe naiso phai ba.

Jisu nah remyaba bri khe long ba

(Mt. 4.12-22; Lk. 4.14,15; 5.1-11)

14Johan khe rem hi phatho ha dengba ni yaohon ha, Jisu thang hi Galili raji ha Madai ni hamba graojma khe sainthi ba. 15Bo edehe thi ba, Bubli sophai kha, Madai ni raji bo sampha kha. Nisi khah phin hi hamba graojma khe lon lah.

16Odehe, Jisu Galili dihkharnai dergong ha daopha langba ha, Simon ar boni buphlung Andri, dih kharnai ha jeh saiba khe bo nu ba. Bonsi de nah remyaba ning. 17Jisu bonsi khe thi ba, Ani yaohon rik lah, ang nisi khe subung remyaba slam nang. 18Ode, bonsi lamai lamai jeh khe gar dada, Jisu ni yaohon rikpha kha.

19Khaisa sagang gede thangba de, Zebedai ni basa gini-Jakob ar boni buphlung jeh khajuba khe nu ba. 20Odehe, bonsi gini khebo longphin ba. Bonsi jar ni bupha Zebedai ar dangyarao khe rung ha garbu hi Jisu ni yaohon rikpha kha.

Sgo sgain gajaoyaba subung

(Lk. 4.31-37)

21Jisu ar boni yaohon rikphayarao Kapernaum ha sohi dada lenggo basain ha bikhoh ha hap hi bonsi khe sling ri ba. 22Subung buthu boni grao khe khnayarao si khrip bo gmang ba. Bede thikhade bode dara khe slingriyarao slingriba lai niya hi khemotha jang sling ri ba.

23Bikhoh ha subung saosi, sgo sgain gajaoyaba phai hi jirikkhao ba, 24Nazareth Jisu, ang jang ning snadi galai lai ba? Ang khe sjam mane phai ba? Ning sere ang mithi du. Ning de Madai ni subung gathar se.

25Ode, Jisu bese gusu khe johi thi ba, Ning phirik phirik dong lah. Boni bising ni phrang baigo lang lah.

26Bese gusu, bo subung khe dukhu rihi, sao derphai dada, bol jang jirikkhao hi boni bising ni phrang baigo lang kha. 27Subung buthu khrip bo gmang lai ba. Saosi jang saosi singlai ba, Ebo la snadi grao kho? Ebo la gadain slingrithai se thi, boni khemotha jang bese gusu buthu bo boni hukhum khe mani du.

28Odehe, Galili raji dongba si ha Jisu ni grao khrip gublung thar kha.

Jisu gabang subung khe ham ri ba.

(Mt. 8.14-17; Lk. 4.38-41)

29Bonsi bikhoh ni phrang baigoba ha Jakob jang Johan thangpha hi, Simon jang Andria ni noh ha hap hi ba. 30Simon ni busuma lim hi thuba. Subung buthu limbani jathai khe Jisu niha sainthi ba. 31Odehe, Jisu boni gabasi ha thang dada boni yao khe remkhu hi songkhu ri ba. Boha ning boni limthai haiger lang la kha, ode bo bonsine jima-lingma ri ba.

32Sainbli ni sainjroba yaohon ha subung buthu gilim-gasa ar sao ha sgainjik gajaoyarao khe Jisu niha labu ba. 33Ode, bo nolei bising ni subung khripbo noh ni derga kholei ha bojom japhai ba. 34Jisu gilim-gasa jayarao khe ode gibin gibin limthai sathai buthu khe ham ri hi, gabang sgainjik buthu khe rikkhlai ri ba. Ode, sgo sgain khe grao jo riya kha, bede thikhade sgo sgain Jisu khe mithi du.

Galili ha Jisu grao sainthi ba

(Lk. 4.42-44)

35Gibin basain ni phorongma ha, nokha naiyasani sagang ha, Jisu baija lang hi siri siri hathan ha thang hi bo Madai bi ba. 36Simon ode boni lugurao bokhe smai ba 37Bokhe nuba jang, bonsi edehe thi ba, Khrip bo ning khe smai du.

38Jisu bonsi khe thiphin ba, Nolei sampha buthu ha thanghi grao sainthima nang ma, odebani se ang phai ba.

39Odehe, Galili raji buthu ha thang hi ar bonsi ni bikhoh buthu habo grao sainthi pha lang ba, ode sgo sgain khe bo rikhlai ba.

Jisu khunthi jayaba subung khe ham ri ba

(Mt. 8.1-4; Lk. 5.12-16)

40Khunthi jayaba subung saosi Jisu niha phai ba ode yasgu thu hi boni ha khainsu ba, Ning nangjao khade, ragao ri phu du, bo ode thi ba.

41Jisu bokhe hamsi ning khasao kha. Yao phlao hi bokhe dopha hi thi ba, Ang nangjao du, ragao lang lah. 42Boha ning khunthi ham lang la kha ar bo ragaophin kha. 43Jisu bokhe thiphin ba, Nai lah, saosi nihabo da sainthi. Thikhabo, Jonthai niha thang hi phnu lah. 44Boni yaohon ha Jisu boni ha thi ba, Khna lah, saosi khebo da thibai. Thikhabo, srap Jonthai niha thang hi bo jang naijao lah; khrip ni sagang ha ning hamphin kha thi hi phnu mane Moses graothai riba lai Madai hu lah.

45Thikhabo, bo jar hamba ni grao khe khrip hathan ha thang hi, sainthi phlung thar kha. Bo olei grao gabang jo bani, Jisu subung buthu jang nujaoya hi nogor ha hap phuya kha. Odebani bo hajengling ha dong ba, ar khrip hathan ni phrang subung buthu boni ha phai ba.

Currently Selected:

MARKA 1: DIMASBSI

Highlight

Copy