MARKA 10
10
Gaoleiba ni balam ha Jisu ni slingrithai
(Mt. 19.1-12; Lk. 16.18)
1Odehe, bo oraha ni phrang baigo lang hi, Jordan dihbu bailang hi Juda raji ha thang ba. Boha subung buthu boniha githim phaiphin ba, ode nalai lai ning bonsi khe slingriphin ba.
2Pharisaorao gejesi boniha phai dada bokhe nainai mane sing ba, Subung jarni bihih jang gaolei mane jini dara ha dong?
3Jisu bonsi khe thiphinhi sing ba, Moses nisi ne bede dara ri ba?
4Bonsi thiphin ba, Subung jarni bihih ne gaolei mani laisi reb hi bokhe haiha phudu thihi Moses dara galang ba.
5Jisu bonsi khe thiphin ba, Nisi ni khah rao bani khlaihi se Moses elei reb ba. 6Jenba ha elei niya. Habsao sangsai jenba ni phrang Madai jar ning bonsi gini khe miya masainjik slam ba thihi laisi gathar ha reb du. 7Odebani khlai hi, subung de jarni buma bupha khe garlang hi bihih jang gathaisi dong ba, 8Odehe, bonsi gini niyahi saomang masi ja kha. 9Odebani Madai sere khe saomang masi slamyaba khe subung da gaolei ri thing.
10Odehe, bonsi noh ha hap bani yaohonha yaohon rikphayarao Jisu niha ebo graoni balam khe sing ba. 11Bo bonsi khe thi ba, Asaba bo jarni bihih khe garhi gibin masainjik jang noh japhin khade, bo subung jarni bihih ne khlai hi gaori ja ba se. 12Masainjik bo jarni basai khe garhi gibin miyah jang noh japhin khade, bo masainjik jarni basai ni khlai hi gaori jaba se.
Jisu ansarao khe hamthai ri ba
(Mt. 19.13-15; Lk. 18.15-17)
13Odehe, subung buthu gejesi ansarao khe Jisu niha yao dopha mane labu ba, odebani boni yaohon rikphayarao bonsi khe jo ba. 14Thikhabo, Jisu ebo khe nuhi hamsi ning jajaoya ba. Odebani bonsi khe thi ba, ansarao khe ani ha haiha lah, bonsi khe da mathao. Bede thikhade Madaini raji de elaiyaba subung buthu ni se. 15Sere ansarao lai Madaini raji khe hamjaoba lai hamjaoya khade Madaini raji ha hap mai nang niya. 16Odehe, ansarao khe bam hi, bonsini basaoha yao deng hi hamthai ri ba.
Subung gnang saosi
(Mt. 19.16-30; Lk. 18.18-30)
17Jisu bo lama gede thang mane baigoba ha subung saosi boni gede khaibu hi boniha yasgu thuhi sing ba, Hamba slingriyaba, bede khlai hi ang thaoglao ni hayu mai phu ma?
18Jisu bokhe thi ba, Snadi jabani angkhe hamba thi ba? Madai khe garhi de saosi bo hamba giri. 19Dara disa khe ning mithi du thi; Malai khe da sthai, gaora gaori da ja, malai khe da thokhi bai, buma-bupha khe man khlai lah.
20Bo subung thiphin ba, Slingriyah, ansa ni phrang ebo Dara disa khe ang mani hi phai ba.
21Jisu bokhe nai dada khasao sisi nu hi bokhe thi ba, Nini masi thao du kho. Ning thanghi nini dongbasi khe phain tharhi, dukhi sarao ne ri lah, odese ning sorgoha don bangdaohi mai nang, ode ani yaohon rikpha lah. 22Bo grao khe khnahi bo subung waimu nang hi thang la kha, bede thikhade bo subung gnang se.
23Jisu boni yaohon rikphayarao khe naiding dada thi ba, Gnang subung ni khlai hide Madai ni raji ha hap ba du bi.
24Bo ode thiba khe khna hi boni yaohon rikphayarao gmang ba. Thikhabo, Jisu bonsi khe thiphin ba, Ani ansarao, Madaini rajiha hap ba bislei du du, 25Gnang subung Madaini rajiha hap ba thane mihhajeng simi ni buphu ha hap ba laidao.
26Ebo khe khna hi, boni yaohon rikphayarao hamsi ning gmang hi bokhe sing ba, Olei thikhala, sere sogojao ma kho?
27Jisu bonsi khe naiding dada thi ba, Subung ni khlai hide du bi, Madai ni khlai hide lai bi. Bede thikhade, Madai ni khlai hide khrip khusi khe blai du.
28Peter boniha thi ba, Nai lah, khripbo dangkhlai thar dada jing ningkhe rikpha kha.
29Jisu bokhe thiphin ba, Gibi jang ang nisi khe thi du; sere ani khlai hi, ode hamba graojma ni khlaihi jarni noh ar bada buphlung, bubi bahandao, buma-bupha, basa-bisik khebo dangkhlai re, 30Ode, jarni hadi hadam khe garhi ebo habsao ha thanghi dongba ning bo bangdaohi mai nang. Ar bada-buphlung, bubi bahandao, buma-bupha, jarni bihih, basa bisik ar hadi hadam phantha rjasi barahi mai nang. Ode, dukhu hadi rijaoba khe bo goron nang, ar phaiginyaba bubliha thaoglao ni hayu mai nang. 31Thikhabo, subung sagangthao dongyarao yaohonthao dong ma, yaohonthao dongyarao sagangthao dong ma se, ode bo thi ba.
Phintham Jisu jarni thihbani grao thi blai ba
(Mt. 20.17-19; Lk. 18.31,34)
32Jisu ode boni yaohon rikphayarao Jerusalem gede lamaha thang la ma. Jisu yaohon rikphayarao ni sagang thang bani bonsi gmang ba. Boni khlaihi bonsi khin ba, ar subung yaohon rikphahi phaiyaba bo khin ba. Jisu jarni yaohon rikphayarao jhigin khe gibin gede langpha hi, bo jarni basaoha sophai ginyaba khe sainthi da ba. 33Bonsi khe thi ba, Nai lah, jing Jerusalem gede thang du. Oraha Marsini Basa khe Jonthairao niha ode Dara khe slingriyarao niha yaopha ma, sthai mane bonsi bokhe bisar khlai dada Jentailrao niha yaopha ma. 34Bonsi bokhe mlaothai ma, khudi thuphra ma, su ma ar sthai ma. Thikhabo nokha sainthamha bo baijaphin ma.
Johan ar Jakob ni bima
(Mt. 20.20-28)
35Odehe, Jakob ar Johan, Zebedai ni basa thu gini Jisu niha phaihi boniha thi ba, Slingriyah, jinthane khusi masi ning dang mane jing nangjao du.
36Jisu bonsi gini khe sing ba, Snadi khusi dang rima nangjao ba?
37Bonsi thiphin ba, Nini muima ni rajiha ning Rajani khamthan ha kham khali de saosi khe nini yaoda gede ode, saosi khe nini yaosi gede kham ri mane jing nangjao du.
38“Nisi sainyaba khede nisi mithiyaba se. Dukhu ni bela, ang lingginyaba ha nisi lingphu nang? Ang maiginyaba baptisma khe nisi mai phu nang”?
Bonsi thiphin ba, Jing mai phu nang.
39Jisu bonsi khe thi ba, “Gibi ning ang lingyaba bela ha nisi lingphu nang; ang maiginyaba baptisma khe nisi mai nang; 40Thikhabo, ani yaoda ar yaosi gede kham rimane ang saikho phuya. Madai sere ne salai hi deng ba, bonsi ne bo ri nang”.
41Gibin rikphayarao jhi khnahi Jakob ode Johan ni basao ha thamsi baigo ba. 42Thikhabo, Jisu bonsi khe longhi thi ba, Jentailrao ni bising ha, bonsi khe naisoyarao Rajarao lai bonsi ni raothai jang bonsi yaowai du thihi nisi mithi du. 43Nisini bising hade olei ja nang niya. Sere asababo nisi ni bisingha dedaothao jama nangjao re thikhade, bo nisi khrip ni dangyasa jahi dongma nang ma se. 44Sere nisini bising ha sagangthao jama nangjao khade, khrip subung ni leng jahi dongma nang ma se. 45Bede thikhade, Marsini basa bo dangjaoma ne phaiya; bode dang mane se phai ba, ode gabang subung khe sogo hi jarni hayu khe ri mane se phai ba.
Gana Bartimai khe ham ri ba
(Mt. 20.19-34; Lk. 18.35-43)
46Odehe, Jeriko ha sophai hi boni yaohon rikphayarao jang subung gabang buthu Jeriko raji ni phrang baigo bu ba. Ar subung gana saosi yao khrang jiyaba, Timai ni basa Bartimai bo lama bijingha khamhi dong ba. 47Bo Nazareth Jisu thihi tharmai ba jang, jirikkhao hi thi ba, Jisu David ni Basa, ning angkhe khasao lah!
48Gabang subung bokhe johi phirik phirik dong mane sani ba. Thikhabo, bak jadaohi jirik khao ba, David ni Basa, ning angkhe khasao. ode thi ba.
49Jisu songthao hi thi ba, Bokhe eraha long hah.
Odebani, bonsi gana subung khe long ba, Khajahi ning bai ja, bo ningkhe long du.
50Bo jarni rih khe garbuhi, baijlom dada Jisu niha phai ba.
51Jisu bokhe sing ba, Ninthane snadi ang dang ma nangjao ba?
Rabbi, ang muthai numa nangjao du, thihi bo thiphin ba.
52Odehe, Jisu bokhe thi ba, Ning thang lah, nini lonma jang ningkhe ham ri kha.
Boha ning bo nuphu kha, ode Jisu jang rikpha kha.
Currently Selected:
MARKA 10: DIMASBSI
Highlight
Share
Copy
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
